1 “ ‘ “ቢታ ህንተ ላታናዉ ሳማን ሻክያ ዎደ፥ ሄ ቢታፐ እት ሳማ መꬍና ጎዳዉ ዱማዪደ ዎꬅተ። ሄዌካ ታማነ ላኡ ክሎ ሜትረነ ባጋ አዱቂያነ ታሙ ክሎ ሜትረ አክያ ሳኣ ግዶ። ሄ ሳአይ ኡባይካ ጌሻ ሳኣ ግዶ። 2 ሄ ሳኣፐ ኦይዱ ማዛን ቃራ ግዴዳ አዱሳተꬃይ 500 ዋꬋ፥ ጎምፓይካ 500 ዋꬋ ግዴዳ ሳአይ ጌሻ ጎልያሳ ግዶ፤ አ ዩሹዋን 50 ዋꬋ ግዴዳ መላ ሳአይ ደኦ። 3 ሄ ጾሳዉ ዱማዬዳ ሳኣፐ አዱሳተꬃይ ታማነ ላኡ ክሎ ሜትረነ ባጋ፥ ጎምፓይ ቃይ እቼሹ ክሎ ሜትረ ግዴዳ ሳኣ ልካደ ሻካ። ሄዋን ጌሻ ጎሊ፥ እካ፥ ኡባፐ አꬌዳ ጌሻይ ደእያ ጌሻ ጎልያዉ ሳኣ ግዲደ ደኦ። 4 ሄዌ ጌሻ ጎልያ ግዶን መꬍና ጎዳዉ ኦꬃናዉ፥ አኮ ሺቅያ ቄሳቶ ዱማቴዳ ጌሻ ሳኣ ግዶ፤ ቃይ ኡንቱንቱ ባረንቱ ጎልያ ኬጽያ ሳነ ጌሻ ጎልያዉካ ጌሻ ሳኣ ግዶ። 5 ቃይ አትያ ታማነ ላኡ ክሎ ሜትረ ባጋ አዱቂያነ እቼሹ ክሎ ሜትረ ባጋ አክያ ሳአይ ጌሻ ጎልያን ኦꬅያ ሌዋቱዋሳ ላታ ግዶ፤ ኡንቱንቱ ባረንቶ ደእያ ካታማቱዋ ሄዋን ኬጽኖ።

6 “ ‘ “ሄ መꬍና ጎዳዉ ዱማዬዳ ሳኣ ምይያን ታማነ ላኡ ክሎ ሜትረነ ባጋ አዱቂያነ ላኡ ክሎ ሜትረነ ባጋ አክያ ሳአይ ካታማ ኬጻናዉ ደኡዋ፤ ሄ ሳአይ እስራኤልያ አሳዉ ኡባዉ ግዶ።

7 “ ‘ “እስራኤልያ ካፖ እመቴዳ ሳማይ ላኡ ባጋናካ ጾሳዉ ዱማዬዳ ሳኣንነ ካታማ ሳኣን ዛዋቴ። እ አዋይ ዉልያ ባጋና ሜድተራነ አባ ጋኬ፤ አዋይ ዶልያ ባጋና እስራኤልያ ቢታ ዛዋ ጋኬ። አዉ እስራኤልያ ዛርያፐ እቱዋ ሳማዳን፥ አዋይ ዉልያ ባጋ ዛዋፐ ቢደ፥ አዋይ ዶልያ ባጋ ዛዋ ጋኬ። 8 ሄ ሳማይ እስራኤልያ ቢታ ካፖ ላታ ጋድያ ግዶ። ሀዋፐ ስንꬃን ታ ካፓቱ ታ አሳ ኡቁኖፕኖ፤ ኡንቱንቱ እስራኤልያ አሳይ ኡባይ ባረ ዛርያን ዛርያን ጋድያ አካናዳን ኦꬅኖ” ያጌ።

9 “ ‘ኡባ ሞድያ መꬍና ጎዳይ ሀዋዳን ያጌ፤ “ህንተኖ፥ እስራኤልያ ካፓቶ፥ ህንተዉ ሀእ ግዳና! ህንተ ሻቢረꬃነ አሳ ኡቁንያዋ አግተ፤ ሱረ ፕርዳነ ጽሎተꬃ ኦꬅተ። ታ አሳ ኡንቱንቱ ላታ ቢታፐ ꬎቆሊደ የደርስያዋ አግተ። ታን ኡባ ሞድያ መꬍና ጎዳይ ሀዋ ኦዳይ።

10 “ ‘ “ህንተ ኡባዉካ ልከ ሚዛናይነ ቃራ ግዴዳ ማክያባይ ደኦ። ዎጋ 19:36 11 ልክያባቱ ኡባዉ ግዶ ግድያ ጎሞረ *ጎሞረ፦ እት ጎሞረ 220 ክሎ ግራመ ዎይ 220 ሊትሮ ግዴ። ያግያ ልክያ ሚሻ ግዶ። መላባ ማክያ ኤፋ ግያ ሚሻይ ጎሞረ ኦይቂያዎ ታሙዋፐ እት ኩሽያ ግዶ፤ ቃይ ጉክያዋ ማክያ ባትያ ግያ ሚሻይካ ጎሞርያዉ ታሙዋፐ እት ኩሽያ ግዶ። ሄዋ ግያዌ አፋይነ ባቲ ብጸ ላገ ግያዋ። 12 ጉꬃባ ልክያ ዎደ፥ ህንተ ልክያ ሚሻይ ሳቅለ †ሳቅለ፦ እት ሳቅሊ ታማነ እት ግራመነ ባጋ ዴጼ። ግዶ። ላታሙ ጌራይ እት ሳቅለ ግዶ፤ ቃይ ኡሱፑን ታሙ ሳቅሊ እት ምናነ ግዶ።

13 “ ‘ “ህንተ እሙዋ እሚደ፥ ሀዋዳን እምተ። ህንተ ቆጽ ሺሽያ ዛርጋፐ ኡሱፑን ታሙዋፐ እት ኩሽያ፥ ባንጋፐ ኡሱፑን ታሙዋፐ እት ኩሽያ፥ 14 ቃይ ዎጋራ ዛይትያፐ ጼቱዋፐ እት ኩሽያ እምተ። ሀዋንታ ልክያ ዎደ፥ ኔን ማክያ ሚሻይ ባተ ግዶ። ታሙ ባቲ እት ጎሞረ ዎይ እት ኮረ ግዴ። 15 እስራኤልያ አሳይ ሄምያ ላኡ ላኡ ጼቱ መህያ ዉዲ ደእያዋፐ እት ዉድያፐ እት እት ዶርሳ እምተ። ሄዋንቱ አሳ ናጋራ አቶ ጊሳናዉ፥ ካꬃ ያርሹዋ፥ ጹግያ ያርሹዋነ እትፐተꬃ ያርሾ ግድኖ። ታን ኡባ ሞድያ መꬍና ጎዳይ ሀዋ ኦዳይ። 16 ቢታን ደእያ አሳይ ኡባይ ሀዋ ኡባ እስራኤልያ ካፖ እሞ። 17 ካፑ ኦꬃናዉ በስያ ኦሱ፥ እስራኤልያ አሳይ ቦንችያ ባላቱዋን፥ አግናይ ጼርያ ጋላሳትዋንነ ሳምባታቱዋን ጹግያ ያርሾቶ፥ ካꬃ ያርሾቶነ ኡሻ ያርሾቶ ኮሽያዋ እሞ። እስራኤልያ አሳ ናጋራ አቶ ጊሳናዉ፥ ናጋራ ያርሾቱዋ፥ ካꬃ ያርሾቶ፥ ጹግያ ያርሾቶነ እትፐተꬃ ያርሾቶ ኡባዉ ኮሽያዋ እ እሞ” ያጌ።

18 “ ‘ኡባ ሞድያ መꬍና ጎዳይ ሀዋዳን ያጌ፤ “ኮይሮ አግናን፥ ኮይሮ ጋላስ ትላ ቦላና እት ኮሩማ ጌሻ ጎልያ ጌሻናዉ ሺሻ። 19 ቄሲ ሀ ናጋራ ያርሹዋ ሱꬃፐ አኪደ፥ ጌሻ ጎልያ ፐንግያ ቆስለꬃቱዋ፥ ያርሽያ ሳ ዩሹዋን ደእያ ደꬃዉ ኦይዱ ምዛናዉነ ግዶ ዳባባ አፍያ ድርሳ ፐንግያ ቆስለꬃቱዋ ኦኮ። 20 ኦንነ ቆፐናን ዎይ ኤራና ꬋዪደ ኦꬄዳ ናጋራ አቶ ጊሳናዉ፥ አግናዉ ላፑንꬃ ጋላሳን ሄዋዳንካ ኦꬃ። ያታደ ጌሻ ጎልያ ቱናተꬃፐ ጌሻ።

21 “ ‘ “ኮይሮ አግናን፥ ታማነ ኦይደንꬆ ጋላሳን ፓስጋ ባላ ቦንችተ፤ ቃይ ላፑን ጋላስ ጋካናዉ፥ እርሹ ገልቤና ኡክꬃ ሚተ። ከሳ 12:1-20፤ ፓይ. 28:16-25 22 ሄ ኮይሮ ጋላሳን ካፑ ባረ ግሻነ ባረ አሳ ድራዉ ናጋራ ያርሹዋ ኦꬂደ ኮሽያዋ፥ እት ኮሩማ እሞ። 23 ሄ ባላይ ቦንቼትያ ላፑን ጋላሳቱዋን ሀች ሀች ላፑን ኮሩማቱዋነ ላፑን ዶርሳ ኦርገቱዋ ኡባይካ ትላ ቦላና ደእያዋንታ ጹግያ ያርሹዋ ኦꬂደ፥ መꬍና ጎዳዉ ኮሽያዋ እሞ። ሄዋናካ እትፐ ናጋራ ያርሾ ሀች ሀች እት ዴሻ ኦርግያ እሞ። 24 እት እት ኮሩማነ እት እት ዶርሳ ኦርግያ ያርሽያ ዎደ፥ ካꬃ ያርሾ 17 ክሎ ግራመ ዛርጋነ ሄዙ ሊትሮ ዛይትያ እሞ።

25 “ ‘ “ላፑንꬃ አግናን፥ ታማነ እቼሻንꬃ ጋላሳን ዶምያ ላፑን ጋላሳ ባላ ዎድያን ኡባን፥ ናጋራ ያርሹዋ፥ ጹግያ ያርሹዋ፥ ካꬃ ያርሹዋነ ዛይትያ ካሰዋፐ ዱማየናን ካፑ እሞ” ያጌ። ዎጋ 23:33-36፤ ፓይ. 29:12-38