1 ሄ ብታኒ ዛሪደ፥ ታና ጌሻ ጎልያ ገልያሳ አፌዳ። ጌሻ ጎልያ ገልያ ፐንግያፐ ጋርሳና ሃꬃይ ፑልቲደ፥ ጌሻ ጎልያፐ አዋይ ዶልያ ባጋ ጎጌ። ጋሱካ መꬍና ጎዳ ጌሻ ጎሊያ ፐንጊ አዋይ ዶልያ ባጋፐ ስንꬃና ደኤ። ጌሻ ጎልያዉ ገድሳ ባጋና ዱገ ጎጊደ፥ ያርሽያ ሳፐ ገድሳ ባጋና አꬌ።ዛካ. 14:8፤ ዮሃ. 7:38፤ ሳፃ 22:1 2 እ ታና ሁጲሳ ፐንግያ ባጋና ከሲደ፥ አዋይ ዶልያ ባጋ ጼልያ ፐንግያ ዩሹዋና ካለꬂደ አፌዳ። ሄ ፐንግያፐ ገድሳ ባጋና ሃꬃይ ጎጌ።

3 ሄ ብታኒ ልክያ ሜትርያ ባረ ኩሽያን ኦይቂደ፥ አዋይ ዶልያ ባጋ ቢደ፥ ጎግያ ሃꬃ ካሊደ፥ 1,000 ዋꬋ ልኬዳ። ታና ሃꬃ ግዱዋና ካለꬄዳ፤ ሃꬃይ ታዉ ሜሽ መቀꬃ ጋኬ። 4 ላኤንꬁዋካ 1,000 ዋꬋ ልኪደ፥ ሃꬃ ግዱዋና ታና ካለꬄዳ። ሃꬃይ ታዉ ጉልባታ ጋኬዳ። ቃይ 1,000 ዋꬋ ልኪደ፥ ታና ሃꬃ ግዱዋና ካለꬄዳ። ሄ ዎደ ሃꬃይ ታዉ ጼሳ ጋኬዳ። 5 እ ቃይካ 1,000 ዋꬋ ልኬዳ። ሽን ሄ ሃꬃይ ዳሮ ጪማ ግዴዳ ድራዉ፥ ታን ፕናናዉ ዳንዳያበይከ፤ እ አሳይ ዋናን ፕናናዉ ዳንዳየና ሻፋ ግዴዳ። 6 ሄ ብታኒ ታና፥ “ላ አሳ ናአዉ፥ ሀዋ በኣድ?” ያጌዳ።

ሄዋፐ ጉይያን፥ እ ታና ሻፋ ጋጻዉ ጉየ ዛሬዳ። 7 ታን ስማደ ያ ጋክያ ዎደ፥ ሻፋ ዶናን ሀ ባጋናነ ያ ባጋና ሎይꬅ ዳሮ ምꬃይ ደእያዋ በኣድ። 8 እ ታና ሀዋዳን ያጌዳ፤ “ሀ ሃꬃይ አዋይ ዶልያ ባጋ ቢታዉ ጎጊደ፥ አራባ ዎምባን ገሌ። እ ሄዋን ጎገና ማጽንያ አባን ገልያ ዎደ፥ ሄ ሃꬃይ ኦራጺደ፥ ጽሎ ሃꬃ ከሴ። 9 ሀ ሻፋይ ጎጊደ ብያ ሳኣን ደእያ፥ ሻምእ ግያ መታቱ ኡባይ ፓጻ ደአና፤ ቃይ ሄ ሻፋይ ያ ጎጊደ፥ አባ ሃꬃ ኦራጽሲደ ጽልስያ ድራዉ፥ ፓይዱዋን ዳሮ ጮራቴዳ ሞለቱ ያን ደአና። ሄዋፐ ደንዴዳዋን፥ ሄ ሻፋይ ጎግያሳን ደእያባይ ኡባይ ፓጻ ደአና። 10 ሞልያ ኦይቂያዋንቱ አባ ዶናን ኤቃና፤ ኤንጋዳፐ ቢደ ኤን-ኤግላይማ ጋካናዉ ደእያ ሳአይ ግትያ ምጭያ ሳኣ ግዳና። ሜድተራነ አባን ደእያ ሞለቱዋዳን፥ ሄዋንካ ዳሮ ዱማ ዱማ ቆሞ ሞለቱ ደአና። 11 ሽን አባ ዶናን ደእያ ጫሪነ ሃꬃይ ኩሞ ኦላይ ማጽነ ግዲደ አታናፐ አትና፥ ኦራጽክኖ። 12 ሄ ሻፋ ዶናን ሀ ባጋናነ ያ ባጋና ምያ አይፍያ አይፍያ፥ ዳሮ ዱማ ዱማ ቆሞ ምꬃቱ ደአና። ኡንቱንቱ ሀይꬃይ ቆቆፈተና፤ አይፍያዋካ አግክኖ። ጌሻ ጎልያፐ ከስያ ሃꬃይ ኡንቱንቱኮ ጎግያ ድራዉ፥ ኡንቱንቱ አግናን አግናን ኦራꬃ አይፍያ አይፋና። ኡንቱንቱ አይፌዳ አይፊ ቁማ ግዳናዋ፤ ኡንቱንቱ ሀይꬃይካ ꬋለ ግዳናዋ” ያጌ። ሳፃ 22:2

13 ኡባ ሞድያ መꬍና ጎዳይ ሀዋዳን ያጌ፤ “እስራኤልያ ዛረቶ ታማነ ላአቶ ቢታ ላታ ጋድያ ኦꬃደ፥ ኔን ሻካና ዛዋይ ሀዋ። ዮሴፎ ዛረቶ ላኡ ሳማይ እመቶ። 14 ታን ካሰ ህንተ ማይዛ አዋቶ ሀ ቢታ ላትሳናዉ ታ ኩሽያ ደንꬃደ ጫቃድ፤ ሀእ ህንተ ኡባይካ ልክያን ሻኪደ ላትተ።

15 “ቢታዉ ሁጲሳ ባጋ ዛዋይ ሀዋ: ሜድተራነ አባፐ ደንዲደ፥ ሄትሎና ካታማነ ሀማታ ፕኑዋ አꬊደ፥ ጸዳደ ካታማ ጋኬ። 16 ሄዋፐ ቃይ ዳማስቆፐነ ሀማታፐ ግዶ ዛዋን ደእያ በሮታነ ስብራይማ ካታማቱዋ አꬊደ፥ ሀዉራና ዛዋን ደእያ ቲኮና *ቲኮና፦ እብራዌꬁዋን ሀዘር-ሀትኮን ጌተቴ። ካታማ ጋኬ። 17 ሄዎ እስራኤልያ ቢታዉ ዛዋይ ሀማታ ቢታ ሁጲሳ ባጋዉ አጊደ፥ ሜድተራነ አባፐ አዋይ ዶልያ ባጋ ቢደ፥ ዳማስቆ ቢታ ዛዋን ደእያ ሀጻር-ኤናና ካታማ ጋኬ።

18 “አዋይ ዶልያ ባጋ ዛዋይ ሀጻር-ኤናናፐ ደንዲደ፥ ዳማስቆፐነ ሀዉራናፐ ግዱዋና አꬌ። ሄዋፐ ቃይ እስራኤልያፐነ ጋላኣደፐ ግዱዋን ደእያ ዮርዳኖሳ ሻፋን ዛዋቲደ፥ ማጽንያ አባ አꬊደ ቢደ፥ ታማራ ካታማ ጋኬ።

19 “ገድሳ ባጋ ዛዋይ ታማራፐ ደንዲደ ቢደ፥ ማሪባ-ቃዴሳን ደእያ ፑልቱዋ ጋኬ። ሄዋፐ ሁጲሳና አዋይ ዉልያ ባጋ ኦይቅክቂደ፥ ግብጼ ሻፋ ካሊደ ቢደ፥ ሜድትራንያ አባ ጋኬ።

20 “አዋይ ዉልያ ባጋ ዛዋይ ሜድተራነ አባ ግዲደ፥ ሁጲሳ ባጋና አꬊደ ሀማተን ዛዋቴ።

21 “ሄዋ ድራዉ፥ ሀ ቢታ እስራኤልያ ዛራቱዋ ፓይዱዋ ልክያን ሻክ አክተ። 22 ህንተዉነ ህንተ ግዶን ናናቱዋ የሊደ ደእያ በተቶ ቢታ ላታ ኦꬂደ ሻክተ። ኡንቱንታ ህንተ ህንተ ቢታን የለቴዳ እስራኤልያ አሳዳን ጼልተ። ኡንቱንቱ ህንተናና እትፐ እስራኤልያ ዛራቱዋና ጋድያ ሳማን አክኖ። 23 በቲ እስራኤልያን አይ ዛርያና ደኦፐካ፥ ሄ እ ደእያ ዛርያ ግዶን አዉ ላታ ቢታ እምተ። ታን ኡባ ሞድያ መꬍና ጎዳይ ሀዋ ኦዳይ።