1 “ቢታ ሻካናዉ ማዝጋበቴዳ ዛራቱዋ ሱንꬃይ ሀዋ: ሁጲሳ ባጋና እት ሳማይ ዳና ዛርያዉ እመቶ። ሄዌካ ሄትሎናፐ ሀማታዉ አፍያ ኦግያ ካሊደ፥ ሄዋፐካ ዳማስቆ ዛዋን ደእያ ሀጻር-ኤናና ማታ ካታማ አꬊደ ሀማተ ማታን ዛዋቴ። ሄዌ አዋይ ዶልያ ባጋፐ ቢደ አዋይ ዉልያ ባጋ ጋካናዉ ደእያ ሳአዉ ሁጲሳ ባጋ ዛዋ ግዳና። 2 ዳና ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ ደእያ እት ሳማይ አሴራ ዛርያዉ እመቶ። 3 አሴራ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ ደእያ እት ሳማይ ንፍታሌማ ዛርያዉ እመቶ። 4 ንፍታሌማ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ ደእያ እት ሳማይ ምናሰ ዛርያዉ እመቶ። 5 ምናሰ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ እት ሳማይ ኤፍሬማ ዛርያዉ እመቶ። 6 ኤፍሬማ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ እት ሳማይ ሮቤላ ዛርያዉ እመቶ። 7 ሮቤላ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ጋካናዉ እት ሳማይ ይሁዳ ዛርያዉ እመቶ።

8 “ይሁዳ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማ ዱማያ ዎꬃ። አዉ ጎምፓይ ታማነ ላኡ ክሎ ሜትረነ ባጋ ግዴ። አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ዛርያ ሻክና ጋክያ ሳማና ቃራ። አዉ ግዶ ግሸቻን ጌሻ ጎሊ ደኤ።

9 “ሄ ሳማፐ ኔን መꬍና ጎዳዉ ዱማያደ ዎꬅያ ሳአይ ታማነ ላኡ ክሎ ሜትረነ ባጋ አዱሳነ ታሙ ክሎ ሜትረ አኮ ግዶ። 10 ሄ ሳአይ ቄሳቶ ዱማዬዳ ሳኣ ግዶ፤ እ ሁጲሳ ባጋና ታማነ ላኡ ክሎ ሜትረነ ባጋ አዱሳ፤ አዋይ ዉልያ ባጋና እቼሹ ክሎ ሜትረ አኮነ አዋይ ዶልያ ባጋናካ እቼሹ ክሎ ሜትረ አኮ፤ ቃይ ገድሳ ባጋና ታማነ ላኡ ክሎ ሜትረነ ባጋ አዱሳ። መꬍና ጎዳ ጌሻ ጎሊ አዉ ግዶ ግሸቻን ደኤ። 11 ሀ ዱማይ ዎꬄዳ ሳአይ እስራኤልያ አሳይ ታ ኦግያፐ ዎራ ስምያ ዎደ፥ ኡንቱንቱና ዎራ ስሜዳ ሌዋቱዋዳን ግደናን፥ አማነቲደ ታዉ ኦꬂደ ጋምኤዳ፥ ጌሻ ቄሳቶ፥ ጻዶቃ ያራቶ እመቶ። 12 ሄዌ መꬍና ጎዳዉ ዱማዬዳ ቢታፐ ኡንቱንቶ ዱማ ሳማ፤ እ ኡባፐ አꬌዳ ጌሻ። ኡንቱንቱ ሳማይ ሌዋቶ ሳማን ዛዋቶ።

13 “ቄሳቱ ዋ ዛዋና ኦይቀቲደ፥ ሌዋቶካ አዱሳተꬃ ታማነ ላኡ ክሎ ሜትረነ ባጋ፥ ጎምፓይካ እቼሹ ክሎ ሜትረ ግዴዳ እት ሳማይ እመቶ። 14 ኡንቱንቱ ሄ ጋድያፐ አያነ ባይዞፕኖ ዎይ ላሞፕኖ። ሄዌ ቢታ ኡባን ዱማቴዳዋ ግድያ ድራዉ፥ ሀራ አሳ ኩሽያን ገላናዉ በሰና፤ መꬍና ጎዳዉ እ ጌሻ ሳኣ።

15 “አቴዳ ላኡ ክሎ ሜትረነ ባጋ አኮነ ታማነ ላኡ ክሎ ሜትረነ ባጋ አዱሳ ሳአይ ካታማ አሳይ ኡባይ ኮꬃን ጎኤትያ ጎልያ ኬጽያነ መህያ ሄምያ ሳኣ ግዶ፤ ካታማይ ሄ ቢታዉ ግዶ ግሸቻን ደኦ። 16 ሄ ካታማይ ኦይዱ ሚዛናን ደኤ። ሁጲሳ ባጋይ 4 ክሎ ሜትረነ ባጋ፤ ገድሳ ባጋይ 4 ክሎ ሜትረነ ባጋ፤ አዋይ ዶልያ ባጋይ 4 ክሎ ሜትረነ ባጋ፤ አዋይ ዉልያ ባጋይካ 4 ክሎ ሜትረነ ባጋ። 17 ካታማዉ ሄንꬃ ጋዲ ደኦ፤ ሄ ጋዲ ሁጲሳ ባጋና፥ ገድሳ ባጋና፥ አዋይ ዶልያ ባጋናነ አዋይ ዉልያ ባጋና 250 ዋꬋ አኮ ግዶ። 18 ጌሻ ሳኣ ባጋና አቴዳ ሳአይ አዋይ ዶልያ ባጋ ዋꬍያ ዎደ፥ አዱሳተꬃይ እቼሹ ክሎ ሜትረ፤ አዋይ ዉልያ ባጋ ዋꬍያ ዎደ፥ አዱሳተꬃይ እቼሹ ክሎ ሜትረ። ሄ ሳኣን ሞኬዳዌ ኡባይ ሄ ካታማን ኦꬅያዋንቶ ቁማ ግዳና። 19 እስራኤልያ ዛረ ኡባፐ ሄ ካታማን ኦꬃናዉ ይያዋንቱ ሄ ቢታ ጎሽኖ። 20 ህንተ ዱማይያ ሳአይ ኡባና ኦይዱ ማርያናካ ታማነ ላኡ ክሎ ሜትረነ ባጋ አዱቄ። ሄ ሳአይ ካታማይ ኬጸቴዳ ሳኣነ ጌሻ ሳኣ ባረናን ጉጄ።

21-22 “ጌሻ ጎልያፐ፥ ቄሳቱ ዋ ሳማፐ፥ ሌዋቱዋ ሳማፐነ ካታማ ሳኣፐ አዋይ ዶልያ ባጋናነ አዋይ ዉልያ ባጋና ደእያ አቴዳ ቢታይ ካፖ ግዶ። ሄ ቢታዉ ጎምፓይ ታማነ ላኡ ክሎ ሜትረነ ባጋ። ሄ ካፑዋ ቢታይ ሁጲሳ ባጋና ይሁዳ ጋኬዳ ሳማን፥ ገድሳ ባጋና ቢንያማ ጋኬዳ ሳማን ዛዋቴ። 23 አቴዳ ዛረቶ ቢታይ ሀዋዳን ሻከቴ። አዋይ ዶልያ ባጋፐ አዋይ ዉልያ ባጋ ጋካናዉ፥ እት ሳማይ ቢንያማ ዛርያዉ እመቶ። 24 ቢንያማ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ስሞና ዛርያዉ እመቶ። 25 ስሞና ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ይሳኮራ ዛርያዉ እመቶ። 26 ይሳኮራ ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ዛብሎና ዛርያዉ እመቶ። 27 ዛብሎና ዛዋና ኦይቀቲደ፥ አዋይ ዶልያ ባጋፐ አዋይ ዉልያ ባጋ ጋካናዉ ደእያ እት ሳማይ ጋዳ ዛርያዉ እመቶ። 28 ጋዳ ገድሳ ዛዋይ ታማራ ካታማፐ ደንዲደ፥ ማሪባ-ቃዴሳን ደእያ ፑልቱዋና አꬊደ፥ ግብጼ ሻፋ ካሊደ ቢደ፥ ሜድተራነ አባ ጋኬ።

29 “ህንተ እስራኤልያ አሳዉ ላታ ኦꬃደ ሻካና ቢታይ ሀዋ፤ ሀዋንቱ ኡንቱንታ ጋካና ሳማቱዋ። ታን ኡባ ሞድያ መꬍና ጎዳይ ሀዋ ኦዳይ።

30 “ካታማፐ ከስያ ፐንገቱ ሀዋንታ። ኡንቱንቱ እስራኤልያ ዛራቱዋ ሱንꬃን ጼገታና። ሁጲሳ ድርሳ ግምቢ 4,500 ዋꬋ አዱቃና፤ ሳፃ 21:12-13 31 ካታማ ፐንገቱ እስራኤልያ ዘረꬃ ሱንꬃን ጼገታና። ሁጲሳ ባጋና፤ ሮቤላ ፐንግያ፥ ይሁዳ ፐንግያነ ሌዊያ ፐንግያ ጌተትያ ሄዙ ፐንገቱ ደአና። 32 አዋይ ዉልያ ድርሳ ግምቢ 4,500 ዋꬋ አዱቃና፤ ሄ ግምቢያን ዮሴፎ ፐንግያ፥ ቢንያማ ፐንግያነ ዳና ፐንግያ ጌተትያ ሄዙ ፐንገቱ ደአና። 33 ገድሳ ድርሳ ግምቢ 4,500 ዋꬋ አዱቃና፤ ሄ ግምቢያን ስሞና ፐንግያ፥ ይሳኮራ ፐንግያነ ዛብሎና ፐንግያ ጌተትያ ሄዙ ፐንገቱ ደአና። 34 አዋይ ዉልያ ድርሳ ግምቢ 4,500 ዋꬋ አዱቃና፤ ሄ ግምቢያን ጋዳ ፐንግያ፥ አሴራ ፐንግያነ ንፍታሌማ ፐንግያ ጌተትያ ሄዙ ፐንገቱ ደአና።

35 “ካታማ ዩሹ ኡባና ልክና፥ 18,000 ዋꬋ ግዳናዋ። ሄ ዎድያፐ ዶሚደ ሄ ካታማይ፥ ‘መꬍና ጎዳይ ሄዋን ደኤ’ ያጌቲደ ጼሰታና” ያጌ።