1 ይሁዳ ካቲ ዮአቄም ካተቴዳ ሄዘንꬆ ላይꬅ፥ ባብሎነ ካቲ ናቡካዳናጾር የሩሳላመ ካታማ ቦላ ደንዲደ፥ ሄ ካታማ ዶዴዳ። 2 ካታ. 24:1፤ 2 ኦዱዋ 36:5-7 2 ጎዳይ ይሁዳ ካትያ ዮአቄማነ ጾሳ ጌሻ ጎልያን ደእያ ሚሻቱዋፐ ኡንደነዳዋ አ ኩሽያን አꬂደ እሜዳ። እካ ሄ ሚሻቱዋ ባብሎነ ጋድያን ደእያ ባረ ጾሳቱዋ ኤቃ ጎልያ አሄዳ፤ ባረ ጾሳ ሚሻ ምንጅያ ጎልያን ዎꬄዳ።2 ካታ. 20:17-18፤ 24:10-16፤ 2 ኦዱዋ 36:10፤ ኢሳ. 39:7-8

3 ሄዋፐ ጉይያን፥ ካቲ አሽፋናዛ ግያ ባረ ኦሳንቻቱዋ ካፑዋ ሀዋዳን ያጊደ አዛዜዳ፤ “እስራኤልያ አሳ ግዶፐ ካትያ ዛረ ግድያዋንታነ ዎልቃማ አሳቱዋ ዛረ ግድያዋንታ ዶራ። 4 ያላጋቱ አሳተꬃን ፓጫይ ባይናዋንታ፥ ማላንቻቱዋ፥ አያ ታማርሶፐካ ኤራናዉ ዳንዳይያዋንታ፥ አኬክያዋንታ፥ ኤራተꬃይ ኩሜዳዋንታነ ካትያ ጎልያን ኦꬃናዉ ዳንዳይያዋንታ። ኡንቱንታ ባብሎነቱዋ ቃላነ ጽፋትያ ታማርሳ” ያጌዳ። 5 ቃይ ኡንቱንቱ ሀች ሀች ማና ቁማይነ ኡሻና ዎይንያ ኤሳይ ካትያዉ ካኤዳ ቁማፐነ ኡሻፐ ግዳናዳን፥ ካቲ አዛዜዳ። ሄዋዳንካ፥ ሄዙ ላይꬃ ሎሄዳዋፐ ጉይያን፥ ካትያ ስንꬃ ሺቂደ፥ ኦሱዋ ዶማናዳን ቃቼዳ።

6 ዶረቴዳዋንቱ ግዶፐ ይሁዳ ዛረ ግድያዋንቱ ዳኔላ፥ ሀናንያ፥ ምሻኤላነ አዛርያ ግያዋንቱ ደኢኖ። 7 ኦሳንቻቱዋ ካፑ ኡንቱንቱ ሱንꬃ ላሚደ፥ ዳኔላ ብልጻሶራ፥ ሀናንያ ስድራቃ፥ ምሻኤላ ምሳቃ፥ አዛርያ አብዳናጎ ጊደ ሱንꬄዳ።

8 ዳኔል ካትያ ቁማ ምያዋንነ ዎይንያ ኤሳ ኡሽያዋን ባረና ቱንሰና ማላ፥ ባረ ዎዛናን ቆፋ ቃቼዳ፤ ሄ ቆፋን ማያናዳን፥ ኦሳንቻቱዋ ካፑዋ ዎሴዳ። 9 ሄ ካፑ ዳኔላ ሳባና ማላነ አዉ ቃረታና ማላ፥ ጾሳይ ኦꬄዳ። 10 ግዶ ሽን፥ ኦሳንቻቱዋ ካፑ ዳኔላዉ ኦዲደ፥ “ታን ህንተንቶ ሀ ቁማነ ኡሻ አዛዜዳ ታ ጎዳ ካትያዉ ያያይ። ህንተናና ላገትያ ያላጋቱ ሶምኡዋፐ ህንተ ሶምኢ ግልቂ ቤቶፐ፥ ህንተ ጋሱዋን ካቲ ታና ዎꬋና” ያጌዳ።

11 ሄዋፐ ጉይያን፥ ኦሳንቻቱዋ ካፑ ሱንꬅና ዳኔላ፥ ሀናንያ፥ ምሻኤላነ አዛርያ ሀዳራ አኬዳ ብታንያ ዳኔል ሀዋዳን ያጌዳ፥ 12 “ኑዉ ማናዉ አታክልትያ፥ ኡሻናዉካ ሃꬃ ጻላላ እማደ፥ ኑና ነ ቆማቱዋ ታሙ ጋላሳቱዋን ፓጫ። 13 ሄዋፐ ጉይያን፥ ኑ ሶምኡዋነ ካትያ ቁማ ምያ ያላጋ አሳቱዋ ሶምኡዋ ጌዳራ ጼላደ፥ ኑና ነ ቆማቱዋ ነዉ ማላት ቤቴዳዋዳን ኦꬃ” ያጌዳ።

14 እ ሄዋ ማዪደ፥ ታሙ ጋላሳ ኡንቱንታ ፓጬዳ። 15 ታሙ ጋላሳፐ ጉይያን ኡንቱንቱ፥ ካትያ ቁማ ሜዳ ያላጋቱዋ ኡባፐ ፓጺደነ አንቃሪደ ቤቴድኖ። 16 ያትና፥ ኡንቱንቶ ጊጌዳ ቁማነ ዎይንያ ኤሳ ድጊደ፥ አታክልትያ እሜዳ።

17 ሀ ኦይዱ ያላጋቶ ጾሳይ ኤራነ ኡባ ቆሞ ጽፋቲነ ትምርቲ ገልያ አኬካ እሜዳ። ዳኔል ቃይ ሳጻነ አኩሙዋ ኡባ ብለꬃ ኤሬ።

18 ካቲ ያላጋቱ ባረኮ ገላናዳን አዛዜዳ ዎዲ ፖለትና፥ ኦሳንቻቱዋ ካፑ ኡንቱንታ ናቡካዳናጾረ ስንꬃ አꬄዳ። 19 ካቲ ኡንቱንታ ሃሳይሴዳ ዎደ፥ ዳኔላ፥ ሀናንያ፥ ምሻኤላነ አዛርያ ማላ አሳይ ኡንቱንቱ ግዶን ቤትቤና። ያትና፥ ኡንቱንቱ ካትያዉ ኦꬃናዉ ገሌድኖ። 20 ካቲ ኡንቱንታ ኦቼዳ አይ አꬌዳ ኤራተꬃነ አኬካ ኦሻን፥ አ ካዉተꬃን ደእያ ሻሬቾቱዋፐነ ሙሩንያዋንቱ ኡባፐ ኡንቱንቱ ታሙ ኩሽያ አꬊደ ቤቴድኖ። 21 ዳኔል ካቲ ቂሮሰ ካተቴዳ ኮይሮ ላይꬃይ ጋካናዉ ጋምኤዳ።