1 ናቡካዳናጾር ባረ ካተቴዳ ላኤንꬆ ላይꬅ አኩሙዋ አኩመቴዳ። ሄ አኩሙ አ ሎይꬅ ሻቢርና፥ ገምእሹ አ አፌናን እጼዳ። 2 ያትና፥ እ አኩመቴዳ አኩሙዋ አዉ ኦዳና ማላ፥ ሻሬቾቱ፥ ሙሩንያዋንቱ፥ ብትያዋንቱነ ጾልንትያ ጼሊደ ካይያዋንቱ ጼገት ያናዳን ካቲ አዛዜዳ። ዪደ፥ አ ስንꬃን ኤቄድኖ። ዶመꬃ 41:8 3 ካቲ ኡንቱንታ፥ “ታን ታና ሻቢርስያ አኩሙዋ አኩመታድ፤ ሄ አኩሙ አየንቶ ኤራናዉ ኮያይ” ያጌዳ።

4 ጾልንትያ ጼሊደ ካይያዋንቱ ካትያ ሶራቱዋ *ዳን። 2:4 ፐ ቢደ ሸምፑዋ 7 ጋካናዉ ደእያዌ: ሶራቱዋ አሳ ቃላን ጻፈቴዳ። ቃላን፥ “ካትያዉ፥ መꬍናዉ ደአ! ነ አኩሙዋ ኑዉ ነ ቆማቶ ኦዳ፤ ኑን ነዉ አ ብለꬃ ኦዳና” ያጌድኖ።

5 ካቲ ጾልንትያ ጼሊደ ካይያዋንታ ሀዋዳን ያጌዳ፤ “ታን ሎይꬃደ ቃቼዳ ቆፋይ ሀዋ። ህንተ ሀ አኩሙዋነ አ ብለꬃ ታና ኤርሳና ꬋዮፐ፥ ታን ህንተና ቃንጻ የጋና፤ ህንተ ጎለቱካ ቡራ ኦልያ ሳኣ ከሳና። 6 ሽን ህንተ አኩሙዋነ አ ብለꬃ ታዉ ኦዶፐ፥ እሙዋ፥ ዎይቱዋነ ዳሮ ቦንቹዋ ታፐ ህንተ አካና። ሄዋ ድራዉ፥ አነ አኩሙዋነ አ ብለꬃ ታና ኤርስተ” ያጌዳ።

7 ላኤንꬁዋካ ኡንቱንቱ ዛሪደ፥ “ካቲ አኩሙዋ ኑዉ ባረ ቆማቶ ኦዶ፤ ኑን አ ብለꬃ ኤርሳና” ያጌድኖ።

8 ካቲ ኡንቱንቶ ዛሪደ፥ “ታን ህንተ ሀልቹዋ ኤራይ፤ ታን ሎይꬃደ ቃቼዳ ቆፋ ህንተካ ኤሬዳ ድራዉ፥ ሀዋ ሱጋና ጊደ ሀኒታ ያጌዳ። 9 ህንተ አኩሙዋ ታዉ ኦዳና ꬋዮፐ፥ እት ቀጩ ህንተና ናጌ። ሀኖታይ ላመታናዋ ጊደ ህንተ ህዶታ ኦꬅያ ድራዉ፥ ታዉ ዎርዶነ ገንያ ቃላ ኦዳናዉ ማቀቴድታ። ሄዋ ድራዉ፥ አኩሙዋ ታዉ ኦድተ፤ ያቶፐ፥ ህንተ አ ብለꬃ ኤርሳናዉ ዳንዳይያዋ ታን ኤራይ” ያጌዳ።

10 ጾልንትያ ጼሊደ ካይያዋንቱ ካትያዉ ዛሪደ፥ “ካቲ ኦችያ ኦሻ ዛራናዉ ዳንዳይያ እት አሳይነ ጋድያን ባዋ። አይ ግታቴዳነ ዎልቃሜዳ ካዉካ ሀዋ ማላባ ሻሬቾቱዋ፥ ሙሩንያዋንታ ዎይ ጾልንትያ ጼሊደ ካይያዋንታ ኦች ኤረና። 11 ካቲ ኦቼዳ ኦሻይ ዴጻ፤ አሳና እትፐ ደኤና ጾሳቱዋፐ አትና፥ ሀዋ ካትያዉ ቆንጭሳናዉ ዳንዳይያዌ ሙለካ ባዋ” ያጌድኖ።

12 ሄዋ ድራዉ፥ ካቲ ሎይꬅ ሀንቀቲደ ባብሎነን ደእያ ካትያ ዞርያዋንታ ኡባ ዉርሳናዳን አዛዜዳ። 13 ካትያ ዞርያዋንታ ዎꬋናዉ አዋዩ ከሴዳ። ዎꬍያዋንቱ ዳኔላነ አ ላገቱዋ ዎꬋናዉ ኮዬድኖ።

14 ካትያ ናግያ ኦላንቻቱዋ ካፑ አርዮክ፥ ባብሎነን ደእያ ካትያ ዞርያዋንታ ዎꬋናዉ ከስያ ዎደ፥ ዳኔል አ አኬካንነ ሂላን ሃሳይሴዳ። 15 እ ካትያ ናግያ ኦላንቻቱዋ ካፑዋ አርዮካ፥ “ካትያ አዋዩ አያዉ ሀዋዳን ፓላቴዴ?” ጊደ ኦቼዳ። አርዮክ ሀኖታ ዳኔላዉ ኦዴዳ። 16 ሄዋን ዳኔል ካትያኮ ገሊደ፥ አኩሙዋ ብለꬃ ኤርሳናዉ፥ ባረዉ ዎዲ እመታና ማላ ዎሴዳ።

17 ሄዋፐ ጉይያን፥ ዳኔል ባረ ጎለ ስሚደ፥ ባረ ሄዙ ላገቶ፥ ሀናንያዉ፥ ምሻኤላዉነ አዛርያዉ ሀኖታ ኦዴዳ። 18 ኡንቱንቱ ባብሎነን ደእያ የንኮ ካትያ ዞርያዋንቱና እትፐ ሀይቀናዳን፥ ሳሉዋ ጾሳይ ማሮታ ኡንቱንቶ ኦꬂደ፥ ሀ ጹራ ኡንቱንቶ ቆንጭሳናዉ ዎሳና ማላ፥ ኡንቱንቶ ኦዴዳ።

19 ሄ ቃማን ጹራይ ዳኔላዉ ሳጻን ቆንጬዳ። ያትና፥ ዳኔል ሳሉዋ ጾሳ ሀዋዳን ያጊደ ጋላቴዳ፤

24 ሄዋፐ ጉይያን፥ ዳኔል ባብሎነን ደእያ ካትያ ዞርያዋንታ ዉርሳናዉ ካትያፐ አዛዙዋ አኬዳ አርዮካኮ ቢደ፥ “ካትያ ዞርያዋንታ ዎꬎፓ። ታና ካትያኮ ገልሳ፤ ያቶፐ ታን አ አኩሙዋ ብለꬃ አ ኤርሳና” ያጌዳ።

25 አርዮክ ኤለካ ዳኔላ ካትያኮ ገልሲደ፥ ካትያዉ፥ “ይሁዳፐ ኦሞደቲደ ዬዳ አሳፐ ካትያ አኩሙዋ ብለꬃ ኤርሳናዉ ዳንዳይያ አሳ ደማድ” ያጌዳ።

26 ካቲ ብልጻሶራ ጌተትያ ዳኔላ፥ “ታን አኩመቴዳ አኩሙዋነ አ ብለꬃ ታና ኤርሳናዉ ዳንዳያይ?” ጊደ ኦቼዳ።

27 ዳኔል ሀዋዳን ያጊደ ዛሬዳ፤ “ካትያዉ፥ ኔን ኦቼዳ ጹራ ቆንጭሳናዉ ዳንዳይያ አꬌዳ ኤራንቻይ፥ ሻሬቹ፥ ሙሩንያዌ፥ ዎይ አያንትያዌ ባዋ። 28 ሽን ጹራቱዋ ቆንጭስያ እት ጾሳይ ሳሉዋን ደኤ። ዉርሰꬃ ጋላሳቱዋን ሀናናባ እ ኔና በሴዳ። ነ አርሳን ዛቁላደ፥ ኔን አኩመቴዳ አኩሙነ ሳጻይ ሀዋ።

29 “ካትያዉ፥ ኔን አርሳን ዛቁላደ፥ ስንꬃፐ ሀናናባ ቆፓዳ። ሄ ዎደ ጹራ ቆንጭስያ ጾሳይ ስንꬃፐ ሀናናዋ ኔና በሴዳ። 30 ሀ ጹራይ ታዉ ቆንጬዳዌ ታን ሀራ አሳፐ አꬌዳ ኤራንቻ ግድና ግደናን፥ ኔን ካቲ አኩሙዋ ብለꬃ ኤራናዳናነ ነ ሁጲያ ግዶን ስመረቴዳ ቆፋ አኬካናዳና።

31 “ካትያዉ፥ ኔን ሎይꬅ ዎልቃማ፥ ጶልያነ ጼላናዉ ያሽያ ምስሊ ነ ስንꬃን ኤቄዳዋ በኣዳ። 32 ሀ ምስልያ ሁጲ ጌሻ ዎርቃፐ፥ አ ትራይነ ኩሸቱ ብራፐ፥ ኡሉነ ዎድረቱ ናሃስያ ግያ ብራታፐ፥ 33 ሱይሊ ብራታፐነ ገድያዉ ያቻይ ባጋይ ብራታፐ ባጋይ ኡርቃፐ መቴዳ። 34 ኔን ሀ ምስልያ ጼልሽን፥ እት ሹቻይ አሳ ኩሺ ቦቼናን ደርያፐ ꬎቆለቲደ፥ ብራታፐነ ኡርቃፐ መቴዳ ምስልያ ገድያ ያቻቱዋ ቦላ ዎꬊደ ጋጬዳ። 35 ሄ ዎደ ብራታይ፥ ኡርቃይ፥ ናሃሰ ግያ ብራታይ፥ ብራይነ ዎርቃይ ኡባይ ጋጨቲደ፥ ቦንያን ኡዱማን ደእያ ሱላ ማላ ግዴዳ፤ አያነ አሸናን ጫርኩ ፕቲደ አፌዳ። ሽን ምስልያ ቦላ ዎꬌዳ ሹቻይ ዎጋ ደርያ ከሲደ፥ ቢታ ሳኣ ኩሜዳ።

36 “ሀዌ ነ አኩሙዋ፤ ቃይ ሀእ ብለꬃ ኑን ነዉ ኦዳና። 37 ካትያዉ፥ ኔን ካተቶ ካትያ። ሳሉዋ ጾሳይ ነዉ ካዉተꬃነ ዎልቃ፥ ምኖተꬃነ ቦንቹዋ እሜዳ። 38 ቢታ ኡባ ቦላን ኔና ሞድያዋ ኦꬄዳ፤ አሳ፥ ባዙዋ ዶኣነ ሳሉዋ ካፉዋ ነ ኩሽያን ዎꬄዳ። ሄዋ ድራዉ፥ ዎርቃ ሁጲ ኔና።

39 “ኔፐ ጉይያን፥ ምኖተꬃን ኔና ጋከና ሀራ ካዉተꬃይ ደንዳና። ካሊደ፥ ቢታ ኡባ ሞድያ፥ ናሃሰ ብራታ ግድያ፥ ሄዘንꬆ ካዉተꬃይ ደንዳና። 40 ዉርሰꬃን ኡባባ ጋጨሬꬅ ሊቅስያ ብራታዳን ምኔዳ ኦይደንꬆ ካዉተꬃይ ደንዳና። ብራታይ ኡባባ ጋጨሬꬂደ ሊቅስያዋዳን፥ እካ ባረፐ ካሰ ደንዴዳ ካዉተꬃቱዋ ጋጨሬꬂደ ሊቅሳና።

41 “ገደቱነ ገድያ ብራቱ ባጋይ ብራታፐ፥ ባጋይ ኡርቃፐ መቴዳዋንታ ኔን በኤዳዋዳንካ፥ ሄ ካዉተꬃይ ሻከቲደ ካዉተꬃ ግዳናዋ። ብራታይ ኡርቃና ዋላከቴዳዋ ነ በኤዳዋዳንካ፥ ባጋይ ብራታዳን ምኔዳዋ ግዳና። 42 ገድያ ብራቱ ባጋይ ብራታ፥ ባጋይ ኡርቃ ግዴዳዋዳን፥ ሄዋዳንካ ሀ ካዉተꬃዉ ባጋይ ምኖ፥ ባጋይ ላፋ ግዳናዋ። 43 ብራታይ ኡርቃና ዋላከቴዳዋ ነ በኤዳዋዳን፥ ሄ ላኡ ባጋ አሳይ ገሉዋን አኩዋን ዋላከታና፤ ሽን ብራታይ ኡርቃና ዋላከታናዉ ዳንዳየናዋዳንካ፥ ኡንቱንቱ እቱዋ ግዲደ ጋምአናዉ ዳንዳይክኖ።

44 “ሄ ካተቱዋ ላይꬃን፥ ሳሉዋ ጾሳይ ሙለካ ኩንደና፥ ሀራ አሳዉካ እመተና ካዉተꬃ ኤሳና። ሄ ኤቄዳ ካዉተꬃይ ሄ ካዉተꬃቱዋ ኡባ ጋጨሬꬅ ꬋይሳና፤ ሽን እ መꬍናዉ ኤቂደ ደአና። 45 አሳ ኩሺ ቦቼናን ደርያፐ ꬎቆለት ዎꬊደ፥ ብራታፐ፥ ናሃስያፐ፥ ኡርቃፐ፥ ብራፐነ ዎርቃፐ መቴዳ ምስልያ ጋጨሬꬄዳ ሹቻ ብለꬃይ ሄ ካዉተꬃ።

“ዎልቃማ ጾሳይ ስንꬃናዉ ሀናናባ ካትያ በሴዳ። አኩሙካ ቱማ፤ ብለꬃይካ አማነቴዳዋ” ያጊደ ዛሬዳ።

46 ሄዋፐ ጉይያን፥ ካቲ ናቡካዳናጾር ዳኔላ ቦንቺደ፥ ሶምኡዋ ቢታ ጋꬂደ ጉፋኔዳ፤ ያቲደ አሳይ አ ስንꬃን ያርሹዋ ያርሻናዳንነ እጻና ጩዋያናዳን አዛዜዳ። 47 ካቲ ዳኔላ፥ “ቱሙዋፐ ነ ጾሳይ ጾሳቱዋ ጾሳ፥ ካተቱ ጎዳነ ጹራ ቆንጭስያዋ። ኔን ሀ ጹራ ቆንጭሳናዉ ዳንዳይያዌ ሄዋሳ” ያጌዳ።

48 ሄዋፐ ጉይያን፥ ካቲ ዳኔላ ሎይꬅ ቦንቼዳ፤ ዳሮነ አልኦ እሞታቱዋካ አዉ እሜዳ፤ ባብሎነ ቢታ ሞድያዋ ኦꬄዳ። ቃይ ባብሎነን ደእያ አꬌዳ ኤራንቻቱዋ ኡባ ቦላ ካፑዋ ኦꬂደ፥ አ ሱንꬄዳ። 49 ዳኔል ኦችና፥ ካቲ ስድራቃ፥ ምሳቃነ አብዳናጋ ባብሎነ ቢታ አይስያዋንታ ኦꬂደ ሱንꬄዳ፤ ሽን ዳኔል ካትያ ጎልያን ጋምኤዳ።