1 ካቲ ናቡካዳናጾር ጌሳይ ኡሱፑን ታሙ ዋꬋ፥ ጎምፓይ ኡሱፑን ዋꬋ ግድያ ምስልያ ዎርቃፐ መꬊደ፥ ባብሎነ ጋድያን ዱራ ደምባን ኤሴዳ። 2 ሄ ምስልያ አንጅሳናዉ ያናዳን፥ ካትያፐ ጋርሳና ጋድያ ሞድያዋንታ፥ ሱንꬃቱዋ፥ አዉራጃ ሞድያዋንታ፥ ካትያ ዞርያዋንታ፥ ሚሻ ጎልያን ኦꬅያዋንታ፥ ፕርዳ ዳናቱዋ፥ ህገ ኤራንቻቱዋነ አዉራጃን አዉራጃን ደእያ ሀራ ካፖቱዋ ጼጌዳ። 3 ያትና፥ ካትያፐ ጋርሳና ጋድያ ሞድያዋንቱ፥ ሱንꬃቱ፥ አዉራጃ ሞድያዋንቱ፥ ካትያ ዞርያዋንቱ፥ ሚሻ ጎልያን ኦꬅያዋንቱ፥ ፕርዳ ዳናቱ፥ ህገ ኤራንቻቱነ አዉራጃን አዉራጃን ደእያ ሀራ ካፓቱ እትፐ ሄ ምስልያ አንጅሳናዉ ሺቂደ፥ ካቲ ናቡካዳናጾር ኤሴዳ ምስልያ ስንꬃን ኤቄድኖ።

4 ሄ ዎደ አዋዩዋ አዋይያዌ ባረ ቃላ ꬎቁ ኦꬂደ፥ ሀዋዳን ያጌዳ፤ “ህንተኖ፥ አሳዉ፥ ካዉተꬃቶ፥ ዱማ ዱማ ቃላን ሃሳይያ ዛረቶ፥ 5 ኡባይካ ማላካታ፥ ሱሱልያ፥ ዛይያ፥ ማስንቁዋ፥ ዲꬃነ ጮራ ባቀቴዳ ክርያን ዋጸቴዳ ዲꬃነ ሀራ ሙዚቃ ሚሻቱዋ እትፐ ካእያ ዎደ ስሶ ሳናካ፥ ካቲ ናቡካዳናጾረ ኤሴዳ ዎርቃ ምስልያዉ ጉፋኒደ ጎይንተ። 6 ምስልያ ስንꬃን ጉፋኒደ ጎይነና ኦንነ ሄ ሳትያን ኤጽያ እቶንያ ታማ ግዶ ኦለታና” ያጌዳ።

7 አሳይ ኡባይ፥ ካዉተꬃቱ ኡባይነ ዱማ ዱማ ቃላን ሃሳይያ ዛራቱ ኡባይ ማላካታ፥ ሱሱልያ ዛይያ፥ ማስንቁዋ፥ ዲꬃነ ጮራ ባቀቴዳ ክርያን ዋጸቴዳ ዲꬃ እትፐ ካእያ ዎደ ስሶ ሳናካ፥ ሳኣን ጉፋኒደ፥ ካቲ ናቡካዳናጾር ኤሴዳ ዎርቃ ምስልያዉ ጎይኔድኖ።

8 ሄዋ ድራዉ፥ ሄ ዎደ እት እት ባብሎነ አሳቱ ስንꬃዉ አꬊደ፥ አይሁዳቱዋ ሞቴድኖ። 9 ኡንቱንቱ ካትያ ናቡካዳናጾራ ሀዋዳን ያጌድኖ፤ “ካትያዉ፥ መꬍናዉ ደአ። 10 ካትያዉ፥ ኔን ማላካታ፥ ሱሱልያ፥ ዛይያ፥ ማስንቁዋ፥ ዲꬃነ ጮራ ባቀቴዳ ክርያን ዋጸቴዳ ዲꬃ እትፐ ካእያ ዎደ፥ ስስያ ኦንነ ሳኣን ጉፋኒደ፥ ዎርቃ ምስልያዉ ጎይናናዳን፥ 11 ቃይ ሳኣን ጉፋኒደ ጎይነና አሳይ ደኦፐ፥ ኤጽያ እቶነ ታማ ግዶ ኦለታናዳን አዋዩዋ ከሳዳ። 12 ሽን ካትያዉ፥ ኔን ባብሎነ ቢታ ቦላ ሱንꬄዳ አይሁዳቱ፥ ስድራቅ፥ ምሳቅነ አብዳናጉ ነ አዛዙዋ እጼድኖ፤ ነ ጾሳቶ ኦꬅክኖ፤ ቃይ ነ ኤሴዳ ዎርቃ ምስልያዉካ ጎይንክኖ” ያጌድኖ።

13 ናቡካዳናጾር ሄዋ ስሴዳ ዎደ፥ ሀንቁዋ ኤጽ ከሲደ፥ ስድራቃ፥ ምሳቃነ አብዳናጋ አሀናዳን አዛዜዳ። ኡንቱንታ ካትያ ስንꬃ አሄድኖ። 14 ናቡካዳናጾር ኡንቱንታ ሀዋዳን ያጌዳ፤ “ስድራቃ፥ ምሳቃ፥ አብዳናጎ፥ ሀ ህንተ ታ ጾሳቶ ኦናዌነ ታ ኤሴዳ ዎርቃ ምስልያዉ ጎይነናዌ ቱሜ? 15 ሀእ ማላካታ፥ ሱሱልያ፥ ዛይያ ማስንቁዋ፥ ዲꬃነ ጮራ ባቀቴዳ ክርያን ዋጸቴዳ ዲꬃነ ሀራ ሙዚቃ ሚሻቱዋ ካእያዋ ስሶ ዎደ፥ ታን ኤሴዳ ምስልያዉ ጉፋኒደ ጎይኖፐ፥ ዳሮ ሎአ። ሽን ህንተ ጎይነናን እጾፐ፥ ኤለካ ኤጽያ እቶንያ ታማ ግዶን ኦለታና። አይ ጾሳቱ ህንተና ታ ኩሽያፐ አሻናዌ?” ያጌዳ።

16 ሽድራቅ፥ ምሻቅነ አብዳናጉ ካትያዉ ዛሪደ፥ “ካትያዉ፥ ናቡካዳናጾራ፥ ሀ የዉዋ ኑን ነዉ ዛሩዋ እማናዉ በሰና። 17 ካትያዉ፥ ኑን ኤጽያ እቶነ ታማ ግዶ ኦለትንቶካ፥ ኑን አዉ ኦꬅያ ጾሳይ ሄ ታማፐ አሻናዉ ዳንዳዬ። ቃይ ካትያዉ፥ እ ኑና ነ ኩሽያፐካ አሻና። 18 ሽን ካትያዉ፥ ኡባ እ ኑና አሸናን እጽንቶካ፥ ኑን ነ ጾሳቶ ኦናዋነ ኔን ኤሴዳ ዎርቃ ምስልያዉ ጎይነናዋ ኤራ” ያጌድኖ።

19 ሄ ዎደ ናቡካዳናጾር ሽድራቃ፥ ምሻቃነ አብዳናጎ ቦላ ሀንቁዋ ሱሌዳ፤ አ ሶምኢ ኡንቱንቶ ካሰዋፐ ዱማቴዳ። ታማይ ካሰ ኤጽያዋፐ ላፑን ኩሽያ አꬊደ ኤጻናዳን አዛዜዳ። 20 ሽድራቃ፥ ምሻቃነ አብዳናጋ ቃቺደ፥ ኤጽያ እቶንያ ታማ ግዶ ኦላናዳን፥ ባረ ኦላንቻቱዋ ግዶፐ ምኖ አሳቱዋ አዛዜዳ። 21 ያትና፥ ሀ አሳቱዋ፥ ኡንቱንቱ ማዩዋና፥ ሱርያና፥ ሁጲያን ጻጼዳ ጻꬃናነ ሀራ ማዩዋ ኡባና ጋꬅ ቃቺደ፥ ኤጽያ እቶንያ ታማ ግዶ ኦሌድኖ። 22 ካትያ አዛዙ ሎይꬅ ኤሌልስያዋ ግዴዳ ድራዉነ እቶንያ ታማይካ ካሰዋፐ አꬍ ኤጽያ ድራዉ፥ ስድራቃ፥ ምሳቃነ፥ አብዳናጋ ታማን ኦሌዳ ሄ ምኖ አሳቱዋ ታማ ላጩ ላቢደ ዎꬌዳ። 23 ሀ ሄዙ ቃሸቴዳ አሳቱ፥ ሽድራቅ፥ ምሻቅነ አብዳናጉ፥ ኤጽያ እቶነ ታማ ግዶ ዎꬌድኖ።

24 ሄዋፐ ጉይያን፥ ካቲ ናቡካዳናጾር ባረና ማላልስና ኤለካ ደንድ ኤቂደ፥ “ኑን ቃቺደ ኤጽያ እቶንያ ታማ ግዶ ኦሌዳ አሳቱ ሄዛ ግድክኖየ?” ያጊደ ባረና ዞርያዋንታ ኦቼዳ።

ኡንቱንቱ፥ “ካትያዉ፥ ኤ ሄዛ” ያጊደ ዛሬድኖ።

25 ካቲ ዛሪደ፥ “በእተ፥ ታን ቃሹዋፐካ ብለቴዳ፥ ታማ ግዶን ያ፥ ሃ ሀመትያ፥ ታማይካ አይነ ቦቼና ኦይዱ አሳቱዋ በአይ! ኦይደንꬁ ቃይ ጾሳቱዋ ናኣ ማላቴ” ያጌዳ።

26 ያትና፥ ናቡካዳናጾር ኤጽያ እቶነ ታማ ማታ ሺቂደ፥ ባረ ቃላ ꬎቁ ኦꬂደ፥ “ኡባፐ ꬎቂያ ጾሳ ቆማቶ፥ ሽድራቃ፥ ምሻቃ፥ አብዳናጎ፥ ከስተ! ሃይተ!” ያጊደ ጼጌዳ። ያትና፥ ሽድራቅ፥ ምሻቅነ አብዳናጉ ታማ ግዶፐ ከሴድኖ። 27 ካትያፐ ጋርሳና ቢታ ሞድያዋንቱ፥ ሱንꬃቱ፥ አዉራጃ ሞድያዋንቱ፥ ካትያዉ ኦꬅያ ሀራ ካፓቱ ኡባይ ኡንቱንቱኮ ሺቄድኖ። ታማይ ኡንቱንቱ ቦላ ቦችቤናዋ፥ ኡንቱንቱ ሁጲያ ብናናፐ እቱካ ማላተትቤናዋ፥ ኡንቱንቱ ማዩካ ቦሸትቤናዋነ ታማ ፔኑካ ኡንቱንቱን ባይናዋ በኤድኖ።

28 ሄዋፐ ጉይያን፥ ናቡካዳናጾር ሀዋዳን ያጌዳ፤ “ስድራቃ፥ ምሳቃነ አብዳናጎ ጾሳይ ጋላተቶ! እ ባረ ኪታንቻ ኪቲደ፥ ባረናን አማነቴዳ ባረ ቆማቱዋ አሼዳ። ኡንቱንቱ ካትያ አዛዙዋ እጼድኖ፤ ባረንቱ ጾሳፐ አትና፥ ሀራ ጾሳዉ ኦꬃናፐነ ጎይናናፐ ሀይቃናዋ ዶሴድኖ። 29 ሄዋ ድራዉ፥ ሽድራቃ፥ ምሻቃነ አብዳናጎ ጾሳ ቶቺደ ሃሳይያ አይ አስካ፥ ዎይ አይ ካዉተꬃይካ፥ ዎይ ዱማ ዱማ ቃላን ሃሳይያ አይ ዛሪካ ቃንጸታናነ ሙጸታና ማላ፥ ኡንቱንቱ ጎሊካ ላለቲደ፥ ፕቱ ኦለትያ ሳኣ ግዳና ማላ፥ ታን አዋያድ። አያዉ ጎፐ፥ ሀራ አይ ጾስነ ሀዋዳን ኦꬂደ፥ አሳ አሸና” ያጌዳ።

30 ሄዋፐ ጉይያን፥ ካቲ ሽድራቃ፥ ምሻቃነ አብዳናጋ ባብሎነ ጋድያን ꬎቁ ꬎቁ ኦꬂደ ሱንꬄዳ።