1 ካቲ ናቡካዳናጾር አሳ ኡባዉ፥ ካዉተꬃቱዋ ኡባዉነ ዱማ ዱማ ቃላን ሃሳይያ ዛራቱዋ ኡባዉ ሀዋዳን ያግ፥ ዳብዳቢያ ኪቴዳ።

“ሳሮ ደኢቴ!

2 “ኡባፐ ꬎቂያ ጾሳይ ታዉ ኦꬄዳ ማላልስያነ ኦራꬃባ ታን ህንተንቶ ኦዳናዉ ኮያይ።

4 “ታን ናቡካዳናጾር፥ ታ ጎልያ እንጅያን፥ ታ ካዉተꬃ ጎልያን ሚኩዋን ደአይ። 5 እት ጋላስ ታን ያሽያ አኩሙዋ አኩመታድ። ታን ታ አርሳን ዛቁላደ፥ በኤዳ አኩሙነ ሳጻይ ታና ዳጋንꬄዳ። 6 ሄዋ ድራዉ፥ ሀ አኩሙዋ ብለꬃ ታና ኤርሳና ማላ፥ ባብሎነን ደእያ ካትያ ዞርያዋንታ ኡባ ታኮ አሀናዳን አዛዛድ። 7 ሄ ዎደ ሻሬቾቱ፥ ሙሩንያዋንቱ፥ አያንትያዋንቱነ ጾልንትያ ጼሊደ ካይያዋንቱ ታኮ ዪና፥ ታ አኩሙዋ ኡንቱንቶ ኦዳድ፤ ሽን ኡንቱንቱ ብለꬃ ታና ኤርሳናዉ ዳንዳይበይክኖ። 8 ዉርሰꬃን ታ ጾሳ ሱንꬃን ብልጻሶራ ጌተት ጼገትያ፥ ጌሻ ጾሳቱዋ አያናይ አን ደእያ ዳኔል ታኮ ገልና፥ አዉ ታ አኩሙዋ ሀዋዳን ጋደ ኦዳድ።

9 “አꬌዳ ኤራንቻቱዋ ካፑዋ ብልጻሶራ፥ ጌሻ ጾሳቱዋ አያናይ ኔናን ደእያዋነ አያ ጹርነ ኔፐ ጌመናዋ ታን ኤራይ። ታን አኩመቴዳ አኩሙ ሀዋ፤ አነ ታዉ አ ብለꬃ ኦዳ።

10 “ታን ታ አርሳን ዛቁላደ፥ ቢታዉ ግዶ ልክያን እት ምꬃይ ኤቄዳዋ ሳጻን በኣድ፤ ሄ ምꬃዉ ጌሳይ ዳሮ አዱሳ። 11 ሄ ምꬃይ ድጪደ ግታቴዳነ ምኔዳ፤ አዉ ጼራይ ሳሉዋ ጋኬ፤ ሳኣፐ ሳኣ ጋጻ ጋካናዉ ቤቴ። 12 ሄ ምꬃ ሀይꬃይ ጼላናዉ ሎእያዋ፤ አ አይፊካ ሎይꬅ ዳራ፤ ኡባዉካ ምያባይ አን ደኤ። ዎራ ዶአቱ አ ኩዋን ሸምፔድኖ፤ ሳሉዋ ካፎቱካ አ ዳሻ ግዶን ኬጺደ ደኤድኖ። ፓጻ ደእያ ኡባይ አፐ ሜዳ።

13 “ታ አርሳን ዛቁላደ፥ ጌሻ ኪታንቻይ ሳሉዋፐ ዎꬍሽን ሳጻን በኣድ። 14 እካ ባረ ቃላ ꬎቁ ኦꬂደ፥ ሀዋዳን ያጌዳ፤ ‘ሀ ምꬃ ቃንጽተ፤ አ ታሽያ ካርተ፤ አ ሀይꬃካ ፕሪጽተ፤ አ አይፍያካ ላልተ። አ ጋርሳን ደእያ ዶአቱነ አ ዳሻን ደእያ ካፎቱ ኡባይ ባቃትኖ። 15 ሽን ዱሩማነ አ ጻጱዋ፥ ብራታፐነ ናሃስያፐ ቆጼዳ ሳንሳላታን ቃቺደ፥ ሳኣን፥ ማታ ግዶን አግ ባሽተ። ሳሉዋፐ ዎꬍያ ከተርሳን ካሎ፤ ቃይ ባዙዋን ማታ ግዶን ዶኣና ደኦ። 16 አ ዎዛናይ ካሀይ አሳዋፐ ዶኣዉ ላመቶ። ሄዋዳን ሀን ደእሽን፥ አ ቦላ ላፑን ላይꬃይ ዉሮ። 17 ኡባፐ ꬎቂያ ጾሳይ አሳ ናናቱ ካዉተꬃ ኡባ ሞድያዋ፥ ካዉተꬃ እ ባረ ኮይያ ኡራዉ እምያዋነ ሀራይ አቶ፥ አሳ ኡባፐ ካቴዳዋንታካ እ ሱንꬅያዋ ፓጻ ደእያ አሳይ ኡባይ ኤራና ማላ፥ ቃሸቴዳ ቆፋ ኪታንቻቱ አዋዬድኖ። ፕርዳካ ጌሻቱ ኦዴድኖ’ ያጌዳ።

18 “ታን ካቲ ናቡካዳናጾር አኩመቴዳ አኩሙ ሀዋ። ሀእ ስም ብልጻሶራ፥ ታዉ አ ብለꬃ ኦዳ። አያዉ ጎፐ፥ ታ ካዉተꬃ ግዶን ደእያ ካትያ ዞርያዋንቱፐ እቱነ ታና ብለꬃ ኤርሳናዉ ዳንዳይቤና፤ ሽን ጌሻ ጾሳቱዋ አያናይ ኔናን ደእያ ድራዉ፥ ኔን ዳንዳያሳ” ያጋድ።

19 ሄ ዎድያን ብልጻሶራ ጌተትያ ዳኔል ዳጋሚደ፥ ሀንያዋ ꬋዬዳ። እ ባረ ቆፋን ሻባረቴዳ ድራዉ፥ ጉꬃ ዎድያ ጮኡ ጊደ ታኬዳ። ያትና፥ ካቲ፥ “ብልጻሶራ፥ ሀ አኩሙነ አ ብለꬃይ ኔና ዳጋንꬆፖ” ያጌዳ።

ብልጻሶር ዛሪደ፥ “ታ ጎዳዉ፥ ሀ አኩሙ ኔና እጽያዋንቶ፥ አ ብለꬃይካ ቃይ ነ ሞርከቶ ግዴረኔሻ! 20 ኔን አኩሙዋን በኤዳ ምꬃይ፥ ድጪደ ምኔዳዌ፥ ጼራይ ሳሉዋ ጋኬዳዌ፥ ሳኣፐ ሳኣ ጋጻ ጋካናዉ ቤቴዳዌ፥ 21 ሀይꬃይ ጼላናዉ ሎኤዳዌ፥ አይፊካ ሎይꬅ ዳሬዳዌ፥ ኡባዉ ምያባይ አን ደእያዌ፥ ባዙዋ ዶአቱ አ ኩዋን ሸምፔዳዌነ ሳሉዋ ካፎቱካ አ ዳሻ ግዶን ኬጺደ ደኤዳዌ፥ 22 ካትያዉ፥ ሄ ምꬃይ ኔና! ኔን ግታታዳነ ምናዳ፤ ነ ግታተꬃይ ድጪደ፥ ሳሉዋ ጋኬዳ፤ ነ ካተተꬃ ማታይካ ሳኣ ጋጻ ጋኬዳ።

23 “ካትያዉ፥ ኔን ጌሻ ኪታንቻይ ሳሉዋፐ ዎꬊደ፥ ‘ሀ ምꬃ ቃንጺደ ꬋይስተ፤ ሽን አ ዱሩማነ አ ጻጱዋ ብራታፐነ ናሃስያፐ ቆጼዳ ሳንሳላታን ቃቺደ፥ ሳኣን፥ ማታ ግዶን አግ ባሽተ። ሳሉዋፐ ዎꬍያ ከተርሳን እ ካሎ፤ ላፑን ላይꬃይ ዉራና ጋካናዉ፥ ባዙዋ ዶኣዳን ደኦ!’ ግያ ዎደ በኣዳ።

24 “ካትያዉ፥ አ ብለꬃይ ሀዋ። ሀዌ ኡባፐ ꬎቂያ ጾሳይ ታ ጎዳ ካትያ ቦላ ፖላናዉ ኪቴዳ ፕርዳ። 25 ኔን አሳ ግዶፐ የደርሴታደ፥ ባዙዋ ዶአቱዋና እትፐ ደአና። ኔን ቦራዳን ማታ ማናነ ሳሉዋፐ ዎꬍያ ከተርሳን ካላና። ቃይ ኡባፐ ꬎቂያ ጾሳይ አሳ ናናቱ ካዉተꬃ ኡባ ሞድያዋነ ካዉተꬃ ባረ ኮዬዳ ኡራዉ እምያዋ ኔን ኤራና ጋካናዉ፥ ላፑን ላይꬃይ ነ ቦላን አꬋና።

26 “ዱሩማይ ባረ ጻጱዋና ጋድያን አታናዳ አዛዘቴዳዌ፥ ኔን ሳሉዋ ጾሳይ ቢታ ኡባ ሞድያዋ ኤርያ ዎደ፥ ነ ካዉተꬃይ ነዉ ስማናዋ በሰ። 27 ሄዋ ድራዉ፥ ካዎ፥ ታ ዞርያ አካ። ናጋራ ኦꬅያዋ አጋደ፥ ጽሎባ ኦꬃ፤ መቱዋን ኡቁነቴዳዋንታ ናቂያዋ አጋደ፥ ኡንቱንቶ ቃረታ። ያቶፐ፥ ኔን ሳሮ ደአና ዎዲ አዱቀናን አገና” ያጌዳ።

28 ሀዌ ኡባይ ካትያ ናቡካዳናጾረ ቦላ ጋኬዳ። 29 ታማነ ላኡ አግናፐ ጉይያን፥ ካቲ ባብሎነን ደእያ ካትያ ጎልያ ቦላ ደምባይ ኬጼዳሳን ሀመቲደ 30 ሀዋዳን ያጌዳ፤ ሀዌ ታ ካዉተꬃ ጎሊ አን ደአና ማላ፥ ታን ታ ዎልቃማ ዎልቃን፥ ታ ግታተꬃ ቦንቾ ግምቢሴዳ ባብሎነ ካታማ ግታ ግደኔ? ያጌዳ።

31 እ ሃሳዪደ ዉርሰናን ደእሽን፥ ሳሉዋፐ ሀዋዳን ግያ ቃላይ ፑቱ ጌዳ፤ ካትያ ናቡካዳናጾራ፥ ነ ቦላን ፕርደቴዳ ፕርዳይ ሀዋ: ነ ካዉተꬃይ ኔፐ አከቴዳ። 32 ኔን አሳ ግዶፐ የደርሰታደ፥ ባዙዋ ዶኣና ደአና፤ ኔን ቦራዳን ማታ ማና። ኡባፐ ꬎቂያ ጾሳይ አሳ ናናቱ ካዉተꬃ ኡባ ሞድያዋነ ካዉተꬃ እ ባረ ኮዬዳ ኡራዉ እምያዋ ኔን ኤራና ጋካናዉ፥ ላፑን ላይꬃይ ነ ቦላ አꬋና ያጌዳ።

33 ናቡካዳናጾረ ቦላ ጌዳዌ ባሱዋናካ ፖለቴዳ። አሳ ግዶፐ ጎደቲደ፥ ቦራዳን ማታ ሜዳ። አ ቦላይካ ሳሉዋፐ ዎꬍያ ከተርሳን ካሌዳ። አ ብናናይ አንኩዋ ባልያዳን፥ አ ጹጉንꬃይካ ካፉዋ ጹጉንꬃዳን ድጬዳ።

34 ሄ ላፑን ላይꬃይ ዉሬዳ ዎደ፥ ታን ናቡካዳናጾረ ꬎቁ ጋደ ሳሉዋ ጼላድ፤ ታ ዎዛናይ ካሀይካ ስሜዳ። ኡባፐ ꬎቂያ ጾሳ ጋላታድ፤ መꬍናዉ ደእያዋካ ቦንቻድነ ሳባድ።

36 ታ ዎዛናይ ስሚና፥ ታ ካዉተꬃ ቦንቹዋ ድራዉ፥ ታ አንጋይነ ታ ፑላይ ታዉ ስም አጌዳ። ካሰ ታና ዞርያዋንቱነ ታ ካፓቱ ታና ኮዬድኖ። ታን ታ ካዉተꬃን ምናድ፤ ካሰዋፐካ አꬍያ ግታተꬃይ ታዉ ጉጀቴዳ።

37 ሀእ ስም ታን ናቡካዳናጾር ሳሉዋ ካትያ ጋላታይ፤ አ ꬎቁ ꬎቁ ኦꬃይነ ቦንቻይ። አያዉ ጎፐ፥ እ ኦꬅያባይ ኡባይ ልከ፤ አ ኦገቱ ኡባይካ ጽሉዋ፤ ቃይ ኦቶሩዋን ብያዋንታ እ ካዉሻናዉ ዳንዳዬ ያጌዳ።