1 እት ጋላስ ካቲ በልሻጻር ባረ ኦሳንቻቱዋፐ እት ሻአቶ ግብራ ጊግሲደ ኡንቱንቱና እትፐ ዎይንያ ኤሳ ኡሼዳ። 2 በልሻጻር ዎይንያ ኤሳ ኡሺደ ማꬆቴዳ ዎደ፥ ባረ አዉ ናቡካዳናጾር የሩሳላመን ደእያ ጌሻ ጎልያፐ አሄዳ ዎርቃፐነ ብራፐ ኦሰቴዳ ኡሻ ሚሻቱዋ አሀና ማላ አዛዜዳ። አያዉ ጎፐ፥ እነ አ ኦሳንቻቱ፥ አ ማቼቱነ አ ባኮቱ ኡባይ ሄ ኡሻ ሚሻቱዋን ኤሳ ኡሻና ማላ፥ እ ኮዬዳ። 3 ያትና፥ ኡንቱንቱ ሄ የሩሳላመን ደእያ ጾሳ ጌሻ ጎልያፐ አሄዳ ዎርቃፐ ኦሰቴዳ ኡሻ ሚሻቱዋ ካትያዉ አሄድኖ። ካቲ፥ አ ኦሳንቻቱ፥ አ ማቼቱነ አ ባኮቱ ሄ ሚሻቱዋን ትገቴዳ ዎይንያ ኤሳ ኡሼድኖ። 4 ኡንቱንቱ ሄ ዎይንያ ኤሳ ኡሺደ፥ ዎርቃፐ ብራፐ፥ ናሃስያፐ፥ ብራታፐ፥ ምꬃፐነ ሹቻፐ ኦሰቴዳ ጾሳቱዋ ጋላቴድኖ።

5 ሄ ዎደ ቆፐናን ደእሽን፥ አሳ ኩሽያ ብራቱ ሀቃፐንቶ ከሲደ ዪደ፥ ካትያ ጎልያን ላሳነቴዳ ጎዳ ቦላን፥ ጾምፕያ ዎꬅያ ባላ ስንꬃን ጻፌዳ። ሄ ኩሺ ጻፍያ ዎደ፥ ካቲ ባረ ሁጲያን በኤዳ። 6 አ ሶምኢ ላመቲደ፥ ብድንꬃ ማላቴዳ፤ ቃይ ያሻን አ ጋዲ ኮኮሬዳ፤ አ ጉልባታይካ እጼዳ።

7 ካቲ ባረ ቃላ ꬎቁ ኦꬂደ፥ ሙሩንያዋንታ፥ ጾልንትያ ጼሊደ ካይያዋንታነ ሻሬቾቱዋ አሀናዳን አዛዜዳ። ኡንቱንቱ ዪና ባብሎነ አꬌዳ ኤራንቻቱዋ ሀዋዳን ያጌዳ፤ “ሀ ጽፋትያ ናባቢደ፥ አ ብለꬃ ታዉ ኦድያ ኡራይ ኦንነ፥ ኦቻ ቴራ ማላትያ ማዩዋ ማያና፤ አ ቆꬍያን ዎርቃ ሀብልያ አꬃና፤ ቃይ እ ታ ካዉተꬃ ሞድያ ሄዘንꬆ አሳ ግዳናዋ” ያጌዳ።

8 ሄዋፐ ጉይያን፥ ካትያ ዞርያዋንቱ ኡባይ አ ስንꬃ አꬌድኖ፤ ሽን ኡንቱንቱፐ ኦንነ ሄ ጽፋትያ ናባባናዉ፥ ዎይ አ ብለꬃ ኦዳናዉ ዳንዳይቤና። 9 ሄዋን ካቲ በልሻጻር ካሰዋፐ አꬍ ዳጋምና፥ አ ሶምኢካ ካሰዋፐ አꬍ ብድንꬃ ማላቴዳ። አ ካፓቱካ ሀንያዋ ꬋዬድኖ።

10 ካቲነ አ ካፓቱ ጫቡዋ አ ዳያ ካታታ ስሳደ፥ ኡንቱንቱ ግብራ ምያ አኮ ጎልያ ገላደ፥ ሀዋዳን ያጋዱ፤ “ካትያዉ፥ መꬍናዉ ደአ! ሀ ቆፋን ሎይꬃ ሻባረቶፓ፤ ነ ሶምኢካ ላመቶፖ። 11 ጌሻ ጾሳቱዋ አያናይ አን ደእያ እት አሳይ ነ ካዉተꬃ ግዶን ደኤ። ኤራይ፥ አኬካይነ ጾሳቱዋ ማላ አꬌዳ ኤራተꬃይ አን ደኤ። ካሰ ነ አዉ ካቲ ናቡካዳናጾር አ ሻሬቾቶ፥ ሙሩንያዋንቶ፥ ጾልንትያ ጼሊደ ካይያዋንቶነ አያንትያዋንቶ ካፑዋ ኦꬂደ ሱንꬄዳ። 12 አያዉ ጎፐ፥ አዉ ሎኦ አያናይ፥ ኤራይነ አኬካይ ደኤ፤ አኩሙዋ ብላናዉ፥ ቃንእሽያ ኦዳናዉነ ጹራ ቆንጭሳናዉ እ ዳንዳዬ። ሄዋ ድራዉ፥ ካቲ ብልጻሶራ ጊደ ሱንꬄዳ ዳኔላ ጼሳ። እ ነዉ ጽፋትያ ብለꬃ ኦዳና” ያጋዱ።

13 ሄ ዎደ ዳኔላ ካትያኮ አህና፥ ካቲ አ ሀዋዳን ያጌዳ፤ “ኔን ዳኔሌ? ታ አዉ ካቲ ይሁዳፐ ኦሞዲደ አሄዳዋንቱፐ እቱዋ ግያዌ ኔኔ? 14 ጾሳቱዋ አያናይ ኔናን ደእያዋነ ኤራይ፥ አኬካይነ ሎይꬅ አꬌዳ ኤራተꬃይ ነዉ ደእያዋ ታን ስሳድ። 15 ሀ ጽፋትያ ናባባናዉነ አ ብለꬃ ታዉ ኦዳናዉ ሙሩንያዋንቱነ ካትያ ዞርያዋንቱ ዬድኖ፤ ሽን ኡንቱንቱ ብለꬃ ታዉ ኦዳናዉ ዳንዳይበይክኖ። 16 ኔን ብለꬃ ኦዳናዉነ ዴጾ ኦሻቱዋ ዛሩዋ እማናዉ ዳንዳይያዋ ታን ስሳድ። ሀእ ስም ኔን ሀ ጽፋትያ ናባባናዉነ አ ብለꬃ ታዉ ኦዳናዉ ዳንዳዮፐ፥ ኦቻ ቴራ ማላትያ ማዩዋ ማያና፤ ነ ቆꬍያን ዎርቃ ሀብሊ አꬋና፤ ቃይ ኔን ካዉተꬃ ሞድያ ሄዘንꬆ አሳ ግዳናሳ” ያጌዳ።

17 ዳኔል ካትያዉ ዛሪደ፥ “ኔን እምያ እሙ ኔሳ ግዶ፤ ነ ዎይቱዋካ ሀራ ኡራዉ እማ። ሀኖፐነ ታን ጽፋትያ ካትያዉ ናባባና፤ ብለꬃካ ኦዳና።

18 “ካትያዉ፥ ኡባፐ ꬎቂያ ጾሳይ ነ አዉዋ ናቡካዳናጾራዉ ካተቱዋ፥ ግታተꬃ፥ ቦንቹዋነ አንጋ እሜዳ። 19 እ አዉ እሜዳ ግታተꬃ ጋሱዋን ሄ አሳቱነ ዱማ ዱማ ቃላ ሃሳይያ ዛራቱ አዉ ያዬድኖነ ኮኮሬድኖ። ባረ ዎꬋናዉ ኮይያዋ ዎꬌዳ፤ አሻናዉ ኮይያዋካ አሼዳ፤ ባረ ꬎቂሳናዉ ኮዬዳዋካ ꬎቂሴዳ፤ ካዉሻናዉ ኮዬዳዋካ ካዉሼዳ። 20 ሽን እ ኦቶረቴዳ ዎደነ አ ዎዛናይ ሙሜዳ ዎደ፥ ባረ ካዉተꬃ አራታፐ ዎꬌዳ፤ አ ቦንቹካ ቃረቴዳ። 21 አሳ ግዶፐ የደርሰቴዳ፤ አ ዎዛናይ ካሀይካ ላመትና፥ ዶኣ ማላ ግዴዳ። ቦራዳን ማታ ሚደ፥ ደምባ ሀረቱዋና እትፐ ደኤዳ። አ ቦላይካ ሳሉዋፐ ዎꬍያ ከተርሳን ጽርክኬዳ። ሄዌካ ኡባፐ ꬎቂያ ጾሳይ አሳ ናናቱ ካዉተꬃ ኡባ ሞድያዋነ እ ባረ ኮዬዳ ኡራዉ እምያዋ እ ኤራና ጋካናሳ።

22 “ሽን ነኖ፥ በልሻጻራ፥ ኔን አ ናአይ ሄ ኡባ ኤራደካ፥ ነ ሁጲያ ዝቂ ኦꬃባካ። 23 ቃይ ሳሉዋ ጎዳ ቦላን ኦቶረታደ፥ ነ ሁጲያ ꬎቁ ꬎቁ ኦꬃዳ። አ ጌሻ ጎልያፐ ቦንቂያን ዬዳ ዎርቃ ሚሻቱዋ ኔን አህስና፥ ነ ኦሳንቻቱ፥ ነ ማቼቱነ ነ ባኮቱ ዎይንያ ኤሳ ኡንቱንቱን ኡሼድኖ። ቃይ ጼላናዉ፥ ስሳናዉነ ኤራናዉ ዳንዳየና ጾሳቱዋ፥ ብራፐ፥ ዎርቃፐ፥ ናሃስያፐ፥ ብራታፐ፥ ምꬃፐነ ሹቻፐ ኦሰቴዳዋንታ ጋላታዳ። ነ ሸምፑዋነ ነ ገላ ከሳ ባረ ኩሽያን ኦይቄዳ ጾሳ ቦንቻበይካ። 24 ሄዋ ድራዉ፥ ሀ ኩሽያ ብራቱ አፐ ኪተትና፥ ሀ ጽፋቲ ጻፈቴዳ።

25 “ጻፉካ፥ ‘ማነ፥ ማነ፥ ተቀል፥ ፓሬስ’ ያግያዋ። 26 አ ብለꬃይካ ሀዋ፦

29 ሄዋፐ ጉይያን፥ በልሻጻር አዛዝና፥ ኦቻ ቴራ ማላትያ ማዩዋ ዳኔላ ማይዜድኖ፤ አ ቆꬍያንካ ዎርቃ ሀብልያ አꬄድኖ፤ ቃይ ካዉተꬃ ሞድያ ሄዘንꬆ አሳ ግዳናዳን አዋዬድኖ። ዶመꬃ 41:42

30 ሄ ጋላስ ቃማ ሞርከቱ ገሊደ፥ ባብሎነ ካትያ በልሻጻራ ዎꬌድኖ። 31 አ ካዉተꬃ ሜዶንያ ዳርዮሰ አኬዳ። ሄ ዎደ ዳርዮሳዉ ላይꬃይ ኡሱፑን ታማነ ላአ።