1 ካቲ ዳርዮሰ ባረ ካዉተꬃ ኡባ ግዶን ባረፐ ጋርሳና ቢታ ሞድያ ጼታነ ላታሙ አሳቱዋ ሱንꬅያዌ ሎአ ጊደ ቆፔዳ። 2 ቃይ ካትያዉ አያነ ፓጭሰናዳን፥ ሄ ቢታ ሞድያዋንታ ጼላና ማላ፥ ሄዙ አሳቱዋ ካፑዋ ኦꬂደ ዶሬዳ፤ ዶረቴዳዋንቱፐ እቱ ዳኔላ። 3 ዳኔል ኦሱዋ ኦꬃናዉ ባረዉ ደእያ ዱማ ኤራን ሀራ ካፓቱዋፐነ ቢታ ሞድያዋንቱፐ አꬊደ ቤቴዳ። ሄዋ ድራዉ፥ ካቲ አ ባረ ኩመንꬃ ካዉተꬃ ቦላ ꬎቃ ኦꬂደ ሱንꬃናዉ ሀልቼዳ።

4 ያትና፥ ቢታ ሞድያዋንቱነ ካፓቱ ዳኔላ ሞታናዉ፥ እ አይስያ አይሱዋ ቦላ ባላ ደማና ጊደ ኮዬድኖ። ሽን እ ሎይꬅ ሱረነ አማነትያ አሳ፤ ቃይ ጌላባ ኦና አሳ ግዴዳ ድራዉ፥ አ ሞታናዉ አ ቦላ አይ ባላነ ደምበይክኖ። 5 ዉርሰꬃን ኡንቱንቱ ጊደ፥ “አ ጾሳ ህግያ ባጋና ግዶፐፐ አትና፥ ሀራ ባጋና ዳኔላ ሞትያባ ደሞኮ” ያጌድኖ።

6 ሄዋፐ ጉይያን፥ ቢታ ሞድያዋንቱነ ካፓቱ እትፐ ካትያኮ ቢደ፥ ሀዋዳን ያጌድኖ፤ “ካትያዉ ዳርዮሳ፥ መꬍናዉ ደአ! 7 ኑን ነ ካዉተꬃ ኦሱዋ ኦꬅያ ካፓቱ፥ ቢታ ሞድያዋንቱ፥ ኦላ ጋዳዋቱ፥ ዞርያዋንቱነ አዉራጃ ሞድያዋንቱ ኡባይ ማዬዳ እት ዞረታይ ደኤ። ሄዌካ ሀችፐ ቢደ ሀታሙ ጋላሳይ ጋካናዉ፥ አይ አሳይነ ኔና ካትያ ዎሳናፐ አትና፥ ሀራ አይ አሳካ ዎይ አይ ጾሳካ ዎሰናዳን፥ ኔን አዋዩዋ ከሳናዳን ኢጼዳ ዎስያዌ ደኦፐ፥ ጋሞቱዋ ኦላን ኦለታናዳን ኔን አዛዛናሳ። 8 ስም ካትያዉ፥ ሀ አዋዩ ሻረተና ሜዶናቱዋነ ፓርሰቱዋ ህግያዳን፥ ምኖነ ላመተናዋ ግዳና ማላ ፓራማ” ያጌድኖ። 9 ሄዋ ድራዉ፥ ካቲ ዳርዮሰ አዋዩዋ ጻፊደ ፓራሜዳ።

10 ዳኔል አዋዩ ፓራመት ከሴዳዋ ኤሬዳ ዎደ፥ ባረ ጎለ ቤዳ፤ ፖቅያን ደእያ ክፍልያ ገሌዳ። ሄ ክፍልያ ማስኮቲ የሩሳላመ ባጋ ስሚደ ዶየት ደእሽን፥ ባረ ካሰ ዎስያዋዳንካ ጉልባቲደ፥ ባረ ጾሳ ጋላቲደ፥ ሀች ሀች ሄዙ ገደ ዎሴዳ።

11 ሄዋፐ ጉይያን፥ ሀ አሳቱ እትፐ ቢደ፥ ዳኔል ባረ ጾሳ ዎስሺናነ ማዱዋ ኦችሽን ደሜድኖ። 12 ካትያኮ ቤድኖ፤ ካትያ፥ “ካትያዉ፥ ሀ ሀታሙ ጋላሳቱዋ ግዶን ኔና ዎሳናፐ አትና፥ ሀራ አይ አሳካ ዎይ አይ ጾሳካ ዎስያዌ ጋሞቱዋ ኦላን ኦለታናዳን አዋያበይኪየ?” ያጊደ አዋዩዋባ ሃሳዬድኖ።

ካቲ ዛሪደ፥ “አዋያድ፤ አዋዩ ሻረተና ሜዶናቱዋነ ፓርሰቱዋ ህግያዳን ምኔዳዋ” ያጌዳ።

13 ኡንቱንቱ፥ “ካትያዉ፥ ያትና ሄኮ ይሁዳፐ ኦሞደቲደ፥ ዬዳዋንቱፐ እቱዋ ግድያ ዳኔል፥ ነዉካ ኔን ፓራማደ ከሴዳ ነ አዋዮካ አዛዘተና። እ ሀእካ ሀች ሀች ሄዙ ገደ ባረ ጾሳ ዎሴ” ያጌድኖ።

14 ካቲ ሄዋ ስሴዳ ዎደ ሎይꬅ ካዮቴዳ፤ ዳኔላ አሻናዉ ቆፋ ቃቺደ፥ አዋይ ዉላና ጋካናዉ፥ አሽያ ኦግያ ኡባ ኮዬዳ።

15 ሄ ዎደ አሳቱ እትፐ ካትያኮ ቢደ፥ “ካትያዉ፥ ሜዶናቱዋነ ፓርሰቱዋ ህግያዳን ግዶፐ፥ ካቲ አዋዬዳ አዋዩ ዎይ አዛዜዳ አዛዙ ላመተናዋ ነዉ ኤራ” ያጌድኖ።

16 ሄዋ ድራዉ፥ ካቲ አዛዝና፥ ዳኔላ አሂደ፥ ጋሞቱዋ ኦላን ኦሌድኖ። ካቲ ዳኔላ፥ “ኔን ኡባ ገደ ጎይንያ ጾሳይ ኔና አሾ” ያጌዳ። 17 ኡንቱንቱ ሹቻ አሂደ፥ ኦላ ዶና ባሬድኖ፤ ዳኔላ ቦላ ኦሰቴዳባይ ላመተና ማላ፥ ካቲ ባረ ማታፋነ ባረ ካዉተꬃ ካፓቱዋ ማታፋ ጎርዴዳ ሹቻ ቦላ ዎꬄዳ። 18 ሄዋፐ ጉይያን፥ ካቲ ባረ ጎልያ ስሚደ፥ ቁማ ሜናንነ ፓሽክስያዋ አያካ ባረኮ ሺሸናን፥ ገምእሹዋና ꬋዪደ አቄዳ።

19 ዎንታ ጉራን ካቲ ደንዲደ፥ ኤሌሊደ ጋሞቱዋ ኦላኮ ቤዳ። 20 ኦላኮ ጋኪደ ካዩዋን፥ “ደኡዋ ጾሳ ቆማዉ ዳኔላ፥ ኔን ኡባ ገደ ጎይንያ ነ ጾሳይ ኔና ጋሞቱዋፐ አሻናዉ ዳንዳዬዴ?” ያጊደ ጼሴዳ።

21 ዳኔል ዛሪደ፥ “ካትያዉ፥ መꬍናዉ ደአ! 22 ታ ጾሳይ ባረ ኪታንቻ ኪቲደ፥ ጋሞቱዋ ዶና ጎርዴዳ፤ ኡንቱንቱ ታና ቦችበይክኖ። አያዉ ጎፐ፥ ታን አ ስንꬃን ጽሉዋ። ቃይ ካዎ፥ ታን ነ ስንꬃንካ ኢታባ ኦꬃበይከ” ያጌዳ።

23 ካቲ ሎይꬅ ናሸቴዳ፤ ዳኔላ ኦላፐ ከሳናዳን አዛዜዳ። ዳኔል ኦላፐ ከሴዳ፤ ባረ ጾሳን እ አማነቴዳ ድራዉ፥ አ ቦላን አያ ደሸቴዳ ሳአይካ ቤትቤና።

24 ሄዋፐ ጉይያን፥ ዳኔላ ሞቴዳ አሳቱዋ አሀናዳን ካቲ አዛዜዳ። ኡንቱንቱ ኦይቀቲደ፥ ባረንቱ ማጫ አሳናነ ባረንቱ ናናቱዋና እትፐ ዪደ፥ ኡባይካ ጋሙዋ ኦላን ኦለቴድኖ። ኡንቱንቱ ኦላ ዉርሰꬃ ጋከናን ደእሽን፥ ጋሞቱ ሶጲ አኪደ፥ ኡንቱንቱ መቀꬃ መንሬꬄድኖ።

25 ሄዋፐ ጉይያን፥ ካቲ ዳርዮሰ አሳ ኡባዉ፥ ካዉተꬃቶ ኡባዉነ ዱማ ዱማ ቃላን ሃሳይያ ዛረቶ ኡባዉ ሀዋዳን ያጊደ ጻፌዳ፦

“ሳሮ ደኢቴ!

26 “ታ ካዉተꬃን ደእያ አሳይ ኡባይ ዳኔላ ጾሳዉ ያያና ማላነ ኮኮራና ማላ፥ ታን አዋዩዋ ከሳድ።

28 ሄዋ ድራዉ፥ ሀ ዳኔል ዳርዮሳ ካዉተꬃ ዎደነ ፓርስያ ቂሮሳ ካዉተꬃ ዎደ ኡባን እሻሊደ ደኤዳ።