1 ባብሎነ ካቲ በልሻጻር ካተቴዳ ኮይሮ ላይꬅ፥ ዳኔል ባረ አርሳን ዛቁሊደ፥ አኩሙዋነ ሳፃ በኤዳ። እ ባረ አኩሙዋን በኤዳ አይፈ የዎቱዋ ጻፌዳ።

2 ዳኔል ሀዋዳን ያጊደ ጻፌዳ፤ “ቃማ ታን ታ ሳጻን ሳሉዋፐ ዬዳ ኦይዱ ጫርኮቱ ዎጋ አባ ቡልአክሽን በኣድ። 3 ቃይ እቱ እቱዋፐ ዱማትያ ኦይዱ ዎልቃማ ዶአቱ አባፐ ከሴድኖ። ሳፃ 13:1፤ 17:8

4 “ኮይሮ ዶአይ ጋሙዋ ማላቴ፤ ቃይ አዉ አንኩዋዳን ቀፊ ደኤ። ታ ጼልሽን፥ አ ቀፊ ሾደትና፥ ሳኣፐ ደንዲደ፥ አሳዳን ላኡ ገድያን ኤቃናዳን ኦሰቴዳ፤ ቃይ አሳ ዎዛናይካ አዉ እመቴዳ። ሳፃ 13:2

5 “ቃይ ላኤንꬆ ዶአይ እት ባጋ ꬎቁ ጊደ ኤቄዳ ባባንꬃ ግያ ኢታ ዶኣ ማላቴ። ሄ ዶአይ ሄዙ ጋይልያ መቀꬃ ባረ ዶናን ባሪደ፥ ባረ ማታን ሳእ ኦይቄዳ። ያቴዳዌ፥ ‘ደንዳደ ዳሮ አሹዋ ማ’ ጌተቴዳ።

6 “ሄዋፐ ስምና ቃይ፥ ማህያ ማላትያ ሀራ ዶኣ በኣድ። አ ዞክያን ካፉዋ ቀፍያ ማላትያ ኦይዱ ቀፈቱ ደኢኖ። ቃይ አዉ ኦይዱ ሁጰቱ ደኢኖ። ሀ ዶአዉ ሞድያ ማታይ እመቴዳ።

7 “ሄዋፐ ስምና፥ ቃማ ሳጻን ያሽያ፥ ዳጋንꬅያነ ሎይꬅ ምንያ ኦይደንꬆ ዶኣ በኣድ። አዉ ዎልቃማ ብራታ አቻቱ ደኢኖ። እ ባረናን ጋከቴዳዋ ኡባ ኡንቱንቱን መንሬꬂደ ሜነ አቴዳዋ ባረ ገድያን የሬꬄ። ካሰ ታ በኤዳ ዶአቱዋ ኡባፐ እ ዱማቴ፤ አዉ ታሙ ካጪ ደኤ። ሳፃ 12:3፤ 13:1 8 ታን ሀ ካጨቱዋባ ቆፕሽና፥ ሄ ካጨቱዋ ግዶፐ ሀራ እት ጉꬃ ካጪ ከስሽን በኣድ፤ ሄ ካጪ የንኮ ካጨቱዋፐ ሄዛቱዋ ꬎቆሊደ ኦሌዳ። ሀ ካጭያዉ አሳ አይፍያ ማላትያ አይፊነ ኦቶሩዋን ሃሳይያ እንጻርሳይ ደኤ። ሳፃ 13:5-6

9 “ታን ሄዋ ጼልሽን፥ ካተቱዋ አራታቱ ኡተꬃዉ ጊጌድኖ። መꬍናፐ ደእያዌ ባረ አራታን ኡቴዳ። አ ማዩ ሻቻዳን፥ አ ሁጲያ ብናናይካ ፑቱዋዳን ቦꬃ። አ አራታይነ አራታ ይንግረꬃቱ ታማዳን ላጮቲኖ። ሳፃ 20:4፤ 1:14 10 ታማ ሻፋይ አ ስንꬃፐ ፑልቲደ ከሴ። ሻአ ገደ ሻአቱ አዉ ኦꬂኖ፤ ቃይ ዳሮ ሚሎነቱ አ ስንꬃን ኤቄድኖ። ያት ደእሽን ፕርዳ ፕርድያዌ ዶመቴዳ፤ ማጻፋቱካ ዶየቴድኖ። ሳፃ 5:11፤ 20:12

11 “ሀ ጉꬃ ካጪ ሃሳይያ ኦቶሮ ቃላይ ታዉ ስሰትያ ድራዉ፥ ታን ሀእካ ꬊሽሳደ ጼላድ። ታን ጼልሽን ሀ ዶአይ ሀይቂደ፥ ኤጽያ ታማን ኦለቲደ ꬋዬዳ። 12 የንኮ ሄዙ ዶአቱዋፐ፥ ኡንቱንቱ ማታይካ አከቴዳ፤ ሽን ኡንቱንቱ ኬረቴዳ ዎድያ ፓጻ ደእኖ ጌተቴድኖ።

13 “ቃይካ ታን ሄ ቃማ ሳጻን፥ አሳ ናኣ ማላትያዌ ሳሉዋ ሻርያና ይያዋ በኣድ። መꬍናፐ ደእያዋኮ ሺቅና፥ ኡንቱንቱ አ አ ስንꬃ አꬄድኖ።ማቶሳ 24:30፤ 26:64፤ ማር. 13:26፤ 14:62፤ ሉቃሳ 21:27፤ ሳፃ 1:7፣ 13፤ 14:14 14 አዉ ማታይ፥ ቦንቹነ ካዉተꬃይ እመቴዳ። አሳይ ኡባይ፥ ካዉተꬃቱ ኡባይነ ዱማ ዱማ ቃላን ሃሳይያ ዛራቱ ኡባይ አዉ ሞደቴድኖ። አ ማታይ መꬍናዉ ሻረተና ማታ፤ አ ካዉተꬃይ ሙለካ ꬋየናዋ።ሳፃ 11:15

15 “ታና ዳኔላ ግዶፐ፥ ታ በኤዳዋን ኡባን ዳጋማድ፤ ታ ሳጻይካ ታና ሻባርሴዳ። 16 ታን ሄዋ ኤቄዳዋንቱፐ እቱዋኮ ሺቃደ፥ ሀ ኡባዉ ቱሙ ብለꬃይ አየንቶ ኦቻድ። እ ታዉ አ ብለꬃ ኡባ ሀዋዳን ያጊደ ኦዴዳ፤ 17 ‘ሀ ኦይዱ ዎልቃማ ዶአቱ ሀ ሳኣን ስንꬃፐ ደንዳና ኦይዱ ካዉተꬃቱዋ። 18 ሽን ኡባፐ ꬎቂያ ጾሳ ጌሻቱ አ ካዉተꬃ አኪደ፥ መꬍናዉ ባረሳ ኦꬃና፤ መꬍና ካዉተꬃ ኡንቱንቱ ላታና’ ያጌዳ። ሳፃ 22:5

19 “ሄዋፐ ጉይያን፥ ታን ሀራ ዶአቱዋ ኡባፐ ዱማቲደ ያሽያ ኦይደንꬆ ዶአዉ ደእያ ቱሙ ብለꬃ ኤራናዉ ኮያድ። ሄ ዶአዉ ብራታ አቻይነ ናሃሰ ብራታ ጹጉንꬃይ ደኤ፤ እ ባረናን ጋከቴዳዋ ኡባ መንሬꬂደ ሜነ ሚሽን አቴዳዋ ባረ ገድያን የሬꬄ። 20 ቃይ ሀ ዶኣ ሁጲያን ደእያ ታሙ ካጨቱዋባነ ቃይ ጉየፐ ከሲደ፥ ኡንቱንቱፐ ሄዛቱዋ ꬎቆል ኦሌዳ ቄር ካጭያባካ ኤራናዉ ኮያድ። ሄ ቄር ካጭያዉ አይፈቱነ ኦቶሮ ቃላ ሃሳይያ እንጻርሳይ ደኤ። ሄ ካጪ የንኮቱዋ ኡባፐ አꬍ ያሽያዋ። 21 ታን ጼልሽን፥ ሀ ካጪ ጌሻቱዋና ኦላ ጋከቲደ፥ ኡንቱንታ ጾኔዳ። ሳፃ 13:7 22 ሄዌ ሀኔዳዌ፥ መꬍናፐ ደእያዌ ያና ጋካናዉነ፥ ኡባፐ ꬎቂያ ጾሳ ጌሻቶ ፕርዳይ ፕርደታና ጋካናሳ፤ ኡንቱንቱ ካዉተꬃ ላትያ ዎዲካ ጋኬዳ። ሳፃ 20:4

23 “እ ታዉ ብለꬃ ሀዋዳን ያግ ኦዴዳ፤ ‘ኦይደንꬆ ዶአይ ሀ ሳኣን ስንꬃፐ ደንዳና ኦይደንꬆ ካዉተꬃ። ሄ ካዉተꬃይ ሀራ ካዉተꬃ ኡባፐ ዱማ፤ ቢታ ሳኣ እ ማና፥ የꬋናነ መንሬꬃና። 24 ቃይ ታሙ ካጨቱ ሀ ካዉተꬃቱዋፐ ደንዳና ታሙ ካተቱዋ። ሄዋፐ ጉይያን፥ ካሰ ታሙ ካተቱዋፐ ዱማትያ ሀራ ካቲ ደንዳና። እ ኡንቱንቱፐ ሄዙ ካተቱዋ ጾኒደ ሞዳና። ሳፃ 17:12 25 እ ኡባፐ ꬎቂያ ጾሳ ቦላ ጻሊደ ሃሳያና፤ አ ጌሻቱዋካ ኡቁናና። ቃይ ዎደቱዋነ ዎጋ ላማናዉ ቃቃታናዋ። ዎዲ፥ ዎደቱነ ዎድያ ባጋይ ጋካናዉ ጌሻቱ አ ማታፐ ጋርሳና ሞደታና። ሳፃ 12:14፤ 13:5-6

26 “ ‘ሽን ሄዋፐ ጉይያን፥ ፕርዳ ፕርድያዌ ዶመታና፤ አ ማታይ ሙሊ አከታና፤ እ መꬍናዉ ꬋያና። 27 ሳሉዋፐ ጋርሳና ደእያ ካዉተꬃቱዋ ኡባ ማታይ፥ ዎልቃይነ ግታተꬃይ ኡባፐ ꬎቂያ ጾሳ ጌሻ አሳቶ እመታና። አ ካዉተꬃይካ መꬍና ካዉተꬃ ግዳናዋ፤ ሳኣ ሞድያዋንቱ ኡባቱ አዉ አዛዘታናነ አዉ ኦꬃና’ ያጌዳ። ሳፃ 20:4፤ 22:5

28 “ታ ሳጻባይ ሀዋን ዉሬዳ። ታን ዳኔል፥ ታ ቆፋን ዳሮ ሻባረታድ፤ ታ ሶምኢካ ሄዋ ኤርሴ። ሽን ኡባባካ ታን ታ ዎዛናን ዎꬃድ” ያጊደ ጻፌዳ።