1 በልሻጻር ካተቴዳ ሄዘንꬆ ላይꬅ፥ ታን ዳኔል ሀዋፐ ካሰ በኤዳ ሳጻፐ ሀራ ሳፃ በኣድ። 2 ሄ ሳጻን አያ በኣድታ ጎፐ፥ ኤላማ ጋድያን ሱሳ ግያ ካታማን፥ ኡላያ ግያ ሻፋ ማታን ኤቄዳ ታና በኣድ።

3 ሄ ሻፋ ማታን ላኡ አዱሳ ካጨቱ ደእያ ዶርሳ ኦርጊ ኤቄዳ። ላኡ ካጨቱዋፐ እቱ ጉየፐ ዶሌዳ፤ ሽን ኮይሮ ዶሌዳዋፐ አዱቄ። 4 ሄ ዶርሳ ኦርጊ ባረ ካጭያን ቃይጫናዉ፥ አዋይ ዉልያ ባጋ፥ ሁጲሳ ባጋናነ ገድሳ ባጋ ንግሽን በኣድ። አናና ኤቀታናዉነ አ ዎልቃፐ ከስ አካናዉ አይ መሂካ ዳንዳይቤና። እ ባረ ኮዬዳዋ ኦꬄዳ፤ ያቲደ ባረና ግታዬዳ።

5 ታን ሀ ሳጻባ ቆፕሽን፥ እት ዴሻ ኦርጊ አዋይ ዉልያ ባጋፐ ከሲደ፥ ቢታ ሳኣ አꬊደ፥ ገዲ ሳኣ የናን ዬዳ፤ አዉ ላኡ አይፈቱዋፐ ግዱዋን እት ዎጋ ካጪ ደኤ። 6 እካ ዳሮ ሀንቁዋና ዲሲደ፥ ሻፋ ማታን ታን በኤዳ ላኡ ካጭያና ደእያ ዶርሳኮ፥ ዋታዉ ንጊደ ዬዳ። 7 ጋኪደ፥ ዳሮ ይሎቲደ፥ ታን ጼልሽን፥ ዶርሳ ኦርግያ ካጨቱ ላኡካ መአና ጋካናዉ፥ ኢታ ዶምኤꬃ ዶምኤዳ። ዶርሳ ኦርግያዉ አናና ኤቀታናዉ ዎልቃይ ባዋ፤ ሄዋ ድራዉ፥ ዴሻ ኦርጊ አ ኩንድሲደ፥ የꬍ ኤቄዳ። ዴሻ ኦርግያ ዎልቃፐ ሄ ዶርሳ ኦርግያ አሽያዌ ባዋ።

8 ሄ ዴሻ ኦርጊ ሎይꬅ ግታቴዳ፤ ሽን አ ዎልቃይ ዳር ዳር ብያ ዎደ፥ አ ዎጋ ካጪ መኤዳ፤ ኤለካ፥ ኦይዱ ዎጋ ካጨቱ ቢታዉ ኦይዱ ባጋ ስሚደ ድጬድኖ። 9 ሀ ኦይዱ ካጨቱዋፐ እቱዋ ቦላ ሀራ ጉꬃ ካጪ ዶሊደ፥ ዎልቃን ገድሳኮ፥ አዋይ ዶልያ ባጋ እስራኤልያ ጋድያኮ ስሚደ ድጬዳ። 10 እ ቢደ ሳሉዋን ደእያ ኦላንቻቱዋ ጋካናዉ ድጬዳ፤ ሳሉዋ ጾልንተቱዋፐ ኡንደናዋንታ ሳኣን ዱገ ኦሊደ፥ ኡንቱንታ የꬌዳ።ሳፃ 12:4 11 ቃይ እ ባረና ꬎቁ ኦꬂደ፥ ኦላንቻቱዋ ጋዳዉዋ ጾሳና ልክሴዳ። ሀቼ ሀች አሳይ ያርሽያ ጹገትያ ያርሹዋካ ተኤዳ። ቃይ አ ጌሻ ጎልያካ ቱንሴዳ። 12 ማካላ ጋሱዋን ጌሻቱዋ ኦላንቻቱነ ሀች ሀች ያርሽያ ያርሹ ሄ ካጭያዉ እመቴዳ። ቱሙካ ሳኣን ኦለቴዳ፤ ሄ ካጪ ኦꬅያባይ ኡባይ አዉ እንጀቴዳ።

13 ሄዋፐ ጉይያን፥ እት ጌሻ ኪታንቻይ ሃሳይሽን ታን ስሳድ። የንኮ ጌሻ ኪታንቻይ ሀ ኪታንቻ፥ “ሀ ሀች ሀች ያርሽያ ያርሹዋባ፥ ሀ ማካላይ አህያ ባሻባነ ሳሉዋ ኦላንቻቱነ ጌሻ ሳአይ የቲደ ደአናባ ኦድያ ሳጻይ አዉደ ፖለታኔ?” ያጊደ ኦቼዳ።

14 እ ዛሪደ፥ “ላኡ ሻኣነ ሄዙ ጼቱ ዎንታይነ ኦማርሳይ ጋካናዉ ጋምአና፤ ሄዋፐ ጉይያን፥ ጌሻ ጎሊ ጌያና” ያጊደ ኦድሽን ስሳድ።

15 ታን፥ ዳኔል፥ ሀ ሳፃ በኣደነ አ ብለꬃ ኤራናዉ ቆፓደ ደእሽን፥ እት አሳ ማላትያዌ ታ ስንꬃን ኤቄዳዋ በኣድ። 16 ቃይ ታን ኡላያ ሻፋፐ፥ “ጋብሬላ፥ ሀ ብታንያዉ ሀ ሳፃ ብለꬃ ኦዳ” ያግያ ኮሻ ስሳድ። ሉቃሳ 1:19፣ 26

17 እ ዪደ ታን ኤቄዳ ሳኣ ማቴዳ ዎደ፥ ታን ዳጋማደ፥ ታ ሶምኡዋ ቢታዉ ዱገ ዛራደ ኩንዳድ። እ ታና፥ “አሳ ናአዉ፥ ሀ ሳጻይ ዉርሰꬃ ዎድያባ በስያዋ ግድያዋ አኬካ” ያጌዳ።

18 እ ታናና ሃሳይያ ዎደ፥ ታን ሳኣን ጉፋናደ፥ ገምእሹዋ ካይሮታድ። ያትና፥ እ ታና ሳኣፐ ፑደ ደንꬂደ፥ ታ ገድያን ኤሴዳ። 19 ታና፥ “ስሳ፥ ታን ጾሳ ሀንቁዋ ዉርሰꬃን ሀናናዉ ደእያዋ ኦዳይ፤ አያዉ ጎፐ፥ ሀ ሳጻይ ጾሳይ ኬር ዎꬄዳ ዉርሰꬃ ዎድያን ሀናናባ ኦዴ።

20 “ኔን በኤዳ ላኡ ካጭያና ደእያ ዶርሳ ኦርጊ ሜዶናነ ፓርሰ ካተቱ ሌምሱዋ። 21 ዴሻ ኦርጊ ቃይ ግሪከ ካትያ ሌምሱዋ፤ አ ላኡ አይፈቱዋፐ ግዱዋን ደእያ ዎጋ ካጪ ኮይሮ ካትያ። 22 ካጪ መእ ዎꬍና፥ አ ሳኣን ዶሌዳ ኦይዱ ካጨቱ አ ካዉተꬃፐ ሻከቲደ ከሳና ኦይዱ ካዉተꬃቱዋ ሌምሱዋ፤ ሽን ኡንቱንቱ ዎልቃይ ኮይሮዋ ዎልቃ ጋከና።

23 “ኡንቱንቱ ካዉተꬃ ዉርሰꬃይ ጋክያ ዎደነ ኡንቱንቱ ማካላይ ዛዋ ጋክያ ዎደ፥ እት መቀꬃ ኢታነ ጭምያ ጭንጫ ካቲ ደንዳና። 24 እ ሎይꬅ ምኖ ግዳና፤ ሽን ባረ ዎልቃና ግደና። ዳጋንꬅያ ባሻ እ ባይዛና፤ እ ኦꬅያባይ ኡባባይ አዉ እንጀታና። እ ምኖ አሳቱዋነ ጌሻ አሳቱዋ ꬋይሳና። 25 እ ጭምያ ድራዉ፥ አዉ እንጀታና፤ ቃይ እ ባረና ኡባፐ ꬎቁ ꬎቁ ኦꬃና። ኡንቱንቱ ሳአይ ሳራ ግ ደእሽን፥ ኡንቱንቱፐ ዳሮቱዋ ዎꬋና፤ ቃይ ካፓቱዋ ካፑዋና ኤቀታና። ሽን አሳይ ቦቼናን እ ባረዉ ꬋያና።

26 “ነዉ ኦደቴዳ ላኡ ሻአነ ሄዙ ጼቱ ዎንታነ ኦማርሳ ጼልያ ሳጻይ ቱማ፤ ሽን ዳሮ ዎድያፐ ጉይያን ፖለታናዉ ደእያ ድራዉ፥ ጎርዳደ ማታፋ አ ቦላ ዎꬃደ ናጋ” ያጌዳ።

27 ታን ዳኔል፥ ሎይꬅ ዳቡሬዳ ድራዉ፥ ሳከታደ ዳሮ ጋላሳ ግሳድ። ሄዋፐ ጉይያን ደንዳደ፥ ካትያ ኦሱዋ ባድ። ሀ ሳጻን ታን ሎይꬅ ሻቢረታድ፤ አኬካናዉካ ዳንዳያበይከ።