1 ሜዶና ቢታ አሳ ግድያ አርጸክስሳ ናአይ ዳርዮሰ ባብሎነን ካተቴዳ። 2 እ ካተቴዳ ኮይሮ ላይꬅ፥ ታን ዳኔል፥ ጌሻ ማጻፋቱዋ ናባባድ፤ ትምቢትያ ኦድያ ኤርማሳዉ መꬍና ጎዳይ ኦዴዳዋዳን የሩሳላመ ላፑን ታሙ ላይꬃ ኮለቲደ ጋምአናዉ ደእያዋ አኬካድ። ኤር. 25:11፤ 29:10

3 ሄዋ ድራዉ፥ ታን ጎዳ ጾሳኮ ስማደ፤ ማቃ ማያደ፥ ብድንꬃ ታ ሁጲያ ቦላ ቆላደ፥ ጾማደ፥ አ ዎሳይነ አዉ ዋትዋታይ።

4 ታን ናጋራ ፓጻደ፥ መꬍና ጎዳ ታ ጾሳ ሀዋዳን ያጋደ ዎሳድ፤ “አቤት ጎዳዉ፥ ዎልቃማነ ያሽያ ጾሳዉ፥ ኔና ሲቅያዋንቶነ ነ አዛዞ ኤኖ ግያዋንቶዉ ነ አገና ሲቁዋነ ጫቁዋ ናግያዎ፥ 5 ኑን ናጋራ ኦꬄዶነ ባሌዶ፤ ኑን ኢታባ ኦꬄዶነ ማካሌዶ፤ ነ አዛዙዋፐነ ነ ዎጋፐ ዎራ ስሜዶ። 6 ኑ ካተቶ፥ ኑ ካፓቶ፥ ኑ አዋቶነ ሳኣን ደእያ አሳ ኡባዉ ነ ሱንꬃን ትምቢትያ ኦዴዳ ነ ቆማቱ ኦዴዳዋ ስሰናን እጼዶ።

7 “አቤት ጎዳዉ፥ ኔን ጽሉዋ፤ ሽን ኑን ሀች ዬላ ማዬዶ። ይሁዳንነ የሩሳላመን ደእያ አሳይ ኡባይ፥ ኑን ነዉ አማነተናን እጽና፥ ኔን ሃኮ ቢታንነ ማታ ጋድያን ላሌዳ እስራኤልያ አሳይ ኡባይ ዬላቴዶ። 8 አቤት መꬍና ጎዳዉ፥ ኑን፥ ኑ ካተቱ፥ ኑ ካፓቱነ ኑ አዎቱ ኔና ናቄዳ ጋሱዋን ዬላ ማዬዶ። 9 ሽን ኑን አዉ ማካሌዳባ ግዶፐካ፥ ጎዳይ ኑ ጾሳይ ማርያዋነ አቶ ያግያዋ። 10 ኑን መꬍና ጎዳዉ፥ ኑ ጾሳዉ፥ አዛዘትቦኮ፤ ቃይ ትምቢትያ ኦድያ ባረ ቆማቱ ባጋና እ እሜዳ አ ህግያ ናግበይኮ። 11 እስራኤልያ አሳይ ኡባይ ነ ህግያ መንꬂደ፥ ዎራ ስሜድኖ፤ ነ አዛዞካ ኤኖ ግበይክኖ።

“ኑን ነ ቦላ ናጋራ ኦꬄዳ ድራዉ፥ ጾሳ ቆማ ሙሴ ህግያ ማጻፋን ጻፈቴዳ ሸቃይነ ፕርዳይ ኑ ቦላ ትገቴዳ። 12 ቃይ ኑ ቦላነ ኑና ካለꬅያዋንቱ ቦላ ዎልቃማ ባሻ አሀናዉ ኔን ሃሳዬዳ ቃላ ኑ ቦላ ፖላዳ። አያዉ ጎፐ፥ የሩሳላመ ቦላ ጋኬዳዋ ማላይ ሳሉዋፐ ጋርሳን ሀራ ጋድያ ቦላ ሙለካ ጋክቤና። 13 ሙሴ ህግያን ጻፈቴዳዋዳን፥ ሀ ባሻይ ኡባይ ኑ ቦላ ጋኬዳ። ኑ ናጋራፐ ስምበይኮ፤ ነ ቱሙዋ ስስበይኮ፤ ኔና፥ መꬍና ጎዳ ኑ ጾሳካ ማሮታ ኦችበይኮ። 14 መꬍና ጎዳይ ሀ ባሻ ኑ ቦላን አሀናዉ ጉየ ግቤና፤ አያዉ ጎፐ፥ መꬍና ጎዳይ ኑ ጾሳይ ባረ ኦꬅያባን ኡባን ጽሉዋ፤ ሽን ኑን አዉ አዛዘተናን እጼዶ።

15 “አቤት ጎዳዉ፥ ኑ ጾሳዉ፥ ካሰ ነ አሳ ነ ምኖ ኩሽያን ግብጼፐ ከሳደ፥ ሀቼዋዳንካ ነ ሱንꬃ ጼስሴዳዎ፥ ኑን ናጋራ ኦꬄዶ፤ ኑን ባሌዶ። 16 አቤት ጎዳዉ፥ ኔን ካሰ ነ ጽሎ ኦሱዋ ኡባ ኦꬄዳዋዳን፥ ሀእ ነ ሀንቁዋነ ነ ቦሻነ ነ ካታማፐ፥ የሩሳላመፐ፥ ነ ጌሻ ደርያፐ፥ ዎራ ዛራ። ኑን ኦꬄዳ ናጋራይነ ኑ አዎቱ ኦꬄዳ ባይዙ የሩሳላመነ ነ አሳነ ኑ ዩሹዋን ደእያ ኡባዉ ቅሊጩዋ ከሴዳ።

17 “ስም ሀእ ኑ ጾሳዉ፥ ታን ነ ቆማይ ዎስያ ዎሳነ ዋትዋቱዋ ስሳ። ጾሳዉ፥ ነ ሱንꬃ ድራዉ ጋደ፥ ሀ ኮለቴዳ ነ ጌሻ ጎልያ ነ ኬካ አይፍያን ጼላ። 18 አቤት ታ ጾሳዉ፥ ነ ሀይꬃ ኑኮ የጋደ ስሳ፤ ነ አይፍያካ ዶያደ፥ ነ ሱንꬃን ጼሰቴዳ ካታማ ባየꬃ ጼላ። ኑን ነዉ ዋትዋትያዌ፥ ኑ ጽሎተꬃ ድራዉ ግደናን፥ ነ ዎልቃማ ማሮተꬃ ድራሳ።

19 “አቤት ጾሳዉ፥ ስሳ! አቤት ጾሳዉ፥ አቶ ጋ! አቤት ጾሳዉ፥ ሀይዛነ ኦꬃ! ነ ካታማይነ ነ አሳይ ነ ሱንꬃን ጼሰቴዳ ድራዉ፥ አቤት ታ ጾሳዉ፥ ነ ሱንꬃ ድራዉ ጋምኦፓ” ያጋድ።

20 ታን ዎሳደ፥ ታ ናጋራነ ታ አሳ እስራኤልያ ናጋራ ፓጻደነ ታ ጾሳ ጌሻ አሳባ፥ የሩሳላመባ መꬍና ጎዳዉ ታ ጾሳዉ ዋትዋታደ ታካድ። 21 ሄዋዳን ሀናደ ታን ደእሺና፥ ካሰ ሳጻን ታን በኤዳ ጋብሬል፥ ታኮ ኤለካ ፓሊደ፥ ኦማርሳ ያርሹዋ ያርሽያ ሳትያን ፑቱ ጌዳ። ሉቃሳ 1:19፣ 26 22 እ ሀዋዳን ያጊደ፥ ታዉ ኦዴዳ፤ “ዳኔላ፥ ታን ኤራነ አኬካ ነዉ እማናዉ ሀእ ያድ። 23 ኔን ብሮ ዎሳ ዶሞደ ነ ዎሳ ዛሩ እመቴዳ፤ ታንካ ሄዋ ነዉ ኦዳናዉ ያድ። አያዉ ጎፐ፥ ጾሳይ ኔና ሎይꬅ ዶሴ። ሄዋ ድራዉ፥ ታን ኦድያዋ ቆፓ፤ ሳጻካ አኬካ።

24 “ላፑ ገደ ላፑን ታሙ ላይꬃይ ጾሳይ ነ አሳዉነ ነ ጌሻ ካታማዉ ኬሬዳ ዎድያ። ሄ ዎደቱዋን ናቁ ዉራና፤ ናጋራ ኦሱ አታና፤ ባይዙ ማረታና፤ መꬍና ጽሎተꬃይ ገላና፤ ሳጻይነ ትምቢቲ ፖለታናነ ኡባፐ አꬌዳ ጌሻ ሳአይ ኦከታና።

25 “ሄዋ ድራዉ፥ ሀዋ ኤራነ አኬካ። የሩሳላመ ካታማይ ኦራጻናዳንነ ኬጸታናዳን አዛዙ ከሴዳ ጋላሳፐ ቢደ ካፑ ኦከቶዌ ያና ጋካናዉ፥ ላፑን ገደ ላፑኑነ ኡሱፑን ታማነ ላኡ ገደ ላፑን ላይꬃይ አꬋና። ሄዋን የሩሳላመ ካታማይ ኦራጻና፤ ኦገቱካ ዩሹዋ ግምበቱካ ኦሰታና። ሽን ግምበትያ ዎዲ መቶ ዎደ ግዳናዋ።

26 “ኡሱፑን ታማነ ላኡ ገደ ላፑን ላይꬃፐ ጉይያን፥ ኦኬቴዳዋ አሳይ ዎꬋና። አ ማታን አያይነ ባዋ። ይያ ካፑዋ አሳይ፥ ካታማነ ጌሻ ጎልያ ላላና። ሄ ካታማ ዉርሰꬃይ ድኡዋዳን አኬከናን ያና። ሄ ዎድያፐ ቢደ ዉርሰꬃይ ጋካናዉ፥ ኦላነ ባሻ አዋዬዳ። 27 ሄ ካፑ ላፑን ላይꬃይ ግዶን አሳና ምኖ ጫቁዋ ጫቀታናዋ። ሄ ላፑን ላይꬃቱዋ ግዶ ግሸቻን እ ያርሹዋ ያርሽያዋነ እሞታ እምያዋ ድጋና። ጌሻ ጎልያዉ ግዶ ግሸቻን ባየꬃ ቱናተꬃ እ ኤሳና። ዉርሰꬃን አዋየቴዳ ቦሻይ አ ቦላ ትገታናዋ” ያጌዳ። ዳኔላ 11:31፤ 12:11፤ ማቶሳ 24:15፤ ማር. 13:14