1 ፓርሰ ካቲ ቂሮስ ካተቴዳ ሄዘንꬆ ላይꬅ፥ ብልጻሶረ ግያ ዳኔላዉ ሀራ ሳጻይ ቆንጬዳ። ሄ ሳጻን ቆንጬዳዌ ቱማ፤ ቆንጬዳዌካ ዎልቃማ ኦላባ። ሄ አኬካይ አዉ እመቴዳዌ ሳጻና።

2 ሄ ዎደ ታን፥ ዳኔል፥ ሄዙ ሳምንታ ዬካድ። 3 ሄዙ ሳምንታይ ዉራና ጋካናዉ ሎኦ ቁማ ማበይከ፤ አሹ ዎይ ዎይንያ ኤሳይ ታ ዶናኮ ሺቅቤና። ታ ሁጲያካ አያነ ኦከታበይከ። 4 ኮይሮ አግናን ላታማነ ኦይደንꬆ ጋላሳን፥ ጸግሮሳ ግያ ዎልቃማ ሻፋ ማታን ታን ኤቃደ ጼላድ፤ 5 ላይኑዋ ግያ ማዩዋ ማዬዳ እት ብታንያ በኣድ። እ ባረ ጼሳን በርተ ዎርቃፐ ኦሰቴዳ ሳቂያ ዳንጨዳ። ሳፃ 1:13-15፤ 2:18፤ 19:21 6 አ ቦላይ ጶልያ እንቁዋ ማላቴ፤ አ ሶምኢ ዋልቃንꬃዳን ጶልቁ ጌ፤ አ አይፈቱካ ታማ ላጩዋ ማላቲኖ፤ አ ኩሺነ አ ገዲ ቁጨቴዳ ናስያ ብራታዳን ፖእሴ፤ አ ቃላይካ ዳሮ አሳይ ሃሳይያ ቃላዳን ሀኔ።

7 ሀ ሳፃ ታን ዳኔል ታረካ በኣድ። ታናና ደእያ አሳቱ በእበይክኖ፤ ኡንቱንቱ ሎይꬅ ዳጋሜዳ ድራዉ፥ ባቃት ቆሰቴድኖ። 8 ታን ሀ ዎልቃማ ሳፃ ጼላደ፥ ታረካ አታድ፤ ታዉ ዎልቃይ እጽና ዳቡራድ፤ ታ ሶምኢ ሎይꬅ ቡላቴዳ። 9 ሄ ዎደ ታን እ ሃሳይያዋ ስሳድ፤ ቢታን ዱገ ታ ሶምኡዋን ጉፋናድ፤ ገምእሹዋ ታይሮታድ።

10 ሄዋፐ ጉይያን፥ እት ኩሺ ታና ቦቼዳ፤ ታን ኮኮራደ ደእሺና፥ ታና ታ ኩሽያንነ ታ ጉልባታን ደንꬂደ ኤሴዳ። 11 እ ታና፥ “ላ፥ ጾሳይ ሎይꬅ ሲቄዳ ዳኔላ፥ ታን ነዉ ኦድያ ቃላ ሎይꬃደ አኬካ፤ ደንዳ ኤቃ። አያዉ ጎፐ፥ ታን ኔኮ ኪተታደ ያድ” ያጌዳ። እ ታና ሀዋዳን ያግና፥ ታን ኮኮራደ ደንዳ ኤቃድ።

12 ቃይካ እ ሀዋዳን ያጌዳ፤ “ዳኔላ፥ አይነ ያዮፓ! አያዉ ጎፐ፥ ኔን አኬካ ደማናዉ ቆፋ ቃቼዳነ ነ ጾሳ ስንꬃን ነ ሁጲያ ካዉሼዳ ኮይሮ ጋላሳፐ ዶሚደ፥ ነ ዎሳይ ስሰቴዳ፤ ታንካ ሄዎ ዛሩዋ አካደ ያድ። 13 ሽን ፓርሰ ካዉተꬃ ካፑዋ ግድያ አያናይ ላታማነ እት ጋላሳ ታና ተኤዳ። ታን ታረካ ፓርሰ ካዉተꬃ ካፑዋና ያን አታድ። ሄዋ ድራዉ ኪታንቻቱዋ ካፓቱዋፐ እቱ፥ ምካኤል ታና ማዳናዉ ዬዳ። ሳፃ 12:7 14 ታን ሀእ ኔኮ ዬዳዌ፥ ዉርሰꬃ ጋላሳቱዋን ነ አሳ ቦላ ሀናናዉ ደእያዋ ነዉ ቆንጭሳናሳ፤ አያዉ ጎፐ፥ ሀ ሳጻይ ስንꬃፐ ሀናናዉ ደእያዋ” ያጌዳ።

15 እ ሄዋ ታዉ ኦድያ ዎደ፥ ታን ታ ሶምኡዋን ጹጉናደ፥ ግያዋ ꬋያድ። 16 ሄዋፐ ጉይያን፥ አሳ ማላትያ እቱ ታ መተርሻ ቦቼዳ፤ ታ ዶናይ ዶየትና፥ ሃሳያ ዶማድ። ታ ስንꬃን ኤቄዳዋ ሀዋዳን ያጋድ፤ “ታ ጎዳዉ፥ ሀ ሳጻን ታን ሎይꬅ ዳጋሜዳ ድራዉ፥ ዳሮ ዳቡራድ። 17 ታን ነ ቆማይ ኔናና ታ ጎዳና ሃሳያናዉ ዎታ ዳንዳያይታ? ታ ዎልቃይ ዉሬዳ፤ ሸምፓናዉካ ታዉ እጸቴዳ” ያጋድ።

18 ሄ አሳ ማላትያ እቱ ላኤንꬁዋካ ታና ቦቺደ፥ ታዉ ዎልቃ እሜዳ። 19 ያቲደ ታና፥ “ላ፥ ጾሳይ ሎይꬅ ሲቄዳ ብታንያዉ፥ አይነ ያዮፓ! ሳሩ ነዉ ግዶ። ሀእ ስም ምና፤ ኤ ምና” ያጌዳ።

እ ሄዋዳን ጊና፥ ታን ምናድ፤ “ታ ጎዳዉ፥ ኔን ታና ምንሶ ድራዉ፥ ሀእ ኦዳ” ያጋድ።

20 እ ዛሪደ፥ “ታን ኔኮ አያዉ ያድታንቶ ኤራይ? ሀእ ታን ስማደ ባደ፥ ፓርሰ ካፑዋ ግድያ አያናና ኦለታና፤ ቃይ ታን ቢና፥ ግሪከ ካፑዋ ግድያ አያናይ ያና። 21 ሽን ታን ነዉ ቱሙዋ ማጻፋን ጻፈቴዳዋ ኦዳና። ታን ኡንቱንቱና ኦለትያ ዎደ፥ ህንተ ካፑዋ ምካኤለፐ አትና፥ ታና ማድያ ሀራይ እቱነ ባዋ።