1 “ሜዶና ቢታ አሳ ግድያ ዳርዮስ ካተቴዳ ኮይሮ ላይꬃን፥ ታን አ ማዳናዉነ ምንሳናዉ አ ምይያን ኤቃድ።

2 “ሀእ ስም ታን ነዉ ቱሙዋ ኦዳይ። ሀራ ሄዙ ካተቱ ፓርሰ ቢታን ካተታና፤ ቃይ ኡንቱንቱፐ ጉይያን ካተትያ ኦይደንꬆ ካቲ፥ ካሰዋንቱ ኡባቱዋፐ አꬌዳ ዱረ ግዳናዋ። እ ባረ ዱረተꬃ ጋሱዋን ዎልቃ ደምያ ዎደ፥ አሳይ ኡባይ ግሪከ ካዉተꬃና ኦለታና ማላ ደንꬃና።

3 “ሄዋፐ ጉይያን፥ ዎልቃን ሞድያ ምኖ ካቲ ደንዳናዋ፤ ባረ ኮዬዳዋ ኡባ ኦꬃና። 4 እ ደንዴዳዋፐ ጉይያን፥ አ ካዉተꬃይ ዱጸረቲደ፥ ኦይዱ ሳኣን ሻከታና። አ ዛረꬅ አ ካዉተꬃ ላትክኖ፤ እ አይስያ ዎደዋዳን ካዉተꬃዉ ዎልቃይ ደኤና። አያዉ ጎፐ፥ አ ካዉተꬃይ አፐ አከቲደ፥ ሀራቶ እመታና።

5 “ገድሳ ቢታ ካቲ ምኖ ግዳናዋ፤ ሽን አ ካፓቱዋፐ እቱ አፐ አꬍ ምኒደ፥ ሄ ዎልቃማ ካዉተꬃ ሞዳና።

6 “ጉꬃ ላይꬃፐ ጉይያን፥ ገድሳ ቢታ ካቲነ ሁጲሳ ቢታ ካቲ ባረንቱ ግዶን ዳቦተꬃ ጫቁዋ ጫቀታናዋንታ። ገድሳ ቢታ ካትያ ናታ ሁጲሳ ቢታ ካትያ ገላናኑ፤ ሽን እዝ ዎልቃይካ ምነና፤ ቃይ እካ አ ዎልቃይካ ዳሮ ዎድያ ጋምኤና። ሄ ዎደ እዞ፥ እዞ አጃብያዋንቱ፥ እዝ ናአይነ እዝ አስናይ ኡባይ አꬊደ እመታና።

7 “ሄዋፐ ስምና፥ እዝ ዳቦቱዋፐ እቱ ገድሳ ቢታን ካተታና። ሁጲሳ ቢታ ካትያ ቦላን ገሊደ፤ አ ጌሱዋ መንꬅ ገሊደ፥ አ ጾናና። 8 ቃይ ኡንቱንቱ ጾሳቱዋ፥ ምስለቱዋነ ብራፐነ ዎርቃፐ ኦሰቴዳ ሚሻቱዋ አኪደ፥ ግብጼ አፋና። ያቲደ አማሬዳ ዎድያዉ ሁጲሳ ቢታ ካትያ ቦቼናን አጋና። 9 ሄዋፐ ጉይያን፥ ሁጲሳ ቢታ ካቲ ገድሳ ቢታ ካዉተꬃ ቦላ ገላና፤ ሽን ድግና፥ ጉየ ባረ ቢታ ስማና።

10 “ሁጲሳ ቢታ ካትያ አቱማ ናናቱ ኦላዉ ጊጊደ፥ ዳሮ ኦላንቻቱዋ ሺሻና፤ ስንꬃን ጋከትያዋ ኡባ ሜጭያ ዎልቃማ ድኡዋዳን፥ አꬊደ ኦሊደ፥ ገድሳ ካትያ ጌሱዋ ኦላናዋንታ። 11 ሄ ዎድያን ገድሳ ቢታ ካቲ ሎይꬅ ሀንቀቲደ፥ ሁጲሳ ቢታ ካትያ ኦላናዉ ደንዳናዋ። ሁጲሳ ቢታ ካቲ ሺሼዳ ዳሮ ኦላንቻቱዋና ኦለቲደ፥ ኡንቱንታ ጾናና። 12 ዳሮ ኦላንቻቱዋ ኦሞዴዳዋፐ ጉይያን፥ ገድሳ ቢታ ካቲ ኦቶሩዋን ፑገታና። ያቲደ ዳሮ ሻኣ ዎꬋና፤ ሽን አ ጾኑ አናና ጋምኤና።

13 “ዋኒደ ጎፐ፥ ሁጲሳ ቢታ ካቲ ካሰዋፐ አꬍያ ሀራ ኦላንቻቱዋ ጊግሳና፤ አማሬዳ ላይꬃቱዋ ጋምኢደ፥ ኩመንꬃ ኦላ ሚሻ ኦይቄዳ ሀ ኦላንቻቱዋ አኪደ፥ ኦላዉ ከሳና። 14 ሄ ዎድያን ዳሩ ገድሳ ቢታ ካትያ ቦላ ደንዳናዋ። ሳጻይ ፖለታና ማላ፥ ነ አሳፐካ እት እት ማካላንቻ አሳቱ ደንዳናዋንታ፤ ሽን ጾንክኖ።

15 “ሄዋፐ ጉይያን፥ ሁጲሳ ቢታ ካቲ ገድሳ ቢታ ዪደ፥ ዩሹ ግምበት ኡቴዳ እት ካታማ ኦሊደ ኦይቃና። ገድሳ ቢታ ካትያ ኦላንቻቱ ዎልቃ ꬋያና፤ ሀራይ አቶ ኡንቱንቱፐ ምኖ ኦላንቻቱካ ኡንቱንቱና ኤቀታናዉ ዳንዳይክኖ። 16 አናና ኤቀትያዌ ሙለካ ባይና ድራዉ፥ ሁጲሳ ቢታ ካቲ ባረ ኮይያዋ ኡባ ኦꬃና። እ እስራኤልያ ግያ ሎኦ ቢታን ባረዉ ምን ኤቂደ፥ አ ꬋይስያ ዎልቃ ደማና። 17 እ ባረ ካዉተꬃዉ ደእያ ዎልቃ ኡባ አኪደ ያናዉ ቆፋ ቃቻና፤ ዪደ፥ ገድሳ ቢታ ካትያና ዳቦተꬃ ጫቁዋ ጫቀታናዋ። ሄ ካዉተꬃ ኡንጋናዉ ሀልቺደ፥ ባረ ናቶ አዉ እማና፤ ሽን አ ሀልቹ ፖለተና።

18 “ሄዋፐ ጉይያን፥ እ ባረ ቆፋ አባ ጋጻን ደእያ ቢታቱዋኮ ዛሪደ፥ ኡንቱንቱፐ ዳሮቱዋ ኦሊደ፥ ባረዉ አካና። ሽን እት ኦላ ጋዳዉ አ ኦቶሩዋ ጊሻና፤ ያቲደ አ ኦቶሩዋ አ ቦላ ዛራና። 19 ሄዋፐ ጉይያን፥ ሁጲሳ ቢታ ካቲ ባረ ቢታ ባረ ጌሱዋ ስማና። ሽን እ ሄዋን ꬉበቲደ ኩንዳና፤ አ ላኤንꬆ ኦንነ በኤና።

20 “አ ሳኣን ካተቴዳዌ ባረ ካዉተꬃ ቦንቹዋ ናጋናዉ ጊራ ጊርስያ አሳ ካዉተꬃ ግዶ ኪታና። ግዶፐነ፥ ቃንꬃ ዎድያፐ ጉይያን፥ ቆንጭያን ዎይ ኦላን ግደናን እ ጮ ሀይቂ ꬋያና።

21 “አ ሳኣን ቃይ እት ካቴዳ አሳይ ደንዳናዋ፤ ሽን ኡንቱንቱ ካዉተꬃ ቦንቹዋ አዉ እምክኖ። አሳይ ሳአይ ሳራ ጊደ ደእሽን፥ ጭም ገሊደ፥ ካዉተꬃ እ ኦይቃና። 22 ሄዋፐ ጉይያን፥ ዳሮ ኦላንቻቱ አ ስንꬃፐ ፕተቲደ ꬋያና፤ ጫቁዋ ካፑካ ሀይቃና። 23 አናና ጫቁዋ ጫቀት ስሚደ፥ ባረ ኦꬅያዋ ጭሙዋን ኦꬃና፤ አማሬዳ አሳቱዋ ጻላላና እ ምናና። 24 አሳይ ሳአይ ሳሮ ጊደ ደእሽን፥ ሄ ቢታን ዳሮ ዱረትያ እት ባጋ እ ገላና። ካሰ ባረ አዉ ዎይ ባረ ማይዛ አዎቱ ኦꬅቤናዋ ኦꬃና፤ ባረ ኦሞድ ሺሼዳ ዱረተꬃነ አቁዋ ባረና ካልያዋንቶ ግሻና። ጌሶቱዋካ ላላናዉ እ ሀልቻናዋ፤ ሽን ሄዋ እ ኦꬅያዌ ጉꬃ ዎድያሳ።

25 “ሄዋፐ ጉይያን ጻሊደ፥ ባረ ዎልቃካ ምንሲደ፥ ዳሮ ኦላንቻቱዋና ገድሳ ቢታ ካትያ ቦላ ደንዳናዋ። ቃይ ገድሳ ቢታ ካቲ ሎይꬅ ዳሮነ ዎልቃማ ኦላንቻቱዋና ኦላዉ ደንዲደ፥ አናና ኦለታና። ሽን አ ቦላ ኡንቱንቱ ካሰቲደ ማቄዳ ማቁዋ ጋሱዋን፥ እ ኡንቱንቱና ኤቀታናዉ ዳንዳየና። 26 ካትያና እት ማዳን ምያዋንቱ አ ꬋይሳና፤ አ ኦላንቻቱ ፕተታና፤ አ ኦላንቻቱዋፐ ዳሮቱ ኦላን ሀይቃና። 27 ሀ ላኡ ካተቱካ ባረንቱ ዎዛናን ኢታ ቆፕያ ድራዉ፥ ኡንቱንቱ እትፐ እት ኦይድያን ኡቲደ ሃሳዪደ፥ እቱ እቶ ዎርዶታና። ሽን ኡንቱንቱ ኦꬃና ግያዌ ኡንቱንቶ እንጀተና፤ አያዉ ጎፐ፥ ጾሳይ ኬሬዳ ዎዲ ብሮ ጋክቤና።

28 “ሁጲሳ ቢታ ካቲ ዳሮ ዱረተꬃና ባረ ቢታ ስማና። ሽን እ ባረ ዎዛናን ጌሻ ጫቁዋ እጻና። አ ቆሀናዉ እትባ አ ቦላ ኦꬂደ፥ ባረ ቢታ ስማና።

29 “ጾሳይ ኬሬዳ ዎዲ ጋክና፥ እ ዛሪደ ገድሳ ቢታ ቦላ ገላና፤ ሽን አዉ ካሰዋዳን እንጀተና። 30 አያዉ ጎፐ፥ አዋይ ዉልያ ባጋ ቢታፐ ይያ ኦላ ማርካባቱ አ ዳጋንꬃና። ያቶፐ እ ጉየ ስሚደ፥ ጌሻ ጫቁዋ ቦላ ሀንቀታና። ቃይ ሄዋፐ ስሚደ፥ ጌሻ ጫቁዋ አግያዋንቱና ዳቦታና።

31 “አ ኦላንቻቱ ጌሻ ጎልያካ አ ዩሹዋ ግምቢያካ ቱንሳናነ ሀች ሀች ያርሽያ ያርሹዋካ ድጋና። ያቲደ ኡንቱንቱ ባየꬃ ቱናተꬃ ያን ኤሳና። ዳኔላ 9:27፤ 12:11፤ ማቶሳ 24:15፤ ማር. 13:14 32 ጫቁዋ ኮልያዋንታ እ ባረ ጭሙዋ ቃላን ባረ ባጋ ኦꬃና፤ ሽን ባረንቱ ጾሳ ኤርያ አሳይ ምናናነ አናና ኤቀታና።

33 “አሳ ግዶን ደእያ አꬌዳ ኤራንቻቱ ዳሮ አሳ ታማርሳና፤ ሽን ጉꬃ ዎድያ ጋርሳን ሀ ታማርስያዋንቱ ማሻን ቡሳከታና፥ ታማን ጹገታና፥ ኦሞደታና ዎይ ቦንቀታና። 34 ሄ መቶቱዋ ግዶን ደኢድ፥ ኡንቱንቱ ጉꬃ ማዱዋ ደማና፤ ዳሮ አሳይካ ኡንቱንቱ ባጋ ማላቲደ፥ ኡንቱንቱኮ ሺቃና፤ ሽን ዎዛናፐ ግደና። 35 አꬌዳ ኤራንቻቱዋፐ ኡንደናዋንቱ ꬉበታና። ሄዋዳን ሀኒደ፥ ዉርሰꬃ ዎዲ ጋካናዉ፥ ኡንቱንቱ ፓጨቲደ ከሳና፥ ጌያናነ ቶሺ ባይናዋንታ ግዳና። አያዉ ጎፐ፥ ጾሳይ ኬሬዳ ዎዲ ብሮ ጋክቤና።

36 “ካቲ ባረና ኮሾዋ ኦꬃና፤ ጾሳቱዋ ኡባፐ ቦላ ባረና ꬎቁ ኦꬂደ ዳርሳና፤ ቃይ ጾሳቱዋ ጾሳ ቦላ ካሰ ስሰት ኤረና ኢታ ቃላ ሃሳያና። ሀናናዉ ቆፋን ቃሸት ኡቴዳዌ ሀናናዉ ደእያ ድራዉ፥ ጾሳ ሀንቁ ፖለታና ጋካናዉ፥ እ ኦꬅያዌ ኡባይ አዉ እንጀታና። 2 ተስ. 2:3-4፤ ሳፃ 13:5-6 37 እ ካሰ ባረ ማይዛ አዎቱዋ ጾሳቱዋ፥ ዎይ ማጫ አሳይ ሲቅያ ጾሳ ካꬋና፤ እ ባረ ጻላላ ሀራ ኡባፐ አꬂደ ꬎቁ ኦꬃናፐ አትና፥ ሀራ አይ ጾሳነ ኮየና። 38 እ ኡንቱንታ ቦንቻናዋ አጊደ ጌሱዋ ጾሳ ቦንቻና፤ አ ማይዛ አዎቱ ኤረና ጾሳዉ ዎርቃ፥ ብራ፥ አልኦ ሹቻነ ሎኦ እሙዋ እሚደ ቦንቻና። 39 እማꬃ ጾሳ ማዱዋን ምኖ ጌሱዋ ቦላ እ ደንዳና። ቃይ ባረ ማታ ኤርያዋንታ እ ዳሮ ቦንቻና። እ ኡንቱንታ ዳሮ አሳ ሞድያዋንታ ኦꬂደ ሱንꬃና፤ ቃይ ቢታካ ዎይቱዋ ኦꬂደ፥ ኡንቱንቶ ሻክ ሻኪደ እማና።

40 “ዉርሰꬃ ዎዲ ጋክና፥ ገድሳ ቢታ ካቲ ደንዲደ፥ ሁጲሳ ቢታ ካትያ ኦላና። ሽን ሁጲሳ ቢታ ካቲ ፓራ ጋረቱዋ፥ ፓራ አሳቱዋነ ዳሮ ማርካባቱዋ አኪደ፥ አ ቦላ ጎትያዳን ያና። ዳሮ ቢታ ቦላ ገሊደ፤ ድኡዋዳን ኡንቱንታ ሜጪደ አꬋና። 41 ቃይ እ እስራኤልያ ግያ ሎኦ ቢታ ቦላንካ ገላና። ዳሮ ቢታቱ አ ኩሽያን ኩንዳና፤ ሽን ኤዶማ፥ ሞኣባነ አሞና ቢታቱ አ ኩሽያፐ አታና። 42 እ ዳሮ ቢታቱዋ ቦላ ገልያ ዎደ፥ ግብጼካ አፐ ከስ አከና። 43 ግብጼ ቢታ ዎርቃ፥ ብራነ ዱረተꬃ ኡባ እ ባረ ኩሽያ አꬃና። ሊቢነ ቶጲ አዉ ሞደታና።

44 “ሽን አዋይ ዶልያ ባጋፐነ ሁጲሳ ባጋፐ ይያ ኦዱ አ ዳጋንꬃና፤ ሀንቁዋ ኤጽ ከሲደ፥ ዳሮቱዋ ዎꬋናዉነ ሙለ ꬋይሳናዉ ደንዳናዋ። 45 እ ባረ ካተቱዋ ዱንካንያ አባፐነ ፑላንቻ ጌሻ አሳፐ ግዱዋን ቶካና። ሽን አ ዉርሰꬃይ ጋካናዋ፤ አ ማድያዌካ ꬋያና።