1 “ሄ ዎድያን፥ ነ አሳ ሄምያ ዎልቃማ ካፑ ምካኤል ደንዳናዋ። ካዉተꬃይ ዶሞደፐ ዶምና፥ ሄ ዎደ ጋካናዉ፥ በእ ኤረና መቶ ዎዲ ሀናና። ግዶፐነ፥ አ ሱንꬃይ ጾሳ ማጻፋን ጻፈቴዳ ነ አሳይ ኡባይ ሄ ዎደ አታናዋ። ማቶሳ 24:21፤ ማር. 13:19፤ ሳፃ 7:14፤ 12:7 2 ካሰ ሀይቂደ ሞገቴዳ አሳፐ ዳሮቱ ደንዳና። ኡንቱንቱፐ ባጋቱ መꬍና ደኦ፥ ባጋቱ ቃይ ዬላዉነ መꬍና ካዉሻዉ ደንዳና። ኢሳ. 26:19፤ ማቶሳ 25:46፤ ዮሃ. 5:29 3 አꬌዳ ኤራንቻቱ፥ ሳሉዋ ፖኡዋዳን፥ ቃይ ዳሮቱዋ ጽሎተꬃ ኦግያ ካለꬄዳዋንቱ መꬍ መꬍናዉ ጾልንትያዳን ፖአና።

4 “ሽን ነኖ ዳኔላ፥ ኔን ዉርሰꬃ ዎዲ ጋካናዉ፥ ሀ ማጻፋ ቃላ ጎርዳደ፥ ማታፋ ዎꬃ። ዳሮቱ ያነ ሃነ ብንኮታና፤ ኤራይካ ዳራና” ያጌዳ። ሳፃ 22:10

5 ሄዋፐ ጉይያን፥ ታን ዳኔል፥ ሀራ ላአቱዋ፥ እቱ ሻፋፐ ሀፍንꬃ ላንቂያን፥ እቱ ሻፋፐ ሄፍንꬃ ላንቂያን ኤቄዳዋንታ በኣድ። 6 ኡንቱንቱፐ እቱ ላይኑዋ ማዪደ፥ ሻፋ ሃꬃፐ ቦላ ባጋና ኤቄዳዋ ኦቺደ፥ “ሀ ማላልስያዋንቱ ፖለታናዉ ዎይሳ ዎድያ ጋምአንዴሻ?” ያጌዳ።

7 ሄ ላይኑዋ ማዪደ፥ ሻፋ ሃꬃፐ ቦላ ባጋና ደእያዌ ባረ ኡሸቻ ኩሽያነ ባረ ሀድርሳ ኩሽያ ሳሉዋ ዛር ደንꬂደ፥ መꬍናዉ ደእያዋ ሱንꬃን ሀዋዳን ያጊደ ጫቄዳ፤ “ሀዌ ዎዲ፥ ዎደቱነ ዎድያ ባጋይ ጋካናዉ ጋምአና፤ ቃይ ጌሻ አሳቱ ዎልቃይ ክንቼቲደ ዉርያ ዎደ፥ ሀ ኡባባይካ ፖለታና” ያጌዳ። ሳፃ 10:5፤ 12:14

8 ሀዋ ኡባ ታን ስሳድ፤ ሽን ታዉ ገልቤና። ያትና፥ ታን፥ “ታ ጎዳዉ፥ ሀ የዎ ኡባዉ ዉርሰꬃይ አያ ግዳኔ?” ጋደ ኦቻድ።

9 እ ዛሪደ፥ ሀዋዳን ያጌዳ፤ “ዳኔላ፥ ባ። አያዉ ጎፐ፥ ሀዌ ማጻፋይ ዉርሰꬃ ዎዲ ጋካናዉ ጎርደቴዳዋነ ማታፋይ አ ቦላ ዎꬌዳዋ። 10 ዳሮቱ ፓጨቲደ ከሳና፥ ጌያናነ ቶሺ ባይናዋንታ ግዳና፤ ሽን ኢታቱ ኢታባ ኦꬃና። ኢታቱዋፐ እት ኡራይነ አኬከና፤ ሽን አꬌዳ ኤራንቻቱ አኬካና። ሳፃ 22:11

11 “ሀች ሀች ያርሽያ ያርሹ ድገቶደፐነ ባየꬃ ቱናተꬃይ ሄ ሳኣን ኤቆደፐ 1,290 ጋላሳ። ዳኔላ 9:27፤ 11:31፤ ማቶሳ 24:15፤ ማር. 13:14 12 ገንጪደ 1,335 ጋላሳቱ ዉራናዉ ጋꬅያ ኡራይ አንጀቴዳዋ።

13 “ኔና ግዶፐ፥ ኔን ዉርሰꬃይ ጋካናዉ ባ። ኔን ሸምፓና፤ ጋላሳቱዋ ዉርሰꬃን ኔና ጋክያ ላታ አካናዉ ደንዳናሳ” ያጌዳ።