1 ላፑንꬃ አግናይ ጋክያ ዎደ እስራኤልያ አሳይ ባረንቱ ካታማ ካታማ ስሜድኖ፥ ኡንቱንቱ ኡባይ እት አሳዳን የሩሳላመን ሺቄድኖ። 2 ዮጸዴቃ ናኣ ኢያሱነ አ ካልያ ቄሳቱ ቃይ ሳላትያላ ናኣ ዛሩባቤልነ አ ዳቦቱ ጾሳ አሳ ሙሴ ህግያን ካሰ ጻፈቴዳዋዳን ጹግያ ያርሹዋ ያርሻናዉ፥ እስራኤልያ ጾሳዉ ያርሽያ ሳኣ ጊግሴድኖ። ከሳ 27:1 3 ኡንቱንቱ ሄ ጋድያን ደእያ አሳዉ ያዮፐነ፥ አገናን ያርሹዋ ያርሽያ ሳኣ ካሰ እ ኮለቴዳ ሳኣን ዛረꬂደ ኬጼድኖ። ጊግሲደ፥ ጹግያ ያርሹዋ መꬍና ጎዳዉ ዎንታነ ኦማርስ ኡባ ዎደ ያርሼድኖ። ፓይ. 28:1-8 4 ካሰ ጻፈቴዳዋዳንካ ኡንቱንቱ ዳስያ ባላ ቦንቼድኖ፤ ጹግያ ያርሹዋካ ሀቼዉ ሀቼዉ በስያዋ ፓይዱዋ ፓጭሰናን ያርሼድኖ። ፓይ. 29:12-38 5 ቃይ ኡባ ዎደ ያርሽያ ጹግያ ያርሹዋ፥ አግናይ ጼርያ ዎደ ያርሽያ ያርሹዋነ መꬍና ጎዳ ጌሻ ባላቱዋን ያርሽያ ያርሹዋ ኡባካ ያርሼድኖ። ሄዋ ቦላካ አሳይ ባረ ሸንያን መꬍና ጎዳዉ እሜዳ እሞታ ኡባካ ያርሼድኖ። ፓይ. 28:11—29:39 6 ላፑንꬃ አግናን ኮይሮ ጋላሳን ኡንቱንቱ መꬍና ጎዳዉ ጹግያ ያርሹዋ ያርሽያዋ ዶሜድኖ፤ ሽን ሄ ዎደ መꬍና ጎዳ ጌሻ ጎልያ ኬጽያ ባሱ ብሮ ባሰትቤና።

7 ሄዋፐ ጉይያን፥ ሹቻ ማስያዋንቶነ አናጸቶ ሻሉዋ ግሺደ ቃጻሬድኖ። ፓርሰ ካቲ ቂሮስ ኡንቱንቶ አዛዜዳ ድራዉ፥ ሊባኖሳፐ ዝጋ አባ ፕንꬂደ፥ ዮጰ አሀናዉ ሲዶናነ ጺሮሳ ቢታ አሳዉ ቁማ፥ ኡሻነ ዛይትያ እሜድኖ።

8 ሄዋፐ ጉይያን፥ ኡንቱንቱ የሩሳላመን ደእያ ጾሳ ጎሊ ደእያ ሳኣ ጋኬዳ ላኤንꬆ ላይꬃን ላኤንꬆ አግናን፥ ሳላትያላ ናአይ ዛሩባቤለ፥ ዮጸዴቃ ናኣ ኢያሱነ ኡንቱንቱ ዳቦቱ፥ ቄሳቱ፥ ሌዋቱነ ኦሞዱዋፐ ስሚደ፥ የሩሳላመ ዬዳ አሳይ ኡባይ ኪታ ዶሜድኖ። ቃይ መꬍና ጎዳ ጎልያ ኪታ አዎተꬃን ጼላና ማላ፥ ላታሙ ላይꬃ ግዴዳዋንታነ ላታሙ ላይꬃፐ አꬌዳ ሌዋቱዋ ሱንꬄድኖ። 9 ሌዊያ ዛርያ ግድያ ኢያሱ፥ አ ናናይነ አ ዳቦቱ፥ ሆዳዊያ ያራ ግድያ ቃድምኤልነ አ ናናይ እትፐ ግዲደ፥ ጾሳ ጎልያ ኪታ አዎተꬃን ጼሌድኖ፤ ቃይ ሄናዳዳ ያራ ግድያ ሌዋቱካ ኡንቱንቱ ማዴድኖ።

10 ግምቢያዋንቱ መꬍና ጎዳ ጌሻ ጎልያ ግምባናዉ ባሱዋ ባስ ዉርሴዳ ዎደ፥ ቄሳቱ ባረንቱ ማዩዋ ማይ ጹሩምባ ኦይቂደ፥ ቃይ አቱማ አሳ ግድያ አሳፋ ያራቱዋ፥ ሌዋቱካ፥ ዳላ ኦይቂደ፥ እስራኤልያ ካትያ ዳዊታ ዎጋዳን መꬍና ጎዳ ጋላታናዉ ኤቄድኖ። 1 ኦዱዋ 25:1 11 ኡንቱንቱ መꬍና ጎዳ ጋላቲድነ ቃንጸናን ማዝሙርያን ሳቢደ፥ ሀዋዳን ያጊደ፥ አዉ የጼድኖ፤ 1 ኦዱዋ 16:34፤ 2 ኦዱዋ 5:13፤ 7:3፤ ማዝ. 100:5፤ 106:1፤ 107:1፤ 118:1፤ 136:1፤ ኤር. 33:11