1 ኦሞዱዋፐ ስሜዳ አሳቱ መꬍና ጎዳዉ፥ እስራኤልያ ጾሳዉ ጌሻ ጎልያ ኬጽያዋ ይሁዳነ ቢንያማ ሞርከቱ ስሴድኖ። 2 ዛሩባቤላኮነ ጎልያ ካፓቱዋኮ ዪደ፥ ሀዋዳን ያጌድኖ፤ “አሶረ ካቲ አስራዶን *አስራዶን፦ ሀ ቃላ ብለꬃይ እብራዌꬁዋን፥ “ኤሳር-ሃዶን” ግያዋ። ኑና ሀ ሳአዉ አሄዳ ጋላሳፐ ዶሚደ፥ ኑንካ ህንተንቱ ጾሳ ኮዬቶነ ያርሼቶ። ሄዋ ድራዉ፥ ኑንካ ህንተናና እትፐ አነ ኬጾይተ” ያጌድኖ። 2 ካታ. 17:24-41

3 ሽን ዛሩባቤለ፥ ኢያሱነ እስራኤልያ ዛራቱዋ ካፓቱ ኡንቱንቶ ዛሪደ፥ ሀዋዳን ያጌድኖ፤ “ኑ ጎልያ ኬጻናዉ ኑዉነ ህንተንቶ አይ እትፐተꬅነ ባዋ። ሽን ፓርሰ ካቲ ቂሮስ አዛዜዳዋዳን፥ ኑ ጻላላይ መꬍና ጎዳዉ እስራኤልያ ጾሳዉ ኬጻና” ያጌድኖ።

4 ሄዋፐ ጉይያን፥ ይሁዳ ቢታ አሳቱ ኬጸናዳን፥ ሄ ጋድያን ደእያ አሳቱ ሀሽያ ሾጬድኖነ ያሽሴድኖ። 5 ቃይ ፓርሰ ካትያ ቂሮሳ ላይꬃይ ዉራናዉነ አፐ ስሚደ ዳርዮስ ፓርሰን ካተቴዳ ዎዲ ጋካናዉ፥ ኡንቱንቱ ይሁዳ አሳቱዋ ዞረታ ላላናዉ ዞረትያዋንታ ማታዬድኖ። †ዳርዮስ፦ ዳርዮሳ ታርኪ ፓይዱዋ 24ፐ ዶሚደ ጻፈቴዳ። ፓይዱዋ 6-23 ጋካናዉ ጻፈቴዳ ታርኪ ጌሻ ጎሊ ኬጸቶደፐ እት ጼቱ ላይꬃ ግድያዋ ጋምእና ሀኔዳባ።

6 አርጸክስሰ ካዉተꬃ ዶመꬃን፥ ኡንቱንቱ ይሁዳነ የሩሳላመ አሳ ሞታናዉ ፓይልያ ዶዬድኖ። አስ. 1:1

7 አርጸክስሰ ካተት ደእሽን፥ ብሽላም፥ ምትረዳት፥ ጻብኤልነ ኡንቱንቱና እትፐ ኦꬅያዋንቱና ግዲደ፥ ፓርሰ ካትያ አርጸክስሳዉ ዳብዳቢያ ጻፌድኖ፤ ሄ ዳብዳቢ ሶርያ ጋደ ፕዶልያንነ ቃላን ጻፈቴዳ።

8 ዎታዳራ ሞድያ ረሁምነ ጻፍያ ሽምሻይ የሩሳላመባ ሀዋዳን ያጊደ፥ ካትያ አርጸክስሳዉ ዳብዳቢያ ጻፌድኖ፤ 9 “ሀ ዳብዳቢ ቢታ ሞድያ ረሁማፐ፥ ጻፍያ ሽምሻያፐ፥ በን ኤላማ ቢታን ደእያ ሱሳፐ፥ ኤሬካፐነ ባብሎነፐ ዬዳ ፕርድያነ ዳናትያ ኡንቱንቱ ያራቱዋፐነ 10 ግታነ ቦንቼቴዳ ካትያ አሳናፋር ኦሞድ አሂደ፥ ሳማርያንነ ኤፍራጺሳ ሻፋፐ አዋይ ዉልያ ባጋ ጋድያን ዎꬄዳ አሳ ኡባፐ ጻፌቴዳ” ያጌድኖ። ‡አሳናፋር፦ እብራዌꬁዋን “ኦስናፓር” ጌተቴ። ሀ ካቲ ቃይ “አሱርባንፓል” ጌተቴ።

11 ኡንቱንቱ አዉ ኪቴዳ ዳብዳቢ ሀዋዳን ያጌ፤ “ካትያ አርጸክስሳዉ፥ ኤፍራጺሳ ሻፋፐ አዋይ ዉልያ ባጋ ጋድያን ደእያ ነ ቆማቱዋፐ፦

12 “ካትያዉ፥ ነ ማታፐ ሃ ኑኮ ዬዳ አይሁዳቱ የሩሳላመ ቢደ፥ ሄ ማካላንቻነ ኢታ ካታማ ዛሪደ ኬጽ ደእያዋ ኤራ። አ ግምቢያ ኦራጽሲኖ፤ አ ጻጱዋካ ኦራጽሲኖ። 13 ቃይ ካትያዉ፥ ሀ ካታማይ ኬጸትያባ ግዶፐነ አ ግምቢያካ ኦራጽስያባ ግዶፐ፥ ሄዋፐ ጉይያን፥ ኡንቱንቱ ጊራነ ቃራጻ ቃንጸናዋ ኤራ። ሄዋፐ ደንዴዳዋን ካትያ ጎለዉ ገልያ ሚሻይ ፓጫ ግዳና። 14 ኑን ካቲ ሱንꬅና ኦꬅያዋንታ ግድያ ግሻዉነ ካቲ ካዉሽሽን በአናዉ ኮየና ድራዉ፥ ሀዋ ኔን ኤራና ማላ ጊደ ኪቴቶ። 15 ሄዋ ድራዉ፥ ካሰ ነ አዎቱዋ ታርክያ ማጻፋይ ኮየቲደ ጼለቶ፤ ሄዋን ጻፈቴዳዋፐ ኔን ሀ ካታማይ በንፐካ ዶሚደ፥ ማካላንቻ ካታማ ግድያዋነ ካተቶነ ቢታቶ መቱዋ መꬌዳዋ ግድያዋ ኤራናዉ ዳንዳያሳ። ሄዋፐ ደንዴዳዋን እ ኮለቴዳ። 16 ሄዋ ድራዉ፥ ሀ ካታማይ ኬጸትያዋ ግዶፐነ አ ግምቢያካ ኦራጽስያዋ ግዶፐ፥ ኤፍራጺሳ ሻፋፐ አዋይ ዉልያ ባጋ ቢታይ ነ ኩሽያፐ ከሴዳዋ ኤራ” ያጌድኖ።

17 ካቲ ሀዋዳን ያግያ ዛሩዋ ኡንቱንቶ የዴዳ፤ “ዎታዳራቱዋ ሞድያ ረሁማ፥ ጻፍያ ሽምሻያ፥ ሳማርያንነ ኤፍራጺሳ ሻፋፐ አዋይ ዉልያ ባጋ ጋድያን ደእያ ኡንቱንቱና ኦꬅያ አሳ ኡባዉ፥ ህንተንታ ሳሮ ጋይ። 18 ህንተንቱ ታዉ የዴዳ ዳብዳቢ ብለቲደ ናባበቴዳ። 19 ታን አዛዝና፥ ካሰ ታርኪ ኮየቲደ ጼለቴዳ፤ ሀ ካታማይ በንፐካ ዶሚደ፥ ካተቶ ማካላንቻ ግድያዌነ መቱዋ መꬍያዋንቱ ደእያ ሳኣ ግድያዌ ኤረቴዳ። 20 የሩሳላመን ዎልቃማ ካተቱ ካዉቴድኖ፤ ኤፍራጺሳ ሻፋፐ አዋይ ዉልያ ባጋ ቢታፐካ ሄ ካተቱ ጊራነ ቃራጻ አኬድኖ። 21 ሄዋ ድራዉ፥ ታን ኡንቱንቶ ኦꬅተ ግያ አዛዙዋ እማና ጋካናዉ፥ ሀ አሳቱ ሄ ካታማ ኬጽያዋ ኤሳና ማላ ኦድተ። 22 ህንተንቱ ሀ የዉዋ ሸነኮ ጌና ማላ ናገትተ። አያዉ ጎፐ፥ ካተቶ መቱዋ ዳርሳናዉ ኮሸና” ያጊደ ኪቴዳ።

23 ካትያ አርጸክሲሳ ዳብዳቢ ረሁማዉ፥ ጻፍያ ሽምሻያዉነ ኡንቱንቱና ኦꬅያ ኡባቶ ናባበቴዳ ዎደ፥ የሩሳላመን ደእያ አይሁዳ አሳቱዋኮ ኤሌል ቢደ፥ ኡንቱንቱ ኬጽያዋ ዎልቃን ተኤድኖ።

24 የሩሳላመን ደእያ ጾሳ ጎልያ ኪታይ ፓርሳ ካቲ ዳርዮሰ ካተቴዳ ላኤንꬆ ላይꬃይ ጋካናዉ፥ ኤቆ ሳኣን አት አጌዳ። ሃገ 1:1፤ ዛካ. 1:1