1 ሄዋ ድራዉ፥ ካቲ ዳርዮስ አዛዝና፥ ባብሎነ ሚሻቱዋ ዎꬅያ ጎለን ደእያ ታርክያ ማዝጋባቱዋ ኡንቱንቱ ኮዬድኖ። 2-3 ሽን ባብሎነ ካታማን ግደናን ደእሽን፥ ሜዶና ጋድያን ደእያ አህምታ ግያ ካታማን እት ጻጸቶ ማጻፋይ ቤቴዳ። ሄ ማጻፋን ጻፈቴዳባይ ሀዋዳን ያጌ፤ *አህምታ፦ ሀ ካታማይ ቃይ ኤክባታና ጌተቴ። “ዎደናዉ ዶገተናዳን፥ ካቲ ቂሮስ ባረ ካተቴዳ ኮይሮ ላይꬃን፥ የሩሳላመን ደእያ ጾሳ ጎልያ ድራዉ፥ ሀዋዳን ያግያ አዋዩዋ ከሴዳ፤ ጾሳ ጎልያ ግድያ፥ ያርሹዋ ያርሽያ ሳአይ ዛረꬂደ ኬጸቶ፤ አ ባሱካ ባሰቶ። ሄ ጌሻ ጎሊ ኡሱፑን ታሙ ዋꬋ አዱሳነ ኡሱፑን ታሙ ዋꬋ አካ ግዶ። 4 ቃይ ሄዙ ማራን ዎልቃማ ሹቻይ ዎꬍና፥ ሄ ማራቱዋ ቦላን ቦላና እት ማራ ምꬃይ ዎꬎ። ሄዎ ኮሽያ ሚሻይ ኡባይ ካትያ ጎለን ሚሻ ዎꬅያ ጎልያፐ እመቶ። 5 ናቡካዳናጾረ፤ ‘የሩሳላመን ደእያ ጾሳ ጎልያፐ ባብሎነ አሄዳ ጾሳ ጌሻ ጎልያ ዎርቃነ ብራ ሚሻቱ ጾሳ ጎልያዉ ጉየ የሩሳላመ ስሚደ፤ ጾሳ ጌሻ ጎልያን ደእኖ’ ያጌዳ።

6 “ህንተንቶ ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናያ፥ ሻታርቦዝናነ ኡንቱንቱና ኦꬅያ ኡባደ፥ ሄ ጎልያኮ ሺቆፕተ። 7 ሀ አሳቱ ኬጽያ ጾሳ ጎልያ ኦሶ ꬉበ ግዶፕተ። አይሁዳቱዋ ሞድያዌነ አይሁዳ ጭማቱ ጾሳ ጎልያ ካሰ እ ደእያ ሳኣን ዛሪደ ኬጽኖ።

8 “ቃይ ሀ አይሁዳ ጭማቱ ጾሳ ጎልያ ኬጽያ ዎደ፥ ኡንቱንቱ ኦꬅያ ኪታይ ኤቀና ማላ፥ ኡንቱንቶ ኮሽያ ሻሉዋ ኡባ ኤፍራጺሳ ሻፋፐ አዋይ ዉልያ ባጋ ቢታፐ ሺሼዳ ካትያ ጊራ ሚሻፐ ህንተንቱ ኡንቱንቶ እማና ማላ፥ ታን አዛዛድ። 9 የሩሳላመን ደእያ ቄሳቱ ሳሉዋ ጾሳዉ ጹግያ ያርሹዋ ያርሻናዉ ኮሽያባይ ኮሩማቱዋ ግድና፥ ዶርሳ ኮልያ ግድና ቃይ ዶርሳ ማራቱዋ ግዶፐነ ኡንቱንቶ እምተ። ቃይ አያነ ፓጭሰናን ኡንቱንቱ ኮይያ ዛርጋ፥ ማጽንያ፥ ዎይንያ ኤሳነ ዛይትያ ኡንቱንቶ ሀቼ ሀቼ እምተ። 10 ሄዋ ህንተንቱ እምያዌ ኡንቱንቱ ሳሉዋ ጾሳ ሎይꬅ ናሸችያ ያርሹዋ ያርሻናሳነ ካትያነ አ ናና ደኡዋ ድራዉካ ዎሳናዳና።

11 “ሀ አዋዩዋ ላምያ ኦንነ ደኦፐ፥ ‘አ ጎልያ ቱሳ ሾዲደ፥ ሄ ቱሳ ጼራ ፖጼዳዋን ሉከቲደ ሀይቆ፤ አ ኬꬃይካ ፕቱዋ ኦልያ ሳኣ ግዶ’ ጋደ ጉጃደካ አዛዛድ። 12 ሀ አዛዙዋ ላማናዉነ ቃይ የሩሳላመን ደእያ ጾሳ ጎልያ ኮላናዉ ኩሽያ ደንꬅያ አይ ካትያ ዎይ አሳ ግድና፥ ባረ ሱንꬃይ ጼሰታና ማላ የሩሳላመ ዶሬዳ ጾሳይ አ ꬋይሶ። ታን ዳርዮስ ሀዋ አዛዛድ። ሀ የዉዋ አሳይ ኡባይ ምኖተꬃን ፖሎ” ያጌ።

13 ሄዋፐ ጉይያን፥ ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናይ፥ ሻታርቦዝንነ ኡንቱንቱና ኦꬅያ ኡባቱ ካቲ ዳርዮስ አዛዜዳዋዳን ምኖተꬃን ኦꬂደ ፖሌድኖ። 14 ሄዋ ድራዉ፥ አይሁዳ ጭማቱ ባረንቱ ኪታ አገናን ኦꬄድኖ፤ ቃይ ትምቢትያ ኦድያዌ ሀዌነ እዶ ናአይ ዛካራስ ኦዴዳ ቃላንካ ምንሴድኖ። እስራኤልያ ጾሳይ አዛዜዳዋዳንነ ፓርሰ ቢታ ካተቱ ቂሮስ፥ ዳርዮስነ አርጸክሲሰ አዋዬዳዋዳን ጌሻ ጎሊ ኬጸቲደ ዉሬዳ። ሃገ 1:1፤ ዛካ. 1:1 15 ዳርዮስ ካተቴዳ ኡሱፑንꬃ ላይꬃን አዳረ ጌተትያ አግናን ሄዘንꬆ ጋላሳን፥ ጎልያ ኪታይ ፖለቴዳ።

16 ሄዋፐ ጉይያን፥ እስራኤልያ አሳይ፥ ቄሳቱ፥ ሌዋቱነ ኦሞዱዋፐ ስሜዳ አሳይ ኡባይ ጾሳ ጎልያ አንጁዋ ባላ ናሸቻን ቦንቼድኖ። 17 ሄ ጾሳ ጎልያ አንጁዋ ባላ ቦንችያ ዎደ፥ ኡንቱንቱ እት ጼቱ ኮሩማቱዋ፥ ላኡ ጼቱ ዶርሳ ኦርገቱዋነ ኦይዱ ጼቱ ዶርሳ ማራቱዋ ያርሼድኖ፤ ቃይ ናጋራ ያርሾ ታማነ ላኡ እስራኤልያ ዛራቱዋ ፓይዱዋን ታማነ ላኡ ዴሻ ኦርገቱዋካ ያርሼድኖ። 18 ሙሴ ማጻፋን ጻፈቴዳዋዳን፥ የሩሳላመን ደእያ ጾሳዉ ኦꬃና ማላ፥ ቄሳቱ ዋ ባረንቱ ማራዳንነ ሌዋቱዋካ ኡንቱንቱ ዘረꬃዳን ዎꬄድኖ።

19 ኦሞዱዋፐ ስሜዳ አሳቱ ኮይሮ አግናን ታማነ ኦይደንꬆ ጋላሳን ፓስጋ ባላ ቦንቼድኖ። ከሳ 12:1-20 20 ቃይ ቄሳቱ ነ ሌዋቱ ባረና ጌሼድኖ፤ ሄዋ ድራዉ፥ ኡንቱንቱ ኡባይካ ጌሻ። ሄዋፐ ጉይያን፥ ሌዋቱ ኦሞዱዋፐ ስሜዳ ኡባዉ፥ ቄሳቶነ ባረንቱ ሁጲያዉ ፓስጋ ዶርሳ ሹኬድኖ። 21 ኦሞዱዋፐ ስሜዳ እስራኤልያ አሳይነ አይሁዳ ግደና አሳቱ ኦꬅያ ቱናተꬃፐ ባረንታ ሻክ፥ መꬍና ጎዳኮ፥ እስራኤልያ ጾሳኮ ስሜዳ አሳይ ኡባይ ፓስጋ ሜድኖ። 22 ቃይ ኡንቱንቱ ላፑን ጋላሳዉ ማጋገ ኡክꬃ ባላ ናሸቻን ቦንቼድኖ፤ አያዉ ጎፐ፥ መꬍና ጎዳይ ኡንቱንቱ ናሸቼዳ፤ ቃይ መꬍና ጎዳ፥ ሄዌካ እስራኤልያ ጾሳ ጎልያ ኡንቱንቱ ኬጺደ ፖላና ማላ፥ አሶረ ካትያ ቆፋ ጾሳይ ላምና፥ ካቲ ኡንቱንታ ማዴዳ።