1 ሄዋፐ ስሚደ፥ ዳሮ ዎድያፐ ጉይያን፥ ፓርሰ ቢታን አርጸክስስ ካተቴዳ ዎድያን እዝራ ጌተትያ እት አሳይ ደኤዳ። እ ሳራያ ናኣ፤ ሳራይ አዛርያ ናኣ፤ አዛሪ ህልቂያ ናኣ፤ ህልቂ ሻሉማ ናኣ፤ 2 ሻሉም ጻዶቃ ናኣ፤ ጻዶቀ አህጹባ ናኣ፤ አህጹብ አማርያ ናኣ፤ 3 አማር አዛርያ ናኣ፤ አዛሪ ማራዮታ ናኣ፤ ማራዮት ዛራህያ ናኣ፤ 4 ዛራሂ ኡዛ ናኣ፤ ኡዝ ቡቃ ናኣ፤ 5 ቡቅ አብሹአ ናኣ፤ አብሹእ ፒንሃሳ ናኣ፤ ፒንሃስ ኤልኣዛራ ናኣ፤ ኤልኣዛረ ቄሰ ኡባቱዋ ካፑዋ አሮና ናኣ።

6 ሀ እዝር ባብሎነፐ ፑደ ዬዳ። እ መꬍና ጎዳይ፥ እስራኤልያ ጾሳይ እሜዳ ሙሴ ህግያ ሎይꬅ ጻናዬዳ ኤራንቻ ጻፍያ። መꬍና ጎዳ አ ጾሳ ኩሺ አ ቦላ ደእያ ድራዉ፥ እ ኦቼዳዋ ኡባ ካቲ አዉ እሜዳ። 7 እስራኤልያ አሳፐ አማሬዳዋንቱነ ቃይ ቄሳቱ ዋፐ፥ ሌዋቱዋፐ፥ ማዝሙርያ የጽያዋንቱፐ፥ ፐንግያ ናግያዋንቱፐነ ጌሻ ጎልያ ቆማቱዋፐ አማሬዳዋንቱ ካቲ አርጸክስስ ካተቴዳ ላፑንꬃ ላይꬃን እዝራና እትፐ ፑደ የሩሳላመ ቤድኖ። 8 ካቲ ካተቴዳ ላፑንꬃ ላይꬃን እቼሻንꬆ አግናን እዝር የሩሳላመ ጋኬዳ። 9 ኮይሮ አግናን ኮይሮ ጋላሳን ባብሎነፐ ፑደ ቡሳ ዶሚደ፥ እቼሻንꬆ አግናን ኮይሮ ጋላሳን የሩሳላመ ጋኬዳ። አያዉ ጎፐ፥ አ ጾሳ ሎኦ ኩሺ አ ቦላን ደኤ። 10 ሄዋ ጻላላ ግደናን እዝር መꬍና ጎዳ ህግያ ጻናያናዉነ ኦꬃናዉ፥ ቃይ እስራኤልያን አ ዎጋነ አ ፕርዳ ታማርሳናዉ ባረ ዎዛና ጊግስ ዎꬄዳ።

11 መꬍና ጎዳይ እስራኤልያዉ እሜዳ ህግያ ጻናዪደ፥ ሎይꬅ ኤርያ ቄሰነ ጻፍያ ግድያ እዝራዉ ካቲ አርጸክሲሰ ዱቅ እሜዳ ዳብዳቢ ሀዋዳን ያጌ፦

12 “ካተቱዋ ካትያ አርጸክስሳፐ፥ ቄስያነ ሳሉዋ ጾሳ ህግያ ሎይꬅ ጻፍያ እዝራ፥ ሳሮተꬃይ ነዉ ግዶ!

13 “ታ ካዉተꬃ ግዱዋን ደእያ እስራኤልያ አሳፐ ኦንነ፥ ቄሳቱ ዋፐ ዎይ ሌዋቱዋፐ ግዶፐነ፥ የሩሳላመ ባናዉ ኮይያ አሳይ ኡባይ ኔናና እትፐ ባናዳን ታን ኦዳድ። 14 ታንነ ታናና ዞረትያ ላፑን አሳቱ እትፐ ግዲደ፥ ኔን ነ ኩሽያን ደእያ ጾሳ ህግያዳን፥ ባደ ይሁዳንነ የሩሳላመን ደእያ ሀኖታይ አይ ማለንቶ ኦቻናዳን ኔና ኪቴቶ። 15 አዉ ደእያ ሳአይ የሩሳላመን ደእያ እስራኤልያ ጾሳዉ፥ ታን ካቲነ ታናና ዞረትያ አሳቱ ኑ ሸንያን እሜዳ ዎርቃነ ብራ እሞታቱዋ ኔን አካደ ባ። 16 ሄዋ ቦላካ ቃይ ኔን ባብሎነ ቢታ ኩመንꬃፐ ደሜዳ ብራነ ዎርቃ ኡባ፥ ቃይ አሳይነ ቄሳቱ የሩሳላመን ደእያ ባረንቱ ጾሳ ጎልያዉ ባረንቱ ሸንያን እሜዳ እሞታካ አካደ ባ። 17 ሀ ሚሻን ኮሩማቱዋ፥ ዶርሳ ኦርገቱዋነ ዶርሳ ማራቱዋ፥ ቃይ ካꬃ ያርሾነ ኡሻ ያርሾ ሻማነንቶ ኤራ፥ የሩሳላመን ደእያ ህንተንቱ ጾሳ ጎልያን ያርሽያ ሳኣን ያርሻ።

18 “ሄዋፐ ፓላሂደ አቴዳ ብራነ ዎርቃ ኔንነ ኔናና ደእያ ነ ቢታ አሳቱ ኦꬃናዉ ኮይያዋ ህንተንቱ ጾሳ ሸንያዳን ኦꬅተ። 19 ቃይ ህንተንቱ ጾሳ ጎልያ ግዶን ኦሰትያ ኦሶ ህንተንቱ ጎኤታና ማላ፥ ኑን ነዉ እሜዳ ሚሻቱዋ ኡባ የሩሳላመ ጾሳ ስንꬃን ዎꬃ። 20 ሀዋፐ ሀራባይ ህንተንቱ ጾሳ ጎልያዉ ኮሽያባይ አያነ ግዶፐ፥ ሄዎ ኮሽያ ሻሉዋ ካትያ ጎለን ሻሉዋ ዎꬅያ ጎልያፐ አካናዉ ዳንዳያሳ።

21 “ሄዋ ድራዉ፥ ሀእ ታን ካቲ አርጸክስስ ኤፍራጺሳ ሻፋፐ አዋይ ዉልያ ባጋ ቢታን ደእያ ሻሉዋ ጎለን አዎተꬃይ ደእያ ኡባቶ ሀ አዛዙዋ እማድ። ቄስያ ግድያነ ሳሉዋ ጾሳ ህግያ ሎይꬅ ጻፍያ እዝር ህንተንታ ኦችያዋ አያነ ግዶፐነ አዉ እምተ። 22 ቃይ ሄዙ ሻአነ ኦይዱ ጼቱ ኪሎ ግራመ ዴጽያ ብራ፥ እት ጼቱ ኩንታለ ዛርጋ፥ ላኡ ሻአ ሊትሮ ዎይንያ ኤሳነ ላኡ ሻአ ሊትሮ ዎጋራ ዛይትያ፥ ቃይ ኮሽያ ኬሻ ማጽንያና ኡባ እዝራዉ እምተ። 23 ካትያ ቦላነ ካትያ ናና ካዉተꬃ ቦላ ሀንቁ ዬና ማላ፥ ሳሉዋ ጾሳይ አዛዜዳዋ ኡባ ሳሉዋ ጾሳ ጎልያዉ አያነ አሸናን እምተ። 24 ቃይ ቄሳቱ ዋፐ፥ ሌዋቱዋፐ፥ ማዝሙርያ የጽያዋንቱፐ፥ ፐንግያ ናግያዋንቱፐ፥ ጾሳ ጎልያ ቆማቱዋፐነ ዱማ ዱማ ኦሱዋ ኦꬅያ አሳ ኡባፐ ህንተንቱ ጊራነ ቃራጻ አካናዉ ህንተንቶ አይ ማትነ ባዋ።

25 “ኔኖ እዝራ፥ ኔን ቃይ፥ ነዉ ጾሳይ እሜዳ ኤራተꬃዳን ኤፍራጺሳ ሻፋፐ አዋይ ዉልያ ባጋ ቢታን ደእያ ነ ጾሳ ህግያ ኤርያ አሳ ቦላ ፕርዳና ማላ፥ ዳናቱዋነ ፕርድያዋንታ ሱንꬃ። ቃይ ሄ ህግያ ኤረናዋንቱ ደኦፐ፥ ኡንቱንቱ ታማርስተ። 26 ነ ጾሳ ህግያዉነ ካትያ ህግያዉ አዛዘተና ኦንነ ደኦፐ፥ እ ኤለካ ሀይቁዋን፥ የደሳን፥ አ ሻሉዋ ቦንቂያዋን ዎይ ቃሹዋን ሙረቶ” ያጌ።

27 የሩሳላመን ደእያ መꬍና ጎዳ ጎልያ ሀዋዳን ሎይꬃና ማላ፥ ካትያ ዎዛናን ሀ ቆፋ ዎꬄዳ መꬍና ጎዳዉ፥ ኑ አዎቱዋ ጾሳዉ ጋላታይ ግዶ! 28 ቃይ ካትያ፥ ካትያና ዞረትያዋንቱነ አናና ኦꬅያ ዎልቃማ ካፓቱዋ ኡባ ስንꬃን ባረ አገና ሲቁዋ ታዉ በሴዳ መꬍና ጎዳ፥ ታ ጾሳ ኩሺ ታናና ደእያ ድራዉ፥ ታን ምነታድ። ቃይ እስራኤልያ ካፓቱዋፐ ታናና ፑደ ቢደ፥ የሩሳላመ ባና ማላ ሺሻይ።