1 እዝር ጾሳ ጎልያ ስንꬃን ኩንድ ዬኪደ ዎስያ ዎደነ ናጋራካ ፓጽያ ዎደ፥ እስራኤልያ አሳፐ ዳሩ፥ ማጫዌ፥ አቱማዌነ ናናይ ኡባይ አኮ ሺቂደ፥ ምሻ ዬኩዋ አናና ዬኬድኖ። 2 ሄዋፐ ጉይያን፥ ኤላማ ያራ ግዴዳ ይህኤላ ናአይ ሻካነ ሀዋዳን ያጌዳ፤ “ኑን ሀ ቢታን ደእያ አይሁዳ ግደና ማጫዋንታ አኬዳ ድራዉ፥ ኑ ጾሳዉ አማነትበይኮ። ግዶፐነ፥ ቃይ እስራኤልያዉ ሀእካ ህዶታይ ደኤ። 3 ሄዋ ድራዉ ታ ጎዳዉ፥ ኔንነ ኑ ጾሳ አዛዞ ያይያዋንቱ ዞሬዳዋዳን ኑን ሀ ማቻቱዋነ ኡንቱቱፐ የለቴዳ ናና ኡባ የዳናዉ ኑ ጾሳና ጫቀቶይተ። ሀዌ ኡባይ ህጊ ግያዋዳን ፖለቶ። 4 ሀ የዉዋ ኑን ዎት ኦꬃነንቶ፥ ኑና ካለꬃናዌ ነ ኦሱዋ ግድያ ድራዉ፥ ደንዳ! ምና! ኑንካ ኔና ማዳና”።

5 እዝር ደንድ ኤቂደ፥ ካለꬅያ ቄሳቱ ዋ፥ ሌዋቱዋነ እስራኤልያ አሳ ኡባ ሀ ጌተቴዳዋዳን ኦꬃና ማላ ጫቂሴዳ፤ ኡንቱንቱካ ጫቄድኖ። 6 ሄዋፐ ጉይያን፥ እዝር ጾሳ ጎልያ ስንꬃፐ ደንዲደ፥ ኤልያሽባ ናአይ ያሆሀናን ደእያ ክፍልያ ገሌዳ። ኩመንꬃ ቃማ ኦሞዱዋፐ ስሜዳ አሳቱዋ ናጋራዉ ዬኪደ አቄዳ ድራዉ፥ ሄ ሳኣን ቁማ ምቤና፤ ሃꬃካ ኡሽቤና።

7 ሄዋፐ ጉይያን፥ ኦሞዱዋፐ ስሜዳ አሳይ ኡባይ የሩሳላመ ሺቃና ማላ፥ ይሁዳ ኡባንነ የሩሳላመን አዋዩዋ አዋዬድኖ። 8 ሀ ሄዙ ጋላሳ ግዶን ሄ ሳኣ ሺቀና ኦንነ ደኦፐ፥ አዉ ደእያባይ ኡባይ አፐ አከታናዳንነ እካ ኦሞዱዋፐ ስሜዳ ሺቁዋፐ ሻከቲደ የደርሰታናዳን ካፓቱነ ጭማቱ ኩሼድኖ።

9 ሄ ጌተቴዳ ሄዙ ጋላሳቱ ዉረናን ደእሽን፥ ኡዱፑንꬃ አግናን ላታማንꬃ ጋላሳን ይሁዳነ ቢንያማ አሳይ ኡባይ የሩሳላመ ሺቂደ፥ ሀ ዴጾ የዉዋፐነ ዎልቃማ እራፐ ደንደዳዋን ኮኮሪደ፥ ጾሳ ጎልያ ስንꬃን ደእያ ዳባባን ኡቴድኖ። 10 ሄዋፐ ጉይያን እዝር ደንድ ኤቂደ፥ ኡንቱንታ ሀዋዳን ያጌዳ፤ “አይሁዳ ግደና ማጫ አሳቱዋፐ ማቼቱዋ አኪደ ናቄድታ፤ ሄ ጋሱዋን እስራኤልያ አሳ ናቁዋ ካሰዋፐካ ያ ዳርሴድታ። 11 ሀእ ህንተንቱ ናጋራ መꬍና ጎዳዉ፥ ህንተንቱ ማይዛ አዎቱዋ ጾሳዉ ፓጽተ፤ እ ዶስያባካ ኦꬅተ። ሄ ቢታን ደእያ አይሁዳ ግደና አሳቱዋፐነ አይሁዳ ግደና ህንተንቱ ማቼቱዋፐ ሻከትተ”።

12 ሄ ሳኣን ሺቄዳ ሺቁ ባረንቱ ኮሻ ꬎቁ ኦꬂደ፥ ሀዋዳን ያጌድኖ፤ “ኔን ኑዉ ኦዴዳዋዳን ኑን ኦꬃናዉ በሰ። 13 ሽን አሳ ፓይዱ ጮራ፤ እራይ ዎልቃም ቡክያ ባልጉዋ። ያትያ ድራዉ፥ ኑን እራፐ አትያ ሳአይ ባይና ሳኣን ሀዋን ኤቃናዉ ዳንዳዮኮ። ቃይ ኑን ሀ የዉዋን ሎይꬅ ናቄዳ ድራዉ፥ ሀዌ እት ጋላሳን ዎይ ላኡ ጋላሳን ጊግያባ ግደና። 14 ሄዋ ድራዉ፥ ሀ ሺቄዳ አሳ ኮታን ኑ ካፓቱ ኮሽያዋ ኦꬅኖ። ሀ የዉዋፐ ደንዴዳዋን ኑ ጾሳ ዎልቃማ ሀንቁ ኑፐ ስማና ጋካናዉ፥ ኑ ካታማቱዋን ደእያ አይሁዳ ግደና ማጫዋንታ አኬዳ ኡባይ ኬሬዳ ዎድያን የሩሳላመ ዪኖ፤ ቃይ ሄ ካታማቱዋ ጭማቱነ ፕርድያዋንቱካ ኡንቱንቱና ዪኖ” ያጌድኖ። 15 አሳሄላ ናአይ ዮናታንነ ቲቅዋ ናአይ ያህዛይ ጻላላይ ኡንቱንቱ ቆፋ ጳልቄድኖ፤ ቃይ ማሹላምነ ሌዊያ ግዴዳ ሻባታይ ጳልቂያዋንታ ማዴድኖ።

16 ሄዋ ድራዉ፥ ኦሞዱዋፐ ስሜዳ አሳይ ሄ ጌዳዋዳን ኦꬄድኖ። ቄሲ እዝር ኡባ ዛራቱዋፐካ ካፓቱዋ ኡንቱንቱ ሱንꬃን ሱንꬃን ዶሬዳ። ታማንꬃ አግናን ኮይሮ ጋላሳን ካፓቱ የዉዋ ቆር ጼላናዉ ዶሜድኖ። 17 ኮይሮ አግናን ኮይሮ ጋላሳይ ጋክያ ዎደ፥ አይሁዳ ግደና ማጫዋንታ አኬዳ አሳቱዋ ኡባ ቆሪደ ዉርሴድኖ።

18 አይሁዳ ግደና ማጫ አሳቱዋፐ ማችያ አኬዳዋንቱ ሀዋፐ ካሊደ ጻፈቴዳዋንታ።

ቄሳቱ ዋፐ: ዮጸዴቃ ናና ግዴዳ ኢያሱነ አ እሻቱዋ ያራፐ ማእሴያ፥ ኤልኤዛራ፥ ያሪባነ ጋዳልያ። 19 ሀዋንቱ ባረንቱ አይሁዳ ግደና ማቼቱዋ የዳናዉ ጫቄድኖ፤ ቃይ ባረንቱ ናቁዋ ድራዉ፥ ዉድያፐ እት ዶርሳ ኦርግያ ናቁዋ ያርሹዋ ኦꬂደ ያርሼድኖ። 20 እሜራ ያራን አይሁዳ ግደና ማቼቱዋ አኬዳዋንቱ ሀናናነ ዛባድያ። 21 ሀሪማ ያራቱዋፐ ማእሴያ፥ ኤላሳ፥ ሻማእያ፥ ይህኤላነ ኦዝያና። 22 ፓሽሁራ ያራቱዋፐ ኤልዮኤናያ፥ ማእሴያ፥ እስማኤላ፥ ናታንኤላ፥ ዮዛባዳነ ኤልኣሳ።

23 ሌዋቱዋፐ: ዮዛባዳ፥ ሻማእያ፥ ቃሊጻ ግያ ቀላያ፥ ፓታህያ፥ ይሁዳነ ኤልኤዛራ።

24 ማዝሙርያ የጽያዋንቱፐ: ኤልያሽባ።

ፐንግያ ናግያዋንቱፐ: ሻሉማ፥ ጸለማነ ኡራ።

25 ቃይ ሀራ እስራኤልያ አሳፐ: ፓርኦሻ ያራቱዋፐ ራምያ፥ ይዝያ፥ ማልክያ፥ ምያሚና፥ ኤልኣዛራ፥ ማልክያነ ባናያ።

26 ኤላማ ያራቱዋፐ ማታንያ፥ ዛካራሳ፥ ይህኤላ፥ አብዳ፥ ይረሞታነ ኤላሳ።

27 ዛቱ ያራቱዋፐ ኤልዮኤናያ፥ ኤልያሽባ፥ ማታንያ፥ ይረሞታ፥ ዛባዳነ አዚዛ።

28 በባያ ያራቱዋፐ ያሆሀናና፥ ሀናንያ፥ ዛባያነ አትላያ።

29 ባና ያራቱዋፐ ማሹላማ፥ ማሉካ፥ አዳያ፥ ያሹባ፥ ሻኣላነ ይረሞታ።

30 ፓሀት-ሞኣባ ያራቱዋፐ አድናሀ፥ ካላላ፥ ባናያ፥ ማእሴያ፥ ማታንያ፥ ባጻልኤላ፥ ቢኑያነ ምናሳ።

31 ሀሪማ ያራቱዋፐ ኤልኤዛራ፥ ይሽያ፥ ማልክያ፥ ሻማእያ፥ ሽምኦና፥ 32 ቢንያማ፥ ማሉካነ ሻማርያ።

33 ሀሹማ ያራቱዋፐ ማታናያ፥ ማታታ፥ ዛባዳ፥ ኤልፈሌሳ፥ የረማያ፥ ምናሳነ ሽምአ።

34 ባና ያራቱዋፐ ማእዳያ፥ አምራማ፥ ኡኤላ፥ 35 ባናያ፥ በድያ፥ ካሉሀ፥ 36 ዋንያ፥ ማረሞታ፥ ኤልያሽባ፥ 37 ማታንያ ማታናያነ ያእሳ።

38 ቢኑያ ያራቱዋፐ ሽምአ፥ 39 ሸሌምያ፥ ናታና፥ አዳያ፥ 40 ማክናዳባያ፥ ሻሻያ፥ ሻራያ፥ 41 አዛርኤላ፥ ሸሌምያ፥ ሻማርያ፥ 42 ሻሉማ፥ አማርያነ ዮሴፎ።

43 ናቦ ያራቱዋፐ ይእኤላ፥ ማቲትያ፥ ዛባዳ፥ ዛቢና፥ ያዳያ፥ ዩኤላነ ባናያ።

44 ሀዋንቱ ኡባቱ አይሁዳ ግደና ማቼቱዋ አኬዳዋንታ። እቱ እቱ ሀራይ አቶ ናናካ የሌድኖ።