1 ሀ ኡባባይ ሀኔዳዋፐ ጉይያን፥ አሳ ካለꬅያዋንቱ ታኮ ዪደ፥ ሀዋዳን ያጌድኖ፤ “እስራኤልያ አሳይ፥ ሀራይ አቶ ቄሳቱ ካ ሌዋቱካ፥ ባረንቱ ሄራን ደእያ አይሁዳ ግደና አሳቱዋፐ ባረንታ ሻክበይክኖ። ኡንቱንቱካ ካናነቱ፥ ሂተቱ፥ ፓርዛዋናቱ፥ ያቡሳዋናቱ፥ አሞናቱ፥ ሞኣባቱ፥ ግብጼቱነ አሞራዋናቱ ኦꬅያዋዳን ቱና ኦሱዋ ኦꬅኖ። 2 ቃይ ባረንቶነ ባረንቱ ናናዉ አይሁዳ ግደና ማጫ ናናቱዋፐ ማቻቶ ኦꬂደ አኬድኖ፤ ሄዋፐ ደንዴዳዋን ጌሻ ዘረꬃቱ አይሁዳ ግደናዋንቱና ዋላከቴድኖ። ካለꬅያዋንቱነ ካፓቱ አማነተናዋንታ ግዲደ፥ ሀዋ ማላ ኦꬃናዉ ስንꬃ ጼራ ግደድኖ”።

3 ታን ሀ የዉዋ ስሴዳ ዎደ፥ ታ ማዩዋነ ታ ቁማዩዋ ፔꬋድ፤ ታ ሁጲያ ብናናነ ታ ቡቻካ ሾዳድ፤ ቃይ ዳሮ ዳጋማደ ኡታ አጋድ። 4 ኦሞዱዋፐ ስሜዳ አሳይ ኦꬄዳ ናጋራ ድራዉ፥ እስራኤልያ ጾሳይ ኦዴዳ ቃላዉ ያዪደ አሳይ ኡባይ ታን ደእያ ሳኣ ታኮ ሺቄዳ። ኦማርሳ ያርሹዋ ያርሽያ ዎዲ ጋካናስካ ዳጋማደ ኡቶ ሳኣፐ ታን ደንዳበይከ።

5 ሽን ኦማርስ ያርሹዋ ያርሽያ ዎዲ ጋክያ ዎደ፥ ታ ማዩነ ታ ቁማዩ ፖሸት ኡት ደእሽን፥ ታን ካዉሻደ ኡቶ ሳኣፐ ደንዳድ። ቃይ ጉልባታደ መꬍና ጎዳ፥ ታ ጾሳኮ፥ ታ ኩሽያ ደንꬃደ፥ ሀዋዳን ያጋደ ዎሳድ፤ 6 “አቤት ታ ጾሳዉ፥ ታን ታ ስንꬃ ኔኮ ፑደ ደንꬃናዉካ ያያይነ ዬላታይ፤ አያዉ ጎፐ፥ ኑ ናጋራይ ዶረቲደ፥ ኑ ሁጲያፐ ፑደ አꬌዳ፤ ኑ ናቁካ ሳሉዋ ጋኬዳ። 7 ኑን ኑ ማይዛ አዎቱዋ ዎድያፐ ዶሚደ፥ ሀቼ ጋካናዉ፥ ኔና ሎይꬅ ናቄዶ። ኑ ናጋራፐ ደንደዳዋን ኑን፥ ኑ ካተቱነ ኑ ቄሳቱ ሀእዋዳንካ አላጋ ካተቱዋ ኩሽያን ማሻዉ፥ ኦሞዶ፥ ቦንቂያዋነ ዉርሰꬃ ዬላዉ አꬊደ እመቴዶ።

8 “ሽን ሀእ ኑዉ ጉꬃ ማሮተꬃ ዎዲ እመቴዳ፤ አያዉ ጎፐ፥ መꬍና ጎዳይ ኑ ጾሳይ ኑፐ አማሬዳ ዘረꬃቱ አታና ማላ ኦꬄዳ፤ ሀ ጌሻ ሳኣን እ ኑና ሳሮተꬃን ዎꬄዳ። ኑ ጾሳይ ኑ አይፍያ ዶዬዳ፤ ቃይ ኑ አይለተꬃፐካ ኑዉ ጉꬃ ኦራꬃ ደኡዋ እሜዳ። 9 ኑን አይልያ ግዶፐነ፥ ኑ ጾሳይ ኑና አይለተꬃን አግቤና፤ ኑ ደኡዋ ኦራꬄዳ። ቃይ ኑ ጾሳ ጎልያ ኬጻና ማላ፥ ኮለቴዳዋ ኦራꬃና ማላነ ይሁዳንነ የሩሳላመን ኑን ሳሮተꬃን ደአና ማላ፥ ፓርሰ ቢታ ካተቱዋ ስንꬃን ኑዉ ባረ አገና ሲቁዋ በሴዳ።

10 “ሽን ኑ ጾሳዉ፥ ሀእ ያትና፥ ኑን ዋጋናዉ ዳንዳዬቶ? አያዉ ጎፐ፥ ኑን ሀእካ ነ አዛዙዋ አግ አጌዶ። 11 ትምቢትያ ኦድያ ነ ቆማቱዋ ባጋና ኔን ሀዋዳን ያጋዳ፤ ‘ህንተ ላታናዉ ገልያ ጋዲ ሄ ጋድያን ደእያ አሳ ቱናተꬃፐ ደንዴዳዋን ቱኔዳ፤ ሀ ጋጻፐ ቢደ፥ ህን ጋጻ ጋካናዉ፥ ኡንቱንቱ አ ባረንቱ ቱና ኪታን ኩንꬄድኖ። 12 ሄዋ ድራዉ፥ ህንተንቱ ምኖ ግዳና ማላ፥ ሄ ጋድያ አይፍያ ማና ማላነ መꬍናዉ ህንተንቱ ናናቶ ላትሳና ማላ፥ ህንተንቱ ማጫ ናና ኡንቱንቱ አቱማ ናናዉ እሞፕተ፤ ኡንቱንቱ ማጫ ናናካ ህንተንቱ አቱማ ናናዉ አኮፕተ። ኡንቱንቱ ሳሮተꬃንነ ዱረተꬃን ደአና ማላካ አሞቶፕተ’።ከሳ 34:11-16፤ ዛረ. 7:1-5

13 “ኑ ቦላ ጋኬዳ ኢታባይ ኡባይ ኑ ኢታ ኦሱዋፐነ ኑ ዎልቃማ ናቁዋፐ ደንዴዳዋና። ግዶፐነ፥ ኔን ኑ ጾሳይ ኑ ናጋራ ዳሩዋ ኬሻ ኑና ፕርዳበይካ፤ ሽን ኑፐ አማሬዳዋንታ ዘረꬃዉ አሻዳ። 14 ያትና፥ ኑን ሀእካ ዛረꬂደ፥ ሀዋ ማላ ቱናባ ኦꬅያ አሳቱዋና እሙዋንነ አኩዋን ዋላከቲደ፥ ነ አዛዙዋ እጼዶ ጋኔ? ቃይ ሀ አቴዳ ጉꬃ ዘረꬃቱካ ꬋያና ጋካናዉ፥ ነ ሀንቁ ኑ ቦላን ዳረኔየ? 15 መꬍና ጎዳዉ፥ እስራኤልያ ጾሳዉ፥ ኔን ጽሉዋ። ኑ ናቁዋፐ ደንዴዳዋን ኑፐ እቱነ ነ ስንꬃን ኤቃናዉ ዳንዳየናዋ ግዶፐነ፥ ኑን ዘረꬃዉ አቴዳዋንቱ ሀቼ ሀዋን ነ ስንꬃን ደኤቶ” ያጋድ።