1 ሄዋፐ ስማደ ታን ታማነ ኦይዱ ላይꬃፐ ጉይያን፥ ባርናባሳና ላኤንꬁዋ የሩሳላመ ባደ፥ ቲታካ ታናና አካደ ባድ። 2 ጾሳይ ታዉ ሳጻን ቆንጭሴዳ ድራዉ ባደ ታን ሀእ ኦꬅያ ኦሱ ዎይ ካሰ ኦꬄዳዌ መላ አተና ማላ፥ ክርስቶሳን አማንያዋንታ ካለꬅያዋንታ ዱማ ሺሻደ፥ አይሁዳ ግደና አሳዉ ታን ኦድያ ምሽራቹዋ ቃላይ አይ ማለንቶ ኡንቱንቶ ኦዳድ። 3 ሽን ሀራይ አቶ ታናና ደእያ ቲታ እ ግሪከ ጋድያ አሳ ግድሽን፥ ቃጻረቶ ጊደ ጎደትበይክኖ። 4 ግዶፐነካ፥ ዎርዱዋን ኑዉ እሻቱዋ ማላት ዪደ፥ ኑናና ዋላከቴዳ ጮራ አሳቱ አ ቃጻራናዉ ኮዬድኖ። ሄ አሳቱ ክርስቶሳ የሱሳን ኑዉ ደእያ ኑን ኮዬዳዋዳን ሀናና ዳንዳይያ ላአተꬃ ዎቺደ ꬊሻናዉ፥ ዉኤቲደ ኑ ግዶ ገሊደ ኑና አይለ ኦꬃናዉ ኮዬድኖ። 5 ሽን ምሽራቹዋ ቃላ ቱማተꬃይ ህንተንቱና ምን ደአና ማላ፥ ኑን ሀራይ አቶ ጉꬃ ዎድያካ ኡንቱንቶ ሞደትበይኮ።

6 ሽን ካፓቱዋ ማላትያዋንቱ ታዉ አይነ ኦራꬃ ቆፋ እምበይክኖ፤ ሀዋ አያዉ ጋይታ ጎፐ፥ ሀዋፐ ካሰ ኡንቱንቱ ኦና ግድናካ ታና መትያባ ግደና፤ ጾሳይ አሳ ሶምእያ ጼሊደ ፕርደና። ዛረ. 10:17 7 ሽን ጉየፐ ጾሳይ ጰጽሮሳዉ፥ አይሁዳቶ ምሽራቹዋ ቃላ ኦድያ ሀዳራ እሜዳዋዳን፥ ታዉካ አይሁዳ ግደና አሳዉ ምሽራቹዋ ቃላ ኦድያ ሀዳራ እሜዳዋ ኡንቱንቱ በኤድኖ። 8 አያዉ ጎፐ፥ ጰጽሮስ አይሁዳቶ የሱስ ኪቴዳዋ ግዴዳዋዳን፥ ታንካ ጾሳ ዎልቃን አይሁዳ ግደና አሳዉ የሱስ ኪቴዳዋ ግዳድ። 9 ቃይ ካለꬅያዋንታ ማላቲደ ቤትያዋንቱ፥ ያቆብ፥ ጰጽሮስነ ዮሃንስ፥ ታዉ እመቴዳ አꬎ ኬካተꬃ ኤሪደ፥ ታናነ ባርናባሳ ኑ ኩሽያ ኦይቂደ ሳሮቴድኖ። ታንነ ባርናባስ አይሁዳ ግደና አሳ ግዶን ኦꬃናዳን፥ ቃይ ኡንቱንቱ አይሁዳቱዋ ግዶን ኦꬃናዳን ቃቺደ ደንዴዶ። 10 ኡንቱንቱ ኑና ካሰፐካ ታን ኦꬃናዉ ቆፓደ ደእያ ህዬሳቱዋ ማዳናዋ ጻላላ ቆፍሴድኖ።

11 ሽን ጰጽሮስ አንጾክያ ግያ ካታማ ዬዳ ዎደ፥ እ ባይዜዳ ድራዉ፥ ቆንጭያን ታን አ፥ “ኔን ባይዛንቻ” ያጋድ። 12 አያዉ ጎፐ፥ ያቆባ ማታፐ ኪተቴዳ አማሬዳ አሳይ ያናፐ ካሰ አይሁዳ ግደና አሳቱዋና ቁማ ሜ፤ ሽን ኡንቱንቱ ዬዳዋፐ ጉይያን፥ አይሁዳ ግደናዋንቱ አማንያዋንታ ግዳናዉ ቃጻረታናዉ ኮሼ ግያዋንቶ ያዬዳ ድራዉ፥ ምያዋ ኤሲደ፥ አይሁዳ ግደናዋንቱፐ ሻከቴዳ። 13 ቃይ የኮ አማኔዳ አይሁዳቱ ጰጽሮሳና ያሻ ዶሜድኖ፤ ሀራይ አቶ ባርናባስካ ኡንቱንቱና ያሻንቻ ግዴዳ።

14 ሽን ኡንቱንቱ ምሽራቹዋ ቃላ ቱማተꬃዳን፥ ሱረ ሀመተናዋ በኣደ፥ ጰጽሮሳ ሄ ኡባ አሳ ስንꬃን፥ “ኔን ጾሳ አሳ አይሁዳ ግዳደ፥ ኡንቱንቱዳን ግደናን ጾሳ አሳ ግደና አይሁዳ ግደናዋንቱዳን ደኣ፤ ሽን ያትና፥ ዎታደ አይሁዳ ግደናዋንታ፥ ‘አይሁዳቱዋዳን ደእተ’ ጋደ ግዳይ?” ያጋድ።

15 ኑን የለታን አይሁዳ፤ “ናጋራንቻ ግዴዳ አይሁዳ ግደና አሳቱዋ” ግዶኮ። 16 ሄዋ ግዶፐካ፥ አሳይ የሱስ ክርስቶሳ አማኒደ ጾሳ ስንꬃን ጽላናፐ አትን፥ ሙሴ ህግያ ናጉዋን ጽለናዋ ኤሬዶ፤ አሹዋ ማዬዳ አሳይ ኡባይ ሙሴ ህግያ ናጉዋን ጽለና ድራዉ፥ ኑን ኑ ሁጰዉካ ሙሴ ህግያ ናጉዋን ግደናን፥ ክርስቶሳን አማኒደ ጽላና ማላ፥ ክርስቶስ የሱሳን አማኔዶ። ማዝ. 143:2፤ ሮመ 3:20፣ 22

17 ሽን ኑዉ ክርስቶሳን ደእያ እትፐተꬃን ጽላናዉ ኮይያዋንታ ግዲደ፥ ኑ ሁጰዉ ናጋራንቻ ግዲደ ቤቶፐ፥ ያትና ክርስቶስ ናጋራ ታማርስያዌ? ሄዌ ሙለካ ዎርዶ! 18 አያዉ ጎፐ፥ እት ካላካ አጋ ድጌዳዋ ታን ላኤንꬁዋ ኦꬅያዋ ግዶፐ፥ ታን ታ ሁጰዉ ህግያ መንꬅያዋ ግድያዋ ኤርሳይ። 19 ታን ጾሳዉ ፓጻ ደአና ማላ፥ ህግያ ባጋና ህገዉ ሀይቃድ። 20 ታን ክርስቶሳና አ ማስቃልያ ቦላ ምስማርያን ꬍሸታደ ካቀታድ፤ ስም፥ ሀእ ፓጻ ደእያዌ ታና ግድከ። ሽን ክርስቶስ ታ ግዶን ደኤ፤ ታን ሀእ ደእያ ደኡ፥ ታና ሲቂደ፥ ታ ድራዉ፥ ባረ ሁጲያ እሜዳ ጾሳ ናኣን ደእያ አማኑዋና። 21 ታን ጾሳ አꬎ ኬካተꬃ እጽከ፤ አሳይ ህግያ ባጋና ጽሎተꬃ ደምያዋ ግዶፐ፥ ክርስቶስ ጮ መላ ሀይቄዳ ጉሳ።