1 ሽን አኬክተ፤ ባረ አቡዋ ላትያ ናአይ ናአተꬃን ደኢደ፥ ደእያዋ ኡባዉ ጎዳ ግዶፐካ፥ አይላቱዋፐ አዉ ዱማትያሳይ ባዋ። 2 ሽን ባረ አቡ ጌዳ ዎዲ ዉራና ጋካናዉ፥ አ ሀዳራ አኬዳዋንቱ ኩሽያንነ አ ሚሻ ናግያዋንቱ ኩሽያን ደኤ። 3 ሀዋዳን ኑንካ ቃይ ናአተꬃን ደእያ ዎደ፥ ሀ አላምያ ሞድያ አያናቶ አይለቴዶ። 4 ሽን ያናዉ በስያ ዎዲ ጋኬዳ ዎደ፥ ጾሳይ ማጫዉንፐ የለቶዋ፥ ሙሴ ህገዉ ሞደትያ አሳ ጋርሳን የለቴዳዋ፥ ባረ ናኣ ኪቴዳ። 5 አያዉ ኪቴዴ ጎፐ፥ ህግያን ሞደቲደ ደእያዋንታ ዎዛናዉነ ኑና ባረ ናና ኦꬃናዉ ኪቴዳ።

6 ጾሳይ ህንተ አ ናና ግድያ ድራዉ፥ “አባቦ፥ ታ አቦ” ጊደ ዋስያ ባረ ናኣ አያና፥ ኑ ዎዛና ግዶ ኪቴዳ። 7 ሄዋ ድራዉ፥ ሀዋፐ ስንꬃዉ ኔን ጾሳ ናኣ ግድያዋፐ አትን፥ አይለ ግዳካ፤ ቃይ ኔን አ ናኣ ግዶፐ፥ ክርስቶሳ ባጋና ጾሳይ ቃላ ገሌዳባ ላትያዋ።

8 ሽን ህንተ ሀዋፐ ካሰ ጾሳ ኤረናን ደኢደ፥ ቱማ ግደና ጾሳቶ አይለ ግዲደ ኤኖ ጌድታ። 9 ሽን ሀእ ጾሳ ኤሪደ፥ ኡባካ ጾሳን ኤረቲደ፥ ላፋነ ቃይ ካቴዳ ሀ አያናቱዋኮ ዋኒደ ስሚቴ? ሽረት ስም፥ አይለ ግዲደ፥ ላኤንꬁዋ ኡንቱንቶ ኤኖ ጋናዉ ኮዪቴ? 10 ዱማቴዳ ጋላሳቱዋ፥ አገናቱዋ፥ ዎደቱዋነ ላይꬃቱዋ ህንተ ሎይꬅ ናጉዋን አይለቴድታ። 11 ታና ህንተባይ ያሼ፤ ታን ህንተንቶ ጮ ጋደ መላ ዳቡራድታሻ?

12 ታናዳን አማንያዋንቶ፥ ታን ህንተንቱዳን ሀኔዳ ድራዉ፥ “ህንተንቱካ ታናዳን ሀንተ” ጋደ፥ ህንተንታ ዎሳይ፤ ህንተ ታና አይነ ናቂበይክታ። 13 ታን ኮይሮ ህንተንቶ ምሽራቹዋ ቃላ ኦዴዳዌ ታና ሀርግስሺና ግድያዋ ህንተ ኤሪታ። 14 ታዉ ፓጻተꬃይ ꬋዪደ፥ ህንተንቶ ፓጨ ግድናካ፥ ታና ካꬍበይክታ፤ ሸነትካበይክታ። ሄዋ ድራ ኡባ ታና ጾሳ ኪታንቻ ሞክያዋዳን፥ ዎይ ክርስቶሳ የሱሳ ሞክያዋዳን ሞኬድታ።

15 ያትና፥ ሄኮ ህንተ ናሸትያዌ ቤተና! ታና ግዶፐ፥ ህንተንቶ ዳንዳየትያባ ግድና፥ ታዉ ህንተ ህንተንቱ አይፍያ ዎጭ እምንቶነ እጸናዋ ማርካታይ። 16 ያትና ታን ህንተንቶ ቱሙዋ ኦድያ ድራዉ፥ ህንተ ሞርከ ግዳይታ?

17 ሀራ አሳቱ ህንተንቶ ቃረትያዋ ማላቲኖ፤ ሽን ኡንቱንቱ ቆፋይ ሎኤና፤ አያዉ ጎፐ፥ ህንተ ኡንቱንቶ ቃረታና ማላ፥ ታፐ ህንተንታ ሻካናዉ ኮዪኖ። 18 ሽን ታን ህንተ ማታን ደእያ ዎደ ጻላላን ግደናን፥ ኡባ ዎደካ ሎኦባን ህንተ ኮየትያዋንታ ግዶፐ ሎአ።

19 ታ ሲቆ ናቶ፥ ክርስቶሳ መታይ ህንተንቱን ቤታና ጋካናዉ፥ ማጫዉኖ ኦይꬃይ ሳክያ ኬና፥ ታን ህንተ ድራዉ ሳከታይ። 20 ሽን ታን ህንተንቶ ህርግያ ድራዉ፥ ሀእ ህንተ ማታ ባደ ህንተንቱና ዶናን ሃሳያንቶ፥ ዳሪ ዶሳይ።

21 ሙሴ ህግያን ሞደቲደ ደአናዉ ኮይያዋንቶ፥ ህጊ ግያዋ ስስክቴ? አነ ታዉ ኦድተ። 22 አያዉ ጎፐ፥ ጾሳ ማጻፋይ፥ “አብራሃሞ ዳንጋጽራትፐነ ጎዳትፐ የለቴዳ ላኡ ናናይ ደኢኖ” ያጌ። ዶመꬃ 16:15፤ 21:2 23 ሽን ዳንጋጽራት ናአይ አሳይ ናኣ የልያ ማራዳንካ የለቴዳ፤ ቃይ ጎዳት ናአይ፥ ጾሳይ ስንꬃፐ እማና ጊደ ቃላ ገሌዳዋን የለቴዳ።

24 ሀ ላኡ ማጫዋንቱ ላኡ ጫቆ ግድያ ሌምሶ። ኡንቱንቱፐ እትና፥ ሙሴዉ ህጊ እመቴዳ ሲና ደርያፐ ጫቁ ዬዳዉና፥ ባረ ናና አይለተꬃዉ የላዱ፤ እዛካ አጋሮ። 25 ሀ አጋራ አራብያ ጌተትያ ጋድያን ደእያ ሲና ደርያን ሌምሰታዉ፤ ቃይካ ሀእ ደእያ የሩሳላመን ሌምሰታዉ፤ አያዉ ጎፐ፥ የሩሳላመ ካታማይ ባረ ግዶን ደእያ አሳ ኡባና ሙሴ ህግያ አይለተꬃን ደኤ። 26 ሽን ሳሉዋን ደእያ የሩሳላመ አይለተꬃን ደኡኩ፤ እዛ ኑዉ አቶ ግዴዳ ሳሮ። 27 አያዉ ጎፐ፥ ጾሳ ማጻፋይ፥

28 ታናዳን አማንያዋንቶ፥ ኑንካ ሳር ናኣ ይሳቃዳን፥ ጾሳይ ስንꬃፐ እማና ጊደ ቃላ ገሌዳ ናና። 29 ሽን ሄ ዎደ አሳ ማራዳን የለቴዳዌ፥ ጾሳ አያናይ ጌዳዋዳን የለቴዳዋ የደርስ ድጎዋዳን፥ ሀእካ ሄዋ ማላ። ዶመꬃ 21:9 30 ሽን ጾሳ ማጻፋይ ዋጊ? “ዳንጋጽራት ናአይ ጎዳት ናኣና እትፐ ላተና ድራዉ፥ ዳንጋጽራቶ እዝ ናኣና እትፐ ከሳ የዳ” ያጌ። ዶመꬃ 21:10 31 ሄዋ ድራዉ፥ ታናዳን አማንያዋንቶ፥ ኑን ጎዳት ናና ግድያዋፐ አትን፥ ዳንጋጽራት ናና ግዶኮ።