1 ኑን አይለተꬃይ ባይናን፥ ደአና ማላ፥ ክርስቶስ ኑና አይለተꬃፐ ከሴዳ፤ ስም ምኒደ ኤቂተ፤ ላኤንꬁዋ አይለተꬃ ሞርገ ምꬃን ዋጸቶፕተ።

2 ስስተ፥ ታን ጳዉሎስ፥ ህንተንታ ያጋይ፤ ህንተ ቃጻረትያዋ ግዶፐ፥ ክርስቶስ ህንተንታ አይነ ማደና። 3 ቃጻረትያ ኡባቱ ህጊ ግያዋ ኡባ ፖሊደ ናጋናዉ በስያዋ ጉጃደ ቆፈꬃይ። 4 ህግያ ናጊደ ጽላናዉ ኮይያዋንቶ፥ ክርስቶሳፐ ሻከቴድታ፤ ጾሳ አꬎ ኬካተꬃፐካ ኩንዴድታ። 5 ኑና ግዶፐ፥ ኑን ጾሳ አያና ባጋና አማኑዋን ጽላናዉ ናሸቻን ናጌቶ። 6 አያዉ ጎፐ፥ ኑን ክርስቶስ የሱሳና እትፐ ደኦፐ፥ ሲቁዋን ኦꬅያ አማኑዋፐ አትን፥ ቃጻረትናካ፥ ቃጻረተናን አግናካ ኑና አይነ ማደና።

7 ካሰ ሎኦ ዎጺታ፤ ሽን ቱማተꬃዉ ህንተ ኤኖ ጌና ማላ፥ ኦኔ ህንተንታ ድጌዳዌ? 8 ሀ ጭሙ ህንተንታ ጼሴዳ ጾሳፐ ይቤና። 9 አሳይ ግያዋዳን፥ ጉꬃ እርሹ ሙናቃ ኡባ ደንꬄ። 10 ህንተንቱ ሀራባ ቆፐናዋ ታን ጾሳን አማነታይ፤ ሽን ህንተንታ መትያ ኡራይ ኦና ግዶፐነ፥ ጾሳፐ ባረ ፕርዳ አካናዋ።

11 ሽን ታናዳን አማንያዋንቶ፥ ታን ሀዋ ጋካናዉ ቃጻራይ ኮሽያዋ ኦድያዋ ግዶፐ፥ ታና አያዉ የደርሲኖ? ሄዌ ቱማ ግዶፐ፥ ታን ክርስቶሳ ማስቃልያባ ታማርስና አይነ መትያባይ ባዋ። 12 ህንተንታ መቶꬅያዋንቱ ባረንታ ባረንቶካ ጎይሬርክኖሻ!

13 ህንተንታ ግዶፐ፥ ታናዳን አማንያዋንቶ፥ አይለተꬃፐ ከሳናዉ ጼሰቴድታ። ግዶፐነካ አይለተꬃፐ ህንተ ከሴዳዋን፥ ህንተ አሳተꬃ አሙ ህንተንታ ሞዶፖ። ሄዋ ድራ ሲቁዋን እቱ እቶ ሞደትተ። 14 አያዉ ጎፐ፥ ህጊ ኡባይ እት ሃሳያን ቃሸቴዳ፤ እካ፥ “ነ ሾሩዋ ነ ሁጲያዳን ሲቃ” ያግያዋ። ዎጋ 19:18 15 ሽን ህንተ እቱ እቱዋና ሳኤትያዋነ ሜተትያዋ ግዶፐ፥ ህንተ ህንተ ግዶን ዉረና ማላ ናገትተ።

16 ሽን ስስተ፤ ጾሳ አያናይ ህንተንታ ካለꬅያዋ ግዶፐ፥ ህንተ አሹዋ አሙዋ ሙለካ ፖልክታ። 17 አያዉ ጎፐ፥ ኑ አሹ አሞትያዋ ጌሻ አያናይ እጼ፤ ቃይ ጌሻ አያናይ አሞትያዋ ኑ አሹ እጼ፤ ሀዋንቱ እቱ እቱዋና እጸቲኖ። ሄዋ ድራዉ፥ ህንተ ዶስያዋ ኦꬃናዉ ዳንዳይክታ። 18 ሽን ጾሳ አያናይ ህንተንታ ካለꬅያዋ ግዶፐ፥ ሙሴ ህጊ ህንተንታ ሞደና።

19 አሹዋ ኦሱ ኤረቴዳዋ፤ እካ አዬ ጎፐ፥ ዎሹምያዋ፥ ቱናተꬃ፥ አꬌዳ ቱናተꬃ ኦሱዋ፥ 20 ኤቃዉ ጎይንያዋ፥ ብትያዋ፥ ሞርከተꬃ፥ ፓሉማ፥ ቃናትያዋ፥ ሀንቁዋ፥ ባረና ዶስያዋ፥ ዋላቀትያዋ፥ እቱ እቱዋፐ ሻከትያዋ፥ 21 አሳዋ አሞትያዋ፥ ማꬆትያዋ፥ የꬃንቻ ግድያዋነ ሀዋንታ ማላትያዋንታ። ካሰካ ታን ህንተንቶ ኦዴዳዋዳን፥ ሀዋንታ ማላትያዋንታ ኦꬅያዋንቶ ጾሳ ካዉተꬃን ገልያሳይ ባዋ።

22 ሽን ጌሻ አያና አይፊ፥ ሲቁዋ፥ ናሸቻ፥ ሳሮተꬃ፥ ዳንዳያ፥ ኬካተꬃ፥ ሎኦተꬃ፥ አማነትያዋ፥ 23 አሽከተꬃ፥ ባረ ሁጲያ ናግያዋ። ሄዋንታ ማላትያዋንታ ድግያ ህጊ ባዋ።

24 ክርስቶሳ የሱሳባ ግድያዋንቱ ባረንቱ አሳተꬃ አ ኢታ ቆፋናነ አ አሙዋና እትፐ ማስቃልያ ቦላን ምስማርያን ꬍሺደ ካቄድኖ። 25 ኑዉ ጌሻ አያናይ ደኡዋ እሞዋፐ ጉይያን፥ ኑና ቃይ እ ካለꬆ። 26 አነ ኦቶረትያዋ፥ ዎይ እቱ እቱዋ ሀንቀꬅያዋ፥ ዎይ እቱ እቱዋ ቃናትያዋ አጎይተ።