1 ታናዳን አማንያዋንቶ፥ ህንተናን ጌሻ አያናን ደእያዋንቱ እት ኡራይ አይ ባይዙዋ ኦꬂደ፥ ቤቶፐካ፥ አሽከተꬃ አያናን አ ሱርስተ፤ ቃይ ህንተ ፓጨተና ማላ፥ ህንተ ሁጲያ ናግተ። 2 እቱ እቱዋ ቶኩዋ ቶክተ፤ ሄዋ ኦꬅያዋን ክርስቶሳ ህገዉ አዛዘቲታ። 3 አያዉ ጎፐ፥ እት ኡራይ አይነ ሀነናን ደኢደ፥ እትባ እ ሀኔዳዋ አዉ ማላቶፐ፥ ባረ ሁጲያ ጭሜ። 4 ሽን አሳይ ኡባይ ሁጲያን ሁጲያን ባረ ኦሱዋ ፓጮ፤ ሄዋፐ ጉይያን፥ ሀራ አሳዋና ልከናን፥ ባረ ሁጰ ኦሱዋ ጻላላን አማነትያዋ ደማና። 5 አያዉ ጎፐ፥ አሳይ ኡባይ ሁጲያን ሁጲያን ባረፐ ናገትያዋ ኦꬃና በሴ።

6 ሽን ጾሳ ቃላ ታማርያዌ ባረዉ ደእያ ሎኦባ ኡባ ባረና ታማርስያዋና ሻኮ።

7 ህንተንታ ህንተረካ ጭሞፕተ። ኦንነ ጾሳ ቦላ ቅሊጫናዉ ዳንዳየና፤ አያዉ ጎፐ፥ አሳይ ባረ ዘርያዋ ዛረꬂደ ቆይጫና። 8 ባረ አሹዋ አሙዋን ዘርያዋ ግዶፐ፥ አሹዋ አሙዋፐ ሀይቁዋ ቆይጫና። ሽን ጾሳ አያናን ዘርያዋ ግዶፐ፥ ጾሳ አያናፐ መꬍና ደኡዋ ቆይጫና። 9 አነ ሎኦ ኦሱዋ ኦꬃናዉ ምኖይተ። አያዉ ጎፐ፥ ኑን ምን ኦꬆፐ፥ ቆይጭያ ዎዲ ስንꬃፐ ያናዋ። 10 ሄዋ ግዶፐ ሀ ኦꬃናዉ ኑን ዳንዳይያዋን፥ አሳ ኡባዉ ሎኦባ ኦꬆይተ፤ ሽን ኡባፐ አꬂደ፥ ኑናና አማኑዋን ደእያዋንቶ ሎኦባ ኦꬆይተ።

11 ታን ታ ኩሽያን፥ አይ ማላ ዎልቃማ ፕዶላቱዋን፥ ሀዋ ህንተንቶ ጻፋድታንቶ በእተ። 12 አሳ ስንꬃን ሎኢደ ቤታናዉ ኮይያ ኡባቱ፥ ህንተ ቃጻረታና ማላ ኮዪኖ፤ ሽን ሄዋ ኡንቱንቱ ኦꬅያዌ ባረንቶ ክርስቶሳ ማስቃልያ ድራዉ የደርሰተናን አታና ጻላላሳ። 13 አያዉ ጎፐ፥ ኡንቱንቱ ህንተ ቃጻረቴዳዋን ጬቀታናዉ ህንተንታ ቃጻረትኖ ጊኖፐ አትን፥ ሀራይ አቶ ቃጻረቴዳዋንቱካ ባረንቱ ሁጰዉ ሙሴ ህግያ ናግክኖ።

14 ሽን አላሚ ታዉ ካቀትና፥ ታንካ አላመዉ ካቀቴዳ የሱስ ክርስቶሳ ማስቃልያፐ አትን፥ ታን ጬቀትያባይ ሀራባይ ታፐ ሃኮ። 15 አያዉ ጎፐ፥ ክርስቶስ የሱሳን ኦራꬃ መታ ግድያዌ ማዴፐ አትን፥ ቃጻረትናካ ቃጻረተናን አግናካ አይነ ማደና። 16 ሀ ዎጋን ሀመትያ ኡባቱዋ ቦላንነ ጾሳ አሳ ኡባ ቦላ፥ ሳሮተꬃይነ ማሮተꬃይ ግዶ።

17 ታን የሱሳዉ ማይቴዳ ማላ ታ ቦላን ቶኬዳ ድራዉ፥ ሀዋፐ ስንꬃዉ እት አሳይካ ታና መቶꬆፖ።

18 ታናዳን አማንያዋንቶ፥ ኑ ጎዳ የሱስ ክርስቶሳ አꬎ ኬካተꬃይ ህንተንቱና ግዶ። አመንእ።