1 ታን ጾሳ ሸንያን ክርስቶስ የሱስ ኪቴዳ ጳዉሎስ፥ ኤፈሶናን ደእያ ጾሳ ናናዉ ቃይ ክርስቶሳ የሱሳዉ አማነቲደ ደእያዋንቶ ሀ ዳብዳቢያ ጻፋይ።

2 ጾሳ ኑ አዉዋፐነ ጎዳ የሱስ ክርስቶሳፐ አꬎ ኬካተꬃይነ ሳሮተꬃይ ህንተንቶ ግዶ።

3 አያና አንጁዋ ኡባን ክርስቶሳ ባጋና ቦላ ሳሉዋን ኑና አንጄዳ ጾሳ፥ ኑ ጎዳ የሱስ ክርስቶሳ አዉዋ፥ ኑን ጋላቴቶ። 4 ኑን አ ስንꬃን ጌሻቱዋነ ፖኩ ባይናዋንታ ግዳና ማላ፥ ጾሳይ ኑና ሳአይ መታናፐ ካሰ፥ ክርስቶሳ ባጋና ባረ ሲቁዋን ዶሬዳ። 5 ጾሳይ ባረ ሸንያን ባረ ዶሴዳዋዳን፥ የሱስ ክርስቶሳ ባጋና ኑና ባረ ናናቱዋ ኦꬃናዉ ካሰቲደ ቆፕ ዎꬄዳ። 6 ጾሳይ ባረ ሲቅያ ናኣ ባጋና ኑዉ ጮ እሜዳ አꬎ ኬካተꬃ ቦንቹዋ ድራዉ፥ ኑፐ ጋላታ አካናዉ ሄዋ ኦꬄዳ።

7 ኑን ጾሳ አꬎ ኬካተꬃ ዳሩዋዳን፥ ክርስቶሳ ሱꬃን ዎዘቴዶ፤ ሄዋን ጾሳይ ኑ ናጋራ አቶ ጌዳ። 8 ጾሳይ ባረ አꬌዳ ኤራተꬃ ኡባንነ ባረ ዎዛና ቆፋ ኡባን ባረ አꬎ ኬካተꬃ ኑዉ ዳርሲደ እሜዳ። 9 አያዉ ጎፐ፥ ጾሳይ ባረ ቆፔዳዋ ኦꬄዳ፤ ቃይ ክርስቶሳ ባጋና ፖላናዉ ቆፕ ዎꬄዳ ጹራ የዉዋ ኑና ኤርሴዳ። 10 ጾሳይ ዎድያ ዉርሰꬃይ ጋክያ ዎደ ፖላናዉ ቆፔዳ ቆፋይ ክርስቶሳ ዋና ኦꬂደ፥ ሳሉዋንነ ሳኣን ደእያ መታ ኡባ እትፐ አን ሺሻናዋ።

11 ኡባባይ ጾሳ ቆፋዳንነ እ ጌዳዋዳን ሀኔዳ፤ ጾሳይ ካሰቲደ ቆፕ ዎꬄዳዋዳን፥ ክርስቶሳ ባጋና ኑን አዋንታ ግዳናዳን፥ ኑና ዶሬዳ። 12 ኑን ካሰቲደ፥ ክርስቶሳ ባጋና አካና ጊደ ናሸቻን ናግያዋንቱ፥ ጾሳ ቦንቹዋ ጋላቴቶ። 13 ህንተዉካ ቃይ ሄዋዳን ሀኔዳ፤ ቱሙ ኪታ፥ ህንተንቶ አቶተꬃ አሄዳ ምሽራቹዋ ቃላ፥ ህንተ ስሴዳ ዎደ ክርስቶሳ አማኔድታ፤ ጾሳይ ህንተንቶ እማና ጌዳ ጌሻ አያና ባጋና፥ ህንተ አዋ ግድያዋ ኤርስያ ማታፋ ህንተ ቦላ ዎꬄዳ። 14 ጾሳይ ባረ አሳዉ እማና ጌዳዋ ኑን ላታና ጋካናዉ፥ ጌሻ አያና ዋሰተꬃ ኦይቄዶ። ሄዌ ቃይ አ ቦንቾ፥ ጋላታ ግዳናዋ።

15 ሄዋ ድራዉ፥ ጎዳ የሱሳ ህንተ አማንያዋነ ጌሻቱዋ ኡባ ህንተ ሲቅያዋ ታን ስሶደፐ ዶማደ፥ 16 ህንተንቶ ጾሳ ጋላትያዋ አጋበይከ፤ ጾሳ ዎሳደ ህንተዉካ ዎሳይ። 17 ቃይ ጎዳ የሱስ ክርስቶሳ ጾሳይ፥ ቦንቹዋ አዉ፥ ጾሳ ህንተ ኤራናዳን፥ ህንተና አꬌዳ ኤራንቻ ኦꬅያ ቃይ ጾሳ ህንተንቶ ቆንጭስያ ጌሻ አያና ህንተንቶ እማናዳን፥ ታን ዎሳይ። 18 ጾሳይ ህንተ አካና ጊደ፥ ናሸቻን ናግ ኡቴዳዎ ህንተና ጼሴዳዋነ እ ባረ አሳዉ እማና ግያ አንጁ አይ ኬና ዱረንቶ ህንተ ኤራናዳን፥ ጾሳይ ህንተ ዎዛና ዶይና፥ አ ፖኡዋ ህንተ በአናዳን፥ ታን ጾሳ ዎሳይ።

19-20 ቃይ አ አማንያ ኑናን አ ዎልቃይ ሎይꬅ ኦꬄ። ሀ ኑናን ደእያ ዎልቃይነ ሀይቁዋፐ ክርስቶሳ ደንꬂደ፥ ሳሉዋ ሳኣን ጾሳፐ ኡሸቻ ባጋና *ኡሸቻ ባጋ፦ ዎልቃነ ቦንቹዋ ሳኣ። ኡትሴዳ ዎልቃማ ዎልቃይ እቱዋ። ማዝ. 110:1 21 ክርስቶስ ሳሉዋ ሱንꬃቱዋፐ፥ ጎዳተꬃይ ደእያዋንቱፐ፥ ዎልቃማቱዋፐነ ጎዳቱዋ ኡባፐ ቦላ ግዲደ ሞዴ፤ እ ሀእ ደእያ የለታ ጻላላን ግደናን፥ ስንꬃፐ ያና የለታንካ ሀራ ሱንꬃተꬃ ኡባፐ ꬎቄ። 22 ጾሳይ ኡባባ ክርስቶሳ ገድያፐ ጋርሳን ሞድሲደ፥ ቃይ ጾሳይ እ ኡባባን ኡባፐ ቦላና ጎዳ ግዳናዳን፥ ዎሳ ጎለዉ አ እሜዳ። ማዝ. 8:6ቆል. 1:18 23 ዎሳ ጎሊ ክርስቶሳ አሳተꬃ፤ ዎሳ ጎሊ ክርስቶስ ኡባ ሳን ኡባባ ኩንꬅያ አ ፖሉዋ።