1 ህንተ አዛዘተናን እጼዳ ድራዉነ ህንተ ናጋራ ድራዉ፥ ካሰ ዎድያን አያና ሀይቁዋ ሀይቄድታ። 2 ሄ ዎደ ህንተ ሀ አላምያ የለታ ኢታ ኦግያ ሀመቴድታ፤ ጫርኩዋ ግዶን ደእያ ዎልቃማ አያናቱዋ ካፖ ቃይ ጾሳዉ አዛዘተና አሳ ሀእ ሞድያ አያናዉ አዛዘቴድታ። 3 ኑንካ ቃይ ኡባይ ሄ አሳ ማላ፤ ቃይ ኑን ኑ አሹዋ አሙዋዳን ደኤዶ፤ ኑ አሹነ ኑ ዎዛናይ ኮዬዳዋ ኦꬄዶ። ኑንካ ሀራቱዋዳን፥ ኑ መታን ጾሳ ሀንቁዋ አካናዉ ደኤቶ።

4 ሽን ጾሳ ማሮተꬃይ ዳራ ግድያ ድራዉ፥ ባረ ሲቁዋ ዳሩዋዳን፥ 5 ኑን አዉ አዛዘተናን እጺደ፥ ሀራይ አቶ አያናን ሀይቄዳዋንታ ግድናካ፥ እ ክርስቶሳና ኑዉ ደኡዋ እሜዳ። ጾሳ አꬎ ኬካተꬃን ህንተ አቴድታ። 6 ኑን ክርስቶስ የሱሳና ሳሉዋነ ሳኣነ ሞዳናዳን፥ ጾሳይ ኑና አናና እትፐ ሀይቁዋፐ ደንꬄዳ። 7 እ ስንꬃፐ ያና ዎድያን፥ ኑዉ ክርስቶስ የሱሳን ደእያ ኬካተꬃን፥ ኡባፐ አꬍያ ባረ አꬎ ኬካተꬃ ꬎቃተꬃ በሳናዉ ሄዋ ኦꬄዳ። 8 አያዉ ጎፐ፥ ህንተ ጾሳ አꬎ ኬካተꬃን፥ አማኑዋን አቴድታ፤ ሀዌ ጾሳ እሙዋፐ አትን፥ ህንተ ኦሱዋና ግደና። 9 ህንተ ዳቡራን ቤትቤና ድራዉ፥ ህንተ ጬቀትያባይ አያይነ ባዋ። 10 አያዉ ጎፐ፥ ኑን ጾሳ መታ፤ እ ኑዉ ካሰቲደ ጊግስ ዎꬄዳ ሎኦ ኦሱዋ ኑን ኦꬃናዳን፥ ክርስቶስ የሱሳ ባጋና ኑና መꬌዳ።

11 ሄዋ ድራዉ፥ ህንተኖ ዛርያን አይሁዳ ግደና አሳቶ፥ ባረንቱ አሳተꬃ ቦላ ኩሽያን ኦሰቴዳዋን፥ ባረና ቃጻረቴዳዋንታ ግያ አይሁዳቱ፥ ቃጻረትቤናዋንታ ጊደ ጼስያዋንቶ፥ ህንተ ካሰ ኦነንቶ አኬክተ። 12 ሄ ዎደ ህንተ ክርስቶሳፐ ሻከቴድታ፤ እማꬃ ግዲደ፥ እስራኤልያ አሳፐ ሃኪደ ደኤድታ፤ ጾሳይ ባረ አሳዉ እማና ጊደ ጫቄዳ ጫቁዋፐ አይነ ደምበይክታ፤ ሀ ሳኣ ቦላ ህንተ ደማና ጊደ፥ ናሸቻን ናግ ኡቴዳዋ ደመናንነ ቃይ ጾሳይ ባይናን ደኤድታ። 13 ሽን ህንተ ካሰ ሃኪደ ደእያዋንቱ ሀእ ክርስቶሳ የሱሳና ደኢደ፥ ክርስቶሳ ሀይቁዋን ማታ ሺቄድታ።

14 አያዉ ጎፐ፥ ክርስቶስ አይሁዳ አሳነ አይሁዳ ግደና አሳ እቱዋ ኦꬂደ፥ ኑዉ ሳሮተꬃ አሄዳ። ኡንቱንቱ ላኡዋ ሻኪደ፥ ሞርከ ኦꬅ ዎꬄዳ ሞርከተꬃ ጎዳ ባረ አሳተꬃን ኮል የጌዳ። 15 እ ባረ ሁጰዉ ሀ ላኡ ዛራቱዋፐ እት ኦራꬃ አሳ መꬊደ ሳሮተꬃ ዎꬃናዉ፥ አይሁዳ አሳቱዋ ህግያ አ አዛዛቱዋነ ዎጋቱዋና እትፐ ꬋይሴዳ። 16 ክርስቶስ ማስቃልያ ቦላ ምስማርያን ꬍሸቲደ ሀይቄዳ ባረ ሀይቁዋን ሞርከተꬃ ꬋይሴዳ፤ ቃይ ማስቃልያ ባጋና ላኡ ዛራቱዋካ እት አሳ ኦꬅ ስገꬂደ፥ ጾሳኮ አሄዳ። 17 ክርስቶስ ዪደ፥ ጾሳፐ ሃኪደ ደእያ ህንተንቶ አይሁዳ ግደናዋንቶነ፥ አ ማታን ደእያ አይሁዳቶ ኡባዉ፥ ምሽራቹዋ ቃላ ሳሮተꬃ ኦዴዳ። ኢሳ. 57:19 18 አያዉ ጎፐ፥ ኑን ኡባይ፥ አይሁዳቱካ አይሁዳ ግደናዋንቱካ፥ እት ጌሻ አያናን ክርስቶሳ ባጋና አዉዋ ስንꬃ ሺቃናዉ ዳንዳዬቶ።

19 ስም ህንተ አይሁዳ ግደና አሳቱ ሀዋፐ ስንꬃዉ አላጋ ዎይ እማꬃ ግድክታ፤ ሀእ ህንተነ ጌሻቱ እት ቢታ አሳ፤ ቃይ ጾሳዉ ህንተ ሶይ አሳ። 20 የሱስ ኪቴዳዋንቱነ ትምቢትያ ኦድያዋንቱ ባሴዳ ባሱዋ ቦላ ህንተካ ኬጸቴድታ፤ ጎዳ ጻጱዋ ምንስያ ዋና ሹቻይ ክርስቶስ የሱሳ። 21 እ ጎልያ ኡባ እትፐ ሺሽ ኦይቂደ፥ ጾሳ ባጋና ጌሻ፥ ጾሳ ጌሻ ጎለ ግዳና ማላ ድቼ። 22 ህንተ ቃይ ጾሳይ ባረ አያናን ደእያ ጎልያ ግዳናዉ፥ ሀራቱዋ ኡባና እትፐ ክርስቶሳን ኬጸቲታ።