ዶመꬃ ማጻፋ
ገሉዋ
ሀ ማጻፋይ “ዶመꬃ” ጌተቲደ ጼሰቴዳ ጋሱ የዉዋ ኡባ ዶመꬃ በስያ ድራሳ።
ዶመꬃባ ጌተትያ ማጻፋይ ሀ አላሚ ዎት መቴደንቶ: ሳሎቱነ ሳአይ መቴዳ መታባ፥ አሳ ዛሪ ዬዳ ዩሳባ፥ ናጋራነ ናጋራ ማሮታባ፥ አንጁነ ሸቃይ ዶመቴዳ ዶመꬃባ፥ ጾሳናነ አሳ ዛራቱዋና ደእያ ጋከተꬃባ ኦዴ። ዶመꬃባይ ላኡ ሁጰ ግሹዋን ሻከቲደ ጼለታናዉ ዳንዳዬ።
ሸምፑዋ እቱዋፐ ቢደ ታማነ እቱዋ ጋካናዉ ደእያ ሳአይ፥ ሳሉነ ሳአይ መቴዳ መታባነ አሳ ዛርያ ኮይሮ ታርክያ ኦዴ። አዳመነ ሄዋን ታርኪ፥ ቃዬላነ አቤላ ታርኪ፥ ኖሄነ ባሻ ሃꬃ ታርኪ፥ ሄዋዳንካ ባብሎነ ግምቢያ ታርኪ ደእያዌ ሀ ሻኩዋና።
ሸምፑዋ ታማነ ላኡዋፐ ቢደ እሻታሙዋ ጋካናዉ ደእያ ሳአይ እስራኤልያ አሳዉ በን ማይዛ አዎቱዋ ታርክያ ኦዴ። ኡንቱቱ ግዱዋን ኮይሮ ባረ አማኑዋንነ ጾሳዉ አዛዘትያ ሀኖታን ኤረቴዳዌ አብራሃማ። ሄዋፐ ቃይ አ ናኣ ይሳቃ፥ አ ናኣ ናኣ ያቆባነ ያቆባ ናና ታማነ ላአቱዋ ታርኪ ካሌዳ። ሀዋንቱ ያቆባ ናናይ ታማነ ላአቱ፥ ታማነ ላኡ እስራኤልያ ዛረቶ አኖ ግዴዳዋንታ። ሀዋንቱ ሀ ታማነ ላኡ እስራኤልያ ናናቱዋ ግዶንካ ዮሴፋ ዱማዪደ፥ ሄዋዳንካ ቃይ ያቆባነ አ ናና የንኮቱዋ ኡንቱቱ ጎለ አሳና ግብጼ ጋድያ አፌዳ ሀኖታቱዋ ምንሲደ ጼሌ።
ሀ ማጻፋይ አሳ ታርክያ ኦድያዋ ግዶፐነ፥ ኡባፐ አꬂደ እ ኦድያዌ ጾሳይ ኦꬄዳ ኦሱዋባ። ጾሳይ ሳሎቱዋነ ሳኣ መꬌዳ ታርክያ ኦዱዋ ዶሚደ ጾሳይ ባረ አሳዉ ቆፕያዋ አገናዋ ኦድያ ህዶታን ፖሌ። ሀ ማጻፋ ግዶን ሀ ጋጻፐ ያ ጋጻ ጋካናዉ ኦደትያ ታርክያ ጎዳይ፥ ባላባ ሀንያዋንታ ፕርድያዌነ ሙርያዌ፥ ባረ አሳ ካለꬅያዌነ ማድያዌ፥ ኡንቱቱ ታርክያ ታንጉዋካ ጊግስያዌ ባረ ሁጲያን ጾሳ። ሀዌ በን ማጻፋይ ጻፈቴዳዌ አሳ አማኑዋ ታርክያ ማዝጋቢደ ኦይቃናሳነ ሄ አማኑካ ፓጻ ደአናዳን ኦꬃናሳ።
ሸምፓቱዋ ኡባቶ እመቴዳ ቃንꬃ ቆፋቱዋ
መታ ዶመꬃባ 1:1—2:3
ኤደን ገነትያባ 2:4-25
ናጋራነ ናጋራ ማሮታባ 3:1-24
አዳማፐ ኖሀ ጋካናዉ 4:1—5:32
ኖሀነ ባሻ ሃꬃ 6:1—10:32
ባብሎና ግምቢያ 11:1-9
ሴማፐ አብራማ ጋካናዉ 11:10-32
አብራማ፥ ይሳቃነ ያቆባ ታርክያ 12:1—35:29
ኤሳ የለታ 36:1-43
ዮሰፋነ አ እሻቱዋ 37:1—45:28
እስራኤላቱ ግብጼ ጋድያን 46:1—50:26
1
መታ ዶመꬃባ
(1:1—2:3)
1 ጾሳይ ሳሎቱዋነ ሳኣ ኮይሮ መꬌዳ። 2 ሄ ዎደ ሳአይ ጊግቤናነ አያይነ ባይና መላ፤ ጪሙዋ ቦላን ꬉማይ ደኤ፤ ጾሳ አያናይ *ጾሳ አያናይ፦ ጾሳ ዎልቃ፤ ጾሳፐ ግዴዳ ጫርኩዋ። ሃꬃፐ ቦላና ማይ ኡቴዳ።
3 ጾሳይ ሄዋፐ ጉየ ሀዋዳን ያጊደ ሃሳዬዳ፤ “ፖኡ ሀኖ” ያጌዳ፤ ፖኡካ ሀኔዳ። 2 ቆሮ. 4:6 4 ፖኡ ሎአ ግዴዳዋ ጾሳይ በኤዳ፤ ያቲደ ፖኡዋ ꬉማፐ ሻኬዳ። 5 ጾሳይ ፖኡዋ “ጋላሳ” ጊደ ሱንꬄዳ፤ ꬉማ “ቃማ” ጊደ ሱንꬄዳ። ሳአይ ቃሜዳነ ዎንቴዳ፤ ሄዌነ ኮይሮ ጋላሳ።
6-7 ጾሳይ ሄዋፐ ጉየ ሀዋዳን ያጊደ ሃሳዬዳ፤ “ቦላና ደእያ ሃꬃ ጋርሳና ደእያ ሃꬃፐ ሻክያ ሳሉዋ ጉፋንꬁ ሀኖ” ያጌዳ፤ ጌተቶዋዳንካ ሀኔዳ። ጾሳይ ሳሉዋ ጉፋንꬁዋ ጊግሲደ፥ ሳሉዋ ጉፋንꬁዋፐ ቦላና ደእያ ሃꬃ ጋርሳና ደእያ ሃꬃፐ ሻኬዳ። 2 ጰጽ. 3:5 8 ጾሳይ ሄ ጉፋንꬁዋ “ሳሉዋ” ጊደ ሱንꬄዳ። ሳአይ ቃሜዳነ ዎንቴዳ፤ ሄዌነ ላኤንꬆ ጋላሳ።
9 ጾሳይ ሄዋፐ ጉየ ሀዋዳን ያጊደ ሃሳዬዳ፤ “ሳሉዋፐ ጋርሳና ደእያ ሃꬃይ እትሳን ኤሎ፤ መላ ሳአይ ቆንጮ” ያጌዳ፤ ሄዋፐ ጉይያን ሀኔዳ። 10 ጾሳይ ሄ መላ ሳኣ “ቢታ” ጊደ ሱንꬄዳ፤ ቃይ እት ሳኣን ኤሌዳ ሃꬃ “አባ” ጊደ ሱንꬄዳ። ያቲደ ጾሳይ ሄዌ ሎአ ግዴዳዋ በኤዳ። 11 ሄዋፐ ስሚደ ጾሳይ፥ “ቢታይ ምꬃ ማታ ዶልሶ፤ ዘረꬃ አይፊ ደእያ ካꬃነ ዘረꬃ አይፍያና ደእያ ቴርያ ምꬃ ዶልሶ” ያጌዳ፤ ሄዌካ ሀኔዳ። 12 ቢታይ፥ ምꬃ ማታ አ ቆሙዋን ቆሙዋን ዶሌዳ። ጾሳይ ሄዌ ሎአ ግዴዳዋ በኤዳ። 13 ሳአይ ቃሜዳነ ዎንቴዳ፤ ሄዌነ ሄዘንꬆ ጋላሳ።
14 ጾሳይ ሄዋፐ ጉየ ሀዋዳን ያጊደ ሃሳዬዳ፤ “ጋላሳ ቃማፐ ሻካናዉ ፖኦቱ ሳሉዋ ጉፋንꬁዋን ሀንኖ፤ ኡንቱቱ ጋላሳ፥ ዎድያነ ላይꬃ ኤርሳናዉ ማላ ግድኖ፤ 15 ሳኣ ቦላን ፖእሳና ማላ ኡንቱቱ ሳሉዋ ጉፋንꬁዋን ፖእኖ” ያጌዳ፤ ሄዋፐ ጉይያን ሀኔዳ። 16 ጾሳይ ላኡ ዎልቃማ ፖኦቱዋ፥ ዳርያዌ ጋላሳ ሞዳናዳንነ ቄራእያዌ ቃማ ሞዳናዳን መꬌዳ፤ ጾልንተቱዋካ እ መꬌዳ። 17-18 ጾሳይ ኡንቱቱ ሀ ሳኣ ቦላን ፖእሳና ማላ፥ ጋላሳነ ቃማ ሞዳና ማላነ ፖኡዋ ꬉማፐ ሻካና ማላ፥ ሳሉዋ ጉፋንꬁዋን ኡንቱንታ ዎꬄዳ። ያቲደ ጾሳይ ሄዌ ሎአ ግዴዳዋ በኤዳ። 19 ሳአይ ቃሜዳነ ዎንቴዳ፤ ሄዌነ ኦይደንꬆ ጋላሳ።
20 ጾሳይ ሄዋፐ ጉየ ሀዋዳን ያጊደ ሃሳዬዳ፤ “ደኡዋን ደእያ ዱማ ዱማ መታቱ ሃꬃን ዳርኖ፤ ካፉካ ሳኣፐ ቦላናነ ሳሉዋ ጉፋንꬁዋፐ ጋርሳና ፓሎ” ያጌዳ። 21 ያቲደ ጾሳይ አባን ደእያ ዎልቃማ ዶአቱዋ፥ ሃꬃ ግዶን ዎጽ ቃጽያ መታ ኡባነ ቀፍያና ደእያ ካፉዋ ኡባ አ ቆሙዋን ቆሙዋን መꬌዳ። ጾሳይ ሄዌ ሎአ ግዴዳዋ በኤዳ። 22 ጾሳይ ኡንቱንታ፥ “የለትተ፤ ጮርተ፤ አባ ሃꬃ ኩምተ፤ ካፉካ ቢታ ቦላን ጮራቶ” ያጊደ አንጄዳ። 23 ሳአይ ቃሜዳነ ዎንቴዳ፤ ሄዌነ እቼሸንꬆ ጋላሳ።
24 ጾሳይ ሄዋፐ ጉየ ሀዋዳን ያጊደ ሃሳዬዳ፤ “ደኡዋን ደእያ መታቱ ባረንቱ ቆሙዋን ቆሙዋን: መሄቱ፥ ቢታና ጎሸትያ መታቱነ ዶአቱ ባረንቱ ቆሙዋን ቆሙዋን ቢታ ቦላን ከስኖ” ያጌዳ፤ ሀኔዳ። 25 ጾሳይ ዶአቱዋ ኡንቱንቱ ቆሙዋን ቆሙዋን፥ መሄቱካ ኡንቱንቱ ቆሙዋን ቆሙዋን፥ ቢታና ጎሸትያ መታቱዋካ ኡባ ኡንቱንቱ ቆሙዋን ቆሙዋን መꬌዳ። ጾሳይ ሄዌ ሎአ ግድያዋ በኤዳ።
26 ሄዋፐ ስሚደ ጾሳይ፥ “አሳ ኑ ሌምሱዋን ኑና ማላትሲደ አነ መꬎይተ፤ ኡንቱንቱ አባ ሞልያ፥ ሳሉዋ ካፉዋ፥ ቢታ ቦላ ዎጽ ቃጽያ መታ ኡባ ሞድኖ” ያጌዳ። 27 ሀዋዳን ጾሳይ አሳ ባረ ሌምሱዋን መꬌዳ፤ እ አሳ ጾሳ ሌምሱዋን መꬌዳ፤ እ ኡንቱንታ አቱማ አሳነ ማጫ አሳ ኦꬂደ መꬌዳ።ማቶሳ 19:4፤ ማር. 10:6ዶመꬃ 5:1-2
28 ጾሳይ ኡንቱንታ ሀዋዳን ያጊደ አንጄዳ፤ “የለትተ፤ ጮርተ፤ ሀ ሳኣ ኩምተነ ሞድተ፤ አባ ሞልያ፥ ሳሉዋ ካፉዋነ ቢታ ቦላ ዎጽ ቃጽያ፥ ደኡዋን ደእያ መታ ኡባ ሞድተ” ያጌዳ።
29 ሄዋፐ ስሚደ ጾሳይ፥ “በእተ! ታን ሀ ቢታ ኡባ ቦላን ዘረꬃ አይፊያና ደእያ ካꬃ ኡባነ ዘረꬃ አይፊያና ደእያ ቴርያ ምꬃ ኡባ ህንተንቶ እማድ፤ ኡንቱንቱ ህንተንቶ ቁማ ግዳና። 30 ቃይካ ሀ ሳኣን ደእያ መህያዉነ ዶኣ ኡባዉ፥ ሳሉዋ ካፉዋ ኡባዉ፥ ቢታና ጎሸትያ መታ ኡባዉነ ሸምፑዋና ደእያ መታ ኡባዉ ምያዋ ግዳናዳን፥ እርጻ ምꬃነ ማታ እማድ” ያጌዳ፤ ሀኔዳ። 31 ጾሳይ ባረ መꬌዳ ኡባባካ ጼሌዳ፤ ዳሮ ሎአ ግዴዳዋ በኤዳ። ሳአይ ቃሜዳነ ዎንቴዳ፤ ሄዌነ ኡሱፑንꬆ ጋላሳ።