1 አሳይ ሳኣ ቦላን ዳሬዳ ዎደ፥ ኡንቱንቶ ማጫ ናናይ የለቴድኖ፤ ኢዮባ 1:6፤ 2:1 2 “ሳሉዋ መታቱዋ”*ሳሉዋ መታቱዋ፦ ጾሳ ናናቱዋ፤ ጾሳቱዋ ናናቱዋ። ጌተትያዋንቱ ሀ አሳ ማጫ ናናይ ማላ ሎአ ግድያዋ በኤድኖ፤ ያቲደ ኡንቱንቱፐ ባረንቶ ዶሬዳዋንታ አኬድኖ። 3 መꬍና ጎዳይ፥ “ታ አያናይ አሳን መꬍናዉ ደኤና፤ አያዉ ጎፐ፥ አሳይ ሀይቂያዋ፤ አ ላይꬃቱካ እት ጼታነ ላታማ ግዳና” ያጌዳ። 4 ሄ ዎደነ ሄዋፐ ጉየ ሳሉዋ መታቱ አሳ ማጫ ናና አክና፥ ናናይ የለቴዳ ዎደ፥ ዎጋ አዱሳ አሳቱ ሳኣ ቦላን ደኤድኖ። ኡንቱንቱነ በን ዎደ ኦላዉ ምናነ ኤረቴዳ አሳ።

5 መꬍና ጎዳይ ሄ ዎደ ሳኣ ቦላን ደእያ አሳ ኢታተꬃይ ዳሬዳዋነ ኡንቱንቱ ዎዛናይ ቆፕያባይ ኡባይ ኡባ ዎደካ ኢታ ጻላላ ግዴዳዋ በኤዳ፤ ማቶሳ 24:37፤ ሉቃሳ 17:26፤ 1 ጰጽ. 3:20 6 መꬍና ጎዳይ አሳ ሀ ሳኣ ቦላን መꬌዳዎ ካዮቴዳ፤ ባረ ዎዛናን ሎይꬅ ሴለቴዳ። 7 ሄዋ ድራዉ መꬍና ጎዳይ፥ “ታን መꬌዳ አሳ ሀ ሳኣ ቦላፐ ሙለ ꬋይሳና፤ አሳ፥ መህያ፥ ዶኣ፥ ቢታና ጎሸትያ መታቱዋነ ሳሉዋ ካፎቱዋ ꬋይሳና፤ አያዉ ጎፐ፥ ታን ኡንቱንታ መꬌዳዎ ካዮታድ” ያጌዳ። 8 ሽን ኖሄ መꬍና ጎዳ ስንꬃን ናሸቴዳ።

9 ኖሄ ሀኔዳባይ ሀዋፐ ካሊደ ጻፈቴዳ። ኖሄ ጽሎ አሳ፤ እ ባረ ዎድያን ደኤዳ አሳ ግዶን ሱረ አሳ፤ ኖሄ ጾሳና ሀመቴዳ። 10 ኖሄ ሴማ፥ ካማነ ያፌታ ግያ ሄዙ አቱማ ናና የሌዳ። 2 ጰጽ. 2:5

11 ሄ ዎደ ቢታይ ሳአይ ጾሳ ስንꬃን ቱኔዳ፤ ሳአይ ኡባይ ማካላን ኩሜዳ። 12 ጾሳይ ሀ ሳኣ ጼሌዳ፤ ሳአይ ቱኔዳዋ በኤዳ፤ አያዉ ጎፐ፥ ሳኣን ደእያ አሳይ ኡባይ ባረ ኦግያ ቱንስ ዎꬄዳ።

13 ሄዋ ድራዉ፥ ጾሳይ ኖሀ ሀዋዳን ያጊደ አዛዜዳ፤ “ታን አሳ ኡባ ꬋይሳና ሀናይ፤ ኡንቱንቱ ጋሱዋን ሳአይ ማካላን ኩሜዳ ድራዉ፥ ታን ቱሙፐ አሳካ ሳኣካ ꬋይሳና። 14 ሄዋ ድራዉ፥ ምኖ ምꬃፐ ነዉ ማርካብያ ኬጻ፤ ሄ ማርካብያ ግዶን ጮራ ቆልኦቱዋ ከሳ፤ ያታደ ሶናነ ካረና ሽድያን ባራ። 15 ማርካብያ ሀዋዳን ያታደ ኬጻ፤ አዱሳተꬃ ሄዙ ጼቱ ዋꬋ፥ ጎምፓ እሻታሙ ዋꬋ፥ ጌሳ ሀታሙ ዋꬋ ኦꬃ፤ 16 ማርካብያዉ ካራ †ካራ፦ ማስኮትያ። መꬋ፤ ካራፐነ ጎዳፐ ግዱዋን እት ዋꬋ ግድያ ሳ ካሎ አጋ ባሻ፤ ፐንግያ ማርካብያዉ ምይያና ከሳ፤ ማርካብያ ሄዙ ፖቅያ ከሳደ ኬጻ።

17 “ታን ሳሉዋፐ ጋርሳን ደኡዋ ሸምፑዋና ደእያ መታ ኡባ ꬋይሳናዉ፥ ሀ ሳኣ ቦላን ባሻ ሃꬃ የዳና፤ ሀ ሳኣን ደእያባይ ኡባይ ꬋያና። 18 ሽን ታን ታ ቃላ ጫቁዋ ኔናና ጫቀታና። ኔን ነ ማቻቶ፥ ነ አቱማ ናናነ ነ አቱማ ናና ማቻቱዋ ኔናና አካደ ማርካብያ ግዶ ገላ። 19 ኡንቱንቱ ኔናና ሸምፑዋና አታና ማላ፥ ሸምፑ ደእያ መታ ኡባፐ ቆሙዋን ቆሙዋን አቱማዋነ ማጫዋ ላኡዋ ላኡዋ አካደ፥ ማርካብያ ግዶ ገልሳ። 20 ዱማ ዱማ ቆሞ ካፉዋፐ፥ ዱማ ዱማ ቆሞ መህያፐነ ቢታና ጎሸትያ ዱማ ዱማ ቆሞ መታቱዋ ኡባፐ ላኡዋ ላኡዋ ግዲደ፥ ሸምፑዋና አታና ማላ ኔኮ ያና። 21 ቃይ ኔንነ ኔናና ደእያዋንቱ ማናዉ፥ ዱማ ዱማ ቆሙ ምያ ካꬃ አፋደ፥ ማርካብያ ግዶን ቆላ” ያጌዳ።

22 ኖሄ ኡባባካ ጾሳይ አዛዜዳዋዳን ኦꬄዳ።እብራ. 11:7