1 መꬍና ጎዳይ ሄዋፐ ጉየ ኖሀ ሀዋዳን ያጌዳ፤ “ኔን ነ ሶ አሳ ኡባና ማርካብያ ግዶ ገላ፤ አያዉ ጎፐ፥ ታን ሀ ዎድያ የለታ ግዶን ኔን ጽሎ ግዴዳዋ በኣድ። 2-3 ኔን ጌሻ ግዴዳ መህያነ ዶኣ ኡባፐ አ ቆሙዋፐ ቆሙዋፐ አቱማዋነ ማጫዋ ላፑኑዋ ላፑኑዋ፥ ጌሻ ግደና መህያነ ዶኣ ኡባፐ አ ቆሙዋፐ ቆሙዋፐ እት አቱማዋነ እት ማጫዋ፥ ቃይ ሳሉዋ ካፉዋፐ አ ቆሙዋፐ ቆሙዋፐ አቱማዋነ ማጫዋ ላፑኑዋ ላፑኑዋ ኦꬃደ፥ ሳኣ ኡባ ቦላን ዱማ ዱማ ዘረꬃይ ሸምፑዋና አታና ማላ ኔናና አካደ ገላ። 4 አያዉ ጎፐ፥ ላፑን ጋላሳፐ ጉየ፥ ታን ኦይታሙ ጋላሳነ ኦይታሙ ቃማ ሀ ሳኣ ቦላን እራ ቡክሳና፤ ያታደ ታን መꬌዳ መታ ኡባ ሳኣ ቦላፐ ꬋይሳና” ያጌዳ።

5 ኖሄ መꬍና ጎዳይ አ አዛዜዳ ኡባባ ኦꬄዳ።

6 ባሻ ሃꬃይ ሀ ሳኣ ቦላ ዬዳ ዎደ፥ ኖሄ ላይꬃይ ኡሱፑን ጼታ። 7 ኖሄ፥ አ አቱማ ናናይ፥ አ ማቻታነ አ ናና ማቼቱ ባሻ ሃꬃፐ አታናዉ ማርካብያ ግዶ ገሌድኖ። ማቶሳ 24:38-39፤ ሉቃሳ 17:27 8 ጌሻ መህያፐነ ዶኣፐ፥ ጌሻ ግደና መህያፐነ ዶኣፐ፥ ካፉዋፐነ ቢታና ጎሸትያዋንቱ ኡባፐ 9 ጾሳይ ኖሀ አዛዜዳዋዳንካ አቱማዌነ ማጫዌ ላኡዋ ላኡዋ ግድ፥ ኖሄኮ ዪደ ማርካብያ ግዶ ገሌድኖ። 10 ላፑን ጋላሳፐ ጉየ፥ ባሻ ሃꬃይ ሀ ሳኣ ቦላን ዬዳ።

11 ኖሄ ኡሱፑን ጼቱ ላይꬃ ደእና፥ ላኤንꬃ አግናን፥ ታማነ ላፑንꬃ ጋላሳን፥ ሄ ጋላሳን ቢታ ግዶን ደእያ ዎልቃማ ጪማ ፑልቱዋ ኡባይ ꬉቂ አጌዳ፤ ሳሉዋን ደእያ ሃꬃ ፐንገቱካ ዶየት ዎꬌድኖ፤2 ጰጽ. 3:6 12 እራይ ሀ ሳኣ ቦላን ኦይታሙ ጋላሳነ ኦይታሙ ቃማ ቡኬዳ። 13 ሄ ጋላሳን ኖሄነ አ አቱማ ናናይ፥ ሴመ፥ ካመነ ያፌት፥ ኖሄ ማቻታነ አ ናና ሄዛቱዋ ማቻቱ እትፐ ማርካብያ ግዶ ገሌድኖ። 14 ኡንቱንቱነ ዶኣ ኡባፐ ባረ ቆሙዋን ቆሙዋን፥ መህያ ኡባፐ ባረ ቆሙዋን ቆሙዋን፥ ሳኣና ጎሸትያዋንቱ ኡባፐ ባረ ቆሙዋን ቆሙዋን፥ ካፉዋ ኡባፐ ባረ ቆሙዋን ቆሙዋን፥ ኡንቱንቱና እትፐ ገሌድኖ፤ 15 ደኡዋ ሸምፑዋና ደእያዋንቱ ኡባይ ላኡዋ ላኡዋ ግድ፥ ኖሄኮ ዪደ ማርካብያን ገሌድኖ፤ 16 ጾሳይ ኖሀ አዛዜዳዋዳን፥ መታ ኡባፐ አቱማዋነ ማጫዋ ግዲደ፥ ማርካብያ ግዶ ገል ስሞዋን፥ መꬍና ጎዳይ ማርካብያ ፐንግያ ጎርዴዳ።

17 ባሻ ሃꬃይ ኦይታሙ ጋላሳ ሳኣ ቦላን ቡኪደ ጋምኤዳ፤ ሃꬃይ ዳሪደ፥ ማርካብያ ቢታፐ ፑደ ደንꬄዳ። 18 ሃꬃይ ቢታ ቦላን ሎይꬅ ዳርና፥ ማርካቢ ሃꬃ ቦላን ቶከቴዳ። 19 ሳሉዋፐ ጋርሳና ደእያ ꬎቃ ደረቱ ኡባይ ምተታና ጋካናዉ፥ ሃꬃይ ሀ ሳኣ ቦላን ሎይꬅ ዎልቃፐ ዳሬዳ። 20 ሃꬃይ ደረቱዋ ጼራፐ አꬊደ፥ ታማነ እቼሹ ዋꬋ ጋካናዉ ቶኬዳ። 21 ያትና ሳኣ ቦላን ሸምፑዋና ቃጽያ መታቱ ኡባይ: ካፉ፥ መሂ፥ ዶአይ፥ ሳኣ ቦላን ሻምእ ግያ መታ ኡባይነ አሳይ ኡባይ ሀይቄዳ። 22 ኤ፥ መላ ቢታ ቦላን ደእያ፥ ባረ ሲꬍያን ደኡዋ ሸምፑዋ ሸምፕያ ኡባይካ ሀይቄዳ። 23 ሀ ሳኣን ፓጻ ደእያባይ ኡባይ: አሳይ፥ መሂነ ዶአይ፥ ቢታና ጎሸትያ መታቱነ ሳሉዋ ካፎቱ ኡባይካ ሳኣፐ ꬋዬድኖ። ኖሄ ጻላላይነ አናና ማርካብያ ግዶን ደእያዋንቱ አቴድኖ። 24 ሄ ሃꬃይ ጼታነ እሻታሙ ጋላሳ ጋካናዉ ሳኣ ቦላን ጋምኤዳ።