1 ሽን ጾሳይ ኖሀ፥ አናና ማርካብያ ግዶን ደእያ ዶኣ ኡባነ መህያ ኡባ ቆፔዳ፤ ሳኣ ቦላን ጫርኩዋ ጫርክሴዳ፤ ሄ ሃꬃይ ዎꬍ ዎꬍ ቤዳ። 2 ቃይ ቢታ ግዱዋን ደእያ ጪሙዋ ፑልቱነ ሳሉዋን ደእያ ሃꬃ ፐንገቱ ጎርደቴድኖ፤ እራይካ ሳሉዋን ኤቄዳ። 3 ያትና ሃꬃይ ዎꬍ ዎꬍ ቤዳ። ሄ ጼታነ እሻታሙንꬃ ጋላሳፐ ጉየ፥ ሃꬃይ ዎꬌዳ። 4 ሃꬃይ ዎꬍና ማርካቢ ላፑንꬃ አግናን፥ ታማነ ላፑንꬃ ጋላሳን አራራተ ግያ ደረቱዋ ቦላ ኡቴዳ። 5 ሃꬃይ ታማንꬃ አግናይ ጋካናዉ ዎꬍ ዎꬍ ቤዳ፤ ታማንꬃ አግናዉ ኮይሮ ጋላስ ደረቱ ጼራይ ቤቴዳ።

6 ኦይታሙ ጋላሳፐ ጉየ፥ ኖሄ ባረ ኬጼዳ ማርካብያ ማስኮትያ ዶዬዳ፤ 7 ያቲደ እት ቁሩዋ ካረ የድና፤ ቁሩ ሃꬃይ ቢታ ቦላፐ መላና ጋካናዉ፥ ያነ ሃነ ፓሊደ ጋምኤዳ። 8 ቃይ ኖሄ ሃꬃይ ቢታ ቦላፐ ዎꬍ ዉሬደንቶነ በአናዉ እት ሀራጳቶ ካረ የዴዳ፤ 9 ሽን ሄ ሀራጳታ ሃꬃይ ቢታ ኡባ ቦላን ሀእካ ደእያ ድራዉ፥ ሸምፕያ ሳኣ ደማበይኩ። ሄዋ ድራዉ ስማደ፥ ማርካብያ ግዶን ደእያ ኖሄኮ ያዱ፤ እ ባረ ኩሽያ የዲደ፥ ባረኮ ማርካብያ ግዶ አኬዳ።

10 ሄዋፐ ጉየ፥ ሀራ ላፑን ጋላሳ ጋምኢደ፥ ዶጎማቶ ዛሪደካ ማርካብያ ግዶፐ ከሲደ የዴዳ። 11 ሄ ሀራጳታ ሳአይ ኦማርስያ ዎደ አኮ ስማደ ያዱ፤ ዎጋራ ማላትያ ምꬃፐ ዱꬄዳ እርጻ ሀይꬃ ባረ ዶናን ሳአ አካደ ያዱ። ሄዋ ድራዉ፥ ሃꬃይ ቢታ ቦላፐ ዎꬌዳዋ ኖሄ ኤሬዳ። 12 ቃይ ኖሄ ሀራ ላፑን ጋላሳ ጋምኢደ፥ ሄ ሀራጳቶ ዛረꬂደ የዴዳ፤ ሽን ሄ ሀራጳታ አኮ ስማደ ያበይኩ።

13 ኖሄ ኡሱፑን ጼታነ እት ላይꬃ ደእና፥ ኮይሮ አግናን ኮይሮ ጋላስ፥ ሃꬃይ ቢታ ቦላፐ ጽኤዳ፤ ኖሄ ማርካብያ ቁምእያ ዶይ ጼሊደ፥ ቢታይ ጽኤዳዋ በኤዳ። 14 ላኤንꬆ አግናን ላታማነ ላፑንꬃ ጋላሳን፥ ቢታይ ሙለ መሌዳ።

15 ጾሳይ ሄ ዎደ ኖሀ ሀዋዳን ያጊደ አዛዜዳ፤ 16 “ኔን ነ ማቻቶ፥ ነ አቱማ ናናነ ነ ናና ማቻቱዋ አካደ ማርካብያ ግዶፐ ከሳ። 17 ኡንቱንቱ የለቲደ፥ ዳሪደ ጮራና ማላ፥ ሸምፑ ደእያ መታ ኡባፐ ኔናና ደእያዋንታ: ካፎቱዋ፥ መሄቱዋ፥ ዶአቱዋነ ቢታና ጎሸትያ ኡባ ኔናና ከሳ” ያጌዳ። 18 ኖሄ ባረ አቱማ ናናቱዋናኔ፥ ባረ ማቻትናነ ባረ ናና ማቼቱዋና ማርካብያ ግዶፐ ከሴዳ። 19 መህያነ ዶኣ ኡባይ፥ ቢታና ጎሸትያ መታ ኡባይ፥ ካፉዋ ኡባይነ ሳኣ ቦላን ዎጽ ቃጽያባ ኡባይ ባረ ቆሙዋን ቆሙዋን ማርካብያ ግዶፐ ከሴድኖ።

20 ኖሄ መꬍና ጎዳዉ ያርሽያ ሳኣ ግምቤዳ፤ ጌሻ መህያነ ዶኣ ኡባፐነ ጌሻ ካፉዋ ኡባፐ አኪደ፥ ያርሽያ ሳኣን ጹጊደ ያርሼዳ። 21 ያትና መꬍና ጎዳይ ያርሹዋ ፔኑዋ ሳዊያዋ ስንጊደ፥ ባረ ዎዛናን ሀዋዳን ያጌዳ፤ “ናአተꬃፐ ዶምና፥ አሳይ ዎዛናን ቆፕያባይ ኡባይ ኢታ ግዶፐነ፥ ታን አሳ ድራዉ ጋደ ላኤንꬆ ኡባካ ሀ ሳኣ ሸቂከ። ቃይ ታን ሀእ ኦꬄዳዋዳን ፓጻ ደእያ መታ ኡባ ላኤንꬆ ኡባካ ꬋይስከ። 22 ሀ ሳአይ ደኤዳ ኬሻ ኡባን፥ ዘርያ ዎዲነ ጫክያ ዎዲ፥ ሜጉነ ሆምቢ፥ ቦኒነ ባልጉ፥ ጋላሳይነ ቃማይ ኡባደካ ደአና” ያጌዳ።