1 ሳኣ ቦላን ደእያ አሳይ ኡባይ ኮይሮ እት ዶናነ እት ቃላ ሃሳዪኖ። 2 አሳቱ አዋይ ከስያ ባጋ ስሚደ ቤዳ ዎደ፥ ሳናኦረ ግያ ጋድያን ደምባ እቱዋ ደሚደ ያን፥ ኡቴድኖ።

3 ኡንቱንቱ እቱ እቱዋ፥ “ሃ ዪተ፤ ጹብያ መꬊደ፥ ታማን ጹጎይተ” ያጌድኖ። ኡንቱንቱ ሹቻ ድራዉ ጹብያ፥ ኡርቃ ድራዉ ሽድያ አኬድኖ፤ 4 “ሃ ዪተ፤ ኑ ሱንꬃ ጼስሳናዉነ ቃይ ኑን ሀ ሳኣ ኡባ ቦላን ላለተናን አታናዉ እት ዎልቃማ ካታማነ ጼራይ ሳሉዋ ጋክያ እት ፖቅያ ኑዉ ኬጾይተ” ያጌድኖ።

5 ሽን ጎዳይ አሳቱ ኬጼዳ ዎልቃማ ካታማነ ፖቅያ በአናዉ ዱገ ዎꬌዳ፤ 6 መꬍና ጎዳይ “ሄኮ ኡንቱንቱ እት አሳ፤ ቃይ ኡንቱንቱ ኡባይካ እት ቃላን ሃሳዪኖ፤ ኡንቱንቱ ሀእ ሀዋ ኦꬃናዉ ዶሞዋፐ ጉየ፥ ኡንቱንቱ ባረንቶ ኦꬃናዉ ቆፖዋ ኡንቱንቶ ዳንዳየተናዌ አያይነ ባዋ። 7 ሃ ዪተ፤ ዱገ ዎꬊደ ኡንቱንቱ እቱ ሃሳይያ ቃላ እቱ ኤረና ማላ፥ ኡንቱንቱ ቃላ ዱማዮይተ” ያጌዳ። 8 መꬍና ጎዳይ ኡንቱንታ ሄዋፐ ሳኣ ኡባ ቦላን ላልና፥ ኡንቱንቱ ሄ ዎልቃማ ካታማ ኬጽያዋ አጊሼድኖ። 9 መꬍና ጎዳይ ሳኣ አሳ ቃላ ያን ዱማዬዳ ድራዉ፥ ሄ ካታማይ ባቤላ *ባቤላ፦ እብራዌꬁዋን ሀ ሱንꬃ ብለꬃይ ዋላከቴዳዋ ግያዋ ማላቴ። ጌተቴዳ። ጎዳይ ኡንቱንታ ሄዋፐ ሳኣ ኡባ ቦላን ላሌዳ።

10 ሴማ የለታይ ሀዋፐ ካሊደ ጻፈቴዳዋ። ባሻ ሃꬃፐ ጉየ፥ ላኡ ላይꬃ ግድና፥ ሴማ ላይꬃይ 100 ግዴዳ ዎደ፥ ሴም አርፋክሳዳ የሌዳ። 11 ሴም አርፋክሳዳ የሌዳዋፐ ጉየ፥ 500 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

12 አርፋክሳድ 35 ላይꬃ ደኢደ፥ ሸላሀ የሌዳ፤ 13 አርፋክሳድ ሸላሀ የሌዳዋፐ ጉየ፥ 403 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

14 ሸላህ 30 ላይꬃ ደኢደ፥ ኤቦራ የሌዳ፤ 15 ሸላህ ኤቦራ የሌዳዋፐ ጉየ፥ 403 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

16 ኤቦር 34 ላይꬃ ደኢደ፥ ፔሌጋ የሌዳ፤ 17 ኤቦር ፔሌጋ የሌዳዋፐ ጉየ፥ 430 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

18 ፔሌግ 30 ላይꬃ ደኢደ፥ ራአ የሌዳ፤ 19 ፔሌግ ራአ የሌዳዋፐ ጉየ፥ 209 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

20 ራኡ 32 ላይꬃ ደኢደ፥ ሳሩጋ የሌዳ፤ 21 ራኡ ሳሩጋ የሌዳዋፐ ጉየ፥ 207 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

22 ሳሩግ 30 ላይꬃ ደኢደ፥ ናኮራ የሌዳ፤ 23 ሳሩግ ናኮራ የሌዳዋፐ ጉየ፥ 200 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

24 ናኮር 29 ላይꬃ ደኢደ፥ ታራ የሌዳ፤ 25 ናኮር ታራ የሌዳዋፐ ጉየ፥ 119 ላይꬃ ደኤዳ፤ ሀራ አቱማ ናናካ ማጫ ናናካ የሌዳ።

26 ታር 70 ላይꬃ ደኢደ፥ አብራማ፥ ናኮራነ ሃራና የሌዳ።

27 ታራ የለታይ ሀዋፐ ካሊደ ጻፈቴዳዋ። ታር አብራማ፥ ናኮራነ ሃራና የሌዳ፤ ሃራን ሎጻ የሌዳ። 28 ሃራን ባረ አዉ ታር ፓጻ ደእሽን፥ ባረ የለቴዳ ካላዳዌቱዋ ጋድያን፥ ኡራ ግያ ዎልቃማ ካታማን ሀይቄዳ። 29 አብራምነ ናኮርነ ላአቱካ አኬድኖ፤ አብራሞ ማቻት ሱንꬃይ ሳሮ፤ ቃይ ናኮራ ማቻት ሱንꬃይ ምልኮ፤ ምልካ ሃራና ናቶ፤ ሃራን ምልክዉነ ይስካንዉ አዉዋ። 30 ሳራ ማንꬃቶ፤ እዝዉ ናእ ባዋ።

31 ታር ባረ ናኣ አብራማ፥ ባረ ናኣ ሃራና ናኣ ሎጻነ፥ ባረ ናኣ አብራሞ ማቻቶ ሳሮ አኪደ ከስና፥ ኡንቱንቱ እትፐ ካናነ ጋድያ ባናዉ ኡር ግያ ካላዳዌቱዋ ካታማፐ ደንዴድኖ፤ ሽን ኡንቱንቱ ካራነ ግያ ካታማ ጋካናዉ ቢደ፥ ያን ኡቴድኖ። 32 ታር 205 ላይꬃ ደኢደ፥ ካራነን ሀይቄዳ።