1 መꬍና ጎዳይ አብራማ ያጌዳ፤ “ኔን ነ ጋድያፐ፥ ነ ዳቦቱዋፐነ ነ አዉዋ ጎለ አሳፐ ሻከታደ፥ ታን ኔና በስያ ጋድያ ባ። ኪታ 7:2-3፤ እብራ. 11:8 2 ታን ኔና ዎልቃማ ካዉተꬃ ኦꬃና፤ ቃይ ታን ኔና አንጃና፤ ታን ነ ሱንꬃ ግታያና፤ ያትና ኔን አንጆ ግዳና፤ 3 ታን ኔና አንጅያዋንታ አንጃና፤ ጋላ. 3:8 ቃይ ኔና ሸቂያዋንታ ታን ሸቃና፤ ሀ ሳኣ ቦላን ደእያ አሳይ ኡባይ ነ ባጋና አንጀታና”*ነ ባጋና አንጀታና፦ ኔና አንጆዋዳ አንጃና ማላ ኡባይ ዎሳና። ያጌዳ።

4 አብራመ መꬍና ጎዳይ አዉ ኦዴዳዋዳን ደንዲደ ቤዳ፤ ሎጸካ አናና ቤዳ፤ አብራመ ካራነፐ ቤዳ ዎደ፥ አዉ ላይꬃይ ላፑን ታማነ እቼሻ። 5 አብራመ ባረ ማቻቶ ሳሮ፥ ባረ እሻ ናኣ ሎጻ፥ ያን ሺሼዳ ባረንቱ ማጹዋ ኡባነ፥ ካራነን ኡንቱንቱ ደሜዳ ቆማቱዋ አኪደ፥ ካናነ ጋድያ ባናዉ ደንዴዳ፤ ቢደ ኡንቱንቱ ካናነ ጋድያ ጋኬድኖ።

6 አብራመ ሄ ጋድያን ሰኬማ ግያ ሳኣን ደእያ ሞረ ግያ ዎልቃማ ዎላ ጋካናዉ ሀመቲደ ቤዳ። ሄ ዎደ ካናነ አሳቱ ሄ ጋድያን ደእኖ። 7 ሽን መꬍና ጎዳይ አብራማዉ ቆንጪደ አ፥ “ሀ ጋድያ ታን ነ ዘረꬃዉ እማና” ያጌዳ። እ ባረዉ ቆንጬዳ መꬍና ጎዳዉ ሄ ሳኣን ያርሽያ ሳኣ ኬጺደ ጎይኔዳ። ኪታ 7:5፤ ጋላ. 3:16 8 ሄዋፐ ደንዲደ፥ ቤቴለፐ አዋይ ዶልያ ባጋና ደእያ ደረትያ ሳኣ ቢደ፥ ሄዋን ቤቴለ አዋይ ዉልያ ባጋ አጊደ፥ ቃይ አይ አዋይ ዶልያ ባጋ አጊደ፥ ግዱዋን ባረ ዱንካንያ ꬎጌዳ፤ ሄዋን መꬍና ጎዳዉ ያርሽያ ሳኣ ኬጺደ፥ መꬍና ጎዳ ሱንꬃ ጼሴዳ። 9 ሄዋፐ ጉየ፥ አብራመ ያፐ ደንድ ቢደ ኔጌባ ባዙዋ ጋኬዳ።

10 ሄ ዎደ ሄ ጋዲ ኮሻቴዳ፤ ኮሻይ ጺጽ ደእያ ድራዉ፥ አብራመ አማሬዳ ዎድያ ደአናዉ ዱገ ግብጼ ዎꬌዳ። 11 ግብጼ ገላና ሀንሽን፥ አብራመ ባረ ማቻቶ ሳሮ ሀዋዳን ያጌዳ፤ “ስሳ፤ ኔን ሎይꬃ ማላ ሎኦ ማጫ አሳ ግድያዋ ታን ኤራይ። 12 ግብጼ አሳቱ ኔና በእያ ዎደ ኡንቱንቱ፥ ‘ሀና አ ማቻቶ’ ያጊደ ኡንቱንቱ ታና ዎꬋና፤ ሽን ኔና ፓጻ አጋና። 13 ስም ኡንቱንቱ ታዉ ነ ጋሱዋን ኬካና ማላነ፥ ቃይ ታን ሀይቀናን ነ ጋሱዋን አታና ማላ ኔን፥ ‘ታን አ ምቻቶ’ ያጋ”ዶመꬃ 20:2፤ 26:7 ያጌዳ።

14 አብራመ ግብጼ ቢታ ገሌዳ ዎደ፥ ግብጼ አሳቱ ሄ ምሽራታ ዳሮ ማላ ሎኦ ማጫ አሳ ግድያዋ በኤድኖ። 15 ቃይ ግብጼ ካትያዉ ኦꬅያ ካፓቱካ እዞ በኤዳ ዎደ፥ ካትያ ስንꬃን እዞ ናሼድኖ፤ ያቲደ እዞ ካትያ ጎለ አፌድኖ። 16 ያትና እዝ ጋሱዋን ካቲ አብራማ ሎኦ አይፍያን ጼሌዳ፤ አብራማዉ ዶርሳቱዋነ ቦራቱዋ፥ አቱማ ሀረቱዋነ ማጫ ሀረቱዋ፥ አቱማ ቆማቱዋነ ማጫ ቆማቱዋ፥ ጋሉዋ እሜዳ።

17 ሽን መꬍና ጎዳይ አብራሞ ማቻት ሳር ጋሱዋን ግብጼ ካትያ ቦላነ አ ሶ አሳ ቦላ ዳሮ ካእያ ሀርግያ የዴዳ። 18 ያትና ካቲ አብራማ ጼሲደ፥ “ኔን ሀዋ አያዉ ታ ቦላ ኦꬃድ? እዛ ነ ማቻቶ ግዴዳዋ አያዉ ታዉ ኦዳበይኪ? 19 ኔን እዞ፥ ‘እዛ ታ ምቻቶ’ ጋደ ታዉ አያዉ ኦዳዲ? ታን እዞ ታዉ ማቼ ኦꬃናዉ አኬዳዌ ሄዋ ድራሳ። ስም ሀእ ነ ማቻቶ ሀኖ በአ፤ እዞ አካደ ባ” ያጌዳ። 20 ባረ አሳ አዛዝና፥ ኡንቱንቱ አብራማ አ ማቻትናነ አዉ ደእያ ኡባባና ከሲደ የዴድኖ።