1 ሄዋ ድራዉ አብራመ ባረ ማቻትናነ፥ ባረዉ ደእያዋ ኡባና ግብጼፐ ነጌባ ባዙዋ ቤዳ፤ ሎጸካ አናና ቤዳ። 2 አብራመ ሄ ዎደ ሚዛ፥ ብራንነ ዎርቃን ዳሪ ዱረቴዳ።

3 እ ነጌባፐ ደንዲደ ቤቴለ ጋካናዉ ቤዳ፤ ሄ ሳአይነ ቤቴለፐነ አይፐ ግዱዋን እ ኮይሮ ባረ ዱንካንያ ꬎጌዳ ሳኣነ 4 ያርሽያ ሳኣ እ ኮይሮ ኬጼዳ ሳኣ። ያን አብራመ መꬍና ጎዳ ሱንꬃ ጼሴዳ።

5 አብራመና ዩይያ ሎጸዉካ ሚዛይ፥ ዶርሳ ዉዲነ ዱንካኒ ደኤ። 6 ሽን ኡንቱንቱ እትፐ ደአናዉ ኡንቱንቶ ቢታይ ግድቤና፤ ኡንቱንቶ ዳሮ መሂ ደእያ ድራዉ፥ ኡንቱንቱ እትፐ ደአናዉ ዳንዳይበይክኖ። 7 ሄዋ ጋሱዋን አብራሞ ዉድያ ሄምያዋንቱ ግዶንነ ሎጸ ዉድያ ሄምያዋንቱ ግዶን ዋላሳይ ከሴዳ። ሄ ዎደ ካናናቱነ ፓርዘቱ ሄ ጋድያን ደእኖ።

8 ያንና አብራመ ሎጻ፥ “ኑን እሻቱዋ ግድያ ድራዉ፥ ታ ግዶንነ ነ ግዶን፥ ታ ዉድያ ሄምያዋንቱ ግዶንነ ነ ዉድያ ሄምያዋንቱ ግዶን ዋላሳ ከሶፓ። 9 ቢታ ኡባይ ነ ስንꬃን ደኤኔ? አነ ኑን ሻከቶይተ፤ ኔን ሀድርሳ ባጋ ቦፐ፥ ታን ኡሸቻ ባጋ ባና፤ ኔን ኡሸቻ ባጋ ቦፐ፥ ታን ሀድርሳ ባጋ ባና” ያጌዳ።

10 ሎጸ ዩይ አꬍ ጼሊደ፥ ዮርዳኖሳ ሻፋ ዎምባይ ኡባይ ቢደ ዞኣራ ጋካናዉ፥ መꬍና ጎዳ ገነትያ *መꬍና ጎዳ ገነትያ፦ ኤደነ ገነትያ በስያዋ። ዎይ ግብጼ ቢታ ማላ ዳሮ ሃꬃይ ደእያዋ ግድያዋ በኤዳ። (ሄዌነ መꬍና ጎዳይ ሶዶማነ ጋሞራ ጌተትያ ካታማቶ ꬋይሳናፐ ካሰ)።ዶመꬃ 2:10 11 ሄዋ ድራዉ ሎጸ ባረዉ ዮርዳኖሳ ዎምባ ኡባ ዶሪደ፥ አዋይ ዶልያ ባጋ ቤዳ፤ ያትና ኡንቱንቱ እቱ እትዋፐ ሻከቴድኖ። 12 አብራመ ካናነ ጋድያን ደኤዳ፤ ሽን ሎጸ ዎምባን ደእያ ዎልቃማ ካታማቱዋ ግዱዋን ኡቲደ፥ ሶዶማ ካታማ ማታን ባረ ዱንካንያ ꬎጌዳ። 13 ሄ ዎደ ሶዶማ አሳቱ ኢታነ መꬍና ጎዳ ቦላ ፓላ ናጋራ ኦꬅያዋንታ።

14 ሎጸ አብራመፐ ሻከቴዳዋፐ ጉየ፥ መꬍና ጎዳይ አብራማ ሀዋዳን ያጌዳ፤ “ꬎቁ ጋደ ኔን ደኢያሳፐ አዋይ ዶልያ ባጋነ አዋይ ዉልያ ባጋ፥ ቃይ ሁጲሳ ባጋነ ገድሳ ባጋ ጼላ። 15 ሀ ኔን ጼልያ ቢታ ኡባ ታን ነዉነ ነ ዛርያዉ መꬍናዉ እማና፤ ኪታ 7:5 16 ታን ነ ዛርያ ሳኣ ሻፍያዳን ዳርሳና፤ ኦንነ ሳኣ ሻፍያ ፓይዳና ዳንዳዮፐ፥ ነ ዛሪካ ፓይደታና። 17 ደንዳ፤ ቢታ ጎምፓን ፑደነ ዱገነ ህንነ ሃነ ሀመታደ በአ፤ አያዉ ጎፐ፥ ታን ሀ ቢታ ነዉ እማና” ያጌዳ።

18 አብራመ ባረ ዱንካንያ ሾዲደ፥ ከብሮነ ካታማን ደእያ ማምረ ዎላቱዋ ዎጋቱዋ ማታን ደአናዉ ቤዳ። ሄዋን መꬍና ጎዳዉ ያርሽያ ሳኣ ኬጼዳ።