1 አብራሃመ ማምረ ዎላቱዋ ዎጋቱዋ ጋርሳን ባረ ዱንካንያ ፐንግያን ሴታ ጋላስ ኡት ደእሽን፥ መꬍና ጎዳይ አዉ ቆንጬዳ። 2 አብራሃመ ꬎቁ ጊደ ጼሊደ ሄዙ አሳቱ አ ማታን ኤቄዳዋንታ በኤዳ፤ ኡንቱንቱና ጋከታናዉ ባረ ዱንካንያ ፐንግያፐ ደንድ ዎጼዳ፤ ጋኪደ፥ ገድያን ሆኪደ፥ ኡንቱንቱ ስንꬃን ጎይኔዳ። እብራ. 13:2 3 ስሚደ እ፥ “አቤት ታ ጎዳው፥ ታን ነ ስንꬃን ናሸቴዳዋ ግዶፐ፥ ታና ነ ቆማ አጋደ አꬎፓ። 4 ሀያና ጉꬃ ሃꬃይ ዮ፤ ህንተንቱ ገዲ ሜጨትና፥ ሀ ምꬃ ኩዋን ሸምፕ አክተ። 5 ህንተንቱ ሀእ ታኮ ህንተንቱ ቆማኮ ዬዳ ድራዉ፥ ካምእ ጊደ ህንተንቱ ብያሳኣ ባና ማላ፥ ታን ህንተንቶ ምያዋ አሀይ” ያጌዳ።

ኡንቱንቱ፥ “ዳሮ ሎአ፤ ኔን ግያዋዳን ኦꬃ” ያጌድኖ።

6 አብራሃመ ዱንካንያ ግዶ ሳርኮ ኤሌል ቢደ፥ “ኤሌላደ ሊቆ ꬊልያፐ ሄዙ ከረ ግድያዋ አካ ሙናቃደ ኡክꬃ ኡካ” ያጌዳ። 7 ቃይ፥ አብራሃመ ባረ መህያኮ ዎጽ ቢደ፥ ሎኦ ቦልትቦልታ ቦልትቦልታ ማራ ዶሪደ፥ እት ቆማዉ እምና፥ እ ኤሌል ሹኪደ ጊግሴዳ። 8 ያትና አብራሃመ መኤዳ ማꬃነ ጊግሴዳ ማራ አሹዋ እማꬃቱዋ ስንꬃ አꬄዳ፤ ኡንቱንቱ ሚሽን፥ እ ሄ ምꬃ ጋርሳን ኡንቱንቱ ማታን ኤቄዳ።

9 ኡንቱንቱ አ፥ “ነ ማቻታ ሳራ ሀቃኔ?” ያጊደ ኦቼድኖ።

እዛ፥ “ህን ዱንካንያ ግዱዋን ደአዉ” ያጌዳ።

10 መꬍና ጎዳይ አ፥ “ታን ላይꬅ ሀኖደ ቱሙ ኔኮ ስማና፤ ሄ ዎደ ነ ማቻታ ሳራ አቱማ ናኣ የላና” ያጌዳ።

ሳራ ሄ ዎደ አፐ ጉየ ባጋና ደእያ ዱንካንያ ፐንግያን ደእያና ሄዋ ስሳዱ። ሮመ 9:9 11 አብራሃመነ ሳራ ባረንቱ ላይꬃ ሎይꬅ ሱጊደ ጭሜድኖ። ሳርዉ ፒላይ ይያዋ አጌዳ። 12 ሄዋ ድራዉ ሳራ ባረ ዎዛናን፥ “ታን ሀእ ጭማ ዉራ ክቾዋፐ ጉይያንነ ታ ጎዳይ ጭሞዋፐ ጉየ፥ ሀእ ታዉ አቱማ አሳና ጋከትያዌ ዋን ሀናኔ?” ያጋደ ሚጫዱ። 1 ጰጽ. 3:6

13 መꬍና ጎዳይ አብራሃመ ሄ ዎደ፥ “ ‘ታን ጭማ ክቾዋፐ ጉየ፥ ቱሙ ናኣ የላንታየ?’ ጋደ፥ ሳራ አያዉ ሚጫደ? 14 መꬍና ጎዳዉ ዳንዳየተናባይ ቱሙ ደኢ? ላይꬅ ሀኖደ ታን ኔኮ ስማና፤ ሄ ዎደ ሳራ አቱማ ናኣ የላና” ያጌዳ። ሉቃሳ 1:37

15 ሳራ ሎይꬃ ያዬዳ ድራዉ፥ “ታን ሚጫበይከ” ያጋደ ላካዱ።

ሽን እ፥ “ኤ፥ ኔን ቱሙ ሚጫዳ” ያጌዳ።

16 ሄዋፐ ጉየ አሳቱ ደንዲደ ብ፥ ሶዶማ ካታማ ዱገ ዛር ጼሌድኖ፤ አብራሃመነ ኡንቱንታ ሞይዚደ ኡንቱንቱና ቤዳ። 17 መꬍና ጎዳይ ሄ ዎደ፥ “ታን ታ ኦꬃናዉ ሀንያባ አብራሃመፐ ቆስከ። 18 አብራሃመ ቱሙፐ ግታነ ዎልቃማ ካዉተꬃ ግዳና፤ ሀ ሳኣ ካዉተꬃቱ ኡባይ አ ባጋና አንጀታና። *ካዉተꬃ ኡባይ አ ባጋና አንጀታና፦ ካዉተꬃይ ኡባይ ኔና አንጆዋዳን ባረናካ አንጃናዳን ታና ዎሳናዋንታ ግያዋ። 19 አያዉ ጎፐ፥ ጽሎተꬃነ ፕርዳ ኦꬂደ፥ መꬍና ጎዳ ኦግያ ናጋናዳን ባረ ናናነ ባረፐ ጉየ፥ ባረ ሶ አሳ እ ዞራና ማላ፥ ታን አ ዶራድ፤ ሄዌነ መꬍና ጎዳይ አብራሃመዉ እማና ጌዳዋ ኡባ ፖላናሳ” ያጌዳ።

20-21 መꬍና ጎዳይ አብራሃመ፥ “ሶዶማፐነ ጋሞራፐ ዋስያ ዋሱ ሎይꬅ ዳሬዳ ድራዉነ ኡንቱንቱ ናጋራይ ሎይꬅ ዴጼዳ ድራዉ፥ ኡንቱንቱ ኦꬄዳባይ ታኮ ጋኬዳ ዋሱዋ ኬሻ ኢተንቶነ በአናዉ አነ ታን ዱገ ዎꬋይ፤ ሄዋ ማላ ኢታ ግዳና ꬋይንቶነ ኤራና” ያጌዳ።

22 ሄዋፐ ጉየ፥ ላኡ አሳቱ ሶዶማኮ ስሚደ ቤድኖ፤ ሽን አብራሃመ መꬍና ጎዳ ስንꬃን ዎስ ደኤ። 23 ሄ ዎደ አብራሃመ መꬍና ጎዳኮ ሺቂደ ያጌዳ፤ “ቱሙ ኔን ጽሎቱዋ ኢታቱዋና ꬋይሳይ? 24 ሄ ዎልቃማ ካታማን እሻታሙ ጽሎቱ ደእንቶካ፥ ኔን ꬋይሳይ? ኔን አን ደእያ እሻታሙ ጽሎቱዋ ድራዉ ሄ ካታማ አሽኪ? 25 ሄዌ ኔፐ ሃኮ፤ ጽሎቱዋ ኢታቱዋና ዎꬍያዌነ ጽሎቱዋነ ኢታቱዋ እት አይፍያን ጼልያዌ ኔፐ ሃኮ። ሀ ሳኣ ኡባ ፕርድያዌ ጽሉዋ ፕርደኔየ?” ያጌዳ።

26 መꬍና ጎዳይ፥ “ሄ ሶዶማ ካታማን እሻታሙ ጽሎቱ ደኦፐ፥ ሄ ሳኣ ኡባ ኡንቱንቱ ድራዉ ታን አሻና” ያጌዳ።

27 ሄዋፐ ጉየ አብራሃመ፥ “ታን ቢታነ ብድንꬃ ግዳደ ታ ጎዳና ጻላደ ሃሳያናዉ ስም ዶማ ክቻድ፤ 28 እሻታሙ ጽሎቱዋፐ እቼሹ ፓጭንቶ፥ ኔን ሄ እቼሻቱዋ ድራዉ ሄ ካታማ ኡባ ꬋይሳይ?” ያጌዳ።

መꬍና ጎዳይ፥ “ታን ያን ኦይታማነ እቼሹ ጽሎቱዋ ደምንቶ፥ ሄ ካታማ ꬋይስከ” ያጌዳ።

29 አብራሃመ ዛረꬂደካ፥ “ያን ኦይታሙ ጻላላይ ቤትንቶ ሽን?” ያጌዳ።

እ፥ “ታን ሄ ኦይታማቱዋ ድራዉ፥ ሄ ካታማ ꬋይስከ” ያጌዳ።

30 ሄዋፐ ጉየ እ፥ “ሀይ ጎዳይ ታዉ ሀንቀቶፖ፤ ታን ጉጃደካ ሃሳያይ። ያን ሀታሙ ጻላላይ ቤትንቶ ሽን?” ያጌዳ።

መꬍና ጎዳይ፥ “ታን ያን ሀታሙዋ ደምንቶ፥ ሄ ካታማ ꬋይስከ” ያጌዳ።

31 አብራሃመ ቃይካ፥ “ታን ጎዳና ጻላደ ሃሳያናዉ ዶማ ክቻድ፤ ያን ላታሙዋ ጻላላይ ቤትንቶ ሽን?” ያጌዳ።

መꬍና ጎዳይ፥ “ሄ ላታማቱዋ ድራዉ ታን አ ꬋይስከ” ያጌዳ።

32 ሄዋፐ ጉየ አብራሃመ፥ “ሀይ ጎዳይ ታዉ ሀንቀቶፖ፤ ታን መጽ እት ገደ ሃሳያይ፤ ያን ታሙ ጻላላይ ቤትንቶ ሽን?” ያጌዳ።

መꬍና ጎዳይ፥ “ሄ ታማቱዋ ድራዉ ታን ሄ ካታማ ꬋይስከ” ያጌዳ።

33 መꬍና ጎዳይ አብራሃመና ሃሳያ ዉርሴዳዋፐ ጉየ ቤዳ፤ አብራሃመካ ባረ ሶ ስሜዳ።