1 ሄዋፐ ስሚደ፥ ጾሳይ አብራሃማ ፓጬዳ፤ እ አ፥ “አብራሃሜ” ያጊደ ጼሴዳ።

እ፥ “አቤ” ያጊደ ኮዬዳ። እብራ. 11:17-19

2 ጾሳይ፥ “ኔን ሲቅያ ነ መጽ እት ናኣ ይሳቃ አካደ፥ ሞርያ ግያ ጋድያ ባ፤ ያን ታን ነዉ ኦድያ እት ደርያ ቦላን አ ጹግያ ያርሹዋ ኦꬃደ ታዉ ያርሻ” ያጌዳ። 2 ኦዱዋ 3:1

3 ዎንተꬃ ጋላስ አብራሃመ ጉራን ደንዲደ፥ ባረ ሀርያ ጫኔዳ፤ ባረ ቆማቱዋፐ ላኡዋነ ባረ ናኣ ይሳቃ ባረናና አኪደ፥ ጹግያ ያርሹዋ ምꬃ ጳልቂ አኪደ፥ ጾሳይ አዉ ኦዴዳ ሳኣ ባናዉ ደንዴዳ። 4 ቢደ ሄዘንꬃ ጋላስ አብራሃመ ꬎቁ ጊደ፥ ሄ ሳኣ ሃኩዋን በኤዳ። 5 አብራሃመ ባረ ቆማቱዋ፥ “ሀ ሀርያና ሀዋን ደእሽተ፤ ታንነ ታ ናአይ ያ ቢደ ጾሳዉ ጎይኒደ፥ ህንተንቱኮ ስማና” ያጌዳ።

6 አብራሃመ ያርሹዋ ምꬃ ደንꬂደ፥ ባረ ናኣ ይሳቃ ቶሴዳ፤ ታማነ ማሻ እ ባረዉ ኦይቄዳ። ኡንቱንቱ ላኡ እትፐ ቢሽን፥ 7 ይሳቅ ባረ አዉዋ አብራሃማ፥ “ታ አዎ” ያጌዳ።

አብራሃመ፥ “አቤ፥ ታ ናአዉ” ያጌዳ።

እ፥ “ታማይነ ምꬃይ ሀዌሽ፤ ሽን ጹጊደ ያርሽያ ዶርሳ ማራይ ሀቃኔ?” ያጌዳ።

8 አብራሃመ፥ “ታ ናአዉ፥ ጹጊደ ያርሽያ ዶርሳ ማራ ጾሳይ ጊግሳና” ያጌዳ። ኡንቱንቱ ላኡ እትፐ ቤድኖ።

9 ኡንቱንቱ ጾሳይ አዉ ኦዴዳ ሳኣ ጋኬዳ ዎደ፥ አብራሃመ ያርሹዋ ያርሽያ ሳኣ ያን ግምቢደ፥ ምꬃ ማር የጌዳ፤ ባረ ናኣ ይሳቃ ቃቺደ፥ ሄ ምꬃ ቦላን ግስሴዳ። ያቆባ 2:21 10 አብራሃመ ባረ ናኣ ሹካናዉ ባረ ኩሽያ የዲደ ማሻ አኬዳ። 11 ሽን መꬍና ጎዳ ኪታንቻይ ሳሉዋፐ አ፥ “አብራሃሜ፥ አብራሃሜ” ያጊደ ጼሴዳ።

እ፥ “አቤ” ጊደ ኮዬዳ።

12 አ፥ “ናኣ ቦላን ነ ኩሽያ ዎꬆፓ፤ አ አይነ ኦꬆፓ፤ ኔን ነ መጽ እት ናኣካ ታና ድጋቤና ድራዉ፥ ኔን ጾሳዉ ያይያዋ ግድያዋ ታን ሀእ ኤራይ” ያጌዳ።

13 አብራሃመ ꬎቁ ግ ጼሊደ፥ ሄዋን ዶርሳ እቱ ካጪ ቡራን ገል ቃጸት ኡቴዳዋ በኤዳ። አብራሃመ ቢደ ሄ ዶርሳ አኪደ፥ ባረ ናኣ ድራዉ ጹግያ ያርሹዋ ኦꬂደ ያርሽ ባሼዳ። 14 ሄዋ ድራዉ አብራሃመ፥ “መꬍና ጎዳይ እማና”*መꬍና ጎዳይ እማና፦ መꬍና ጎዳይ ጼሌ። ያጊደ ሄ ሳኣ ሱንꬄዳ፤ ሀቼ ጋካናስካ፥ “መꬍና ጎዳ ደርያን እመታና” ጌተቴ።

15 መꬍና ጎዳ ኪታንቻይ ሳሉዋፐ ላኤንꬂደ አብራሃማ ጼሲደ ያጌዳ፤ 16 “መꬍና ጎዳይ፥ ‘ሀዋዳን ያጋደ ነዉ ታን ታ ሁጲያን ጫቃይ፤ ኔን ሀዋ ኦꬄዳ ድራዉነ ነ መጽ እት ናኣካ ታና ድጋቤና ድራዉ፥ እብራ. 6:13-14 17 ታን ኔና ቱሙ አንጃና፤ ነ ዘረꬃካ ታን ሳሉዋ ጾልንትያ ኬናነ አባ ዶና ሻፍያ ኬና ኦꬃደ ጮርሳና። ነ ዘረꬃቱ ባረንቱ ሞርከቱዋ ካታማቱዋ ላታና። እብራ. 11:12 18 ኔን ታዉ አዛዘቴዳ ድራዉ፥ ሀ ሳኣ ካዉተꬃቱ ኡባይ ነ ዘረꬃ ባጋና አንጀታና’ ያጌ” ያጌዳ። ኪታ 3:25

19 ሄዋፐ ጉየ፥ አብራሃመ ባረ ቆማቱዋኮ ስሚደ፥ ኡንቱንቱ ኡባይ እትፐ በርሳበሄ ደንዲደ ቤድኖ። አብራሃመ በርሳበሄን ደኤዳ።

20 ሄዋፐ ስሚደ አብራሃመዉ፥ “ምልካ ነ እሻ ናኮራዉ ናና የላዱ፤ 21 ኡንቱንቱነ ባይራይ ኡጻ፤ ኡጻ እሻቱ ቡዛ፥ 22 አራማ አዉዋ ቃሙኤላ፥ ኬሳደ፥ ሃዞ፥ ፕልዳሻ፥ ይድላፋነ ባቱኤላ። 23 ሀዋንታ ሀ ሆስፑን ናናካ ምልካ አብራሃመ እሻ ናኮራዉ የላዱ፤ ባቱኤል ርብቆ የሌዳ። 24 ራኡማ ግያ አ ቆማታ ቃይ ጸባሀ፥ ጋሃማ፥ ታሃሻነ ማእካ የላዱ” ያጊደ ኦዴድኖ።