1 ሄዋ ድራዉ፥ ይሳቅ ያቆባ ጼሲደ ሀዋዳን አንጄዳነ አዛዜዳ፤ “ካናነ ጋድያ ማጫ ናናቱዋፐ ነዉ ማቻቶ አኮፓ። 2 ደንዳ! ነ ዳይ አዉዋ ባቱኤላኮ፥ ማስጰጾምያ ጋድያ ባደ ያፐ ነ ዳይ እሻ ላባና ማጫ ናናቱዋፐ እትኖ ነዉ ማቻቶ ኦꬃደ አካ። 3 ኡባ ዳንዳይያ ጾሳይ ኔና አንጆ፤ እ ኔ የለታ አሶ፤ ኔን እት ደረ አሳ ኬና ጋካናዉ ኔና ጮርሶ። 4 ኔን ሀእ በተተꬃን ኡቴዳ ሀ ቢታ ነዋ ኦꬃና ማላ ነዉነ ነ ዘረꬃዉ ጾሳይ አብራሃመ አንጁዋ እሞ” ያጌዳ። ዶመꬃ 17:4-8 5 ይሳቅ ያቆባ የዴዳ፤ ያቆብ ማስጰጾምያ ጋድያ ላባናኮ ቤዳ። ላባን ያቆባነ ኤሳ የሌዳ አት ርብቃ እሻነ ሶርያ ባቱኤላ ናኣ።

6 ይሳቅ ያቆባ አንጄዳዋነ፥ ያፐ ማቻቶ አካናዉ ማስጰጾምያ ጋድያ አ የዴዳዋ፥ ቃይ እ ያቆባ አንጄዳ ዎደ፥ “ካናነ ማጫ አሳ አኮፓ” ያጊደ አዛዜዳዋነ፥ 7 ያቆብ ባረ አዉዋነ ባረ አቶነ አዛዘቲደ፥ ማስጰጾምያ ጋድያ ቤዳዋ ኤሳይ ኤሬዳ። 8 ኤሳይ ሄዋን ካናነ ቢታ ማጫውና ባረ አዉዋ ይሳቃ አይ ኬሻ ኢትንቶ አኬኬዳ። 9 ሄዋ ድራዉ ኤሳይ አብራሃመ ናኣ እስማኤለኮ ቢደ፥ አ ናቶ ማህላቶ ባረ ማቻቱዋ ቦላ ጉጂደ አኬዳ። እዛ ናባዮታ ምቻቶ።

10 ያቆብ በርሳበሄፐ ካራነ ባናዉ ደንዴዳ። 11 እ እት ሳኣ ጋክና አዋይ ዉልና፥ ያን ቃማ አቄዳ። ሄ ሳኣን ደእያ ሹቻቱዋፐ እቱዋ አኪደ፥ ባረ ሁጲያን ቦርኮቲደ ሄ ሳኣን ገምእሼዳ። 12 እ አኩሙዋ አኩመቴዳ፤ ሄ አኩሙዋን ጋይያ እቱ ቢታን ኤቂና፥ አዉ ጼራይ ሳሉዋ ጋክያዋን፥ ጾሳ ኪታንቻቱ ግእሺናነ ዎꬍሽን በኤዳ፤ ዮሃ. 1:51 13 ጋይያዉ ቦላ ጼራን መꬍና ጎዳይ ኤቂደ አ፥ “ታን መꬍና ጎዳ፥ ነ አዉዋ አብራሃማ ጾሳ፥ ይሳቃ ጾሳ። ሀ ኔን ግሴዳ ቢታ ነዉነ ነ ዘረꬃዉ እማና፤ ዶመꬃ 13:14-15 14 ነ ዘረꬃይ ሳኣ ሻፍያዳን ዳራና፤ ኔን አዋይ ዉልያ ባጋናነ፥ አዋይ ዶልያ ባጋና፥ ሁጲሳናነ ህርክ ባጋና ደእያ ሳኣ ጋካናዉ አካና፤ ሳኣ ቦላን ደእያ አሳይ ኡባይ ነ ባጋናነ ነ ዘረꬃ ባጋና *ነ ባጋናነ ነ ዘረꬃ ባጋና፦ ሳኣ ቦላን ደእያ አሳይ ኡባይ ኔናነ ነ ዘረꬃ አንጆዋዳን አንጃና ማላ ታና ዎሳና ጉሳ። አንጀታና 15 ታን ኔናና ደአይ፤ ኔን ብያሳኣ ኡባን ታን ኔና ናጋና፤ ቃይ ታን ኔና ሀ ጋድያ ጉየ ዛራደ አሀና፤ ታን ነዉ ኦꬃና ጌዳዋ ኦꬃና ጋካናዉ ኔና የግከ” ያጌዳ።

16 ያቆብ ገምእሹዋፐ ቤጎቴዳ ዎደ፥ “መꬍና ጎዳይ ቱሙ ሀ ሳኣን ደኤ፤ ታን ኤራበይከፐ አትን” ያጌዳ። 17 እ ያዪደ፥ “ሀ ሳአይ ዎት ያሺ! ሀ ሳአይ ጾሳ ጎልያፐ አትን፥ አይነ ሀራ ሳኣ ግደና፤ ሀዌ ሳሉዋ ፐንግያ” ያጌዳ።

18 ዎንተꬃ ጋላስ ዎንታ ጉራን ያቆብ ደንዲደ፥ ባረ ቦርኮቴዳ ሹቻ አኪደ፥ ቱሳዳን ኤሲደ፥ ጾሳዉ ዱማያናዉ አ ቦላ ዛይትያ ትጌዳ። 19 ያቆብ ሄ ሳኣ ቤቴለ †ቤቴለ፦ ሀ ሱንꬃ ብለꬃይ እብራዌꬁዋን፥ “ጾሳ ጎልያ” ግያዋ። ጊደ ጼሴዳ። ሽን ሄ ካታማይ ሄዋፐ ካሰ ሎዛ ጌተቴ።

20-21 ያቆብ ሀዋዳን ያጊደ ሺቄዳ፤ “ታ አዉዋ ሶ ታን ሳሮ ስማና ማላ ጾሳይ ታናና ግዶፐ፥ ታን ብያ ሀ ቡሳን ታና ናጎፐነ ታዉ ምያ ቁማነ ማይያ ማዩዋ እሞፐ፥ መꬍና ጎዳይ ታ ጾሳ ግዳና፤ 22 ታን ቱሳዳን ኤሴዳ ሀ ሹቻይ ጾሳ ጎልያ ግዳና። ኔን ታዉ እምያዋ ኡባፐ ታሙዋፐ እቱዋ ታን ነዉ እማና” ያጌዳ።