1 ሄዋፐ ጉየ፥ ያቆብ ደንድ ቢደ፥ አዋይ ዶልያ ባጋ አሳቱዋ ጋድያ ጋኬዳ። 2 እት ሃꬃ ኦላይ ደምባን ደእያዋ በኤዳ፤ ሄዙ ዶርሳ ዉዲ ቃይ ሄ ኦላ ማታን ግሴድኖ። አያዉ ጎፐ፥ ዉዲ ኡባይ ሃꬃ ኡሽያዌ ሄ ኦላፐ። ሄ ሃꬃ ኦላ ዶናን ደእያ ሹቻይ ዎልቃማ። 3 ዶርሳ ዉዲ ኡባይ ሄዋን ዳጋቴዳ ዎደ፥ ሄ ዉድያ ሄምያዋንቱ ሃꬃ ኦላ ዶናፐ ሄ ሹቻ ጎንዶርሲደ ዶርሳ ኡሺኖ። ሄ ሹቻ ኦላ ዶናን ዛሪደ ዎꬅኖ።

4 ያቆብ ኡንቱንታ፥ “ታ እሻቶ፥ ህንተንቱ ሀቃፐ የድተ?” ያጊደ ኦቼዳ።

ኡንቱንቱ፥ “ኑን ካራነፐ ዬዶ” ያጌድኖ።

5 እ፥ “ናኮራ ናኣ ናኣ ላባና ህንተንቱ ኤሪተየ?” ያጌዳ።

ኡንቱንቱ፥ “ኤ፥ አ ኤሬቶ” ያጌድኖ።

6 ያቆብ ኡንቱንታ፥ “እ ሎኦ ደኢ?” ያጊደ ኦቼዳ።

ኡንቱንቱ፥ “ኤ፥ ሎአ፤ አ ናታ ራሄላ ዶርሳ አካደ የውኖ ሀኖ በአ” ያጌድኖ።

7 ያቆብ ኡንቱንታ፥ “በእተ፤ አዋይ ሀእ ዉልቤና፤ ዉድያ መሂ ሶ ሺቅያ ዎዲ ብሮ ጋክቤና፤ ዶርሳ ሀእ ኡሽ አፊደ፥ ሄምተ” ያጌዳ።

8 ሽን ኡንቱንቱ፥ “ዉዲ ኡባይ ሺቃና ጋካናዉ፥ ሹቻ ሃꬃ ኦላ ዶናፐ ጎንዶርሳና ጋካናዉ፥ ኑን ኡሻናዉ ዳንዳዮኮ። ሄዋፐ ጉየ፥ ኑን ዶርሳ ኡሻና” ያጌድኖ።

9 እ ብሮ ሃሳይሽን፥ ላባና ናታ ራሄላ ባረ አዉዋ ዶርሳቱዋ ላጋ አካደ ጋካዱ፤ አያዉ ጎፐ፥ እዛ ዶርሳ ሄንꬃንቻ። 10 ያቆብ ባረ አት እሻ ላባና ናቶ ራሄሎ በኤዳ ዎደነ፥ ባረ አት እሻ ላባና ዶርሳ በኤዳ ዎደ፥ ቢደ ኦላ ዶናፐ ሹቻ ጎንዶርሴዳ፤ ባረ አት እሻ ዶርሳቱዋ ሃꬃ ኡሼዳ። 11 ያቆብ ራሄሎ የሪደ፥ ናሸቻዉ ባረ ቃላ ꬎቂሲደ ዬኬዳ። 12 ያቆብ እዝዉ አዉዋ ዳቦነ ርብቅ ናኣ ግድያዋ ራሄልዉ ኦዴዳ። ሄዋ ድራዉ እዛ ዎጻ ባደ ባረ አዎ ኦዳዱ።

13 ላባን ባረ ምቻት ናኣ ያቆባ ዎርያ ስሴዳ ሳናካ፥ አናና ጋከታናዉ ዎጼዳ። አ እድም የሪደ፥ ባረ ሶ አፌዳ። ያን ያቆብ ሀኔዳዋ ኡባ ላባናዉ ኦዴዳ። 14 ላባን አ፥ “ኔን ቱሙ ታ አሾነ ታ ሱꬃ” ያጌዳ። ያቆብ አናና እት አግና ኩመንꬃ ኡቴዳ።

15 ሄዋፐ ጉየ ላባን አ፥ “ኔን ታዉ ዳቦ ግዴዳ ድራዉ፥ ታዉ ጮ መላ ኦꬃንዬ? አነ ነዉ አያ ጭጋናዉ በስንቶ ታዉ ኦዳ” ያጌዳ። 16 ላባናዉ ላኡ ማጫ ናናቱ ደኢኖ፤ ባይራት ሱንꬃይ ልዮ፥ ቴፋትዌ ራሄሎ። 17 ልያ አይፍያና ጩጫ፤ ሽን ራሄላ ጌሳንቻነ ማላ ሎአ።

18 ያቆብ ራሄሎ ሲቂደ አ፥ “ታን ነ ቴፋ ናት ራሄል ድራዉ ነዉ ላፑን ላይꬃ ኦꬃና” ያጌዳ።

19 ላባን፥ “እዞ ሀራ አሳዉ እማናፐ ነዉ እምያዌ ሎአ፤ ኔን ታናና ሀዋን ደአ” ያጌዳ። 20 ሄዋ ድራዉ ያቆብ ራሄሎ አካናዉ ላፑን ላይꬃ ኦꬄዳ፤ ሽን እ እዞ ሲቅያ ድራዉ፥ አዉ አማሬዳ ጋላሳ ማላቴዳ።

21 ሄዋፐ ጉየ ያቆብ ላባና፥ “ታ ማቻቶ ታዉ እማ፤ ታ ዎዲ ፖለቴዳ፤ ታን እዞ አካናዉ ኮያድ” ያጌዳ። 22 ሄዋ ድራዉ ላባን ሄዋን ደእያ አሳ ኡባ ጼሲደ፥ ቡላቻ ከሴዳ። 23 ሽን ሳአይ ቃምና፥ እ ባረ ናቶ ልዮ አፊደ ያቆባዉ እሜዳ። ያቆብ እዞ አኬዳ። 24 ቃይ ላባን ባረ ቆማቶ ዝልፖ ባረ ናት ልይዉ ዳንጋጽረ ግዳናዳን እሜዳ።

25 ሳአይ ዎንትና ጼልያ ዎደ፥ ሄኮ ልዮ! ያትና ያቆብ ላባና፥ “ሀዌ ኔን ታ ቦላ ኦꬄዳዌ አዬ? ታን ነዉ ኦꬄዳዌ ራሄል ድራሳ ግደኔየ? ታና አያዉ ጭማድ?” ያጌዳ።

26 ላባን አ፥ “ኑ ቢታን ባይራታ ደእሽን፥ ቴፋቶ አስናዉ እምያዌ ዎጋ ግደና። 27 ሄ ምሽራ ሳምንታ ዉርሳ፤ ቃይ ቴፋትያኖካ ኑን ነዉ እማና፤ ሄዋፐ ጉየ፥ ሀራ ላፑን ላይꬃ ታዉ ኦꬃሳ” ያጌዳ።

28 ያቆብ ሄዋዳን ሀኒደ ሄ ሳምንታ ዉርሴዳ፤ ሄዋፐ ጉየ፥ ላባን ባረ ናቶ ራሄሎ አዉ እሜዳ። 29 ቃይ ላባን ባረ ቆማቶ ባሎ ባረ ናት ራሄልዉ ዳንጋጽረ ግዳናዳን እሜዳ። 30 ያቆብ ራሄሎ አኬዳ። ራሄሎ ልይፐ አꬂደ ሲቄዳ። ሀራ ላፑን ላይꬃ ላባናዉ ኦꬄዳ።

31 መꬍና ጎዳይ ልያ ሲቀታቤናዋ በኢደ፥ እዝዉ የልያ ኡሉዋ ዶዬዳ፤ ሽን ራሄላ ማንꬃቶ። 32 ልያ ሻሃራደ አቱማ ናኣ የላዱ። አ ሱንꬃካ ሮቤላ *ሮቤላ፦ ሀ ሱንꬃ ብርሸꬃይ “ሀሹ! አቱማ ናኣ!” ዎይ “ታ መቱዋ በኤዳ” ግያዋ። ሱንꬃዱ፤ አያዉ ጎፐ እዛ፥ “መꬍና ጎዳይ ታ መቱዋ በኤዳ፤ ሀእ ቱሙ ታና ታ አስናይ ሲቃና” ያጋዱ።

33 እዛ ሀራካ ሻሃራደ አቱማ ናኣ የላዱ። እዛ፥ “መꬍና ጎዳይ ታን ሲቀታቤናዋ ስሴዳ ድራዉ፥ ታዉ ሀዋካ ጉጄዳ” ያጋደ፥ አ ስሞና †ስሞና፦ ሀ ሱንꬃ ብለꬃይ እብራዌꬁዋን፥ “ስሴዳ” ግያዋ። ሱንꬃዱ።

34 አ ሀራካ ሻሃራደ አቱማ ናኣ የላዱ። እዛ፥ “ታን አዉ ሄዙ አቱማ ናና የሌዳ ድራዉ፥ ታ አስናይ ሀእ ታናና ዋጸታና” ያጋደ፥ አ ሌዊ ‡ሌዊ፦ ሀ ሱንꬃ ብለꬃይ እብራዌꬁዋን፥ “ዋጸታና” ግያዋ። ሱንꬃዱ።

35 አ ሀራካ ሻሃራደ አቱማ ናኣ የላዱ። እዛ፥ “ሀችዋን ታን መꬍና ጎዳ ጋላታና” ያጋዱ። ሄዋ ድራዉ አ ይሁዳ §ይሁዳ፦ ሀ ሱንꬃ ብለꬃይ እብራዌꬁዋን፥ “ጋላታ” ግያዋ። ሱንꬃዱ። ሄዋፐ ጉየ የሉዋ ኤሳዱ።