ጌሻ ማጻፋ ዶመꬃ 30

1 ራሄላ ያቆባዉ ናና የላቤናዋ በኤዳ ዎደ፥ ባረ ምቻቶ ቃናታዱ፤ ሄዋ ድራዉ ያቆባ፥ “ታዉ ናና እማ፤ ሄዌ ꬋዮፐ፥ ታን ሀይቃና” ያጋዱ።

2 ያቆብ ራሄሎ ሀንቀቲደ፥ “ታና ነዉ የሉዋ ድጌዳ ጾሳ ጋድየ?” ያጌዳ።

3 እዛ፥ “ታ ዳንጋጽራቶ ባሎ ህኖ በአ፤ እዛ ታ ድራዉ የላና ማላ ኔን እዞ አካ፤ ያቶፐ እዝ ባጋና ታንካ ናኣ ዳዮ ግዳና” ያጋዱ። 4 ባረ ዳንጋጽራቶ ባሎ ማቻቶ ኦꬂደ አካና ማላ፥ አዉ እማዱ፤ ያቆብ እዞ አኬዳ። 5 ባላ ሻሃራደ አቱማ ናኣ ያቆባዉ የላዱ። 6 ያትና ራሄላ፥ “ጾሳይ ታዉ ዳናቴዳ፤ ታ ዎሳካ ስሲደ፥ ታዉ አቱማ ናኣ እሜዳ” ያጋዱ። ሄዋ ድራዉ አ ዳና * ሱንꬃዱ።

7 ራሄል ዳንጋጽራታ ባላ ሀራ ሻሃራደ፥ ያቆባዉ ላኤንꬁዋ አቱማ ናኣ የላዱ። 8 ራሄላ፥ “ታን ታ ምቻትና ዎልቃማ ባጽያ ባጸታደ ጾናድ” ያጋዱ። ሄዋ ድራዉ አ ንፍታሌማ † ሱንꬃዱ።

9 ልያ ባረዉ የሉ ኤቄዳዋ በኣደ፥ ባረ ዳንጋጽራቶ ዝልፖ አፋደ ያቆብ እዞ አካና ማላ እማዱ። 10 ልያ ዳንጋጽራታ ዝልፓ አቱማ ናኣ ያቆባዉ የላዱ። 11 ልያ፥ “ላ ሀዌ አያ ሎኦ ካጬ!” ያጋዱ። ሄዋ ድራዉ ጋዳ ‡ ሱንꬃዱ።

12 ልያ ዳንጋጽራታ ዝልፓ ያቆባዉ ላኤንꬁዋ አቱማ ናኣ የላዱ። 13 ልያ፥ “ታን አይ ኬሻ ናሸታይታሻ! ማጫ አሳይ ታና ናሸትያኖ ጋና” ያጋዱ። ሄዋ ድራዉ አ አሴራ § ሱንꬃዱ።

14 ዛርጋ ጫክያ አግናን ሮቤል ጋደ ቢደ፥ እንኮይያ ግያ ትማትምያ ማላትያ ቴራ ደሚደ፥ ባረ አት ልይዉ አሄዳ። ራሄላ ልዮ፥ “ነ ናኣ እንኮይያፐ ታዉ እማ” ያጋዱ።

15 ሽን ልያ፥ “ታ አስና ኔን ዎꬃ አኬዳዌ ግደናን እጽና፥ ቃይ ታ ናኣ እንኮይያ * አካይ?” ያጋዱ።

ራሄላ፥ “ያቶፐ፥ ነ ናኣ እንኮይያ ድራዉ ያቆብ ሀቼ ቃማ ኔናና አቆ” ያጋዱ።

16 ሄ ጋላሳ ኦማርስ ያቆብ ዎራፐ ዬዳ ዎደ፥ ልያ አ ሞካናዉ ከሳደ አ፥ “ኔን ታናና አቃና ኮሼ፤ አያዉ ጎፐ፥ ታን ታ ናኣ እንኮይያን ኔና ከራዉ አካ ድጋድ” ያጋዱ። ሄዋ ድራዉ እ ሄ ጋላሳ ቃማ እዝና አቄዳ።

17 ጾሳይ ልያ ዎሳ ስሴዳ፤ እዛ ሻሃራደ፥ እቼሻንꬃ አቱማ ናኣ ያቆባዉ የላዱ። 18 ልያ፥ “ታን ታ ዳንጋጽራቶ ታ አስናዉ እሜዳ ድራዉ፥ ጾሳይ ሄዋ ከራ ታዉ ጭጌዳ” ያጋዱ። ሄዋ ድራዉ አ ይሳኮራ † ጋደ ሱንꬃዱ። 19 ልያ ሀራካ ሻሃራደ፥ ኡሱፑንꬃ አቱማ ናኣ ያቆባዉ የላዱ። 20 ልያ፥ “ጾሳይ ታዉ አልኦ እሞታ እሜዳ፤ ታን ታ አስናዉ ኡሱፑን ናና የሌዳ ድራዉ፥ ሀእ እ ታና ቦንቻናዋ” ያጋዱ። ሄዋ ድራዉ አ ዛብሎና ‡ ሱንꬃዱ። 21 ሄዋፐ ጉየ እት ማጫ ናቶ የላዱ፤ እዞ ዲኖ ሱንꬃዱ።

22 ጾሳይ ራሄሎ ሀሳዬዳ፤ እዝ ዎሳ ስሲደ እዝ የልያ ኡሉዋ ዶዬዳ። 23 እዛ ሻሃራደ አቱማ ናኣ የላዱ፤ “ጾሳይ ታ ዬላ ቃሬዳ። 24 መꬍና ጎዳይ ታዉ ሀራ አቱማ ናኣካ ጉጄረኔሻ” ያጋዱ። ሄዋ ድራዉ አ ዮሴፎ § ሱንꬃዱ።

ያቆብ ላባና ድርጉዋን ፓሉመቴዳ

25 ራሄላ ዮሴፋ የሌዳዋፐ ጉየ፥ ያቆብ ላባና፥ “ታን ታ አዉዋ ጋድያ ስማና ማላ፥ ታና ሞይዛ። 26 ታን ኡንቱንቱ ድራዉ ነዉ ኦꬄዳ ታ ማቻቱዋነ ታ ናና ሀማ፤ ታን ባና፤ አያዉ ጎፐ፥ ታን ነዉ አይ ኬሻ ኦሱዋ ኦꬄደንቶ ኔን ኤራሳ” ያጌዳ።

27 ሽን ላባን አ፥ “ታን ነዉ እትባ ኦዳይ፤ መꬍና ጎዳይ ነ ጋሱዋን ታና አንጄዳዋ ታን በኣድ። 28 ነ ድርጉዋ ታዉ ኦዳ፤ ታን ነዉ ጭጋና” ያጌዳ።

29 ያቆብ፥ “ታን ነዉ ዋታ ኦꬄደንቶ፥ ነ መሂካ ዋን የለቴደንቶ ኔን ኤራሳ። 30 ታን ያናፐ ካሰ ነዉ ደእያ ጉꬃይ ሀእ ሎይꬅ ዳሬዳ፤ መꬍና ጎዳይ ኔና ታን አꬌዳ ሳኣን ኡባን አንጄዳ። ሽን ሀእ፥ ታን ታ ሶ አሳዉ ኦꬃናዌ አዉዴ?” ያጌዳ።

31 ላባን፥ “ታን ነዉ አያ እሞ?” ያጊደ አ ኦቼዳ።

ያቆብ፥ “ታዉ አይነ እሞፓ፤ ሽን ኔን ታዉ እትባ ኦꬆፐ፥ ታን ነ ዉድያ ቃይካ ሄማናነ ናጋና። 32 ታን ሀቼ ነ ዉድያ ኡባ ግዱዋና አꬋና፤ ሄዋን ነ ዶርሳፐ ፑንጫርያ ዎይ ጋዛ ኡባ፥ ካረꬃ ዶርሳ ማራ ኡባነ ዴሻፐ ጋዛነ ፑንጫርያ ኡባ ታን ሻካና፤ ኡንቱንቱ ታ ድርጉዋ ግዳና። 33 ሄዋ ድራዉ ታ ጽሎተꬃይ ኔን ታዉ ጭጌዳ ድርጉዋ ፓይዳናዉ ስንꬃፐ ይያ ዎደ፥ ታዉ ማርካታና፤ ታ ዴሻፐ ጋዛ ዎይ ፑንጫረ ግደናዌ ዎይ ካረꬃ ግደና አይ ዶርሳ ማራይነ ታ ማታን ቤትንቶ፥ ዉኤቴዳዋዳን ፓይደታና” ያጌዳ።

34 ላብ፥ “ማያድ፤ ኔን ጌዳዋዳን ግዶ” ያጌዳ። 35 ሽን ሄ ጋላሳን ላብ ዳንጫ ዎይ ጋዛ ግዴዳ አቱማ ዴሻ ኡባ፥ ፑንጫረ ዎይ ጋዛ ግዴዳ ማጫ ዴሻ ኡባ፥ ቦꬃ ግዴዳ ኡባነ ካረꬃ ዶርሳ ማራ ኡባ ከሲደ፥ ባረ አቱማ ናና ሄንꬄዳ። 36 ያቲደ ሄ ዉድያና ሄዙ ጋላሳ ኦግያ ያቆባፐ ሃኪደ ቤዳ። ሽን ያቆብ አቴዳ ላባና ዉድያ ሄሜዳ።

37 ያቆብ ዴሻ ሎምያፐ፥ ጉማርያፐነ ጻንቃርሳፐ ቃየ ጋትማ ከሲደ፥ ፖቁዋ ፖቂ ፖቂደ፥ ግዶ ቦꬃ ባጋ ቃሪደ ጋዛዬዳ። 38 ዉዲ ሃꬃ ኡሻናዉ ይያ ሳኣ ኡባን፥ ዎንግርያን፥ ዉድያ ስንꬃን ፖቄዳ ጋትማቱዋ ዎꬄዳ። ካሆዋንቱ ሃꬃ ኡሻናዉ ዪደ፥ 39 ሄ ጋትማቱዋ ስንꬃን ብራሴድኖ፤ ኡንቱንቱ ዳንጫ፥ ፑንጫረነ ጋዛ ማራቱዋ የሌድኖ። 40 ያቆብ ማራቱዋ ዉድያፐ ሻክ ዱማ ዎꬄዳ፤ አቴዳ ዉድያ ዳንጫነ ካረꬃ ግዴዳ ላባና መህያ ስንꬃ ዛሬዳ። ያቲደ ባረዉ ዉድያ ዱማዬዳ፤ ላባና መሄቱዋና ኡንቱንታ ጋꬅቤና።

41 ፓጻነ ምኖ ማጫዋንቱ ካህያ ዎደ አዉደነ፥ ኡንቱንቱ ሄ ጋትማቱዋ ማታን ብራሳና ማላ፥ ያቆብ ሄ ጋትማቱዋ ሃꬃ ዎንግርያን፥ ሚዛቱዋ ስንꬃን ዎꬄ። 42 ሽን መሄቱ ላፋ ግዶፐ፥ ኡንቱንቱ ስንꬃን ጋትማቱዋ ዎና። ሄዋ ድራዉ ላፍያ መሄቱ ላባዋ ግድና፥ ዳርያዋንቱ ያቆባዋ ግዴድኖ። 43 ሀዋዳን ሀኒደ፥ ያቆብ ሎይꬅ ዱረቲደ፥ ዳሮ ዉድያ፥ ማጫ ቆማቱዋነ አቱማ ቆማቱዋ፥ ዳሮ ጋሎቱዋነ ሀረቱዋ ሞዴዳ።

*30:6 ዳና፦ ሀ ሱንꬃ ብለꬃይ እብራዌꬁዋን፥ “ጾሳይ ታዉ ዳናቴዳ” ግያዋ።

†30:8 ንፍታሌማ፦ ሀ ሱንꬃ ብለꬃይ እብራዌꬁዋን፥ “ባጽያ” ግያዋ።

‡30:11 ጋዳ፦ ሀ ሱንꬃ ብለꬃይ እብራዌꬁዋን፥ “ሎኦ ካጫ” ግያዋ።

§30:13 አሴራ፦ ሀ ሱንꬃ ብለꬃይ እብራዌꬁዋን፥ “ናሸቻ” ግያዋ።

*30:15 እንኮይያ፦ የሉዋነ ሲቁዋ እሜ ጊደ ቆፈትያ ምꬃ።

†30:18 ይሳኮራ፦ ሀ ሱንꬃ ብለꬃይ እብራዌꬁዋን፥ “ከራ ታዉ ጭጌዳ” ግያዋ።

‡30:20 ዛብሎና፦ ሀ ሱንꬃ ብለꬃይ እብራዌꬁዋን፥ “ቦንቹዋ” ግያዋ።

§30:24 ዮሴፎ፦ ሀ ሱንꬃ ብለꬃይ እብራዌꬁዋን፥ “ጉጆ” ዎይ “ቃሬዳ” ግያዋ።