1 ልያ ያቆባዉ የሌዳ ናታ ዋና፥ ሄ ዎደ ሄ ጋድያ ማጫዋንታ በአናዉ ከሳዱ። 2 ሄ ጋድያ ሞድያ ህውያ ሀሞራ ናኣ ሸኬመ እዞ በኢደ፥ እዞ ሆር አፊደ ባይዜዳ። 3 አ ዎዛናይ ያቆባ ናቶ ዲኖ አሞቴዳ፤ እ እዞ ሲቄዳ፤ እዝዉ ሎእያዋ ሃሳዬዳ። 4 ሸኬመ ባረ አዉዋ ሀሞራ፥ “ታዉ ሀ ናቶ ማቼተꬃዉ ኦቻርክ” ያጌዳ።

5 ያቆብ ባረ ናታ ዳና ባዬዳዋ ስስያ ዎደ፥ አ አቱማ ናናይ ዎራን መህያና ደእኖ፤ ሄዋ ድራዉ ኡንቱንቱ ጋካናዉ ጮኡ ጌዳ።

6 ሄዋፐ ጉየ፥ ሸኬማ አዉዋ ሀሞር ያቆባና ሃሳያናዉ ዬዳ። 7 ያቆባ አቱማ ናናይ ሄዋ ስሴዳ ሳና ዎራፐ ዬድኖ፤ ኡንቱንቱ ካዮቴድኖነ ሀንቀቴድኖ፤ አያዉ ጎፐ፥ ሸኬመ ያቆባ ናቶ ሆር አፊደ ባይዝያዋ፥ እስራኤልያ ቦላ ፖኮባ፥ ኦꬃናዉ በሰናባ ኦꬄዳ።

8 ሽን ሀሞር ኡንቱንታ፥ “ታ ናአይ ሸኬመ ህንተንቱ ናትዉ ዳርስ ዳጋሜዳ፤ ሀያና እዞ አዉ ማቼተꬃዉ እሜርክቴ! 9 ኑናና አከትተነ ገለትተ፤ ህንተንቱ ማጫ ናና ኑዉ እምተ፤ ኑ ማጫ ናናነ ህንተንቶ አክተ። 10 ህንተንቱ ኑ ግዶን ኡታናዉ ዳንዳዪታ፤ ቢታይ ሎይꬅ አካ፤ አን ደእተ፤ ዛልእተ፤ አን ማጹዋ ደምተ” ያጌዳ።

11 ሄ ዎደ ሸኬመ ዲን አዉዋነ እ እሻቱዋ፥ “ታን ህንተንቱ ስንꬃን ናሸቶፐ፥ ህንተንቱ ኦችያዋ አያ ግዶፐነ እማና። 12 ህንተንቱ ምሽራ ናትዉ እምያዋነ ጭሎሻ ህንተንቱ ኮዮዋ ኬሻ ዳርሲደ ታና ኦችተ፤ ታን ህንተንቱ ታና ኦቼዳዋ አያነ እማና፤ ሽን ታን አካናዳን ናቶ ታዉ እሜርክቴ!” ያጌዳ።

13 ባረንቱ ምቻቶ ዲኖ ሸኬመ ቱንሴዳ ድራዉ፥ ያቆባ አቱማ ናናይ ሸኬማዉነ አ አዉዋ ሀሞራዉ ዎርዱዋ ኦዴድኖ፤ 14 ኡንቱንታ ሀዋዳን ያጌድኖ፤ “ኑን ሄዋ ማላ ኦꬃና ዳንዳዮኮ፤ ኑን ኑ ምቻቶ ቃጻረትቤና አሳዉ እሞኮ፤ ሄዌ ኑና ካዉሽያዋ። 15 ኑን ህንተንቱ እትባ ኦꬆፐ ህንተንቶ፥ ‘ኤኖ’ ጋና፤ ሄዌ አዬ ጎፐ፥ ህንተንቱ ጋድያ አቱማ አሳይ ኡባይ ቃጻረቲደ ኑናዳን ሀኖፐ፥ 16 ኑን ኑ ማጫ ናና ህንተንቶ እማናዉ ‘ኤኖ’ ጋና፤ ህንተንቱ ማጫ ናናካ ኑዉ አካና። ኑን ህንተንቱ ግዶን ኡቲደ፥ ህንተናና እት አሳ ግዳና። 17 ሽን ህንተንቱ ቃጻረታናዉ ኤኖ ጌናዋ ግዶፐ፥ ኑን ኑ ምቻቶ አኪደ ባና” ያጌድኖ።

18 ኡንቱንቱ ጌዳዌ ሀሞራዉነ አ ናኣ ሸኬማዉ ሎአ ማላቴዳ። 19 ሄ ዎዳላይ፥ ባረ አዉዋ ጎለን ደእያ ኡባፐ አꬍ ቦንቼቴዳዌ፥ ያቆባ ናትን ናሸቴዳ ድራዉ፥ ኡንቱንቱ ጌዳዋ ኦꬃናዉ ጋምእቤና። 20 ሄ ዎደ ሀሞርነ አ ናአይ ሸኬመ ባረንቱ ካታማ ጉታራ ቢደ፥ ባረንቱ ካታማ አሳዉ ሀዋዳን ያጊደ ኦዴድኖ፤ 21 “ሀ አሳቱ ኑናና ስጋ፤ ኡንቱንቱ ኑ ቢታን ደኢኖነ ዛልኢኖ፤ ቢታይ ሎይꬅ አካ። ኡንቱንቱ ማጫ ናናካ ኑን አካና፤ ኡንቱንቱካ ኑ ማጫ ናና አካና። 22 ሽን ኑናና ኡንቱንቱ እት አሳዳን ደአናዉ ኑን እትባ ማየታናዉ ኮሼ፤ ሄዌነ፥ ኡንቱንቱ ቃጻረቴዳዋዳን ኑ አቱማ አሳይ ኡባይ ቃጻረታናዋ። 23 ኑን ሄዋዳን ኦꬆፐ፥ ኡንቱንቱ ሚዛይ፥ ኡንቱንቱ ማጹነ ኡንቱንቱ ሀራ መሂ ኡባይ ኑዋ ግደኔ? ሄዋ ድራዉ አነ ኑን ኡንቱንቱ ግያዋ ኤኖ ጎይተ፤ ኡንቱንቱካ ኑ ግዶን ደአና” ያጌድኖ።

24 ካታማ ጉታራ ሺቄዳ አሳቱ ኡባይ ሀሞራዉነ አ ናኣ ሸኬማዉ፥ “ኤኖ” ጌድኖ። ያትና ሄ ካታማ አቱማ አሳቱ ኡባይ ቃጻረቴድኖ።

25 ሄዘንꬆ ጋላስ፥ ኡንቱንቱ ኡባይ ባረንቱ ቃጻራ ማዱꬃን ሳከት ደእሽን፥ ያቆባ አቱማ ናናቱዋፐ ላኡ፥ ስሞንነ ሌዊ፥ ዲን እሻቱ፥ ባረንቱ ማሻ አኪደ፥ ኦንነ ኤረናን ካታማ ገሊደ፥ አቱማ አሳቱዋ ኡባ ዎꬌድኖ። 26 ሀሞራነ አ ናኣ ሸኬማ ማሻን ዎꬊደ፥ ባረንቱ ምቻቶ ዲኖ ሸኬማ ጎልያፐ አኪደ አፌድኖ። 27 ያቆባ አቱማ ናናይ ሄ አሃቱዋ ቦላ ገሊደ፥ ባረንቱ ምቻቶ ዲኖ ቱንሴዳ ካታማ ቦንቄድኖ። 28 ኡንቱንቱ ዶርሳ ዉድያ፥ ሚዛ ዉድያ፥ ሀርያ፥ ካታማ ግዶን ደእያዋነ ጋጻን ደእያዋ ኡባ አኬድኖ። 29 ኡንቱንቱ ማጹዋ ኡባ፥ ኡንቱንቱ ናና ኡባነ ማቻቱዋ ኡባ ኦሞዴድኖ፤ ጎለን ደኤዳዋ ኡባ ቦንቄድኖ።

30 ያቆብ ስሞናነ ሌዊያ፥ “ህንተንቱ ታ ቦላ መቱዋ አህ ክቼድታ፤ ሀ ጋድያን ደእያ ካናናቱነ ፓርዘቱ ታና እጻናዋንታ፤ ኑን ፓይዱዋን ጉꬃ፤ ኡንቱንቱ እትፐ ግዲደ ታ ቦላ ደንዶፐ፥ ታንነ ታ ሶ አሳይ ꬋያና” ያጌዳ።

31 ሽን ኡንቱንቱ፥ “ያትና እ ኑ ምቻቶ ሻርሙጻዳን ኦꬃና በሲ?” ያጌድኖ።