1 ያቆብ ꬎቁ ግ ጼሊደ፥ ኤሳይ ባረ ኦይዱ ጼቱ አሳና ይያዋ በኤዳ። ሄዋ ድራዉ ናና ልይዉ፥ ራሄልዉነ ላኡ ቆማቱዋኮ ሻኬዳ። 2 ቆማቱዋነ ኡንቱንቱ ናና ስንꬃን፥ ልዮነ እ ናና ኡንቱንቱ ጌዱዋን፥ ራሄሎነ ዮሴፋ ዉርሰꬃን ዎꬄዳ። 3 ሽን እ ባረ ሁጲያዉ ስንꬃዉ አꬊደ፥ ባረ እሻኮ ማቲደ፥ ሳኣ ጋክ ጋኪደ ላፑን ካላ ጎይኔዳ።

4 ሽን ኤሳይ አናና ጋከታናዉ ዎጺደ፥ አ ቆꬍያ ቆም የሬዳ። ኡንቱንቱ ዬኬድኖ። 5 ያትና ኤሳይ ꬎቁ ግ ጼሊደ፥ ማቻቱዋነ ናና በኤዳ፤ እ፥ “ሀ ኔናና ደእያዋንቱ ኦኔ?” ያጊደ ኦቼዳ።

ያቆብ፥ “ኡንቱንቱ ጾሳይ ነ ቆማዉ ኬካተꬃን እሜዳ ናና” ያጌዳ። 6 ቆማቱ ባረንቱ ናናቱዋና ሺቂደ ጎይኔድኖ። 7 ሄዋፐ ጉየ፥ ልያነ እዝ ናናይ ዪደ ጎይኔድኖ፤ ዉርሰꬃን ዮሴፎነ ራሄላ ዪደ ጎይኔድኖ።

8 ኤሳይ፥ “ሀ ስንꬃን ታናና ጋከቴዳ ዉዲ ኡባይ ቃይ አዬ?” ያጊደ ኦቼዳ።

እ፥ “ታ ጎዳዉ፥ ሄዌ ታን ነ ስንꬃን ናሸታናሳ” ያጌዳ።

9 ሽን ኤሳይ፥ “ታ እሻዉ፥ ታዉ ዳሮባይ ደኤ፤ ነዌ ኔሳ ግዶ” ያጌዳ።

10 ያቆብ፥ “ቱይት፥ ሀእ ታን ነ ስንꬃን ናሸቴዳዋ ግዶፐ፥ ሀ ታን እምያዋ ታፐ አካ። ኔን ታና ሞካ አኬዳ ድራዉ፥ ታን ነ ዴሙዋ በእያዌ ጾሳ ዴሙዋ በእያዋ ማላ። 11 ታን ነዉ አሄዳ ሀ እሙዋ አካ፤ አያዉ ጎፐ፥ ጾሳይ ኬኪደ እምና፥ ታዉ በሴዳ” ያጌዳ። ያቆብ ሾብያ ቶሌዳ ድራዉ፥ ኤሳይ ሄዋ አኬዳ።

12 ሄዋፐ ጉየ ኤሳይ፥ “አነ ደንዳ፤ ኑ ኦግያ ቦይተ፤ ታን ኔናና እትፐ ባና” ያጌዳ።

13 ሽን ያቆብ አ፥ “ታ ጎዳዉ፥ ናናይ ሹጋ ግድያዋ ኤራሳ፤ ቃይ ታን ባረንቱ ጋሎ ማራቱዋ ꬋንꬅያ ዶርሳቱዋነ ሚዛ ናጋና ኮሼ፤ አሳይ ኡንቱንቱ እት ጋላሳ ድርቢስ ላጎፐ፥ መህያ ኡባይ ሀይቃና። 14 ሄዋ ድራዉ፥ ታ ጎዳዉ፥ ነ ቆማፐ ስንꬃታደ ባ፤ ታን ሰኢራን ታ ጎዳ ጋካናዉ፥ ታ ስንꬃን ደእያ መህያ ሄመታ ኬናነ ናና ሄመታ ኬና ሎዳን ካላና” ያጌዳ።

15 ኤሳይ አ፥ “ያቶፐ ታን ታ አሳፐ አማሬዳዋ ነዉ አሻይ” ያጌዳ።

ሽን ያቆብ አ፥ “ሄዌ አይሴ? ታን ታ ጎዳ ስንꬃን ናሸትያዌ ታዉ ግዳና” ያጌዳ።

16 ሄዋ ድራዉ ኤሳይ ሄ ጋላስ ኦግያን ገሊደ፥ ሰኢራ ስሜዳ። 17 ሽን ያቆብ ሱኮታ ቤዳ፤ ያን ባረዉ ጎልያ ኬጼዳ፤ ባረ መሄቶካ ዳስያ ዳሴዳ። ሄዋ ድራዉ ሄ ሳኣ ሱኮታ *ሱኮታ፦ ሀ ሱንꬃ ብለꬃይ እብራዌꬁዋን፥ “ዳስያ” ግያዋ። ጊደ ሱንꬄዳ።

18 ያቆብ ማስጰጾምያፐ ስሜዳ ዎደ፥ ካናነ ቢታን ደእያ ሰኬመ ግያ ካታማ ሳሮተꬃን ጋኬዳ፤ እ ሄ ካታማዉ ባዙዋን ኡቴዳ። 19 ባረ ዱንካንያ ꬎጌዳ ጋድያ ሸኬማ አዉዋ ሀሞራ ናናቱዋፐ ጼቱ ጻጋራ ብራን ሻሜዳ። ኢያሳ 24:32፤ ዮሃ. 4:5 20 ያን ያርሽያ ሳኣ ኬጺደ አ፥ “ጾሳ፥ እስራኤልያ ጾሳ” ጊደ ሱንꬄዳ።