1 ያቆብ ባረ አዉ ደኤዳ ካናነ ቢታን ኡቴዳ።

2 ያቆባ ናናይ ሀኔዳባይ ሀዋፐ ካሊደ ጻፈቴዳዋ።

ዮሴፎ ታማነ ላፑን ላይꬃ ናኣ ግዴዳ ዎደ፥ ባረ አዎ ሀራ ማቼቱዋፐ፥ ባልፐነ ዝልፕፐ የለቴዳ ባረ እሻቱዋና ዉድያ ሄመ። ሄ ዎደ እ ባረ አዎ ኡንቱንቱ ኦꬄዳ ኢታባ ኦዴዳ።

3 እስራኤሊ ዮሴፋ ጭሚደ የሌዳ ድራዉ፥ ባረ ሀራ አቱማ ናና ኡባፐ አꬂደ ሲቄ። እ አዉ አሌቄዳ ማዩዋ ጊግሴዳ። 4 አ እሻቱ ባረንቱ አዉ አ ኡንቱንቱፐ አꬂደ ሲቅያዋ በኤዳ ዎደ፥ ኡንቱንቱ አ እጺደ፥ ሎኦ ቃላ አዉ ሃሳያናዉ ዳንዳይበይክኖ።

5 ዮሴፎ አኩሙዋ አኩመቲደ፥ ባረ እሻቶ ኦዴዳ፤ ኡንቱንቱ አ ያ ዳርሲደ እጼድኖ። 6 እ ኡንቱንታ፥ “ታን አኩመቴዳ አኩሙዋ ስስተ። 7 ኑን ጋደን ፖችያ ቃችሽን፥ ታ ምርቂ እት ኩꬃን ደንዲደ ስት ግ ኤቂሽና፥ ህንተንቱ ምርቀቱ ዩይ አꬊደ ታ ምርቂያዉ ጎይኔድኖ” ያጌዳ።

8 አ እሻቱ አ፥ “ኔን ኑ ቦላን ካተታና ሀናይዬ? ዎይ ኑና ቱሙ ሞዳና ሀናይዬ?” ያጌድኖ። ኡንቱንቱ አ አኩሙዋ ድራዉነ አ ኦዱዋ ድራዉ፥ ያ ዳርሲደ እጼድኖ።

9 ቃይ ዮሴፎ ሀራ አኩሙዋ አኩመቲደ፥ ባረ እሻቶ ኦዴዳ፤ “ስስተ፤ ታን ሀራ አኩሙዋካ አኩመታድ። ሄ አኩሙዋን አዋይ፥ አግናይነ ታማነ እት ጾልንተቱ ታዉ ጎይኒኖ” ያጌዳ።

10 ባረ አዎነ ባረ እሻቶ ሄ አኩሙዋ ኦዴዳ ዎደ፥ አ አዉ አ፥ “ሀዌ ኔን አኩመቴዳዌ አያ አኩሜ? ቱሙ ታን፥ ነ ዳያነ ነ እሻቱ ዪደ፥ ነ ስንꬃን ሳኣን ጉፋኒደ ነዉ ጎይናነየ?” ያጊደ ሴሬዳ። 11 አ እሻቱ አ ቃናቴድኖ፤ ሽን አ አዉ ሀ የዉዋ ባረ ዎዛናን ዎꬄዳ።ኪታ 7:9

12 እት ጋላስ አ እሻቱ ሰኬማ ማታን ባረንቱ አዉዋ ዶርሳ ሄማናዉ ቤድኖ። 13 እስራኤሊ ዮሴፋ፥ “ነ እሻቱ ሰኬማን ዉድያ ሄምያዋ ኤራሳ። ሃያ፤ ታን ኔና ኡንቱንቱኮ ኪታና” ያጌዳ።

ዮሴፎ፥ “ኤኖ” ያጌዳ።

14 እ አ፥ “ባ፤ ነ እሻቱዋነ ዉዲ ሳራ ግድያዋ በአ፤ ኡንቱንቱባ ታዉ ኦዳሳ” ያጌዳ። አ ከብሮና ድልባፐ ኪቴዳ።

እ ሰኬማ ቤዳ። 15 ያን ደምባ ግዶን ያ ሃ ስመረትሽን፥ እት አሳይ አ ደሚደ፥ “ላ አያ ኮያይ?” ያጊደ ኦቼዳ።

16 እ፥ “ታ እሻቱዋ ኮያይ፤ ኡንቱንቱ ዉድያ ሄምያ ሳአይ ሀቃነንቶ ሀያና ታዉ ኦዳርኪ!” ያጌዳ።

17 ብታኒ፥ “ሀዋፐ ደንድ ክቼድኖ፤ ኡንቱንቱ፥ ‘ኑን ዶታና በቶ’ ጊሽን ስሳድ” ያጌዳ። ሄዋ ድራዉ፥ ዮሴፎ ባረ እሻቱዋ ጌዱዋ ቢደ፥ ኡንቱንታ ዶታናን ደሜዳ።

18 ሽን እ ሃኩዋን ደእሽን፥ ኡንቱንቱ አ በኤድኖ፤ እ ኡንቱንቱኮ ጋከናን ደእሽን፥ ኡንቱንቱ አ ዎꬋናዉ አ ቦላ ማቀቴድኖ። 19 እቱ እቱዋ፥ “በእተ! አኩሙዋው የ። 20 ሃይተ፤ አ ዎꬊደ፥ ሀ ኦላቱዋፐ እቱዋ ግዶ የጎይተ። ሄዋፐ ጉየ፥ ‘ኢታ ዶአይ አ ሜዳ’ ያጋና፤ ያቲደ አ አኩሙ አህያዋ በአና” ያጌድኖ።

21 ሮቤል ሄዋ ስሴዳ ዎደ፥ ኡንቱንቱ ኩሽያፐ አ አሻናዉ ኮዪደ፥ “አ ዎናን አጎይተ። 22 ሱꬃ ጉሶፕተ፤ አ ህንተንቱ ዎራን ደእያ ሀ ኦላ ግዶ ኦልተ፤ አ ቦላ ኩሽያ ዎꬆፕተ” ያጌዳ። ሮቤል ሀዋ አ ኡንቱንቱፐ አሺደ ጉየ አ አዉዋኮ የዳናዉ ጌዳ።

23 ዮሴፎ ባረ እሻቱዋኮ ጋኬዳ ዎደ፥ እ ማዬዳ አሌቄዳ ማዩዋ አፐ ቃር አኬድኖ፤ 24 አ አፊደ ሃꬃይ ባይና መላ ኦላን የጌድኖ።

25 ኡንቱንቱ ባረንቱ ቁማ ማናዉ ኡት ደእሽን፥ እስማኤላ አሳቱ ግብጼ ባናዉ ጋላኣደፐ ይያዋንታ ꬎቁ ጊደ በኤድኖ፤ ኡንቱንቱ ባረንቱ ጋሉዋን ሳዉዋ፥ ባላሳነ ግያ ꬋልያነ ካርቢያ ጫን ዎꬄድኖ።

26 ይሁዳይ ባረ እሻቱዋ፥ “ኑን ኑ እሻ ዎꬊደ አ ሱꬃ ቆስያዋ ግዶፐ ኑና አያ ጎኢ? 27 ሃይተ፤ አ እስማኤላቶ ዛልኦይተ፤ አ ቦላ ኑ ኩሽያ ዎꬆኮ፤ አያዉ ጎፐ፥ እ ኑ እሻ፥ ኑ አሹዋ” ያጌዳ። አ እሻቱ ማየቴድኖ። 28 ሄዋ ድራዉ ምድያማ ቢታ ዛልአንቻቱ ሄዋና አꬍሽን፥ አ እሻቱ ዮሴፋ ኦላፐ ከሲደ፥ እስማኤላ አሳቶ ላታሙ ጻጋራ ብራን ዛልኤድኖ። ኡንቱንቱ ዮሴፋ ግብጼ ጋድያ አፌድኖ። ኪታ 7:9

29 ሮቤል ኦላኮ ስሚደ፥ ዮሴፎ ያን ባይናዋ በኤዳ ዎደ፥ ካዮቲደ ባረ ማዩዋ ፖሼዳ። 30 እ ጉየ ባረ እሻቱዋኮ ቢደ፥ “ናአይ ያን ባዋ፤ ሀእ ታን ሀቃ ቦሻ!” ያጌዳ።

31 ሄዋፐ ጉየ ኡንቱንቱ ዮሴፎ ማዩዋ አኪደ፥ ዴሻ ኦርግያ ሹኪደ፥ ሄ ሱꬃን ናቄድኖ። 32 አሌቄዳ አ ማዩዋ ባረንቱ አዉዋኮ አፊደ አ፥ “ኑን ሀዋ ደሜዶ፤ ሀዌ ነ ናኣ ማየንቶነ አነ ጼላ” ያጌድኖ።

33 ማዩዋ እ ኤሪደ፥ “ሀዌ ታ ናኣ ማዩዋ! ዎራ ዶአይ አ ም ድጌዳ። ዮሴፎ ቱሙካ ዱጸረት ክቼዳ” ያጌዳ።

34 ያቆብ ካዮቲደ፥ ባረ ማዩዋ ፔꬌዳ፤ ባረ ጼሳን ዋሩዋ ዳንጪደ፥ ባረ ናአዉ ዳሮ ጋላሳ ዬኬዳ። 35 አ አቱማ ናናይነ ማጫ ናናይ ኡባይ አ ምንꬃናዉ ዬድኖ፤ ሽን እ ምነናን እጺደ፥ “ቱይት፥ ታን ዬካደ ታ ናኣኮ ባደ፥ ዱፉዋን ገላና” ያጊደ፥ አ አዉ አዉ ዬኬዳ።

36 ሄ ዎደ ሚድያማ ቢታ አሳቱ ዮሴፋ ግብጼ ካትያ ኦሳንቻ ጶጽፋራዉ ግብጼን ዛልኤድኖ፤ እ ናግያዋንቱ ካፑዋ።