1 ሄ ዎደ ይሁዳይ ባረ እሻቱዋፐ ሻከቲደ፥ አዱላማ ግያ ካታማን ደእያ ሂራ ግያ ብታንያና ደአናዉ ቤዳ። 2 ያን ይሁዳይ ሹአ ግያ ካናነ ናትና ጋከቴዳ፤ እ እዞ አኬዳ። 3 እዛ አዉ ሻሃራደ አቱማ ናኣ የላዱ፤ አ ኤራ ሱንꬃዱ። 4 ቃይካ ሻሃሮ ዎደ አቱማ ናኣ የላዱ፤ አ ኦናና ሱንꬃዱ። 5 ቃይ ጉጃደካ አቱማ ናኣ የላዱ፤ አ ሼላ ሱንꬃዱ። እዛ የሌዳዌ አክዚባ ግያ ቢታና።

6 ይሁዳይ ባረ ባይራ ናኣ ኤራዉ ትእማሮ ግያ ማቻቶ እሜዳ። 7 ይሁዳ ባይራ ናአይ፥ ኤር፥ መꬍና ጎዳ ስንꬃን ኢታ አሳ ግድያ ድራዉ፥ መꬍና ጎዳይ አ ዎꬌዳ።

8 ይሁዳይ ኦናና፥ “ነ እሻ ማቻትኮ ገላደ፥ እዞ አካ፤ ነ እሻዉ ናኣ የላደ አ ጼስሳ” ያጌዳ። 9 ሽን ኦናን የለትያ ናናይ ባረዋንታ ግደናዋ ኤሬዳ፤ ሄዋ ድራዉ ባረ እሻ ማቻትና ግስያ ዎደ አዉደነ፥ ባረ እሻዉ ናእ የለተና ማላ፥ ባረ ዘረꬃ ቢታን ጉሴ። 10 እ ኦꬄዳባይ መꬍና ጎዳ ስንꬃን ኢታባ ግዴዳ ድራዉ፥ መꬍና ጎዳይ አካ ዎꬌዳ።

11 ሄዋፐ ጉየ፥ ይሁዳይ ባረ ናኣ ማቻቶ ትእማሮ፥ “ታ ናአይ ሼል ድጫና ጋካናዉ ነ አዉዋ ሶ ባደ፥ አምኤተꬃን ደአሻ” ያጌዳ። ሄዋ እ አያዉ ጌደ ጎፐ፥ እካ ባረ እሻቱዋዳን ሀይቃነንቶነ ጊደ ህርጌዳ ድራሳ። ሄዋ ድራዉ ትእማራ ባደ ባረ አዉዋ ሶን ደኣዱ።

12 ዳሮ ዎድያፐ ጉየ ይሁዳ ማቻታ፥ ሹአ ናታ ሀይቃዱ። ይሁዳይ ባረ ካዩዋፐ ምነቴዳ ዎደ፥ ባረ ዶርሳ እስክያ ሜድያ አሳቱዋኮ ትምና ከሴዳ፤ ቃይ አ ላገ፥ አዱላምያ ሂር አናና ቤዳ።

13 አሳይ ትእማሮ፥ “በአ፤ ነ ቦሉ ይሁዳይ፥ ባረ ዶርሳቱዋ እስክያ ሜዳናዉ ትምና ከሴዳ” ያጊደ ኦዴዳ። 14 እዛ ባረ አምኤተꬃ ማዩዋ ቃራዱ፤ ባረና ባለꬃናዉ ሻሽያ አካደ ጉሎታዱ። ትምና አፍያ ኦግያ ዶናን ደእያ ኤናይማ ካታማ ፐንግያን ኡታዱ። ሄዋ እዛ ኦꬄዳዌ፥ ሼል ድጭ ጋክንካ እዛ አዉ ማቻቶ ግዳናዉ እመታቤናዋ ኤሬዳ ድራሳ።

15 ይሁዳይ እዞ በኤዳ ዎደ፥ ሻርሙጻቶ ጊደ ቆፔዳ፤ አያዉ ጎፐ፥ እዛ ባረ ዴሙዋ ጉሎታ ኡታዱ። 16 ባረ ናኣ ማቻቶ ግድያዋ ኤረናን ደኢደ፥ ኦግያ ጋጻ ኢኮ ሺቂደ እዞ፥ “ታናና ግሳርኪ!” ያጌዳ።

እዛ፥ “ታን ኔናና ግሶፐ፥ ኔን ታዉ አያ እማኒ?” ያጋደ ኦቻዱ።

17 እ፥ “ታን ታ ዉድያፐ እት ዴሻ ማራ ነዉ የዳና” ያጌዳ።

እዛ፥ “ኔን ሄዋ ታዉ የዳና ጋካናዉ አያ ኦꬃኒ?” ያጋዱ።

18 እ፥ “አያ ኦꬆ?” ያጌዳ።

እዛ፥ “ነ ማታፋ ዎꬅያ ምግዱዋ፥ አ አꬅያ ሳቂያነ ነ ኩሽያን ደእያ ጋትማ ኦይꬃ” ያጋዱ። እ ሄዋንታ እሚደ፥ እዝና ግስና፥ እዛ አዉ ሻሃራዱ። 19 እዛ ሄዋፐ ደንዳደ ቤዳዋፐ ጉየ፥ ባረ ጉሎꬃ ሻሽያ ቃራደ፥ ባረ አምኤተꬃ ማዩዋ ማያዱ።

20 ይሁዳይ ባረ ኦይꬄዳዋ ሄ ምሽራትፐ ዛር አካናዉ ዴሻ ማራ ባረ ላግያ አዱላማ ቦላ እዝዉ ኪቴዳ፤ ሽን እ እዞ ደምቤና። 21 እ ሄ ቢታ አሳ፥ “ኤናይማ ካታማን፥ ኦግያ ዶናን ኡቴዳ ሻርሙጻ ምሽራታ ሀቃኔ?” ያጊደ ኦቼዳ።

አሳይ፥ “ሻርሙጻ ማጫውና ሀዋን ኡባካ ባዋ” ያጌዳ።

22 እ ይሁዳኮ ስሚደ አ፥ “ታን እዞ ደማበይከ፤ ሄዋ ቦላካ ሄ ቢታ አሳይ፥ ‘ሻርሙጻ ማጫውና ሀዋን ኡባካ ባዋ’ ያጌዳ” ያጌዳ።

23 ይሁዳይ፥ “ባረ ኦይቄዳዋ ባረዉ አኩ፤ ሄዌ ꬋዮፐ፥ አሳይ ኑና ሚጫና። ስም ታን እዝዉ ዴሻ ማራ የዳድ፤ ሽን ኔን እዞ ደማበይካ” ያጌዳ።

24 ሄዙ አግና ኬሻፐ ጉየ አሳይ፥ “ነ ናኣ ማቻታ ትእማራ ሻርሙጻደ ሻሃራዱ” ያጊደ ይሁዳዉ ኦዴዳ።

ይሁዳይ፥ “እዞ ካረ ከሲደ ታማን ጹግተ” ያጌዳ።

25 እዞ ካረ ከስያ ዎደ፥ “ታን ሻሃሬዳዌ ሀ ሚሻ ጎዳሳ፤ በአ፤ ሀ ማታፋ ዎꬅያ ምግዱ፥ አ አꬅያ ሳቂነ ጋትማይ ኦዌንቶ ኤራና ዳንዳዮፐ ኤራ” ያጋደ ባረ ቦሎ ኪታ ኪታዱ።

26 ይሁዳይ ሄ ሚሻቱዋ ኤሪደ፥ “ታፐ እዛ ጽላ፤ አያዉ ጎፐ፥ ታን እዞ ታ ናኣ ሼላዉ እማበይከ” ያጌዳ። ሄዋፐ ጉየ፥ እ እዝና ዛር ግስቤና።

27 እዛ የላና ሀንያ ዎደ፥ እዝ ኡሉዋን ማንተ አቱማ ናናይ ደኢኖ። 28 እዛ የልሺን፥ ኡንቱንቱፐ እቱ ባረ ኩሽያ ከሴዳ፤ ማርስያና፥ “በእተ፤ ሀዌ ኮይሮ ከሴዳ” ጋናዉ ዞኦ ቁንጩትያ አካደ አ ኩሽያን ቃቻዱ። 29 ሽን እ ባረ ኩሽያ ጉየ አኬዳ ዎደ፥ አ እሻይ ከሴዳ፤ እዛ፥ “ኔን ዋና ፖርꬁ ጋደ ከሳዲ!” ያጋዱ። ሄዋ ድራዉ፥ ፓሬሳ *ፓሬሳ፦ ሀ ሱንꬃ ብለꬃይ እብራዌꬁዋን፥ “ፖርꬁ ጌዳ” ግያዋ። ጋደ አ ሱንꬃዱ። 30 ሄዋፐ ጉየ፥ አ ኩሽያን ዞኦ ቁንጩቲ ደእያ አ እሻይ ከሴዳ፤ አ ሱንꬃይ ዛራሀ †ዛራሀ፦ ሀ ሱንꬃ ብለꬃይ እብራዌꬁዋን፥ “ዞኡዋ” ግያዋ። ጌተቴዳ።