1 እስማኤላ አሳቱ ዮሴፋ ግብጼ አፍ ዎꬄድኖ። ግብጻዌ ጶጽፋር፥ ካትያ ኦሳንቻቱዋፐ እቱ፥ ናግያዋንቱ ካፑ ዮሴፎ እስማኤለቱዋፐ ሻሜዳ።

2 መꬍና ጎዳይ ዮሴፎና ደኤ፤ ሄዋ ድራዉ፥ እ ኦꬅያዋ ኡባ አዉ እንጀዬዳ፤ ያትና ባረ ጎዳ፥ ግብጻዊያ ሶን ደኤዳ። ኪታ 7:9 3 መꬍና ጎዳይ አናና ደእያዋነ መꬍና ጎዳይ እ ኦꬄዳዋ ኡባ አዉ ሱርስያዋ ጶጽፋር በኤዳ ዎደ፥ 4 ዮሴፎ አ ስንꬃን ናሸቴዳ፤ እ አዉ ኪተቴዳ። ጶጽፋር አ ባረ ጎለ አሳ ቦላ ሱንꬄዳ፤ ባረዉ ደእያዋ ኡባ አ ኩሽያን ዎꬄዳ። 5 ጶጽፋር ባረ ጎለን ደእያዋ ኡባ ቦላነ ባረ ማጹዋ ኡባ ቦላ ሱንꬄዳ ዎድያፐ ዶሚደ፥ መꬍና ጎዳይ ግብጼ ብታንያ ጎሊያ ዮሴፎ ድራዉ አንጄዳ። መꬍና ጎዳ አንጁ ጶጽፋራ ሶንነ ጋደን ደኤዳ ኡባባ ቦላ ዎꬌዳ። 6 ሄዋ ድራዉ ባረዉ ደእያ ኡባባ ዮሴፎዉ ሼꬌዳ፤ እ ባረ ምያ ቁማፐ አትና፥ አይነ ቆፐና።

ዮሴፎ ጌሳንቻነ ማላ ሎኦ አሳ። 7 አማሬዳ ዎድያፐ ጉየ፥ አ ጎዳ ማቻታ ዮሴፋ ጼላ በኣደ፥ “ሃያ፤ ታናና ግሳ” ያጋዱ።

8 ሽን እ እጼዳ። ባረ ጎዳ ማቻቶ፥ “በአ፤ ታ ጎዳይ ታዉ ሼꬊደ ባረ ሶን ደእያባዉ አያዉነ ህርገና፤ ባረዉ ደእያዋ ኡባ ታ ኩሽያን ዎꬄዳ። 9 ሀ ሶን ታፐ ግታትያዌ ኦንነ ባዋ። ኔን አ ማቻቶ ግድያ ድራዉ ነ ጻላላፐ አትና፥ ታ ጎዳይ ታዉ እምቤናባይ ባዋ። ያትና ታን ዋታደ ሀዋ ማላ ዳሮ ኢታባ ሀናደ ጾሳ ቦላ ናጋራ ኦꬆ?” ያጌዳ። 10 እዛ ሀ የዉዋ ሀቼ ሀቼ ዮሴፎዉ ኦዶፐነ፥ እ እዝና ግሰናን ዎይ እዝ ማታን ኡተናን እጼዳ።

11 እት ጋላስ እ ባረ ኦሱዋ ኦꬃናዉ ሶ ገልያ ዎደ፥ ሶ ቆማቱዋፐ ኦንነ ሶን ባዋ። 12 እዛ ዮሴፎ አፍላ ኦይቃደ፥ “ታናና ግሳ” ያጋዱ። ሽን እ ባረ አፍላ እ ኩሽያን የጊደ፥ ሶፐ ካረ ዎጺደ ከሴዳ።

13 ዮሴፎ ባረ አፍላ እ ኩሽያን የጊደ፥ ሶፐ ካረ ዎጽ ከሶዋ እዛ በኤዳ ዎደ፥ 14 ባረ ሶ ቆማቱዋ ጼሳደ ኡንቱንታ፥ “በእተ፤ ታ አስናይ አሄዳ ሀ እብራዌ ብታኒ ታና ባለꬅ ድጊደ አሼዳ፤ እ ታናና ግሳናዉ ሀዋ ገሌዳ፤ ሽን ታን ታ ኮሻ ꬎቂሳደ ዋሳድ። 15 ታን ዋስና ስሴዳ ዎደ፥ እ ባረ አፍላ ታ ማታን የጊደ፥ ሶፐ ካረ ዎጺደ ከሴዳ” ያጋዱ።

16 አ ጎዳይ ሶ ያና ጋካናዉ እዛ ዮሴፎ አፍላ ባረ ማታን ዎꬃዱ። 17 ሄዋፐ ጉየ፥ እዛ አዉ ሀዋዳን ያጋደ ኦዳዱ፤ “ሄዌ ኔን ኑዉ አሄዳ እብራዌ አይሊ ታናና ግሳናዉ ታኮ ገሌዳ፤ 18 ሽን ታን ታ ቃላ ꬎቂሳደ ዋሶዌ፥ ባረ አፍላ ታ ማታን የጊደ፥ ሶፐ ካረ ዎጼዳ” ያጋዱ።

19 አ ጎዳይ ባረ ማቻታ፥ “ነ አይሊ ታና ሀዋዳን ኦꬄዳ” ያጋደ ኦዴዳ ቃላ ስሲደ፥ ሀንቁዋን ፐንቴዳ። 20 ዮሴፋ አ ጎዳይ አፊደ፥ ካትያ ቃሹዋ ሳአይ ደእያ ቃሾ ጎለን የጌዳ።

21 ሽን ዮሴፎ ያን ቃሾ ጎለን ደእያ ዎደ፥ መꬍና ጎዳይ አናና ደኤ። እ አዉ ቃረቴዳ፤ ቃሾ ጎለ ካፑዋ ስንꬃን አዉ ናሹዋ እሜዳ። ኪታ 7:9 22 ያትና ቃሾ ጎለ ካፑ ቃሹዋ አሳ ኡባ ዮሴፎ ኩሽያን ዎꬄዳ፤ ሄዋን ኦሰትያዋ ኡባ ኦꬅያዌ አ። 23 ቃሾ ጎለ ካፑ ዮሴፎ ኩሽያን ደእያባዉ አያዉነ ህርገና፤ አያዉ ጎፐ፥ መꬍና ጎዳይ አናና ደኤ፤ እ ኦꬅያዋካ ኡባ አዉ እንጀዬዳ።