1 አማሬዳ ዎድያፐ ጉየ፥ ግብጼ ካትያው ኤሳ ትግያዌነ ኡክꬃ ኡክያዌ ባረንቱ ጎዳ ግብጼ ካትያ ናቄድኖ። 2 ካቲ ኤሳ ትግያዋንቱ ካፑዋነ ኡክꬃ ኡክያዋንቱ ካፑዋ ላኡዋካ ሎይꬅ ሀንቀቴዳ። 3 ዮሴፎ ቃሸቴዳ ቃሾ ጎለን፥ ናግያዋንቱ ካፑዋ ሶን ኡንቱንታ ዎꬄዳ። 4 ናግያዋንቱ ካፑ ኡንቱንታ ዮሴፎዉ ሼꬌዳ፤ እ ኡንቱንቶ ኦꬄ። ኡንቱንቱ ቃሾ ጎለን አማሬዳ ዎድያ ኡቴድኖ።

5 ግብጼ ካትያዉ ኤሳ ትግያዌነ ኡክꬃ ኡክያዌ፥ ቃሾ ጎለን ደእያ ላአቱካ፥ እት ቃማ ዱማ ዱማ አኩሙዋ አኩመቴድኖ። ቃይ አኩሞቶ ሁጲያን ሁጲያን ኡንቱንቱ ብለꬃይ ደኤ። 6 ዮሴፎ ዎንታ ኡንቱንቱኮ ገሌዳ ዎደ፥ ካዮት ኡቴዳዋንታ በኤዳ። 7 ሄዋ ድራዉ ባረ ጎዳ ሶን ባረናና ቃሾ ጎለን ደእያ ካትያ ኦሳንቻቱዋ፥ “ሀቼ ህንተንቱ ደሙ አያዉ ꬉሜዴ?” ያጊደ ኦቼዳ።

8 ኡንቱንቱ አ፥ “ኑን ላኡ አኩሙዋ አኩመቴዶ፤ ሽን ኑዉ ብልያዌ ꬋዬዳ” ያጌድኖ።

ዮሴፎ ኡንቱንታ፥ “አኩሙዋ ብለꬃይ ጾሳዋ ግደኔየ? ህንተንቱ አኩሙዋ ታዉ ኦድተ” ያጌዳ።

9 ኤሳ ትግያዋንቱ ካፑ ባረ አኩሙዋ ዮሴፎዉ ሀዋዳን ያጊደ ኦዴዳ፤ “ታን ታ አኩሙዋን እት ዎይንያ ቱራ ታ ስንꬃን በኣድ። 10 ቃይ ሄ ዎይንያ ቱራዉ ሄዙ ታሺ ደኤ። እ ማራ የሊደ፥ ጪሻ ጪሺደ፥ ዉርጩዋ ዉርጬዳ፤ ዉርጩነ ቴሬዳ። 11 ካትያ ዋንጫይ ታ ኩሽያን ደኤ፤ ታን ዎይንያ ቴራ አካደ፥ ካትያ ዋንጫን ጉምኣደ፥ ሄ ዋንጫ አ ኩሽያን ዎꬃድ” ያጌዳ።

12 ዮሴፎ፥ “ሄዋ ብርሸꬃይ ሀዋ፤ ሄዙ ታሸቱ ሄዙ ጋላሳቱዋ። 13 ሄዙ ጋላሳ ግዱዋን ካቲ ኔና ደንꬃና፤ እ ኔና ካሰ ነ ሱንꬃተꬃዉ ዛራና፤ ካሰ ኔን ኤሳ ትግያ ዎደ ኦꬄዳዋዳን፥ ኔን ካትያ ዋንጫ አ ኩሽያን ዎꬃና። 14 ሽን ነዉ ሳአይ ሎኤዳ ዎደ ታና ዶጎፓ፤ ታዉ ሎአ፤ ታባ ካትያዉ ኦዳደ፥ ሀ ቃሾ ጎልያፐ ታና ከስሳ፤ 15 አያዉ ጎፐ፥ ታና እብራዌቱዋ ቢታፐ ግዲደ አሄድኖ፤ ሀራይ አቶ ሀዋንካ ታና ቃሽስያዋ አይነ ኦꬃበይከ” ያጌዳ።

16 ኡክꬃ ኡክያዋንቱ ካፑ ዮሴፎ አኩሙዋ ሎይꬅ ብሌዳዋ በኤዳ ዎደ ዮሴፎ፥ “ታንካ አኩሙዋ አኩመታድ፤ ታ ሁጲያን ሄዙ ሳምፓ ኡክꬃይ ደኤ፤ 17 ቦላ ባጋ ሳምፓን ግብጼ ካትያዉ ኡከቴዳ ኡባ ቆሞ ኡክꬃይ ደኤ። ሽን ካፉ ሄዋ ታ ሁጲያን ደእያ ሳምፓፐ ሜ” ያጌዳ።

18 ዮሴፎ፥ “ሄዋ ብርሸꬃይ ሀዋ፤ ሄዙ ሳምፓቱ ሄዙ ጋላሳቱዋ። 19 ሄዙ ጋላሳ ግዶን ካቲ ኔና ደንꬃና፤ ነ ቆꬍያ ሙጭሲደ ምꬃን ካቅሳና፤ ነ አሹዋካ ካፉ ማና” ያጌዳ።

20 ሄዘንꬆ ጋላሳን ግብጼ ካቲ ባረ የለቴዳ ጋላስ ባረ ኦሳንቻቱዋ ኡባዉ ባላ ጊግሴዳ። ኤሳ ትግያዋንቱ ካፑዋነ ኡክꬃ ኡክያዋንቱ ካፑዋ ደንꬂደ፥ ባረ ኦሳንቻቱዋ ግዶን ኤሴዳ። 21 ኤሳ ትግያዋንቱ ካፑዋ አ ሱንꬃተꬃዉ ዛርና፥ እ ካትያ ኩሽያን ዋንጫ ዎꬄዳ። 22 ሽን ካቲ ኡክꬃ ኡክያዋንቱ ካፑዋ ኡንቱንቱ አኩሙዋ ብለꬃ ዮሴፎ ኦዴዳዋዳንካ ካቅሴዳ። 23 ሽን ኤሳ ትግያዋንቱ ካፑ ዮሴፎ ሀሳይቤና፤ ዶጊሼዳ።