1 ላኡ ላይꬃ ኩመንꬃይ አꬌዳ ዎደ፥ ግብጼ ካቲ አኩሙዋ አኩመቴዳ፤ አኩሙዋን እ ናይለ ሻፋ ዶናን ኤቄዳ፤ 2 ላፑን ኦርደነ ሞꬎ ሚዛቱ ናይለ ሻፋፐ ከስ ዎꬊደ፥ ማቃ ግዱዋን ምያዋንታ በኤዳ። 3 ኡንቱንቱፐ ስሚደ፥ ሀራ ላፑን ማላ ኢታነ ግልቃ ሚዛቱ ናይለ ሻፋፐ ከሴድኖ፤ ሻፋ ዶናን ደእያ ሀራ ሚዛቱ ማታን ኤቄድኖ። 4 ሄ ማላ ኢታነ ግልቃ ሚዛቱ ላፑን ኦርዳነ ሞꬎ ሚዛቱዋ ሜድኖ። ሄዋፐ ጉየ ካቲ ቤጎቴዳ።

5 እ ዛረꬅ ገምእሺደ፥ ላኤንꬆ አኩሙዋካ አኩመቴዳ፤ ላፑን ሎአነ ሙሩታ ትሻቱ እት አኑዋን ድጬድኖ። 6 ኡንቱንቱፐ ስሚደ፥ ጬጨዳነ አዋይ ዶልያ ባጋ ጫርኩዋን ሹሌዳ ሀራ ላፑን ትሻቱ ከሴድኖ። 7 ሄ ጬጬዳ ትሻቱ ሎአነ ሙሩታ ትሻቱዋ ምቴድኖ። ሄዋፐ ጉየ ካቲ ቤጎቲደ፥ አኩሙዋ ግድያዋ ኤሬዳ። 8 ሳአይ ዎንትና፥ አ ዎዛናይ ሻቢረቴዳ፤ ሄዋ ድራዉ ግብጼን ደእያ ብትያዋንቱ ኡባዉነ አꬌዳ ኤራንቻቱዋ ኡባዉ ኪቲደ ጼስሴዳ፤ ካቲ ኡንቱንቶ ባረ አኩሙዋ ኦዴዳ፤ ሽን አዉ ሄ አኩሙዋ ብርሽያዌ ꬋዬዳ።ዳኔላ 2:2

9 ኤሳ ትግያዋንቱ ካፑ ሄ ዎደ ግብጼ ካትያ ሀዋዳን ያጌዳ፤ “ታን ታ ባይዙዋ ሀቼ ሀሳያይ። 10 እት ገደ ካቲ ባረ ቆማቶ ሀንቀቲደ፥ ታናነ ኡክꬃ ኡክያዋንቱ ካፑዋ ቃሾ ጎለን የጌዳ። 11 ያን ደኢደ ኑን ሁጲያን ሁጲያን አኩሙዋ አኩመቴዶ፤ አኩሞ ዱማ ዱማ ብርሸꬃይ ደኤ። 12 ሄ ዎደ ናግያዋንቱ ካፑ፥ ቆማይ፥ እብራዌ ዎዳላይ ኑናና ቃሾ ጎለን ደኤ። ኑን ኑ አኩሙዋ አዉ ኦዴዶ፤ እ ኑዉ ሁጲያን ሁጲያን አኩሙዋ ብርሼዳ። 13 ያንና ሄ የዎቱ እ ኑዉ ብሌዳዋዳንካ ሀኔድኖ። ሄዌ አዬ ጎፐ፥ ታን ታ ሱንꬃተꬃዉ ስማድ፤ ህንኮ ብታኒ ካቀቴዳ” ያጌዳ።

14 ግብጼ ካቲ ዮሴፎዉ ኪቲደ ጼስሴዳ። ኡንቱንቱ አ ቃሾ ጎልያፐ ኤለካ አሄድኖ። እ ሜደቲደ ባረ ማዩዋ ላሚደ፥ ካትያኮ ገሌዳ። 15 ካቲ ዮሴፎ፥ “ታን አኩሙዋ አኩመታድ፤ ሽን አ እቱነ ብላናዉ ዳንዳይቤና። ሽን ታን፥ ‘ዮሴፎ አኩሙዋ ስሶፐ፥ ብላናዉ ዳንዳዬ’ ግያዋ ስሳድ” ያጌዳ።

16 ዮሴፎ፥ “ታን ሄዋ ዳንዳይከ፤ ሽን ጾሳይ ካትያዉ ልከ ብርሸꬃ እማና” ያጌዳ።

17 ካቲ፥ “ታን ታ አኩሙዋን ናይለ ሻፋ ዶናን ኤቃ ደእሽን፥ 18 ላፑን ኦርዳነ ሞꬎ ሚዛቱ ናይለ ሻፋፐ ከሲደ፥ ማቃ ግዱዋን ሚኖ። 19 ኡንቱንቱፐ ስሚደ፥ ሀራ ላፑን ማላ ኢታ፥ ግልቃነ ላፋ ሚዛቱ ከሴድኖ፤ ታን ሄዋ ማላ ማላ ኢታ ሚዛ ግብጼ ጋድያን ኡባካ በአ ኤርከ። 20 ማላ ኢታነ ላፋ ሚዛቱ ኮይሮዋንታ፥ ላፑን ሞꬎ ሚዛቱዋ ሜድኖ። 21 ሽን ኡንቱንታ ሜዳዋፐ ጉየና፥ ኡንቱንቱ ሜዳዋ ኦንነ ኤራናዉ ዳንዳይቤና፤ አያዉ ጎፐ፥ ኡንቱንቱ ማላይ ካሰዋዳንካ ኢት ኡቴዳ። ሄዋፐ ጉየ ታን ቤጎታድ።

22 “ታን ታ አኩሙዋን ቃይ ላፑን ሎአነ ሙሩታ ትሻቱዋ እት አኑዋን ድጬዳዋንታ በኣድ። 23 ኡንቱንቱፐ ስሚደ፥ ጬጨዳነ አዋይ ዶልያ ባጋ ጫርኩዋን ሹሌዳ ሀራ ላፑን ትሻቱ ከሴድኖ። 24 ሄ ጬጬዳ ትሻቱ ላፑን ሎኦ ትሻቱዋ ምቴድኖ። ታን ሀ አኩሙዋ ብትያዋንቶ ኦዳድ፤ ሽን ታዉ አኩሙዋ ብልያዌ ቤትቤና” ያጌዳ።

25 ሄዋፐ ጉየ ዮሴፎ ግብጼ ካትያ፥ “ካትያ አኩሞቱ እቱዋ። ጾሳይ ባረ ኦꬃና ሀንያዋ ካትያዉ ቆንጭሴዳ። 26 ሄ ላፑን ሎኦ ሚዛቱ ላፑን ላይꬃቱዋ፤ ቃይ ላፑን ሎኦ ትሻቱ ላፑን ላይꬃቱዋ፤ ሀ አኩሙ እቱዋ። 27 ሄ ላፑን ማላ ኢታነ ላፋ ሚዛቱ ላፑን ላይꬃቱዋ፤ ቃይ አዋይ ዶልያ ባጋ ጫርኩዋን ሹሌዳ፥ ጬጮ ላፑን ትሻቱ ላፑን ኮሻ ላይꬃቱዋ።

28 “ታን ካትያዉ ኦዴዳዋዳንካ፥ ጾሳይ ባረ ኦꬃና ሀንያዋ ካትያዉ በሴዳ። 29 ላፑን ዳሮ ካሎ ላይꬃቱ ግብጼ ቢታዉ ኡባዉ ያና፤ 30 ሽን ላፑን ኮሻ ላይꬃይ ሄዋ ካላና። ሄ ዎደ ግብጼ ካሉ ኡባይ ዶገታና፤ ኮሻይ ቢታ ጺጻና። 31 ሄ ቢታ ካሉ ሀሳየተናን አታናዋ፤ አያዉ ጎፐ፥ ሄዋ ካሌዳ ኮሻይ ሎይꬅ ሱላና። 32 ላኡ ኦግያን ካትያዉ ሄ አኩሙ ቤቴዳዌ አያሴ ጎፐ፥ ሀ የዉዋ ጾሳይ ምንሲደ ቃቾ ድራሳ፤ ጾሳይ ሄዋ ኤለካ ኦꬃና።

33 “ሀእ ስም፥ ካቲ አꬌዳ ኤራንቻነ ጭንጫ አሳ ኮዪደ፥ ግብጼ ቢታን ሱንꬆ። 34 ካቲ ቢታን ሱንꬃቱዋ ላፑን ካሎ ላይꬃን ቡክያ ካꬃፐ እቼሹ ኩሽያፐ እቱዋ ሺሻናዉ ሱንꬆ። 35 ኡንቱንቱ ይያ ካሎ ላይꬃቱዋን ካꬃ ሺሺደ፥ ካትያ አዎተꬃን ምንጅኖ፤ ሄ ካꬃ ካታማቱዋን ናግኖ። 36 ቢታይ ኮሻን ꬋየና ማላ፥ ሀ ካꬃይ ግብጼ ቢታን ላፑን ላይꬃን ደንዳና ኮሻዉ ምንጀቲደ ደኦ” ያጌዳ።

37 ሀ የዉ ግብጼ ካትያዉነ አ ኦሳንቻቶ ሎአ ግዲደ ቤቴዳ። 38 ሄዋ ድራዉ ካቲ ኡንቱንታ፥ “ኑን ጾሳ አያናና ደእያ ሀዋ ማላ ሀራ አሳ ደማኔየ?” ያጊደ ኦቼዳ።

39 ሄዋፐ ጉየ ካቲ ዮሴፎ፥ “ጾሳይ ሀዋ ኡባ ኔና ኤርሴዳ ድራዉ፥ ነ ማላ አꬌዳ ኤራይነ ጭንጫተꬃይ ደእያዌ ኦንነ ባዋ። 40 ታን ኔና ታ ጎለን ሱንꬃይ፤ ታ አሳይ ኡባይ ነዉ አዛዘታና፤ ታን ኔፐ አꬍያዌ ታ ካዉተꬃ አራታ ጻላላና ግዶ” ያጌዳ። ኪታ 7:10

41 ሄዋ ድራዉ ካቲ ዮሴፎ፥ “በአ፤ ታን ኔና ግብጼ ጋድያ ኡባ ቦላን ሱንꬃድ” ያጌዳ። 42 ሄዋፐ ጉየ፥ ካቲ ባረ ፓራምያ ምግዱዋ ባረ ብራꬍያፐ ከሲደ፥ ዮሴፎ ብራꬍያን ዎꬄዳ። ታልባፐ ዳደቴዳ ማዩዋ እ አ ማይዚደ፥ አ ቆꬍያንካ ዎርቃ ሳንሳላታ አꬄዳ።ዳኔላ 5:29 43 ካቲ ባረ ላኤንꬆ ፓራ ጋርያ ዮሴፋ ቶግሴዳ፤ ቆማቱ፥ “ጎይንተ! ጎይንተ!” ያጊደ አፐ ስንꬃና ሀመቴድኖ። ሀዋዳን ኦꬂደ፥ ካቲ አ ግብጼ ቢታ ኡባ ቦላን ሱንꬄዳ።

44 ሄዋፐ ጉየ ካቲ ዮሴፎ፥ “ታን ካትያ፤ ሽን ኔን ደንꬆ ጌናን ግብጼ ቢታ ኡባን ኦንነ ኩሽያ ዎይ ገድያ ደንና” ያጌዳ። 45 ካቲ ዮሴፋ፥ “ጻፍናት-ፓእናሀ” ጊደ ሱንꬄዳ፤ እ አዉ ኦና ግያ ካታማ ቄስያ ጶጽፋራ ናቶ አስናቶ ማቼ ኦꬅ እሜዳ። ያትና ዮሴፎ ግብጼ ቢታ ኡባ ሳና አꬌዳ።

46 ዮሴፎ ግብጼ ካትያዉ ኦꬃናዉ ዶምያ ዎደ፥ አዉ ላይꬃይ ሀታማ። ቃይ ዮሴፎ ካትያ ስንꬃፐ ከሲደ፥ ግብጼ ቢታ ኡባ ግዱዋ ሀመቴዳ። 47 ሄ ላፑን ካሎ ላይꬃቱዋን ቢታይ ዳሮ ካꬃ ዶሌዳ። 48 ዮሴፎ ግብጼ ቢታን ሄ ላፑን ካሎ ላይꬃ ካꬃ ኡባ ሺሺደ፥ ካታማቱዋን ምንጄዳ። እት እት ካታማ ዩሹዋን ደእያ ጎሻ ካꬃ ኡባ ሄ ካታማቱዋን ምንጄዳ። 49 ዮሴፎ አባ ሻፍያ ኬሻ ዳሮ ካꬃ ምንጄዳ፤ ካꬃይ ዳርና፥ ማካናዉ ዳንዳይቤና ድራዉ፥ ማክ ማክ ቆልያዋ አግ ባሼዳ።

50 ኮሻ ላይꬃይ ያናፐ ካሰ፥ ኦና ካታማ ቄስያ ጶጽፋራ ናት አስናትፐ ዮሴፎ ላኡ አቱማ ናና የሌዳ። 51 ዮሴፎ ባረ ባይራ ናኣ ምናሳ *ምናሳ፦ እብራዌꬁዋን ጾሳይ ታ መቱዋ ኡባነ ታ አዉዋ ሶ አሳ ኡባ ዶግሴዳ ግያዋ። ሱንꬄዳ። 52 ላኤንꬆ ናኣ ኤፍሬማ †ኤፍሬማ፦ ሀ ሱንꬃ ብለꬃይ እብራዌꬁዋን “ጾሳይ ታን ቱጋቴዳ ቢታን ታና አይፍሴዳ” ያግያዋ። ሱንꬄዳ።

53 ግብጼ ቢታን ደእያ ሄ ላፑን ካሎ ላይꬃቱ ዉሬድኖ። 54 ቃይ ዮሴፎ ኦዴዳዋዳን ላፑን ኮሻ ላይꬃቱ ዶሜድኖ። ሀራ ቢታን ኡባን ኮሻይ ደንዴዳ፤ ሽን ግብጼ ቢታ ኡባን ካꬃይ ደኤ። ኪታ 7:11 55 ግብጼ ቢታይ ኡባይ ኮሻቴዳ ዎደ፥ አሳይ ካꬃዉ ካትያ ዋሴዳ። ካቲ ግብጼ አሳ ኡባ፥ “ዮሴፎኮ ቢተ፤ እ ኦድያዋ ኦꬅተ” ያጌዳ። ዮሃ. 2:5

56 ኮሻይ ግብጼ ቢታ ኡባ ጋኬዳ ዎደ፥ ዮሴፎ ካꬃ ምንጄዳ ጎልያ ኡባ ዶዪደ፥ ካꬃ ግብጼ አሳዉ ዛልኤዳ፤ አያዉ ጎፐ፥ ግብጼን ኮሻይ ፐንቴዳ። 57 ሳኣ ኡባን ኮሻይ ጺጽ ደእያ ድራዉ፥ ሳኣን ደእያ አሳይ ኡባይ ካꬃ ዮሴፎፐ ዎማናዉ ግብጼ ዬዳ።