1 ያቆብ ግብጼን ካꬃይ ደእያዋ ስሴዳ ዎደ፥ ባረ አቱማ ናና፥ “ህንተንቱ እቱ እቱዋ አያዉ ጼሊቴ? 2 በእተ! ግብጼን ካꬃይ ደእያዋ ታን ስሳድ፤ ያ ዱገ ቢደ፥ ኑን ሀይቀናን ፓጻ ደአና ማላ፥ ያፐ አማሬዳዋ ኑዉ ዎምተ” ያጌዳ። ኪታ 7:12 3 ዮሴፎ እሻቱ ታማቱ ካꬃ ዎማናዉ ዱገ ግብጼ ቤድኖ። 4 ሽን ያቆብ ዮሴፎ እሻ ቢንያማ አ እሻቱዋና የድቤና፤ አያዉ ጎፐ፥ እ ቆሄታነንቶነ ጊደ ቆፔዳ። 5 ካናነ ቢታን ዎልቃማ ኮሻይ ደእያ ድራዉ፥ ካꬃ ዎማናዉ ዬዳዋንቱና እስራኤልያ አቱማ ናናይ ግብጼ ገሌድኖ።

6 ሄ ዎደ ዮሴፎ ሄ ቢታ አይስያዋንታነ ቢታን ደእያ አሳዉ ኡባዉ ካꬃ ዛልእያዋ፤ ሄዋ ድራዉ ዮሴፎ እሻቱ ጋኬዳ ዎደ፥ ባረንቱ ዴሙዋ ሳኣ ጋꬂደ አዉ ጎይኔድኖ። 7 ዮሴፎ ባረ እሻቱዋ በኦ ሳን ኤር አጌዳ፤ ሽን እ ኡንቱንታ ኤረናዋዳን ላመቴዳ፤ እ ኡንቱንታ፥ “ህንተንቱ ሀቃፐ ዬድቴ?” ያጊደ ኦቼዳ።

ኡንቱንቱ፥ “ካꬃ ዎማናዉ፥ ካናነ ቢታፐ ዬዶ” ያጌድኖ።

8 ዮሴፎ ባረ እሻቱዋ ኤሬዳ፤ ሽን ኡንቱንቱ አ ኤርበይክኖ። 9 ሄዋፐ ጉየ፥ ዮሴፎ ኡንቱንቱዋ አኩመቴዳ ባረ አኩሙዋ ሀሳዪደ ኡንቱንታ፥ “ህንተንቱ ጌድ ጼልያ አሳ፤ ህንተንቱ ኑ ቢታን ናጉ ለፕያ ባጋይ ሀቃዌንቶ በአናዉ ዬድታ” ያጌዳ። ዶመꬃ 37:5-10

10 ኡንቱንቱ፥ “ቱይት፥ ኑ ጎዳዉ፥ ኑን ጌድ ጼልያ አሳ ግዶኮ፤ ኑን ነ ቆማቱ ካꬃ ዎማናዉ ዬዶ። 11 ኑን ኡባይካ እት አዉዋ ናና። ኑን ነ ቆማቱ አማነትያ አሳ” ያጌድኖ።

12 ዮሴፎ ኡንቱንታ፥ “ቱይት፤ ህንተንቱ ኑ ቢታን ናጉ ለፕያ ባጋይ ሀቃዌንቶ በአናዉ ዬድታ” ያጌዳ።

13 ሽን ኡንቱንቱ፥ “ኑን ነ ቆማቱ ታማነ ላኡ እሻቱዋነ ካናነ ቢታን ደእያ እት ብታንያ ናና። ዉርሰꬃ ꬋንꬃ ዱሱ ሀእ ኑ አቡና ደኤ፤ እቱ ꬋዬዳ” ያጌድኖ።

14 ዮሴፎ ኡንቱንታ፥ “ታን ህንተንቶ ኦዴዳዋዳንካ ህንተንቱ ቢታ ጌድያዋንታ። 15 ቃይ ህንተንቱ ፓጨታናዌ ሀዋና፤ ቱሙዋፐ ካቲ ሀይቆ፤ ህንተንቱ ዉርሰꬃ ቴፋ እሻይ ሀዋ ያና ꬋዮፐ፥ ህንተንቱ ሀዋፐ ቢክታ። 16 ህንተንቱ ኦድያዌ ቱማ ግድያዋ ፓጫናዉ፥ ህንተፐ እቱዋ ኪትተ፤ እ ህንተንቱ እሻ አኪደ ዮ፤ አቴዳዋንቱ ቃሾ ጎለን ጋምኢታ። ሄዋ ግዳና ꬋዮፐ፥ ካቲ ሀይቆ፤ ህንተንቱ ቢታ ጌድያዋንታ” ያጌዳ። 17 ኡንቱንታ ሄዙ ጋላሳዉ ቃሾ ጎለን የጌዳ።

18 ሄዘንꬆ ጋላሳን ዮሴፎ ኡንቱንታ፥ “ታን ጾሳዉ ያይያ አሳ፤ ህንተንቱ እትባ ኦꬆፐ፥ ፓጻ ደአና። 19 ህንተንቱ ቱሙካ አማነትያ አሳ ግዶፐ፥ ህንተንቱ እሻቱዋፐ እቱ ሀዋን ቃሾ ጎለን ደኦ፤ አቴዳዋንቱ ኮሻትያ ህንተንቱ ሶ አሳዉ ካꬃ አኪደ አፍተ፤ 20 ሽን ህንተንቱ ቃላ ቱማያና ማላነ ህንተንቱ ሀይቀና ማላ ህንተንቱ ህንተንቱ ዉርሰꬃ ቴፋ እሻ ታኮ አሀና ኮሼ” ያጌዳ። ኡንቱንቱነ ሀ የዉዋ ማዬድኖ።

21 ኡንቱንቱ እቱ እቱዋ፥ “ቱሙ ኑን ኑ እሻዉ ኦꬄዳባይ ኑና ካኤ። እ ባረ ሸምፖ ሀንያባይ እጽና፥ ኑዉ ዋትዋትያ ዎደ፥ ኑን ስሲደ እጼዶ፤ ሀ ዋዪ ኑና ጋኬዳዌ ሄዋ ድራሳ” ያጌድኖ።

22 ሮቤል፥ “ታን ህንተንታ፥ ‘ናኣ ቦላ ናጋራ ኦꬆፕተ’ ጋደ ኦዳበይክታ? ሽን ህንተንቱ ስሰናን እጼድታ። ስም ሀእ፥ አ ሱꬃይ ኑና አቼ” ያጌዳ። ዶመꬃ 37:21-22 23 ኡንቱንቱ ግያባ ዮሴፎ ኤሬዳዋ ኡንቱንቱ አኬክበይክኖ፤ አያዉ ጎፐ፥ እ ኡንቱንቱና ዎካልያን ሃሳይያ ድራሳ። 24 እ ኡንቱንቱፐ ዎራ ስሚደ ዬኬዳ፤ ሽን ቃይ ኡንቱንቱኮ ስሚደ፥ ኡንቱንቶ ጉጂደ ሃሳዬዳ። እ ስሞና ኡንቱንቱፐ ዱꬅ አሺደ ኡንቱንቱ በእሽን ቃቼዳ።

25 ዮሴፎ ባረ ቆማቱዋ፥ “ካꬃ ኡንቱንቱ ኦጎሩዋ ኩንꬅተ፤ ኡንቱንቱ ብራካ ዛሪደ፥ ኡንቱንቱ ኦጎሩዋን ኦጎሩዋን ዎꬅተ፤ ቃይ ኡንቱንቱ ኦግያዉ ሽንቃ እምተ” ያጊደ አዛዜዳ። 26 እ ጌዳዋዳን ኦꬄዳዋፐ ጉየ፥ ዮሴፎ እሻቱ ካꬃ ባረንቱ ሀረቱዋን ጫኒደ፥ ደንዲደ ቤድኖ።

27 ኡንቱንቱ ቃማ አቃናዉ ስሜድኖ ኡንቱንቱፐ እቱ ባረ ሀርያዉ ካꬃፐ የጋናዉ ባረ ኦጎሩዋ ብሊደ፥ ሄ ኦጎሩዋ ዶናን ደእያ ባረ ብራ በኤዳ። 28 እ ባረ እሻቱዋ፥ “ታ ብራይ ታዉ ስሜዳ፤ ቱሙ ሀዋ በእተ! ታ ኦጎሩዋን ደኤ” ያጌዳ።

ኡንቱንቱ ዎዛናይ ዳጋምና፥ ኮኮሪደ እቱ እቱዋኮ ስሚደ፥ “ጾሳይ ኑ ቦላ ኦꬄዳባይ ሀዌ አዬ?” ያጌድኖ።

29 ኡንቱንቱ ካናነ ቢታን ደእያ ባረንቱ አዉዋ ያቆባኮ ዬዳ ዎደ፥ ባረና ጋኬዳዋ ኡባ አዉ ኦዴድኖ። 30 ኡንቱንቱ አዉ፥ “ሄ ቢታዉ ጎዳ ግዴዳ ብታኒ ኑና ሀንቀቴዳ። ሄዋፐ ጉየ፥ እ ኑና ሄ ቢታ ገድያዋዳን ጎዳቴዳ። 31 ሽን ኑን አ፥ ‘ኑን አማነትያ አሳ፤ ቢታ ጌድያዋንታ ግዶኮ። 32 ኑን ታማነ ላኡ እሻቱ እት አዉዋ ናና፤ እቱ ꬋዬዳ፤ ዉርሰꬃ ቴፋይ ካናነ ቢታን ሀእ ኑ አቡና ደኤ’ ያጌዶ። 33 ሄ ቢታዉ ጎዳ ግዴዳ ብታኒ ኑና፥ ‘ህንተ አማነትያ አሳ ግድያዋ ታን ሀዋን ኤራና፤ ህንተንቱ እሻቱዋፐ እቱዋ ሀዋን ታ ማታን የጊደ፥ ኮሻትያ ህንተንቱ ሶ አሳዉ ካꬃ አኪደ ቢተ። 34 ህንተንቱ ቢታ ጌድያዋንታ ግደናን፥ አማነትያ አሳ ግድያዋ ታን ኤራና ማላ፥ ህንተንቱ ዉርሰꬃ ቴፋ እሻ ታኮ አክ ዪተ። ያቶፐ ታን ሃን አቴዳ ህንተንቱ እሻ ህንተንቶ ዛራደ እማና፤ ህንተነ ሀ ቢታን ዛልኢታ’ ጌዳ” ያጌድኖ።

35 ኡንቱንቱ ባረንቱ ኦጎሩዋፐ ካꬃ ቆሊደ፥ ባረንቱ ኦጎሩዋን ኦጎሩዋን ባረንቱ ብራ ቃሹዋና ኡቴዳዋ ደሜድኖ። ኡንቱንቱነ ኡንቱንቱ አዉ ሄ ቃሹዋና ደእያ ብራ በኢደ ያዬድኖ። 36 ኡንቱንቱ አዉዋ ያቆብ ኡንቱንታ፥ “ህንተንቱ ታና ታ ናናቱዋፐ መላ ከሴድታ፤ ዮሴፎ ባዋ፥ ስሞን ባዋ፤ ቃይ ህንተንቱ ቢንያማ አፋና ኮዪታ። ኡባባይ ታዉ ትራን ስት ጌዳ” ያጌዳ።

37 ሄዋፐ ጉየ ሮቤል ባረ አዉዋ፥ “ታን ቢንያማ ነዉ ዛራደ አሀና ꬋዮፐ፥ ታ አቱማ ናና ላኡዋካ ዎꬋ፤ ታና አማነታደ አ ታ ኩሽያን ዎꬃ፤ ቃይ ታን አ ዛራደ አሀና” ያጌዳ።

38 ሽን ያቆብ ኡንቱንታ፥ “ታ ናአይ ህንተናና ያ ዱገ ቤና፤ አ እሻይ ሀይቂና፥ አቴዳዌ አ ጻላላ፤ ህንተንቱ አፍሽን፥ ኦግያን ኢታባይ አ ጋክያዋ ግዶፐ፥ ህንተንቱ ታ ፑሉንꬃ ሁጲያ ካዩዋን ዱፉዋን የጊታ” ያጌዳ።