1 ሀእነ ኮሻይ ካናነ ቢታን ዎልቃሜዳ። 2 ያትና ኡንቱንቱ ግብጼፐ አሄዳ ካꬃ ኡባ ም ዉርስ ድግና፥ ኡንቱንቱ አዉ፥ “ቃይካ ጉየ ቢደ ኑዉ አማሬዳ ካꬃ ዎምተ” ያጌዳ።

3 ሽን ይሁዳይ አ፥ “ሄ ብታኒ ኑና፥ ‘ህንተ እሻይ ህንተናና ያና ꬋዮፐ፥ ታ ዴሙዋ ዛር በእክታ’ ያጊደ ሎይꬅ ኦዴዳ። 4 ኔን ኑ እሻ ኑናና የዶፐ፥ ኑን ዱገ ቢደ ነዉ ካꬃ ሻማና። 5 ሽን ኔን አ የደናዋ ግዶፐ፥ ኑን ዱገ ቦኮ፤ አያዉ ጎፐ፥ ሄ ብታኒ ኑና፥ ‘ህንተ እሻይ ህንተናና ያና ꬋዮፐ፥ ህንተንቱ ታ ዴሙዋ ዛር በእክታ’ ጌዳ” ያጌዳ።

6 እስራኤሊ፥ “ህንተንቱ፥ ‘ኑዉ ሀራ እሻይ ደኤ’ ጊደ ኦዲደ ሀ መቱዋ ታ ቦላ አያዉ አሄድቴ?” ያጌዳ።

7 ኡንቱንቱ አ፥ “ሄ ብታኒ ኑባነ ኑ ሶ አሳባ ሎይꬅ ኦቼዳ። እ ኑና፥ ‘ህንተ አዉ ሀእካ ፓጻ ደኢ? ህንተንቶ ሀራ እሻይ ደኢ?’ ያጊደ ኦቼዳ። ኑን እ ኦቼዳዋ አዉ ዛሬዶ። እ ኑና፥ ‘ህንተ እሻ ዱገ ሃ አህተ’ ጋናዋ ኑን አያን ኤራኔ?” ያጌድኖ።

8 ይሁዳይ ባረ አዉዋ እስራኤልያ፥ “ኑንካ ኔንካ ኑ ናናይካ ፓጻ ደአና ማላነ ሀይቀናን አታና ማላ፥ ናኣ ታናና የዳ፤ ኑን ኤለካ ባና። 9 ናኣ ታ ዋሰተꬃን እማ፤ አባን ታና ኦቻ፤ ታን አ ነዉ ሳሮ ዛራደ አሀና ꬋዮፐ፥ ታ ደኡዋ ኡባን ነ ሸቃይ ታና ጋኮ! 10 ኑን ጋምእቤናዋ ግድንቶ፥ ሀኖደ ላኤንꬁዋ ያ ጋኪደ ስማና ሽን” ያጌዳ።

11 ሄዋፐ ጉየ ኡንቱንቱ አዉ እስራኤለ ኡንቱንታ፥ “ሄዋ ግዶፐ፥ ያትተ፤ ሄ ብታንያዉ ኩሽያ ገንꬅያዋ ሀ ቢታን ዶሌዳዋ ኡባፐ ሎእያዋ ዶርተ፤ ሄዌነ ባላሳነ ግያ ꬋልያ፥ ኤሳ፥ ሳዉዋ፥ ካርቢያነ ታምረ ላዉዝያ ግያ ምꬃቱዋ ቴራ ህንተንቱ ኦጎሩዋን የጊደ አክ ቢተ። 12 ህንተንቱ ኦጎሩዋ ዶናን ስሜዳ ብራይ ባለꬄዳዋ ግዳናዉ ዳንዳይያ ድራዉ፥ ብራካ ላኡ ኩሸ ኦꬂደ አክ ቢተ። 13 ቃይ ህንተንቱ እሻነ አኪደ፥ ሄ ብታንያኮ ኤለካ ጉየ ቢተ። 14 እ ህንኮ ህንተንቱ እሻ የዳና ማላ፥ ቢንያመነ ህንተናና ያና ማላ፥ ኡባ ዳንዳይያ ጾሳይ ሄ ብታኒ ህንተንቶ ቃረታናዳን ኦꬆ። ታና ግዶፐ፥ ታ ናናቱዋፐ መላ አቶፐነ አታድ” ያጌዳ።

15 ሄዋ ድራዉ ሄ አሳቱ እሞታነ ላኡ ኩሸ ብራነ ቃይ ቢንያማነ አኬድኖ። ኡንቱንቱ ዱገ ግብጼ ቢደ፥ ዮሴፎ ስንꬃ ሺቄድኖ። 16 ዮሴፎ ቢንያማ ኡንቱንቱና በኤዳ ዎደ፥ ባረ ጎለ ካፑዋ፥ “ሄ አሳ ታ ሶ አካደ ባ፤ እት መህያ ሹካደ ጊግሳ፤ ኡንቱንቱ ሴታ ጋላሳን ላጻ ታናና ሚኖ” ያጊደ አዛዜዳ።

17 ያትና እ ዮሴፎ አዉ ኦዴዳዋዳን ሄ አሳ ዮሴፎ ሶ አፌዳ። 18 አሳቱ ዮሴፎ ሶ ቤዳ ድራዉ፥ ያዬድኖ፤ ኡንቱንቱ፥ “ኑን ሀዋ ዬዳዌ ኮይሮ ኦጎሩዋና ስሚደ ቤዳ ብራ ድራሳ፤ እ ኑና ዋꬋናዉ፥ አይለተꬃን ሞዳናዉነ ኑ ሀረቱዋ አካናዉ ሀኔዳ” ያጊደ ቆፔድኖ።

19 ሄዋ ድራዉ ኡንቱንቱ ዮሴፎ ጎለ ፐንግያ ጋኪደ፥ ጎልያ ካፑዋ ሃሳይሴድኖ፤ 20 “ታ ጎዳዉ፥ ኑን ኮይሮ ካꬃ ዎማናዉ ሀዋ ዬዶ፤ 21 ስሚደ ኑን ቃማ አቅያ ሳኣን ኦጎሩዋ ብሊደ፥ ሁጲያን ሁጲያን ኑ ብራይ ፓጨናን ኑ ኦጎሩዋ ዶናን ደእያዋ ደሜዶ፤ ሄዋ ድራዉ ሀእ ኑን አ ጉየ አኪደ ዬዶ። 22 ቃይ ኑን ካꬃ ዎማናዉ ሀራ ብራካ አሄዶ። ኑ ብራ ኑ ኦጎሩዋ ኦጎሩዋ ዶናን ኦን ዎꬄደንቶነ ኤሮኮ” ያጌድኖ።

23 እ ኡንቱንታ፥ “ሄዌ አይነ ባዋ፤ ያዮፕተ! ህንተንቱ ጾሳይ፥ ህንተንቱ አዉዋ ጾሳይ፥ ህንተንቱ ኦጎሩዋ ግዶን ህንተንቶ ብራ እሜዳ፤ ታን ህንተንቱ ብራ አካድ” ያጌዳ። ሄዋፐ ጉየ፥ እ ስሞና ኡንቱንቱኮ ከሴዳ።

24 ሄ ብታኒ ሄ አሳ ዮሴፎ ሶ አፊደ፥ ኡንቱንቱ ገድያዉ ሃꬃ አይና፥ ባረንቱ ገድያ ሜጨቴድኖ። ኡንቱንቱ ሀረቶ ሀርቁዋ የጌዳ። 25 ዮሴፎ ሴታ ጋላስ ዪና እማናዉ፥ ኡንቱንቱ ባረንቱ እሞታ አዉ ጊግሴድኖ፤ አያዉ ጎፐ፥ ኡንቱንቱ ያን ማናዋ ስስ ኡቴድኖ።

26 ዮሴፎ ባረ ሶ ገሌዳ ዎደ፥ ኡንቱንቱ ሶ አሄዳ ባረንቱ እምያዋ ሶን አዉ እሜድኖ፤ ኡንቱንቱ አ ስንꬃን ሳኣ ጋኪደ ጎይኔድኖ። 27 እ ኡንቱንቱ ሳሮተꬃ ኦች ስሚደ፥ “ህንተንቱ ታዉ ኦዴዳ ህንተንቱ አዉ ጭማይ ሎኤ? ሀእካ እ ፓጻ ደኢ?” ያጌዳ።

28 ኡንቱንቱ፥ “ኤ፥ ነ ቆማይ፥ ኑ አዉ ሀእካ ፓጻ ደኤ፤ እ ሎአ” ያጊደ ሆኪደ አዉ ጎይኔድኖ።

29 እ ባረ አት ናኣ ቢንያማ በኤዳ ዎደ ኡንቱንታ፥ “ህንተንቱ ኦዴዳ ዉርሰꬃ ቴፋ ህንተንቱ እሻይ ሀዌ?” ያጌዳ። ቃይ እ ቢንያማ፥ “ታ ናአዉ፥ ኔና ጾሳይ አንጆ” ያጌዳ። 30 ዮሴፎ አ እሻይ አዉ ጎምፓይ ምሸቴዳ ድራዉ፥ ዬካናዉ እት ሳኣ ላዉሁ ጌዳ። እ ባረ ዱማ ቆልኡዋ ገሊደ ያን ዬኬዳ።

31 እ ባረ ዴሙዋ ሜጨቶዋፐ ጉየ ከሲደ፥ ባረና ምንꬂደ፥ “ቁማ አꬅተ” ያጌዳ።

32 ኡንቱንቱ አዉ ዱማ፥ ሄ እሻቶ ዱማ፥ ሄዋን አናና ምያ ግብጼ አሳቶ ዱማ አꬄድኖ፤ አያዉ ጎፐ፥ ግብጼ አሳቱ እብራዌ አሳቱዋና እትፐ ሚክኖ። ሄዌ ግብጼ ቢታ አሳ ሸነይያዋ። 33 ኡንቱንቱ ዮሴፎ ስንꬃን ባይራይ ባረ ባይራተꬃዳን፥ ቴፋይ ባረ ቴፋተꬃዳን ማራን ኡቴድኖ። ኡንቱንቱ እቱ እቱዋ ጼሊደ፥ ኡንቱንታ ዎት ኡትሴድኖንቶ በኢደ ማላለቴድኖ። 34 ዮሴፎ ማዳፐ ኡንቱንቶ ቁማ ግሽያ ዎደ፥ ቢንያመዉ ጋኬዳዌ ሀራቱዋፐ እቼሹ ኩሽያ ዳሬ፤ ያትና ኡንቱንቱ ናሸቲደ አናና ሜድኖነ ኡሼድኖ።