1 ዮሴፎ ባረ ጎለ ካፑዋ፥ “ኔን ሀ አሳቱዋ ኦጎሩ አክያዋ ኬሻ ካꬃ ኡንቱንቶ ኩንꬃ፤ ኡንቱንቱ ኡባ ብራካ ኡንቱንቱ ኦጎሩዋ ኦጎሩዋ ዶናን ዎꬃ፤ 2 ያታደ ዉርሰꬃ ቴፋ ኦጎሩዋ ዶናን ታ ብራ ዋንጫነ አ ካꬃ ብራ ዎꬃ” ያጊደ አዛዜዳ፤ እ ዮሴፎ ጌዳዋዳን ኦꬄዳ።

3 ሳአይ ዎንትና ሄ አሳቱ ባረንቱ ሀረቱዋ አኪደ ባናዉ ሞይዘቴድኖ። 4 ኡንቱንቱ ሄ ካታማፐ ከሲደ ሃክ ቤናን ደእሽን፥ ዮሴፎ ባረ ጎለ ካፑዋ፥ “ደንዳ! ሀ አሳቱዋ ጌዱዋ ካላ፤ ኔን ኡንቱንታ ጋኬዳ ዎደ ኡንቱንቱ፥ ‘ህንተ አያዉ ኬካ ኢታን ዛሬድቴ? 5 ሀዌ ታ ጎዳይ ኡሽያነ ቃይ ጹራባ ደምያ ዋንጫ ግደኔ? ሀዌ ህንተንቱ ኦꬄዳባይ ባላባ’ ያጋ” ያጌዳ።

6 እ ኡንቱንቱ ጌዱዋ ጋኪደ፥ ሀ ጌዳዋዳንካ ኡንቱንቶ ኦዴዳ። 7 ሽን ኡንቱንቱ፥ “ታ ጎዳይ ሀዋ ማላ ቃላ አያዉ ሃሳዪ? ሄዋ ማላ ኦꬅያዌ ኑፐ ነ ቆማቱዋፐ ሃኮ! 8 ኑን ሀራይ አቶ ኑ ኦጎሩዋ ዶናፐ ደሜዳ ብራ ካናነ ቢታፐ ጉየ ነዉ ዛር አሄዶ። 9 ነ ጎዳ ጎልያፐ ኑን ዎርቃ ዎይ ብራ ዎት ዉኤቶ? ነ ቆማቱዋ ግዶን ሄ ዋንጫይ ቤቴዳ ኡራይ ሀይቆ፤ ቃይ አቴዳ ኑን ኑ ጎዳዉ አይለ ግዳና” ያጌድኖ።

10 እ ኡንቱንታ፥ “ሄዋ ግዶፐ ሎአ፤ ህንተንቱ ጌዳዋዳን ዋንጫ አኬዳ ኦንነ ታ አይለ ግዳና፤ ህንኮ አቴዳ ህንተንቱ ቦርያፐ ሳሮ አታና” ያጌዳ።

11 ሄዋፐ ጉየ፥ ኡንቱንቱ ኤለካ ባረንቱ ኦጎሩዋ ኦጎሩዋ ሳኣን ዎꬂደ ብሌድኖ። 12 ሄ ካፑ ኡባፐ ባይራትያዋ ኦጎሩዋፐ ዶሚደ ዉርሰꬃ ቴፋ ጋካናዉ ኮዬዳ፤ ሄ ዋንጫ ቢንያማ ኦጎሩዋ ግዶፐ ደሜዳ። 13 ሄዋን ኡንቱንቱ ካዮቲደ፥ ባረንቱ ማዩዋ ፔꬌድኖ፤ ባረንቱ ኦጎሩዋ ባረንቱ ሀረቱዋን ጫኒደ፥ ጉየ ካታማ ስሜድኖ።

14 ይሁዳይ ባረ እሻቱዋና ዮሴፎኮ ገልያ ዎደ፥ ዮሴፎ ሶን ደኤ፤ ኡንቱንቱ አ ስንꬃን ሳኣን ጉፋኔድኖ። 15 ዮሴፎ ኡንቱንታ፥ “ህንተንቱ አያ ኢታባ ኦꬄድተ? ታ ማላ አሳይ ጹራባ ደምያዋ ኤርክቴየ?” ያጌዳ።

16 ይሁዳይ፥ “ታ ጎዳዉ ኑን አያ ጋኔ? ኑን አያ ሃሳያኔ? ዎይ ኑን ጽሉዋ ግድያዋ ዎት በሳኔ? ጾሳይ ነ አይለቱዋ ባይዙዋ ቆንጭስ ድጌዳ። ስም ኑንካ ሄ ዋንጫይ አፐ ቤቴዳዌካ ታ ጎዳዉ አይለ ግዴዳ” ያጌዳ።

17 ሽን ዮሴፎ፥ “ሀዋ ማላ ኦꬅያዌ ታፐ ሃኮ፤ ታ ዋንጫይ አፐ ቤቴዳ ብታንያ ጻላላይ ታ አይለ ግዳና። ህንኮ ህንተንቱ ህንተንቱ አዉዋኮ ጉየ ሳሮ ስምተ” ያጌዳ።

18 ይሁዳይ አኮ ሺቂደ አ፥ “ታ ጎዳዉ፥ ታን እት ቃላ ሃሳያና ማላ ኔና ዎሳይ፤ ታና ነ አይልያ ሀንቀቶፓ፤ አያዉ ጎፐ፥ ኔን ካትያ ማላ። 19 ኔን ታ ጎዳይ ኑና ነ አይለቱዋ፥ ‘ህንተንቶ አዉ ደኢየ ዎይ እሻይ ደኢ?’ ያጋደ ኦቻዳ። 20 ኑንካ፥ ‘ኑዉ ጭሜዳ አዉ ደኤ፤ እ ጭም ክቺደ የሌዳ ቴፋ ናአይካ ደኤ፤ ሄ ናኣ እሻይ ሀይቄዳ፤ ባረ አትዉ እት አ ጻላላይ አቴዳ፤ አ አዉ አ ሲቄ’ ያጌዳ።

21 “ኔን ነ አይለቱዋ፥ ‘ታን አ በአና ማላ ታዉ አህተ’ ያጋዳ። 22 ኑን ታ ጎዳ፥ ‘ሄ ናአይ ባረ አዉዋፐ ሻከታናዉ ዳንዳየና፤ ሻከቶፐ አ አዉ ሀይቃንታ’ ያጌዳ። 23 ሽን ኔን ነ አይለቱዋ፥ ‘ህንተ ቴፋ እሻይ ህንተናና ዱገ ያና ꬋዮፐ፥ ላኤንꬁዋ ታ ዴሙዋ በእክታ’ ያጋዳ። 24 ኑን ነ አይላቱ ኑ አዉዋኮ ስሚደ ቤዳ ዎደ፥ ታ ጎዳይ ጌዳዋ አዉ ኦዴዶ።

25 “ኑ አዉ፥ ‘ጉየ ቢደ አማሬዳ ካꬃ ዎምተ’ ያግና፥ 26 ኑን አ፥ ‘ኑ ቴፋ እሻይ ኑናና ቦፐ አትን፥ ዱገ ባናዉ ዳንዳዮኮ፤ አያዉ ጎፐ፥ ኑ እሻይ ቴፋይ ኑናና ቤናዋ ግዶፐ፥ ኑን ሄ ብታንያ ዴሙዋ በአናዉ ዳንዳዮኮ’ ያጌዶ።

27 “ኑ አዉ ነ አይል ኑና፥ ‘ታ ማቻታ ራሄላ ታዉ ላኡ አቱማ ናና የሌዳዋ ህንተንቱ ኤሪታ፤ 28 ኡንቱንቱፐ እቱ ታፐ ሻከቲደ ቢና፥ “ቱሙ አ ዶአይ ፑዘሬꬅ ሜዳ” ያጋድ፤ ሀቼ ጋካናዉ ታን አ በአበይከ። 29 ሀዋ ቃይ ህንተንቱ ታፐ ሻክ አፍና፥ ኢታባይ አ ጋኮፐ፥ ህንተንቱ ታ ፑሉንꬃ ሁጲያ ካዩዋን ዱፉዋን የጋና’ ያጌዳ።

30-31 “ሄዋ ድራዉ፥ ሀእ ታን ጉየ ነ አይልያ ታ አዉዋኮ ብያ ዎደ፥ ታ አዉ፥ ናኣ ባረ ሸምፑዋዳን ሲቅያዌ፥ ናአይ ኑናና ባይናዋ በኦፐ ሀይቂ አጋና። ኑን ነ አይለቱ ኑ አዉዋ ፑሉንꬃ ሁጲያ ካዩዋን ዱፉዋን የጌቶ። 32 ታን ነ አይል ናኣ ታ ዋሰተꬃን አካድ፤ ታን አ፥ ‘ታ አዎ፥ ታን አ ነዉ ሳሮ ዛራደ አሀና ꬋዮፐ፥ ታ ደኡዋ ኡባን ነ ሸቃይ ታና ጋኮ!’ ያጋ ዎꬃድ።

33 “ያቴዳ ድራዉ፥ ታን ነ አይል ታ ጎዳዉ ናኣ ድራዉ አይለታደ፥ ሀዋን አትና፥ ናአይ ባረ እሻቱዋና ጉየ ስሞ። 34 ናአይ ባይናን ታን ዋናደ ጉየ ታ አዉዋኮ ስማኔ? ቱይት፥ ታና ታ አዉ ሴለታና ሴላ በሶፓ” ያጌዳ።