1 ሄ ዎደ ዮሴፎ ሄ አሳ ኡባ ስንꬃን ገንጫና ዳንዳይቤና፤ “አሳ ኡባ ታ ስንꬃፐ ከስተ” ያጊደ ዋሴዳ። ሄዋ ድራዉ ዮሴፎ ባረና ባረ እሻቶ ኤርሴዳ ዎደ፥ አናና ኦንነ ባዋ። ኪታ 7:13 2 እ ባረ ቃላ ꬎቂሲደ፥ ግብጼቱ አ ስሳና ጋካናዉ ሎይꬅ ዬኬዳ። ካትያ ሶ አሳይ ሄ ዎርያ ስሴዳ።

3 ዮሴፎ ባረ እሻቶ፥ “ታን ዮሴፋቴ! ታ አዉ ሀኖ ጋካናዉ ፓጻ ደኢየ?” ያጊደ ኦቼዳ። ሽን አ እሻቱ ሎይꬅ ዳጋሜዳ ድራዉ፥ አዉ ዛራና ዳንዳይበይክኖ።

4 ያትና ዮሴፎ ባረ እሻቱዋ፥ “ታኮ ሃ ሺቅተ” ያጌዳ። ኡንቱንቱ አኮ ሺቄድኖ፤ እ ኡንቱንታ፥ “ታን ህንተንቱ እሻ ዮሴፋ፤ ህንተንቱ ግብጼ ቢታዉ ዛልኤዳዋ። 5 ቃይ ህንተንቱ ታና ሀዎ ዛልኤዳ ድራዉ፥ ቁምኤቶፕተነ ካዮቶፕተ፤ አያዉ ጎፐ፥ ጾሳይ ታና ህንተፐ ስንꬃዉ ኪቴዳዌ አሳ ሸምፑዋ አሻናሳ። 6 ሀ ቢታ ኮሻይ ገሎደፐ ላኤንꬆ ላይꬃ፤ ቃይ ይያ እቼሹ ላይꬃቱዋን አሳይ ጎሸና ዎይ ጫከና። 7 ሽን ታን ሳኣን ህንተንቶ ዘረꬃ አሻና ማላነ ህንተንቱ ደኡዋ ዳርሳ አሻና ማላ፥ ጾሳይ ታና ህንተፐ ስንꬃዉ ኪቴዳ። 8 ስም ታና ሀ ሳኣ ኪቴዳዌ ጾሳ ግድያዋፐ አትና፥ ህንተንታ ግድክታ። እ ታና ግብጼ ካትያዉ አዉዋ፥ አዉ ደእያዋ ኡባዉ ጎዳነ ግብጼ ቢታ ሞድያዋ ኦꬄዳ።

9 “ሀእ ኤሌል ጉየ ታ አዉዋኮ ቢደ አ፥ ‘ነ ናአይ ዮሴፎ ሀዋዳን ያጌ፤ “ጾሳይ ታና ግብጼ ቢታ ኡባ ቦላን ጎዳ ከሴዳ፤ ኔን ታኮ ዱገ ሃያ፤ ጋምኦፓ። ኪታ 7:14 10 ኔን ገሴመ ቢታን ኡታሳ፤ ቃይ ኔን፥ ነ ናናይ፥ ነ ናና ናናይ፥ ነ ዶርሳ ዉዲ፥ ነ ሚዛ ዉዲነ ነዉ ደእያባይ ኡባይ ታ ማታን ደኢታ። 11 ብሮ እቼሹ ኮሻ ላይꬃቱ አቴድኖ፤ ኔና፥ ነ ሶ አሳነ ነ መህያ ኮሻይ ኦይቀና ማላ፥ ታን ኔና ምዛና” ያጌዳ’ ያግተ” ያጌዳ።

12 ቃይካ ዮሴፎ ኡንቱንታ፥ “ህንተካ ታ እሻ ቢንያመካ፥ ሀ ህንተናና ሃሳይያዌ ቱሙ ታና ዮሴፋ ግድያዋ ህንተንቱ አይፍያን በኢታ። 13 ታዉ ግብጼ ቢታን ደእያ ቦንቹዋ ኡባነ ህንተንቱ በኤዳዋ ኡባ ታ አዎ ኦድተ፤ ታ አዉዋነ ኤለካ ሃ ዱገ አክ ዪተ” ያጌዳ።

14 ባረ እሻ ቢንያማ ቆꬍያ ቆም ዬኬዳ፤ ቢንያመካ ባረ እሻ ቆም ዬኬዳ። 15 ዮሴፎ ባረ እሻቱዋ ኡባ የሪደ፥ ኡንቱንቱ ቦላንካ ዬኬዳ። ሄዋፐ ጉየ፥ አ እሻቱ አናና ሃሳዬድኖ።

16 ዮሴፎ እሻቱ ዬዳ ዎሪ ካትያ ጎለ ጋኬዳ ዎደ፥ ካቲነ አ ኦሳንቻቱ ናሸቴድኖ። 17 ካቲ ዮሴፎ፥ “ኔን ነ እሻቱዋ ያትተ ጋ፤ ‘ህንተ መህያ ጫኒደ፥ ካናነ ጋድያ ስምተ፤ 18 ህንተንቱ አዉዋነ ህንተንቱ ሶ አሳ አኪደ፥ ጉየ ታኮ ሃ አህተ። ታን ህንተንቶ ግብጼ ቢታን ኡባ ሳኣፐ ሎእያ ሳኣ እምና፥ ህንተንቱ ሀ ቢታ ሞꬉዋ ካሻና’ ያጋ። 19 ቃይካ ኔን ነ እሻቱዋ፥ ‘ፓራ ጋርያ ህንተንቱ ናናቱዋነ ህንተንቱ ማጫ አሳቱዋ አህያዋንታ ግብጼፐ አኪደ ቢተ፤ ህንተንቱ አዉዋነ አኪደ ዪተ። 20 ግብጼ ቢታን ደእያ ኡባፐ አꬍ ሎእያዌ ህንተሳ ግድያ ድራዉ፥ ህንተንቱ ማጹዋ ቆፖፕተ’ ያጋደ ኦዳ” ያጌዳ።

21 እስራኤልያ አቱማ ናናይ ጌዳዋዳን ኦꬄድኖ። ዮሴፎ ካቲ አዛዜዳዋዳን ፓራ ጋረቱዋነ ኦግያዉ ሽንቃ ኡንቱንቶ እሜዳ። 22 ኡንቱንቶ ኡባዉካ ሁጲያን ሁጲያን ኦራꬃ ማዩዋ እሜዳ፤ ሽን ቢንያመዉ ሄዙ ጼቱ ጻጋራ ብራነ እቼሹ ኩመንꬃ ማዩዋ እሜዳ። 23 እ ባረ አዎ የዴዳዌ ሀዋ፤ ግብጼን ደእያ ኡባባፐ ሎእያዋ ታሙ ሀርያን ጫኒደ፥ ቃይ ኦግያዉ ካꬃ፥ ኡክꬃነ ሀራ ሽንቃ ታሙ ማጫ ሀረቱዋን ጫኒደ የዴዳ። 24 ዮሴፎ ባረ እሻቱዋ ሞይዜዳ። ኡንቱንቱ ቢሽን እ ኡንቱንታ፥ “ኦግያን ቢደ ዋላቀቶፕተ” ያጌዳ።

25 ኡንቱንቱ ግብጼፐ ከሲደ ቤድኖ፤ ካናነ ቢታ ቢደ፥ ባረንቱ አዉዋ ያቆባኮ ጋኬድኖ። 26 ኡንቱንቱ አዉ ሀዋዳን ያጊደ ኦዴድኖ፤ “ዮሴፎ ፓጻ ደኤ! እ ሄዋፐነ ግብጼ ቢታ ኡባ ሞድያዋ” ያጌድኖ፤ ያቆባ ዳጋማይ ዎዛና ባይዜዳ ድራዉ፥ ኡንቱንታ አማንቤና። 27 ሽን ኡንቱንቱ ዮሴፎ ባረንቶ ኦዴዳዋ ኡባ አዉ ኦድናነ አ አክ አሀና ማላ ዮሴፎ ኪቴዳ ፓራ ጋረቱዋ እ በእና፥ ኡንቱንቱ አዉዋ ያቆባ ሸምፑ ስሜዳ። 28 እስራኤሊ፥ “ሄዌ ታዉ ግዴ፤ ታ ናኣ ዮሴፎ ሀኖ ጋካናዉ ፓጻ ደኤ! ታን ሀይቃናፐ ካሰ ባደ፥ አ በአና” ያጌዳ።